ਮਾਂ ਨੇ ਵਾਹਿਗੁਰੂ ਅੱਗੇ ਕੀਤੀ ਸੀ ਅਰਦਾਸ, ਪੁੱਤਰ ਨੇ ਜੂਨੀਅਰ ਹਾਕੀ ‘ਚ ਜਿੱਤਿਆ ਗੋਲਡ, ਹੁਣ ਭਾਰਤੀ ਸੀਨੀਅਰ ਟੀਮ ‘ਚ ਜਗ੍ਹਾ ਬਣਾਉਣ ਦਾ ਟੀਚਾ

ਪ੍ਰਭਦੀਪ ਨੇ ਹਾਕੀ ’ਚ ਰੌਸ਼ਨ ਕੀਤਾ ਦੇਸ਼ ਦਾ ਨਾਮ Photo Credit : Social Media

ਜਲੰਧਰ ਦੀ ਮਿੱਠੂ ਬਸਤੀ ਦੇ ਰਹਿਣ ਵਾਲੇ ਪ੍ਰਭਦੀਪ ਨੇ ਜੂਨੀਅਰ ਏਸ਼ੀਆ ਕੱਪ ਹਾਕੀ ਟੂਰਨਾਮੈਂਟ ਵਿੱਚ ਦੇਸ਼ ਨੂੰ ਗੋਲਡ ਮੈਡਲ ਦਿਵਾਇਆ। ਆਪਣੇ ਡੈਬਿਊ ਮੈਚ ਵਿੱਚ ਹੀ ਪ੍ਰਭਦੀਪ ਨੇ ਇਹ ਕਮਾਲ ਕਰ ਦਿਖਾਇਆ। 20 ਸਾਲਾ ਖਿਡਾਰੀ ਨੇ ਚੀਨ ਵਿੱਚ 4 ਤੋਂ 13 ਸਤੰਬਰ ਤੱਕ ਕਰਵਾਏ ਗਏ ਜੂਨੀਅਰ ਏਸ਼ੀਆ ਕੱਪ ਹਾਕੀ ਟੂਰਨਾਮੈਂਟ ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ। ਭਾਰਤ ਨੇ ਦੱਖਣੀ ਕੋਰੀਆ ਨੂੰ 4-1 ਨਾਲ ਹਰਾ ਕੇ ਖਿਤਾਬ ਆਪਣੇ ਨਾਮ ਕੀਤਾ। ਪ੍ਰਭਦੀਪ ਨੇ ਹਰ ਮੈਚ ਵਿੱਚ ਗੋਲ ਕਰਕੇ ਭਾਰਤੀ ਜੂਨੀਅਰ ਹਾਕੀ ਟੀਮ ਨੂੰ ਤਮਗਾ ਦਿਵਾਉਣ ਵਿੱਚ ਅਹਿਮ ਭੂਮਿਕਾ ਨਿਭਾਈ। ਜਲੰਧਰ ਵਾਪਸ ਪਰਤਣ ‘ਤੇ ਪਰਿਵਾਰਕ ਮੈਂਬਰਾਂ ਅਤੇ ਇਲਾਕਾ ਵਾਸੀਆਂ ਨੇ ਪ੍ਰਭਦੀਪ ਦਾ ਢੋਲ-ਨਗਾੜਿਆਂ ਨਾਲ ਸ਼ਾਨਦਾਰ ਸਵਾਗਤ ਕੀਤਾ।

ਪ੍ਰਭਦੀਪ ਨੇ ਦੱਸਿਆ ਕਿ ਇਹ ਉਸ ਦਾ ਪਹਿਲਾ ਅੰਤਰਰਾਸ਼ਟਰੀ ਟੂਰਨਾਮੈਂਟ ਸੀ। ਭਾਰਤ ਲਈ ਗੋਲਡ ਜਿੱਤਣਾ ਉਸ ਲਈ ਮਾਣ ਵਾਲਾ ਪਲ ਰਿਹਾ। ਏਸ਼ੀਆ ਕੱਪ ਦੇ ਮੁਸ਼ਕਲ ਮੁਕਾਬਲਿਆਂ ਬਾਰੇ ਗੱਲ ਕਰਦਿਆਂ ਪ੍ਰਭਦੀਪ ਨੇ ਕਿਹਾ ਕਿ ਕੋਰੀਆ, ਜਾਪਾਨ, ਮਲੇਸ਼ੀਆ ਅਤੇ ਪਾਕਿਸਤਾਨ ਵਰਗੀਆਂ ਟੀਮਾਂ ਖ਼ਿਲਾਫ਼ ਮੁਕਾਬਲੇ ਕਾਫ਼ੀ ਚੁਣੌਤੀਪੂਰਨ ਸਨ, ਪਰ ਮਜ਼ਬੂਤ ਬੌਂਡਿੰਗ ਅਤੇ ਸਖ਼ਤ ਮਿਹਨਤ ਨਾਲ ਟੀਮ ਨੇ ਜਿੱਤ ਹਾਸਲ ਕੀਤੀ।

ਪਿਤਾ ਨੇ ਘਰ ਦੇ ਬਾਹਰ ਇੱਟਾਂ ਰੱਖ ਕੇ ਸ਼ੁਰੂ ਕਰਵਾਈ ਸੀ ਟ੍ਰੇਨਿੰਗ

ਪ੍ਰਭਦੀਪ ਦੀ ਇਸ ਸਫਲਤਾ ਪਿੱਛੇ ਉਸ ਦੇ ਪਿਤਾ ਰਾਜਿੰਦਰ ਸਿੰਘ ਦਾ ਅਹਿਮ ਯੋਗਦਾਨ ਰਿਹਾ ਹੈ। ਰਾਜਿੰਦਰ ਸਿੰਘ ਨੇ ਦੱਸਿਆ ਕਿ ਜਦੋਂ ਪ੍ਰਭਦੀਪ 8-9 ਸਾਲ ਦਾ ਸੀ, ਉਦੋਂ ਉਸ ਨੂੰ ਕ੍ਰਿਕਟ ਪਸੰਦ ਸੀ। ਇੱਕ ਦਿਨ ਉਸ ਨੇ ਹਾਕੀ ਖੇਡਣ ਦੀ ਇੱਛਾ ਜ਼ਾਹਰ ਕੀਤੀ। ਉਸ ਸਮੇਂ ਪਿੰਡ ਦਾ ਹਾਕੀ ਗਰਾਊਂਡ ਬੰਦ ਸੀ। ਇਸ ਤੋਂ ਬਾਅਦ ਮੈਂ ਘਰ ਦੇ ਬਾਹਰ ਇੱਟਾਂ ਰੱਖ ਕੇ ਪ੍ਰਭਦੀਪ ਨੂੰ ਸ਼ਾਟ ਲਗਾਉਣ ਦੀ ਪ੍ਰੈਕਟਿਸ ਕਰਵਾਉਣੀ ਸ਼ੁਰੂ ਕੀਤੀ।

ਇਸ ਤੋਂ ਬਾਅਦ ਕੋਚ ਦਵਿੰਦਰ ਤੋਂ ਟ੍ਰੇਨਿੰਗ ਲੈਣ, ਖਡੂਰ ਸਾਹਿਬ ਅਕੈਡਮੀ ਅਤੇ ਫਿਰ ਸੁਰਜੀਤ ਹਾਕੀ ਅਕੈਡਮੀ ਵਿੱਚ ਪ੍ਰੈਕਟਿਸ ਕਰਦਿਆਂ ਪ੍ਰਭਦੀਪ ਨੇ ਸਬ-ਜੂਨੀਅਰ ਅਤੇ ਜੂਨੀਅਰ ਨੈਸ਼ਨਲ ਵਿੱਚ ਆਪਣੀ ਜਗ੍ਹਾ ਬਣਾਈ। ਹਾਲ ਹੀ ਵਿੱਚ ਉਹ ਬੈਲਜੀਅਮ ਅਤੇ ਨੀਦਰਲੈਂਡ ਦੇ ਯੂਰਪੀ ਦੌਰਿਆਂ ‘ਤੇ ਵੀ ਭਾਰਤੀ ਟੀਮ ਦਾ ਹਿੱਸਾ ਰਹਿ ਚੁੱਕਾ ਹੈ।

ਮਾਂ ਦੀ ਅਰਦਾਸ ਅਤੇ ਸੀਨੀਅਰ ਓਲੰਪੀਅਨਾਂ ਦੇ ਟਿਪਸ ਆਏ ਕੰਮ

ਪ੍ਰਭਦੀਪ ਦੀ ਮਾਤਾ ਸੁਖਵਿੰਦਰ ਕੌਰ ਨੇ ਪੁੱਤਰ ਦੀ ਸਫਲਤਾ ‘ਤੇ ਉਸ ਨੂੰ ਗੋਦ ਵਿੱਚ ਬਿਠਾ ਲਿਆ। ਮਾਂ ਨੇ ਕਿਹਾ ਕਿ ਉਨ੍ਹਾਂ ਦੇ ਪੁੱਤਰ ਦਾ ਸੁਪਨਾ ਹਮੇਸ਼ਾ ਤੋਂ ਹਾਕੀ ਵਿੱਚ ਦੇਸ਼ ਦਾ ਨਾਮ ਰੌਸ਼ਨ ਕਰਨਾ ਸੀ। ਜਦੋਂ ਪੁੱਤਰ ਪਹਿਲੀ ਵਾਰ ਕਿਸੇ ਦੂਜੇ ਦੇਸ਼ ਵਿੱਚ ਖੇਡਣ ਜਾ ਰਿਹਾ ਸੀ ਤਾਂ ਉਨ੍ਹਾਂ ਨੇ ਵਾਹਿਗੁਰੂ ਅੱਗੇ ਅਰਦਾਸ ਕੀਤੀ ਸੀ, ਜੋ ਅੱਜ ਪੂਰੀ ਹੋ ਗਈ ਹੈ।

ਦੱਸ ਦੇਈਏ ਕਿ ਪ੍ਰਭਦੀਪ ਜਲੰਧਰ ਦੇ ਉਸੇ ਮਿੱਠਾਪੁਰ ਇਲਾਕੇ ਤੋਂ ਹਨ, ਜਿੱਥੋਂ ਮਨਪ੍ਰੀਤ ਸਿੰਘ ਅਤੇ ਮਨਦੀਪ ਸਿੰਘ ਵਰਗੇ ਓਲੰਪੀਅਨ ਖਿਡਾਰੀ ਨਿਕਲੇ ਹਨ। ਪ੍ਰਭਦੀਪ ਨੇ ਦੱਸਿਆ ਕਿ ਸੀਨੀਅਰ ਖਿਡਾਰੀ ਉਨ੍ਹਾਂ ਨੂੰ ਲਗਾਤਾਰ ਆਪਣੀ ਖੇਡ ਵਿੱਚ ਸੁਧਾਰ ਕਰਨ ਲਈ ਟਿਪਸ ਦਿੰਦੇ ਰਹਿੰਦੇ ਹਨ। ਹੁਣ ਉਨ੍ਹਾਂ ਦਾ ਅਗਲਾ ਟੀਚਾ ਹੋਰ ਜ਼ਿਆਦਾ ਮਿਹਨਤ ਕਰਕੇ ਜਲਦ ਤੋਂ ਜਲਦ ਭਾਰਤੀ ਸੀਨੀਅਰ ਹਾਕੀ ਟੀਮ ਵਿੱਚ ਆਪਣੀ ਜਗ੍ਹਾ ਪੱਕੀ ਕਰਨਾ ਹੈ।