ਹੈਂਡਸਮ ਦਿਖਣ ਲਈ ਹਥੌੜੇ ਨਾਲ ਆਪਣਾ ਚਿਹਰਾ ਭੰਨ ਰਹੇ ਨੇ ਨੌਜਵਾਨ, ਜਾਣੋ ਕੀ ਹੈ Bone Smashing ਟ੍ਰੈਂਡ

Image Credit source: X/@B4R_Renny

ਸੋਸ਼ਲ ਮੀਡੀਆ ਦੀ ਦੁਨੀਆ ਵਿੱਚ ਵਾਇਰਲ ਹੋਣ ਦੀ ਦੌੜ ਅਤੇ ਪਰਫੈਕਟ ਲੁੱਕ ਪਾਉਣ ਦੀ ਚਾਹਤ ਹੁਣ ਖ਼ਤਰਨਾਕ ਪੱਧਰ ‘ਤੇ ਪਹੁੰਚ ਚੁੱਕੀ ਹੈ। ਅੱਜ-ਕੱਲ੍ਹ ਇੰਸਟਾਗ੍ਰਾਮ, ਟਿਕਟੌਕ ਅਤੇ ਕਿੱਕ ਵਰਗੇ ਪਲੇਟਫਾਰਮਾਂ ‘ਤੇ ਬੋਨ ਸਮੈਸ਼ਿੰਗ ਨਾਮ ਦਾ ਇੱਕ ਜਾਨਲੇਵਾ ਟ੍ਰੈਂਡ ਤੇਜ਼ੀ ਨਾਲ ਵਾਇਰਲ ਹੋ ਰਿਹਾ ਹੈ। ਤੁਹਾਨੂੰ ਇਹ ਸੁਣ ਕੇ ਯਕੀਨ ਨਹੀਂ ਹੋਵੇਗਾ ਕਿ ਇਸ ਟ੍ਰੈਂਡ ਵਿੱਚ ਨੌਜਵਾਨ ਆਪਣੇ ਚਿਹਰੇ ਦੇ ਨੈਣ-ਨਕਸ਼, ਖਾਸ ਕਰਕੇ ਜੌ-ਲਾਈਨ ਨੂੰ ਤਿੱਖਾ ਅਤੇ ਆਕਰਸ਼ਕ ਬਣਾਉਣ ਲਈ ਹਥੌੜੇ ਨਾਲ ਆਪਣੇ ਚਿਹਰੇ ਦੀਆਂ ਹੱਡੀਆਂ ‘ਤੇ ਵਾਰ ਕਰ ਰਹੇ ਹਨ।

ਕਿੱਥੋਂ ਹੋਈ ਇਸ ਖ਼ੌਫ਼ਨਾਕ ਟ੍ਰੈਂਡ ਦੀ ਸ਼ੁਰੂਆਤ?

ਇਸ ਭਿਆਨਕ ਟ੍ਰੈਂਡ ਦੀ ਸ਼ੁਰੂਆਤ ‘Looksmaxxing’ ਨਾਮਕ ਇੱਕ ਆਨਲਾਈਨ ਕਮਿਊਨਿਟੀ ਤੋਂ ਹੋਈ ਹੈ, ਜਿੱਥੇ ਲੋਕ ਆਪਣੀ ਸਰੀਰਕ ਦਿੱਖ ਨੂੰ ਸੁਧਾਰਨ ਲਈ ਕਿਸੇ ਵੀ ਹੱਦ ਤੱਕ ਜਾਣ ਨੂੰ ਤਿਆਰ ਰਹਿੰਦੇ ਹਨ। ਇਸ ਨੂੰ 20 ਸਾਲਾ ਅਮਰੀਕੀ ਇਨਫਲੂਐਂਸਰ ਬ੍ਰੈਡਨ ਪੀਟਰਸ, ਜਿਸ ਨੂੰ ‘ਕਲੈਵੀਕੁਲਰ’ ਦੇ ਨਾਂ ਨਾਲ ਵੀ ਜਾਣਿਆ ਜਾਂਦਾ ਹੈ, ਨੇ ਕਾਫੀ ਮਸ਼ਹੂਰ ਕੀਤਾ ਹੈ। ਉਸ ਦੀਆਂ ਵੀਡੀਓਜ਼ ਦੇਖ ਕੇ ਦੁਨੀਆ ਭਰ ਦੇ ਨੌਜਵਾਨ ਇਸ ਖ਼ਤਰਨਾਕ ਰਾਹ ‘ਤੇ ਚੱਲ ਪਏ ਹਨ।

ਗਲਤ ਤਰਕ ਅਤੇ ਵਿਗਿਆਨ ਦੀ ਦੁਰਵਰਤੋਂ

ਇਹ ਨੌਜਵਾਨ ਮੰਨਦੇ ਹਨ ਕਿ ਚਿਹਰੇ ਦੀਆਂ ਹੱਡੀਆਂ ਨੂੰ ਹਥੌੜੇ ਨਾਲ ਪੀਟਣ ਨਾਲ ਉਨ੍ਹਾਂ ਵਿੱਚ ‘ਮਾਈਕਰੋ ਫਰੈਕਚਰ’ ਹੋਣਗੇ। ਉਨ੍ਹਾਂ ਦਾ ਤਰਕ ਹੈ ਕਿ ਜਦੋਂ ਇਹ ਹੱਡੀਆਂ ਦੁਬਾਰਾ ਜੁੜਨਗੀਆਂ, ਤਾਂ ਇਹ ਪਹਿਲਾਂ ਨਾਲੋਂ ਜ਼ਿਆਦਾ ਚੌੜੀਆਂ, ਮਜ਼ਬੂਤ ਅਤੇ ਸ਼ਾਰਪ ਹੋ ਜਾਣਗੀਆਂ। ਇਸ ਦੇ ਪਿੱਛੇ ਇਹ ਨੌਜਵਾਨ 19ਵੀਂ ਸਦੀ ਦੇ ‘ਵੁਲਫਸ ਲਾਅ’ (Wolffs Law) ਦਾ ਹਵਾਲਾ ਦਿੰਦੇ ਹਨ, ਜਦਕਿ ਮਾਹਿਰਾਂ ਅਨੁਸਾਰ ਇਹ ਇਸ ਕਾਨੂੰਨ ਦੀ ਪੂਰੀ ਤਰ੍ਹਾਂ ਗਲਤ ਵਿਆਖਿਆ ਹੈ।

ਡਾਕਟਰਾਂ ਦੀ ਸਖ਼ਤ ਚੇਤਾਵਨੀ

ਡਾਕਟਰੀ ਮਾਹਿਰਾਂ ਨੇ ਇਸ ਟ੍ਰੈਂਡ ਨੂੰ ਪੂਰੀ ਤਰ੍ਹਾਂ ਘਾਤਕ ਅਤੇ ਮੂਰਖਤਾ ਭਰਿਆ ਦੱਸਿਆ ਹੈ। ਡਾਕਟਰਾਂ ਦਾ ਕਹਿਣਾ ਹੈ ਕਿ ਚਿਹਰੇ ‘ਤੇ ਹਥੌੜੇ ਨਾਲ ਵਾਰ ਕਰਨ ਨਾਲ ਹੱਡੀਆਂ ਮਜ਼ਬੂਤ ਨਹੀਂ ਹੁੰਦੀਆਂ, ਸਗੋਂ ਉਹ ਬੁਰੀ ਤਰ੍ਹਾਂ ਟੁੱਟ ਸਕਦੀਆਂ ਹਨ।

ਚਿਹਰਾ ਹਮੇਸ਼ਾ ਲਈ ਟੇਢਾ ਅਤੇ ਬਦਸੂਰਤ ਹੋ ਸਕਦਾ ਹੈ।

ਚਿਹਰੇ ਦੀਆਂ ਨਸਾਂ ਨੂੰ ਗੰਭੀਰ ਨੁਕਸਾਨ ਪਹੁੰਚ ਸਕਦਾ ਹੈ।

ਸਰੀਰ ਦੇ ਅੰਦਰੂਨੀ ਖੂਨ ਵਗਣ ਦੀ ਸਮੱਸਿਆ ਹੋ ਸਕਦੀ ਹੈ।

ਸਭ ਤੋਂ ਖ਼ਤਰਨਾਕ ਗੱਲ ਇਹ ਹੈ ਕਿ ਇਸ ਨਾਲ ਅੱਖਾਂ ਦੀ ਰੌਸ਼ਨੀ ਜਾਣ ਤੱਕ ਦਾ ਖ਼ਤਰਾ ਵੀ ਬਣਿਆ ਰਹਿੰਦਾ ਹੈ।