ਨਿੱਝਰ ਨੂੰ ਅਸੀਂ ਟਾਰਗੇਟ ਕੀਤਾ… ਗੋਲਡੀ ਬਰਾੜ ਦੀ ਕਥਿਤ ਆਡੀਓ ਵਾਇਰਲ

ਨਿੱਝਰ ਨੂੰ ਅਸੀਂ ਟਾਰਗੇਟ ਕੀਤਾ... ਗੋਲਡੀ ਬਰਾੜ ਦੀ ਕਥਿਤ ਆਡੀਓ ਵਾਇਰਲ

ਗੈਂਗਸਟਰ ਗੋਲਡੀ ਬਰਾੜ ਦੀ ਇੱਕ ਕਥਿਤ ਆਡੀਓ ਕਾਲ ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੋ ਰਹੀ ਹੈ। ਇਸ ‘ਚ ਗੋਲਡੀ ਬਰਾੜ ਕਹਿ ਰਿਹਾ ਹੈ ਕਿ ਹਰਦੀਪ ਸਿੰਘ ਨਿੱਝਰ ਦਾ ਕਤਲ ਉਸ ਨੇ ਕਰਵਾਇਆ ਸੀ। ਕਥਿਤ ਆਡੀਓ ‘ਚ ਅੱਤਵਾਦੀ ਪਰਮਜੀਤ ਸਿੰਘ ਪੰਮਾ ਤੇ ਗੋਲਡੀ ਬਰਾੜ ਵਿਚਕਾਰ ਫ਼ੋਨ ਕਾਲ ਹੋਣ ਦਾ ਦਾਅਵਾ ਕੀਤਾ ਜਾ ਰਿਹਾ। ਹਾਲਾਂਕਿ, ਇਸ ਆਡੀਓ ਦੀ ਅਜੇ ਤੱਕ ਪੁਸ਼ਟੀ ਨਹੀਂ ਹੋਈ ਹੈ।

ਗੋਲਡੀ ਬਰਾੜ ਕਥਿਤ ਆਡੀਓ ‘ਚ ਕਹਿ ਰਿਹਾ ਹੈ ਕਿ ਨਿੱਝਰ ਇਸ ਲਈ ਟਾਰਗੇਟ ਹੋਇਆ ਸੀ ਕਿਉਂਕਿ ਜਦੋਂ ਸਾਡਾ ਭਰਾ ਮਰਿਆ ਤਾਂ ਸੁੱਖਾ ਦੁਨੇਕੇ ਤੇ ਅਰਸ਼ ਡਾਲਾ ਇਸ ਨਿੱਝਰ ਦੀ ਕੋਠੀ ‘ਚ ਰਹਿੰਦੇ ਸਨ। ਇਸ ਲਈ ਸਾਡਾ ਖ਼ੂਨ ਮਚਦਾ ਸੀ ਕਿ ਜਿਸ ਕੋਠੀਆਂ ‘ਚ ਬੈਠ ਕੇ ਫ਼ੋਨ ਕਰਕੇ ਸਾਡੇ ਭਰਾ ਮਰਵਾਏ ਸਨ, ਉਹ ਕੋਠੀਆਂ ਇਨ੍ਹਾਂ ਦੀਆਂ ਸਨ ਤੇ ਇਸ ਲਈ ਅਸੀਂ ਛੱਡ ਨਹੀਂ ਸਕਦੇ।

ਗੋਲਡੀ ਬਰਾੜ ਅੱਗੇ ਕਹਿ ਰਿਹਾ ਹੈ ਕਿ ਅਸੀਂ ਗੁਰੂ ਘਰ ਦੀ ਇੱਜ਼ਤ ਇੰਨੀ ਰੱਖੀ ਹੈ ਕਿ ਗੁਰੂ ਘਰ ਦੇ ਗੇਟ ਅੰਦਰ ਗੋਲੀ ਨਹੀਂ ਚੱਲੀ। ਜੇਕਰ ਅਸੀਂ ਅੰਦਰ ਗੋਲੀ ਚਲਾਉਣ ਦੀ ਬਦਤਮੀਜ਼ੀ ਕਰਨੀ ਹੁੰਦੀ ਤਾਂ ਅਰਸ਼ ਡਾਲਾ ਵੀ ਨਾਲ ਹੀ ਲੱਦੇ ਕੇ ਸੁੱਟਦੇ। ਗੁਰੂ ਘਰ ਦੀ ਹੀ ਇੱਜ਼ਤ ਰੱਖਣ ਲਈ ਹੀ ਅਸੀਂ ਇੰਨਾ ਸਬਰ ਰੱਖਿਆ ਕਿ ਅਸੀਂ ਗੁਰੂ ਘਰ ਬਾਹਰ ਉਡੀਕਿਆ।

ਇਸ ਤਰ੍ਹਾਂ ਹੋਇਆ ਸੀ ਹਰਦੀਪ ਸਿੰਘ ਦਾ ਕਤਲ

ਜੂਨ, 2023 ਨੂੰ ਨਿੱਝਰ ਨੂੰ ਕੈਨੇਡਾ ਦੇ ਬ੍ਰਿਟਿਸ਼ ਕੋਲੰਬੀਆ ਦੇ ਸਰੀ ‘ਚ ਗੁਰੂ ਨਾਨਕ ਸਿੱਖ ਗੁਰਦੁਆਰੇ ਨੇੜੇ ਦੋ ਅਣਪਛਾਤੇ ਬੰਦੂਕਧਾਰੀਆਂ ਨੇ ਗੋਲੀ ਮਾਰ ਦਿੱਤੀ ਸੀ। ਉਹ ਗੁਰਦੁਆਰੇ ਦੇ ਬਾਹਰ ਪਾਰਕਿੰਗ ‘ਚ ਆਪਣੀ ਕਾਰ ‘ਚ ਸੀ। ਇਸ ਦੌਰਾਨ ਦੋ ਹਮਲਾਵਰਾਂ ਨੇ ਨਿੱਝਰ ‘ਤੇ ਗੋਲੀਆਂ ਚਲਾਉਣੀਆਂ ਸ਼ੁਰੂ ਕਰ ਦਿੱਤੀਆਂ ਸਨ। ਨਿੱਝਰ ਨੂੰ ਕਾਰ ਤੋਂ ਬਾਹਰ ਨਿਕਲਣ ਦਾ ਸਮਾਂ ਨਹੀਂ ਮਿਲਿਆ ਤੇ ਉਸ ਦੀ ਮੌਕੇ ‘ਤੇ ਹੀ ਮੌਤ ਹੋ ਗਈ ਸੀ।

ਨਿੱਝਰ ਕਤਲ ਮਾਮਲੇ ‘ਚ ਵਿਵਾਦ

ਨਿੱਝਰ ਦੇ ਕਤਲ ਦੇ ਮਾਮਲੇ ਨੂੰ ਲੈ ਕੇ ਭਾਰਤ ਤੇ ਕੈਨੇਡਾ ਵਿਚਾਲੇ ਪਹਿਲਾਂ ਤੋਂ ਹੀ ਵਿਵਾਦ ਰਿਹਾ ਹੈ। ਕੈਨੇਡਾ ਵੱਲੋਂ ਇਸ ਕਤਲ ਨੂੰ ਭਾਰਤੀ ਏਜੰਟਾਂ ਨਾਲ ਜੋੜਦਿਆਂ ਗੰਭੀ ਇਲਜ਼ਾਮ ਲਗਾਏ ਗਏ ਸਨ। ਭਾਰਤ ਇਨ੍ਹਾਂ ਇਲਜ਼ਾਮਾਂ ਨੂੰ ਲਗਾਤਾਰ ਖ਼ਾਰਜ ਕਰਦਾ ਰਿਹਾ ਹੈ ਤੇ ਕਿਹਾ ਹੈ ਕਿ ਇਨ੍ਹਾਂ ਨੂੰ ਸਾਬਤ ਕਰਨ ਲਈ ਲੋੜੀਂਦੇ ਸਬੂਤ ਸਾਹਮਣੇ ਨਹੀਂ ਰੱਖੇ ਗਏ।