ਸਟਾਰਲਿੰਕ ‘ਤੇ ਸਖ਼ਤ ਸਰਕਾਰ, ਐਲੋਨ ਮਸਕ ਭਾਰਤ ‘ਚ ਵੇਚ ਸਕਣਗੇ ਸਿਰਫ਼ ਇੰਨੇ ਹੀ ਕੁਨੈਕਸ਼ਨ

ਭਾਰਤ ਵਿੱਚ ਸਟਾਰਲਿੰਕ ਦਾ ਰਸਤਾ ਆਸਾਨ ਨਹੀਂ ਹੈ, ਕੇਂਦਰੀ ਮੰਤਰੀ ਪੇਮਾਸਨੀ ਚੰਦਰਸ਼ੇਖਰ ਨੇ ਹਾਲ ਹੀ ਵਿੱਚ ਜਾਣਕਾਰੀ ਦਿੱਤੀ ਹੈ ਕਿ ਐਲੋਨ ਮਸਕ ਦੀ ਸੈਟੇਲਾਈਟ ਇੰਟਰਨੈੱਟ ਕੰਪਨੀ ਸਟਾਰਲਿੰਕ ਨੂੰ ਭਾਰਤ ਵਿੱਚ ਸਿਰਫ਼ 20 ਲੱਖ ਕਨੈਕਸ਼ਨਾਂ ਦੀ ਇਜਾਜ਼ਤ ਦਿੱਤੀ ਜਾਵੇਗੀ। ਸਟਾਰਲਿੰਕ ਨੇ ਅਜੇ ਭਾਰਤ ਵਿੱਚ ਪੈਰ ਵੀ ਨਹੀਂ ਰੱਖਿਆ ਹੈ ਅਤੇ ਅਜਿਹਾ ਲੱਗਦਾ ਹੈ ਕਿ ਸਰਕਾਰ ਨੇ ਸਟਾਰਲਿੰਕ ਦੇ ਖੰਭ ਕੱਟਣੇ ਸ਼ੁਰੂ ਕਰ ਦਿੱਤੇ ਹਨ। ਬੀਐਸਐਨਐਲ ਨਾਲ ਸਮੀਖਿਆ ਮੀਟਿੰਗ ਤੋਂ ਬਾਅਦ, ਦੂਰਸੰਚਾਰ ਰਾਜ ਮੰਤਰੀ ਨੇ ਕਿਹਾ ਕਿ ਸਟਾਰਲਿੰਕ ਸਰਕਾਰੀ ਕੰਪਨੀ ਬੀਐਸਐਨਐਲ ਅਤੇ ਹੋਰ ਦੂਰਸੰਚਾਰ ਆਪਰੇਟਰਾਂ ਲਈ ਖ਼ਤਰਾ ਪੈਦਾ ਕਰ ਸਕਦਾ ਹੈ।

ਪ੍ਰੈਸ ਟਰੱਸਟ ਆਫ ਇੰਡੀਆ ਦੀ ਰਿਪੋਰਟ ਦੇ ਅਨੁਸਾਰ, ਮੰਤਰੀ ਨੇ ਕਿਹਾ ਕਿ ਸਟਾਰਲਿੰਕ ਦੇ ਭਾਰਤ ਵਿੱਚ ਸਿਰਫ਼ 20 ਲੱਖ ਗਾਹਕ ਹੋ ਸਕਦੇ ਹਨ ਅਤੇ ਕੰਪਨੀ 200Mbps ਤੱਕ ਦੀ ਸਪੀਡ ਦੀ ਪੇਸ਼ਕਸ਼ ਕਰ ਸਕਦੀ ਹੈ, ਇਸ ਦਾ ਦੂਰਸੰਚਾਰ ਸੇਵਾ ‘ਤੇ ਕੋਈ ਪ੍ਰਭਾਵ ਨਹੀਂ ਪਵੇਗਾ। ਸਟਾਰਲਿੰਕ ਅਤੇ ਹੋਰ ਸੈਟੇਲਾਈਟ ਸੰਚਾਰ (ਸੈਟਕਾਮ) ਸੇਵਾਵਾਂ ਮੁੱਖ ਤੌਰ ‘ਤੇ ਪੇਂਡੂ ਅਤੇ ਦੂਰ-ਦੁਰਾਡੇ ਦੇ ਖੇਤਰਾਂ ਵਿੱਚ ਉਪਲਬਧ ਹੋਣਗੀਆਂ, ਉਹ ਖੇਤਰ ਜਿੱਥੇ BSNL ਦੀ ਪਹਿਲਾਂ ਹੀ ਮਜ਼ਬੂਤ ਮੌਜੂਦਗੀ ਹੈ।

ਮੰਤਰੀ ਦੇ ਅਨੁਸਾਰ, ਸੈਟਕਾਮ ਸੇਵਾ ਸਥਾਪਤ ਕਰਨ ਅਤੇ ਵਰਤਣ ਦੀ ਲਾਗਤ ਕਾਫ਼ੀ ਜ਼ਿਆਦਾ ਹੋਵੇਗੀ, ਉਨ੍ਹਾਂ ਕਿਹਾ ਕਿ ਮਹੀਨਾਵਾਰ ਫੀਸ ਲਗਭਗ 3,000 ਰੁਪਏ ਹੋ ਸਕਦੀ ਹੈ, ਜਿਸ ਨਾਲ ਇਹ ਬਹੁਤ ਸਾਰੇ ਲੋਕਾਂ ਲਈ ਇੱਕ ਮਹਿੰਗਾ ਵਿਕਲਪ ਬਣ ਜਾਂਦਾ ਹੈ। ਬੀਐਸਐਨਐਲ ਦੇ ਵਾਧੇ ਬਾਰੇ ਗੱਲ ਕਰਦਿਆਂ, ਉਨ੍ਹਾਂ ਕਿਹਾ ਕਿ ਬੀਐਸਐਨਐਲ ਦੀਆਂ 4ਜੀ ਸੇਵਾਵਾਂ ਦਾ ਰੋਲਆਊਟ ਹੁਣ ਪੂਰਾ ਹੋ ਗਿਆ ਹੈ, ਉਨ੍ਹਾਂ ਇਹ ਵੀ ਸਪੱਸ਼ਟ ਕੀਤਾ ਕਿ ਕੰਪਨੀ ਇਸ ਸਮੇਂ ਆਪਣੇ ਟੈਰਿਫ ਵਧਾਉਣ ਦੀ ਯੋਜਨਾ ਨਹੀਂ ਬਣਾ ਰਹੀ ਹੈ।

ਤੀਜੀ ਸੈਟੇਲਾਈਟ ਕੰਪਨੀ ਹੋਵੇਗੀ ਸਟਾਰਲਿੰਕ

ਇਸ ਮਹੀਨੇ ਦੇ ਸ਼ੁਰੂ ਵਿੱਚ, ਸਟਾਰਲਿੰਕ ਨੂੰ ਭਾਰਤ ਦੇ ਸਪੇਸ ਰੈਗੂਲੇਟਰ IN-SPACE ਤੋਂ ਵਪਾਰਕ ਕਾਰਜ ਸ਼ੁਰੂ ਕਰਨ ਲਈ ਅੰਤਿਮ ਲਾਇਸੈਂਸ ਪ੍ਰਾਪਤ ਹੋਇਆ। ਇਸ ਨਾਲ ਸਟਾਰਲਿੰਕ ਦੇ ਭਾਰਤੀ ਬਾਜ਼ਾਰ ਵਿੱਚ ਦਾਖਲ ਹੋਣ ਲਈ ਆਖਰੀ ਰੁਕਾਵਟ ਦੂਰ ਹੋ ਗਈ ਹੈ। ਕੰਪਨੀ 2022 ਤੋਂ ਅੰਤਿਮ ਪ੍ਰਵਾਨਗੀ ਦੀ ਉਡੀਕ ਕਰ ਰਹੀ ਸੀ।