ਫਰਾਂਸ ਤੋਂ ਬੈਲਜੀਅਮ ਤੱਕ ਹੈਕਰਾਂ ਨੇ ਯੂਰਪ ਦੇ 4 ਦੇਸ਼ਾਂ ‘ਚ ਸੈਂਕੜੇ ਫਰਿੱਜ ਕੀਤੇ ਹੈਕ, ਪੈਰਿਸ ਵਿੱਚ 150 ਰੈਫ੍ਰਿਜਰੇਟਰਾਂ ਨੂੰ ਲੱਗੀ ਅੱਗ
Fridge Hacking: ਡੈਨਮਾਰਕ ਦੀ ਕੰਪਨੀ ਡੈਨਫੌਸ (Danfoss) ਮੁਤਾਬਕ, ਸਿਰਫ਼ ਉਨ੍ਹਾਂ ਫਰਿੱਜਾਂ ਨੂੰ ਹੈਕ ਕੀਤਾ ਗਿਆ ਹੈ, ਜਿਨ੍ਹਾਂ ਦਾ ਫਰਮਵੇਅਰ ਕਾਫ਼ੀ ਪੁਰਾਣਾ ਸੀ। ਕੰਪਨੀ ਨੇ ਇਸ ਸਬੰਧੀ ਆਪਣੇ ਗਾਹਕਾਂ ਨੂੰ ਅਲਰਟ ਵੀ ਜਾਰੀ ਕੀਤਾ ਹੈ।
ਹੈਕਰਾਂ ਨੇ ਫਰਿੱਜਾਂ ਨੂੰ ਬਣਾਇਆ ਓਵਨ
ਫਰਾਂਸ ਵਿੱਚ ਹੈਕਰਾਂ ਨੇ ਪਹਿਲਾਂ ਇੱਕ ਸੁਪਰਮਾਰਕੀਟ ਦੇ ਸਿਸਟਮ ਨੂੰ ਹੈਕ ਕੀਤਾ ਅਤੇ ਫਿਰ ਰਾਤੋ-ਰਾਤ ਉੱਥੇ ਰੱਖੇ ਕਈ ਫਰਿੱਜਾਂ ਦਾ ਤਾਪਮਾਨ 50 ਡਿਗਰੀ ਸੈਲਸੀਅਸ ਤੋਂ ਵੱਧ ਵਧਾ ਦਿੱਤਾ। ਹੈਕਿੰਗ ਦੀ ਇਸ ਘਟਨਾ ਕਾਰਨ ਵੱਖ-ਵੱਖ ਸੁਪਰਮਾਰਕੀਟਾਂ ਦੇ ਲਗਭਗ 150 ਫਰਿੱਜਾਂ ਵਿੱਚ ਅੱਗ ਲੱਗ ਗਈ। ਪੈਰਿਸ ਦੇ ਸਰਕਾਰੀ ਵਕੀਲ ਦੇ ਦਫ਼ਤਰ ਮੁਤਾਬਕ, ਹੈਕਰਾਂ ਦੀ ਇਸ ਕਾਰਵਾਈ ਕਾਰਨ ਪੂਰੇ ਫਰਾਂਸ ਵਿੱਚ ਕਈ ਪ੍ਰਮੁੱਖ ਫੂਡ ਰਿਟੇਲਰਾਂ ਕੋਲ ਲੱਗੇ ਕਨੈਕਟਿਡ ਰੈਫ੍ਰਿਜਰੇਟਰ ਪ੍ਰਭਾਵਿਤ ਹੋਏ ਹਨ।
ਫਰਾਂਸ ਤੋਂ ਇਲਾਵਾ ਡੈਨਮਾਰਕ, ਨੀਦਰਲੈਂਡ ਅਤੇ ਬੈਲਜੀਅਮ ਨੇ ਵੀ ਆਪਣੇ ਇੱਥੇ ਫਰਿੱਜ ਹੈਕ ਹੋਣ ਦੀਆਂ ਘਟਨਾਵਾਂ ਦੀ ਪੁਸ਼ਟੀ ਕੀਤੀ ਹੈ। ਇਹ ਦੇਸ਼ ਜਾਂਚ ਕਰ ਰਹੇ ਹਨ ਕਿ ਕੀ ਇਨ੍ਹਾਂ ਸਾਈਬਰ ਹਮਲਿਆਂ ਪਿੱਛੇ ਰੂਸ ਦਾ ਹੱਥ ਹੈ।
ਸਥਾਨਕ ਮੀਡੀਆ ਮੁਤਾਬਕ, ਫਰਾਂਸ ਦੇ ਪ੍ਰਧਾਨ ਮੰਤਰੀ ਦਫ਼ਤਰ ਨੇ ਇਸ ਮਾਮਲੇ ਦੀ ਜਾਂਚ ਦੇ ਹੁਕਮ ਦਿੱਤੇ ਹਨ। ਫਰਾਂਸ ਨੇ ਇਸ ਸਬੰਧੀ ਯੂਰਪ ਦੇ ਕਈ ਵੱਡੇ ਦੇਸ਼ਾਂ ਨਾਲ ਵੀ ਸੰਪਰਕ ਕੀਤਾ ਹੈ। ਦਿ ਗਾਰਡੀਅਨ ਨੇ ਇੰਟਰਮਾਰਸ਼ੇ (Intermarché) ਰਿਟੇਲਰ ਦੀ ਮਾਲਕ ਕੰਪਨੀ ਲੇਸ ਮੌਸਕੇਟੀਅਰਜ਼ (Les Mousquetaires) ਦੇ ਹਵਾਲੇ ਨਾਲ ਦੱਸਿਆ ਕਿ ਸਾਰੇ ਫਰਿੱਜਾਂ ਦਾ ਤਾਪਮਾਨ ਲਗਭਗ 6 ਘੰਟਿਆਂ ਤੱਕ 50 ਡਿਗਰੀ ਸੈਲਸੀਅਸ ਤੱਕ ਪਹੁੰਚਿਆ ਰਿਹਾ।
6 ਸੁਪਰਮਾਰਕੀਟਾਂ ਨੂੰ ਬਣਾਇਆ ਗਿਆ ਨਿਸ਼ਾਨਾ
ਰਿਪੋਰਟ ਮੁਤਾਬਕ, ਹੈਕਰਾਂ ਨੇ ਫਰਾਂਸ ਦੀਆਂ 6 ਸੁਪਰਮਾਰਕੀਟਾਂ ਨੂੰ ਨਿਸ਼ਾਨਾ ਬਣਾਇਆ। ਇਨ੍ਹਾਂ ਵਿੱਚ ਕੈਰੇਫੋਰ (Carrefour), ਮੋਨੋਪ੍ਰੀ (Monoprix), ਔਸ਼ਾਂ (Auchan), ਇੰਟਰਮਾਰਸ਼ੇ (Intermarché) ਅਤੇ ਈ-ਲੇਕਲਰਕ (E.Leclerc) ਸ਼ਾਮਲ ਹਨ। ਈ-ਲੇਕਲਰਕ ਫਰਾਂਸ ਦੀ ਸਭ ਤੋਂ ਵੱਡੀ ਸੁਪਰਮਾਰਕੀਟ ਕੰਪਨੀ ਹੈ। ਇੱਥੇ ਵੀ ਇੱਕੋ ਸਮੇਂ ਕਈ ਫਰਿੱਜਾਂ ਨੂੰ ਨਿਸ਼ਾਨਾ ਬਣਾਇਆ ਗਿਆ। ਹਾਲਾਂਕਿ, ਸੁਪਰਮਾਰਕੀਟ ਕੰਪਨੀਆਂ ਨੇ ਅਜੇ ਤੱਕ ਇਸ ਮਾਮਲੇ ‘ਤੇ ਚੁੱਪੀ ਧਾਰੀ ਹੋਈ ਹੈ।
ਕਿਵੇਂ ਹੈਕ ਹੋਏ ਫਰਿੱਜ, ਵੱਡਾ ਸਵਾਲ?
ਹੈਕਰਾਂ ਨੇ ਸੁਪਰਮਾਰਕੀਟਾਂ ਦੇ ਸਿਸਟਮ ਨੂੰ ਹੈਕ ਕਰ ਲਿਆ ਅਤੇ ਫਿਰ ਕਈ ਸਟੋਰਾਂ ਵਿੱਚ ਰੈਫ੍ਰਿਜਰੇਸ਼ਨ ਸਿਸਟਮ ਨੂੰ ਜ਼ਬਰਦਸਤੀ ਡੀਫ੍ਰੌਸਟ ਕਰਨ ਵਿੱਚ ਸਫਲਤਾ ਹਾਸਲ ਕਰ ਲਈ। ਇਸ ਤੋਂ ਬਾਅਦ ਫਰਿੱਜਾਂ ਦਾ ਤਾਪਮਾਨ ਤੇਜ਼ੀ ਨਾਲ ਵਧਣ ਲੱਗਾ। ਦੇਖਦੇ ਹੀ ਦੇਖਦੇ ਸੈਂਕੜੇ ਫਰਿੱਜਾਂ ਦਾ ਤਾਪਮਾਨ 50 ਡਿਗਰੀ ਸੈਲਸੀਅਸ ਤੋਂ ਵੀ ਵੱਧ ਹੋ ਗਿਆ। ਹੈਕਰਾਂ ਦਾ ਮਕਸਦ ਫਰਿੱਜਾਂ ਨੂੰ ਓਵਨ ਵਾਂਗ ਗਰਮ ਕਰਨਾ ਸੀ। ਕੰਪਨੀਆਂ ਦੀਆਂ ਸਾਰੀਆਂ ਕੋਸ਼ਿਸ਼ਾਂ ਦੇ ਬਾਵਜੂਦ, ਰੈਫ੍ਰਿਜਰੇਸ਼ਨ ਸਿਸਟਮ ਲਗਭਗ 6 ਘੰਟਿਆਂ ਤੱਕ ਹੈਕਰਾਂ ਦੇ ਕੰਟਰੋਲ ਵਿੱਚ ਰਿਹਾ। ਜਦੋਂ ਸਥਿਤੀ ਆਮ ਹੋਈ ਤਾਂ ਕੰਪਨੀਆਂ ਨੇ ਫਰਿੱਜਾਂ ਵਿੱਚ ਰੱਖੇ ਸਾਰੇ ਖਾਣ-ਪੀਣ ਦੇ ਸਮਾਨ ਨੂੰ ਬਾਹਰ ਸੁੱਟ ਦਿੱਤਾ। ਇੱਕ ਕੰਪਨੀ ਦੇ ਮਾਲਕ ਨੇ ਇਸ ਪੂਰੀ ਘਟਨਾ ਲਈ ਲੋਕਾਂ ਤੋਂ ਮੁਆਫ਼ੀ ਵੀ ਮੰਗੀ ਹੈ।
ਇਹ ਵੀ ਪੜ੍ਹੋ
ਡੈਨਮਾਰਕ ਦੀ ਕੰਪਨੀ ਡੈਨਫੌਸ (Danfoss) ਨੇ ਆਪਣੇ ਇੱਕ ਬਿਆਨ ਵਿੱਚ ਕਿਹਾ ਕਿ ਜਿਨ੍ਹਾਂ ਰੈਫ੍ਰਿਜਰੇਟਰਾਂ ਨੂੰ ਹੈਕ ਕੀਤਾ ਗਿਆ, ਉਹ ਪੁਰਾਣੇ ਫਰਮਵੇਅਰ ‘ਤੇ ਚੱਲ ਰਹੇ ਸਨ। ਕੰਪਨੀ ਮੁਤਾਬਕ, ਉਸ ਨੇ ਕੁਝ ਮਹੀਨੇ ਪਹਿਲਾਂ ਹੀ ਆਪਣੇ ਸਾਰੇ ਗਾਹਕਾਂ ਨੂੰ ਇਸ ਸਬੰਧੀ ਅਲਰਟ ਵੀ ਜਾਰੀ ਕੀਤਾ ਸੀ।