5 ਸਾਲਾਂ ‘ਚ ਸਿਰਫ 2 ਸੈਂਕੜੇ, ਕੋਈ ਹੋਰ ਹੁੰਦਾ ਤਾਂ… Border Gavaskar Trophy ਤੋਂ ਪਹਿਲਾਂ ਵਿਰਾਟ ਦੀ ਖਰਾਬ ਫਾਰਮ ‘ਤੇ ਪੋਂਟਿੰਗ ਨੇ ਕੀ ਕਿਹਾ?
ਟੀਮ ਇੰਡੀਆ ਦੇ ਦਿੱਗਜ ਬੱਲੇਬਾਜ਼ ਵਿਰਾਟ ਕੋਹਲੀ ਪਿਛਲੇ ਕੁਝ ਸਮੇਂ ਤੋਂ ਖਰਾਬ ਫਾਰਮ ਨਾਲ ਜੂਝ ਰਹੇ ਹਨ। ਉਹ ਟੈਸਟ 'ਚ ਵੱਡੀਆਂ ਪਾਰੀਆਂ ਖੇਡਣ 'ਚ ਲਗਾਤਾਰ ਅਸਫਲ ਹੋ ਰਹੇ ਹਨ। ਆਸਟ੍ਰੇਲੀਆ ਦੇ ਮਹਾਨ ਖਿਡਾਰੀ ਰਿਕੀ ਪੋਂਟਿੰਗ ਨੇ ਬਾਰਡਰ ਗਾਵਸਕਰ ਟਰਾਫੀ ਤੋਂ ਪਹਿਲਾਂ ਵਿਰਾਟ ਦੇ ਪ੍ਰਦਰਸ਼ਨ 'ਤੇ ਵੱਡਾ ਬਿਆਨ ਦਿੱਤਾ ਹੈ।
ਨਿਊਜ਼ੀਲੈਂਡ ਦੇ ਖਿਲਾਫ ਹਾਲ ਹੀ ‘ਚ ਮਿਲੀ ਕਰਾਰੀ ਹਾਰ ਤੋਂ ਬਾਅਦ ਟੀਮ ਇੰਡੀਆ ਹੁਣ ਆਸਟ੍ਰੇਲੀਆ ਖਿਲਾਫ 5 ਮੈਚਾਂ ਦੀ ਟੈਸਟ ਸੀਰੀਜ਼ ਖੇਡੇਗੀ। ਦੋਵਾਂ ਟੀਮਾਂ ਵਿਚਾਲੇ ਖੇਡੀ ਜਾਣ ਵਾਲੀ ਬਾਰਡਰ ਗਾਵਸਕਰ ਟਰਾਫੀ 22 ਨਵੰਬਰ ਤੋਂ ਸ਼ੁਰੂ ਹੋਵੇਗੀ। ਜੇਕਰ ਟੀਮ ਇੰਡੀਆ ਇਸ ਸੀਰੀਜ਼ ‘ਚ ਆਪਣਾ ਦਬਦਬਾ ਕਾਇਮ ਰੱਖਣਾ ਚਾਹੁੰਦੀ ਹੈ ਤਾਂ ਵਿਰਾਟ ਕੋਹਲੀ ਨੂੰ ਕਿਸੇ ਵੀ ਕੀਮਤ ‘ਤੇ ਫਾਰਮ ‘ਚ ਵਾਪਸੀ ਕਰਨੀ ਪਵੇਗੀ। ਵਿਰਾਟ ਕੋਹਲੀ ਦਾ ਇਸ ਸਾਲ ਪ੍ਰਦਰਸ਼ਨ ਕੁਝ ਖਾਸ ਨਹੀਂ ਰਿਹਾ। ਇਸ ਸਾਲ ਦੇ ਸ਼ੁਰੂਆਤ ਤੋਂ ਕੋਹਲੀ ਨੇ ਛੇ ਟੈਸਟ ਮੈਚਾਂ ਵਿੱਚ ਸਿਰਫ 22.72 ਦੀ ਔਸਤ ਨਾਲ ਦੌੜਾਂ ਬਣਾਈਆਂ ਹਨ, ਜੋ ਕਿ 2011 ਵਿੱਚ ਆਪਣੇ ਡੈਬਿਊ ਤੋਂ ਬਾਅਦ ਇੱਕ ਸਾਲ ਵਿੱਚ ਇਸ ਫਾਰਮੈਟ ਵਿੱਚ ਉਨ੍ਹਾਂ ਦੀ ਸਭ ਤੋਂ ਘੱਟ ਔਸਤ ਹੈ। ਹੁਣ ਆਸਟ੍ਰੇਲੀਆ ਦੇ ਮਹਾਨ ਖਿਡਾਰੀ ਰਿਕੀ ਪੋਂਟਿੰਗ ਨੇ ਵਿਰਾਟ ਦੇ ਇਸ ਫਾਰਮ ‘ਤੇ ਵੱਡਾ ਬਿਆਨ ਦਿੱਤਾ ਹੈ।
ਵਿਰਾਟ ਦੀ ਖਰਾਬ ਫਾਰਮ ‘ਤੇ ਪੋਂਟਿੰਗ ਨੇ ਕੀ ਕਿਹਾ?
ਹਾਲ ਹੀ ‘ਚ ਵਿਰਾਟ ਕੋਹਲੀ ਨੇ ਨਿਊਜ਼ੀਲੈਂਡ ਖਿਲਾਫ ਟੈਸਟ ਸੀਰੀਜ਼ ਦੇ 3 ਮੈਚਾਂ ‘ਚ 15.50 ਦੀ ਔਸਤ ਨਾਲ 93 ਦੌੜਾਂ ਬਣਾਈਆਂ ਸਨ। ਇਸ ਦੌਰਾਨ ਉਹ ਸਿਰਫ਼ ਇੱਕ ਅਰਧ ਸੈਂਕੜਾ ਹੀ ਬਣਾ ਸਕੇ। ਤੁਹਾਨੂੰ ਦੱਸ ਦੇਈਏ ਕਿ ਵਿਰਾਟ ਪਿਛਲੇ ਕਾਫੀ ਸਮੇਂ ਤੋਂ ਟੈਸਟ ਫਾਰਮੈਟ ‘ਚ ਸੰਘਰਸ਼ ਕਰ ਰਹੇ ਹਨ। ਉਨ੍ਹਾਂ ਨੇ ਪਿਛਲੇ 5 ਸਾਲਾਂ ‘ਚ ਸਿਰਫ 2 ਟੈਸਟ ਸੈਂਕੜੇ ਹੀ ਬਣਾਏ ਹਨ, ਜੋ ਕਿ ਕਾਫੀ ਹੈਰਾਨ ਕਰਨ ਵਾਲਾ ਅੰਕੜਾ ਹੈ। ਵਿਰਾਟ ਦੇ ਇਸ ਪ੍ਰਦਰਸ਼ਨ ‘ਤੇ ਆਈਸੀਸੀ ਨਾਲ ਗੱਲ ਕਰਦੇ ਹੋਏ ਰਿਕੀ ਪੋਂਟਿੰਗ ਨੇ ਕਿਹਾ, ‘ਮੈਂ ਹਾਲ ਹੀ ‘ਚ ਵਿਰਾਟ ਬਾਰੇ ਇਕ ਅੰਕੜਾ ਦੇਖਿਆ, ਜਿਸ ‘ਚ ਦੱਸਿਆ ਗਿਆ ਸੀ ਕਿ ਉਨ੍ਹਾਂ ਨੇ ਪਿਛਲੇ ਪੰਜ ਸਾਲਾਂ ‘ਚ ਸਿਰਫ ਦੋ ਟੈਸਟ ਸੈਂਕੜੇ ਲਗਾਏ ਹਨ। ਇਹ ਮੈਨੂੰ ਸਹੀ ਨਹੀਂ ਜਾਪਦਾ, ਪਰ ਜੇ ਇਹ ਸਹੀ ਹੈ, ਮੇਰਾ ਮਤਲਬ ਹੈ, ਇਹ ਚਿੰਤਾ ਦਾ ਵਿਸ਼ਾ ਹੈ। ਸ਼ਾਇਦ ਅੰਤਰਰਾਸ਼ਟਰੀ ਕ੍ਰਿਕਟ ‘ਚ ਟਾਪ ਆਰਡਰ ਬੱਲੇਬਾਜ਼ ਦੇ ਤੌਰ ‘ਤੇ ਖੇਡਣ ਵਾਲਾ ਕੋਈ ਹੋਰ ਨਹੀਂ ਹੋਵੇਗਾ, ਜਿਸ ਨੇ ਪੰਜ ਸਾਲਾਂ ‘ਚ ਸਿਰਫ ਦੋ ਟੈਸਟ ਮੈਚਾਂ ਦੇ ਸੈਂਕੜੇ ਲਗਾਏ ਹਨ।
ਆਸਟ੍ਰੇਲੀਆ ਖਿਲਾਫ ਵਾਪਸੀ ਕਰ ਸਕਦੇ
ਰਿਕੀ ਪੋਂਟਿੰਗ ਦਾ ਇਹ ਵੀ ਮੰਨਣਾ ਹੈ ਕਿ ਭਾਰਤੀ ਬੱਲੇਬਾਜ਼ ਵਿਰਾਟ ਕੋਹਲੀ ਨੂੰ ਮੌਜੂਦਾ ਫਾਰਮ ਦੇ ਆਧਾਰ ‘ਤੇ ਨਹੀਂ ਪਰਖਿਆ ਜਾਣਾ ਚਾਹੀਦਾ ਹੈ ਅਤੇ ਚੈਂਪੀਅਨ ਕ੍ਰਿਕਟਰ ਆਗਾਮੀ ਪੰਜ ਟੈਸਟਾਂ ਦੀ ਬਾਰਡਰ-ਗਾਵਸਕਰ ਸੀਰੀਜ਼ ਦੌਰਾਨ ਜ਼ਬਰਦਸਤ ਵਾਪਸੀ ਕਰ ਸਕਦਾ ਹੈ। ਪੋਂਟਿੰਗ ਨੇ ਕਿਹਾ, ‘ਮੈਂ ਵਿਰਾਟ ਬਾਰੇ ਪਹਿਲਾਂ ਵੀ ਇਹ ਕਿਹਾ ਹੈ, ਤੁਸੀਂ ਕਦੇ ਵੀ ਖੇਡ ਦੇ ਮਹਾਨ ਖਿਡਾਰੀਆਂ ‘ਤੇ ਸਵਾਲ ਨਹੀਂ ਚੁੱਕ ਸਕਦੇ। ਇਸ ਵਿੱਚ ਕੋਈ ਸ਼ੱਕ ਨਹੀਂ ਕਿ ਉਹ ਖੇਡ ਦੇ ਮਹਾਨ ਖਿਡਾਰੀ ਹਨ। ਉਹ ਆਸਟ੍ਰੇਲੀਆ ਖਿਲਾਫ ਖੇਡਣਾ ਪਸੰਦ ਕਰਦੇ ਹਨ। ਅਸਲ ‘ਚ ਮੈਂ ਜਾਣਦਾ ਹਾਂ ਕਿ ਉਨ੍ਹਾਂ ਨੂੰ ਆਸਟ੍ਰੇਲੀਆ ਖਿਲਾਫ ਖੇਡਣਾ ਪਸੰਦ ਹੈ ਅਤੇ ਆਸਟ੍ਰੇਲੀਆ ‘ਚ ਉਨ੍ਹਾਂ ਦਾ ਰਿਕਾਰਡ ਕਾਫੀ ਚੰਗਾ ਹੈ।
ਪੋਂਟਿੰਗ ਦਾ ਮੰਨਣਾ ਹੈ ਕਿ ਬਾਰਡਰ-ਗਾਵਸਕਰ ਸੀਰੀਜ਼ ਕੋਹਲੀ ਦੇ ਟੈਸਟ ਕਰੀਅਰ ਨੂੰ ਮੁੜ ਜਨਮ ਦੇ ਸਕਦੀ ਹੈ। ਪੋਂਟਿੰਗ ਨੇ ਕਿਹਾ, ‘ਜੇਕਰ ਉਨ੍ਹਾਂ ਲਈ ਇਸ ਨੂੰ ਬਦਲਣ ਦਾ ਸਮਾਂ ਹੈ ਤਾਂ ਇਹ ਸੀਰੀਜ਼ ਹੋਵੇਗੀ। ਇਸ ਲਈ ਵਿਰਾਟ ਨੂੰ ਪਹਿਲੇ ਮੈਚ ‘ਚ ਦੌੜਾਂ ਬਣਾਉਂਦੇ ਦੇਖ ਮੈਨੂੰ ਕੋਈ ਹੈਰਾਨੀ ਨਹੀਂ ਹੋਵੇਗੀ।
