ਕੱਦ ਬਣ ਗਿਆ ਮੁਸੀਬਤ! 6.6 ਫੁੱਟ ਲੰਬੇ ਬੱਸ ਕੰਡਕਟਰ ਦੀ ਆਕੜ ਗਈ ਪਿੱਠ ਤੇ ਧੌਣ… ਹੁਣ ਮਿਲਿਆ ਨਵਾਂ ਕੰਮ

6.6 ਫੁੱਟ ਲੰਬੇ ਬੱਸ ਕੰਡਕਟਰ ਦੀ ਆਕੜ ਗਈ ਪਿੱਠ ਤੇ ਧੌਣ

ਤੇਲੰਗਾਨਾ ਦੇ ਹੈਦਰਾਬਾਦ ਤੋਂ ਇੱਕ ਅਜੀਬ ਮਾਮਲਾ ਸਾਹਮਣੇ ਆਇਆ ਹੈ। ਇੱਥੇ, ਇੱਕ ਬੱਸ ਕੰਡਕਟਰ ਦਾ ਕੱਦ ਉਸ ਲਈ ਮੁਸੀਬਤ ਦਾ ਕਾਰਨ ਬਣ ਗਿਆ। ਕਰਮਚਾਰੀ ਦੀਆਂ ਸਰੀਰਕ ਮੁਸ਼ਕਲਾਂ ਨੂੰ ਧਿਆਨ ‘ਚ ਰੱਖਦੇ ਹੋਏ, ਸਟੇਟ ਟਰਾਂਸਪੋਰਟ ਕਾਰਪੋਰੇਸ਼ਨ ਨੇ ਉਸ ਨੂੰ ਨਿਯਮਤ ਬੱਸ ਕੰਡਕਟ ਦੀ ਡਿਊਟੀ ਤੋਂ ਹਟਾ ਦਿੱਤਾ ਹੈ ਤੇ ਉਸ ਨੂੰ ਇੱਕ ਵੱਖਰੀ ਜ਼ਿੰਮੇਵਾਰੀ ਸੌਂਪੀ ਹੈ। ਇਹ ਮਾਮਲਾ ਹੁਣ ਸੋਸ਼ਲ ਮੀਡੀਆ ‘ਤੇ ਵੀ ਚਰਚਾ ਦਾ ਵਿਸ਼ਾ ਬਣ ਗਿਆ ਹੈ।

ਮਹਿਦੀਪਟਨਮ ਡਿਪੂ ‘ਚ ਤਾਇਨਾਤ ਇੱਕ ਕੰਡਕਟਰ, ਅਮੀਨ ਅਹਿਮਦ ਅੰਸਾਰੀ ਕਰੀਬ 198 ਸੈਂਟੀਮੀਟਰ ਯਾਨੀ ਕਿ ਲਗਭਗ 6 ਫੁੱਟ 6 ਇੰਚ ਲੰਬਾ ਹੈ। ਉਸ ਦੀ ਲੰਬਾਈ ਔਸਤ ਵਿਅਕਤੀ ਨਾਲੋਂ ਕਾਫ਼ੀ ਜ਼ਿਆਦਾ ਹੈ, ਜਿਸ ਕਾਰਨ ਉਸ ਨੂੰ ਬੱਸਾਂ ਦੇ ਅੰਦਰ ਕੰਡਕਟਰ ਦੀ ਡਿਊਟੀ ਨਿਭਾਉਣ ‘ਚ ਬਹੁਤ ਮੁਸ਼ਕਲ ਆਉਂਦੀ ਸੀ। ਬੱਸਾਂ ਦੇ ਆਮ ਤੰਗ ਗਲਿਆਰੇ ਤੇ ਨੀਵੀਂ ਛੱਤ ਨੇ ਉਸ ਦੇ ਲਈ ਮੁਸੀਬਤ ਪੈਦਾ ਕਰ ਦਿੱਤੀ। ਯਾਤਰੀਆਂ ਦੀਆਂ ਟਿਕਟਾਂ ਦੀ ਕੱਟਦੇ ਸਮੇਂ ਤੇ ਬੱਸ ਦੇ ਅੰਦਰ ਅੱਗੇ-ਪਿੱਛੇ ਘੁੰਮਦੇ ਸਮੇਂ ਉਸ ਨੂੰ ਲਗਾਤਾਰ ਆਪਣਾ ਸਿਰ ਝੁਕਾ ਕੇ ਤੁਰਨ ਲਈ ਮਜਬੂਰ ਹੋਣਾ ਪੈਂਦਾ ਸੀ।

ਉਸ ਦੀ ਸਰੀਰਕ ਸਥਿਤੀ ਨੂੰ ਧਿਆਨ ‘ਚ ਰੱਖਦੇ ਹੋਏਟਰਾਂਸਪੋਰਟ ਕਾਰਪੋਰੇਸ਼ਨ ਨੇ ਪਹਿਲਾਂ ਉਸ ਨੂੰ ਇੱਕ ਸਾਲ ਦੀ ਮਿਆਦ ਲਈ ‘ਆਊਟ ਆਫ ਡਿਜ਼ੀਗਨੇਸ਼ਨ’ (OD) ਡਿਊਟੀ ‘ਤੇ ਨਿਯੁਕਤ ਕੀਤਾ ਸੀ। ਇਸ ਸਮੇਂ ਦੌਰਾਨ, ਉਸ ਨੂੰ ਅਜਿਹੇ ਕੰਮ ਸੌਂਪੇ ਗਏ ਸਨ, ਜਿਨ੍ਹਾਂ ਲਈ ਉਸ ਨੂੰ ਬੱਸਾਂ ਦੇ ਅੰਦਰ ਲਗਾਤਾਰ ਡਿਊਟੀ ਕਰਨ ਦੀ ਲੋੜ ਨਹੀਂ ਸੀ। ਹਾਲਾਂਕਿ, ਉਸ ਦੀ OD ਡਿਊਟੀ ਦੀ ਮਿਆਦ 28 ਅਪ੍ਰੈਲ ਨੂੰ ਖ਼ਤਮ ਹੋ ਗਈ ਸੀ ਤੇ ਐਕਸਟੈਂਸ਼ਨ ਪ੍ਰਾਪਤ ਕਰਨ ‘ਚ ਦੇਰੀ ਕਾਰਨ, ਉਸ ਨੂੰ ਬੱਸ ਕੰਡਕਟਰ ਵਜੋਂ ਆਪਣੀਆਂ ਜ਼ਿੰਮੇਵਾਰੀਆਂ ਦੁਬਾਰਾ ਸ਼ੁਰੂ ਕਰਨ ਲਈ ਮਜਬੂਰ ਹੋਣਆ ਪਿਆ।

ਗਰਦਨ ਤੇ ਪਿੱਠ ਦਰਦ

ਨਿਯਮਤ ਡਿਊਟੀ ‘ਤੇ ਵਾਪਸ ਆਉਣ ਤੋਂ ਥੋੜ੍ਹੀ ਦੇਰ ਬਾਅਦ, ਅੰਸਾਰੀ ਨੂੰ ਗਰਦਨ ਤੇ ਪਿੱਠ ‘ਚ ਗੰਭੀਰ ਦਰਦ ਹੋਣ ਲੱਗੀ। ਲਗਾਤਾਰ ਝੁਕ ਕੇ ਕੰਮ ਕਰਨ ਦੇ ਕਾਰਨ ਉਸ ਦੀ ਸਰੀਰਕ ਦਿੱਕਤ ਵੱਧ ਗਈ। ਦੱਸਿਆ ਗਿਆ ਕਿ ਉਸ ਨੂੰ ਬੱਸ ਦੇ ਅੰਦਰ ਖੜ੍ਹੇ ਹੋਣ ਤੇ ਯਾਤਰੀਆਂ ‘ਚੋਂ ਲੰਘਣ ‘ਚ ਕਾਫ਼ੀ ਮੁਸ਼ਕਲ ਦਾ ਸਾਹਮਣਾ ਕਰਨਾ ਪਿਆ। ਜਦੋਂ ਅਧਿਕਾਰੀਆਂ ਨੂੰ ਇਸ ਸਥਿਤੀ ਤੋਂ ਜਾਣੂ ਕਰਵਾਇਆ ਗਿਆ, ਤਾਂ ਉਨ੍ਹਾਂ ਨੇ ਮਾਮਲੇ ਨੂੰ ਗੰਭੀਰਤਾ ਨਾਲ ਲਿਆ।

OD ਡਿਊਟੀ ‘ਤੇ ਦੁਬਾਰਾ ਨਿਯੁਕਤ ਕੀਤਾ ਗਿਆ

ਇਸ ਤੋਂ ਬਾਅਦ, 5 ਮਈ ਨੂੰ, ਟਰਾਂਸਪੋਰਟ ਕਾਰਪੋਰੇਸ਼ਨ ਹੈੱਡਕੁਆਰਟਰ ਦੁਆਰਾ ਇੱਕ ਅਧਿਕਾਰਤ ਆਦੇਸ਼ ਜਾਰੀ ਕੀਤਾ ਗਿਆ, ਜਿਸ ‘ਚ ਅਮੀਨ ਅਹਿਮਦ ਅੰਸਾਰੀ ਨੂੰ OD ਡਿਊਟੀ ‘ਤੇ ਦੁਬਾਰਾ ਨਿਯੁਕਤ ਕੀਤਾ ਗਿਆ। ਨਵੇਂ ਹੁਕਮ ਦੇ ਅਨੁਸਾਰ, ਉਸ ਦੀਆਂ ਸੇਵਾਵਾਂ ਹੁਣ ਲੋੜਾਂ ਅਨੁਸਾਰ ਬੱਸ ਪਾਸ ਸੈਕਸ਼ਨ, ਪ੍ਰਸ਼ਾਸਕੀ ਵਿਭਾਗਾਂ ਜਾਂ ਹਵਾਈ ਅੱਡੇ ਨਾਲ ਸਬੰਧਤ ਡਿਵੀਜ਼ਨਾਂ ‘ਚ ਵਰਤੀਆਂ ਜਾ ਸਕਦੀਆਂ ਹਨ, ਜਿੱਥੇ ਉਸ ਨੂੰ ਘੱਟ ਸਰੀਰਕ ਪਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪਵੇਗਾ। Source: TV9Hindi.com