IND vs SL: ਜਸਪ੍ਰੀਤ ਬੁਮਰਾਹ ਸ਼੍ਰੀਲੰਕਾ ਖ਼ਿਲਾਫ਼ ਟੈਸਟ ਸੀਰੀਜ਼ ਤੋਂ ਹੋਏ ਬਾਹਰ, ਜਾਣੋ ਕੀ ਹੈ ਵੱਡੀ ਵਜ੍ਹਾ

Photo: (PTI)

ਭਾਰਤ ਦੇ ਸਟਾਰ ਤੇਜ਼ ਗੇਂਦਬਾਜ਼ ਜਸਪ੍ਰੀਤ ਬੁਮਰਾਹ ਸ਼੍ਰੀਲੰਕਾ ਖ਼ਿਲਾਫ਼ ਹੋਣ ਵਾਲੀ ਟੈਸਟ ਸੀਰੀਜ਼ ਤੋਂ ਬਾਹਰ ਹੋ ਗਏ ਹਨ। ਖ਼ਬਰਾਂ ਮੁਤਾਬਕ ਉਨ੍ਹਾਂ ਦੇ ਖੱਬੇ ਗੋਡੇ ਦੀ ਸਮੱਸਿਆ ਅਜੇ ਵੀ ਬਰਕਰਾਰ ਹੈ, ਜਿਸ ਕਾਰਨ ਹੁਣ ਉਨ੍ਹਾਂ ਦਾ ਸ਼੍ਰੀਲੰਕਾ ਦੌਰੇ ‘ਤੇ ਜਾਣਾ ਮੁਸ਼ਕਿਲ ਹੋ ਗਿਆ ਹੈ। ਇਸ ਤੋਂ ਪਹਿਲਾਂ ਜਦੋਂ ਸ਼੍ਰੀਲੰਕਾ ਦੌਰੇ ਲਈ ਟੀਮ ਇੰਡੀਆ ਦੀ ਚੋਣ ਕੀਤੀ ਗਈ ਸੀ, ਤਾਂ ਬੁਮਰਾਹ ਨੂੰ ਟੀਮ ‘ਚ ਸ਼ਾਮਲ ਕੀਤਾ ਗਿਆ ਸੀ। ਹਾਲਾਂਕਿ, ਉਦੋਂ ਵੀ ਇਹ ਸ਼ਰਤ ਰੱਖੀ ਗਈ ਸੀ ਕਿ ਜੇਕਰ ਉਹ ਪੂਰੀ ਤਰ੍ਹਾਂ ਫਿੱਟ ਹੁੰਦੇ ਹਨ, ਤਾਂ ਹੀ ਸ਼੍ਰੀਲੰਕਾ ਜਾਣਗੇ।

ਸ਼੍ਰੀਲੰਕਾ ਦੌਰੇ ਤੋਂ ਬੁਮਰਾਹ ਬਾਹਰ

ਭਾਰਤੀ ਟੀਮ ਨੂੰ 4 ਅਗਸਤ ਨੂੰ ਸ਼੍ਰੀਲੰਕਾ ਲਈ ਰਵਾਨਾ ਹੋਣਾ ਹੈ। ਉਸ ਤੋਂ ਠੀਕ ਪਹਿਲਾਂ ਬੁਮਰਾਹ ਦੇ ਬਾਹਰ ਹੋਣ ਦੀ ਖ਼ਬਰ ਟੀਮ ਇੰਡੀਆ ਲਈ ਕਿਸੇ ਵੱਡੇ ਝਟਕੇ ਤੋਂ ਘੱਟ ਨਹੀਂ ਹੈ। ਅਜਿਹਾ ਇਸ ਲਈ ਹੈ ਕਿਉਂਕਿ ਸ਼੍ਰੀਲੰਕਾ ਖ਼ਿਲਾਫ਼ ਇਹ ਟੈਸਟ ਸੀਰੀਜ਼ ਵਰਲਡ ਟੈਸਟ ਚੈਂਪੀਅਨਸ਼ਿਪ (WTC) ਦੇ ਫਾਈਨਲ ਵਿੱਚ ਆਪਣੀ ਜਗ੍ਹਾ ਮਜ਼ਬੂਤ ਕਰਨ ਦੇ ਮਕਸਦ ਨਾਲ ਭਾਰਤੀ ਟੀਮ ਲਈ ਬੇਹੱਦ ਅਹਿਮ ਮੰਨੀ ਜਾ ਰਹੀ ਹੈ।

ਖੱਬੇ ਗੋਡੇ ‘ਚ ਸਮੱਸਿਆ, ਡਾਕਟਰਾਂ ਨੇ ਦਿੱਤੀ ਆਰਾਮ ਦੀ ਸਲਾਹ

ਬੀ.ਸੀ.ਸੀ.ਆਈ. (BCCI) ਦੇ ਸੈਂਟਰ ਆਫ਼ ਐਕਸੀਲੈਂਸ ਦੀ ਸ਼ੁਰੂਆਤੀ ਜਾਂਚ ਵਿੱਚ ਹੀ ਬੁਮਰਾਹ ਦੇ ਖੱਬੇ ਗੋਡੇ ਵਿੱਚ ਹੋ ਰਹੀ ਤਕਲੀਫ਼ ਦਾ ਪਤਾ ਲੱਗ ਗਿਆ ਸੀ। ਇਸ ਤੋਂ ਬਾਅਦ ਮੈਡੀਕਲ ਟੀਮ ਨੇ ਉਨ੍ਹਾਂ ਨੂੰ ਸ਼੍ਰੀਲੰਕਾ ਭੇਜਣ ਦੀ ਬਜਾਏ ਪੂਰੀ ਤਰ੍ਹਾਂ ਆਰਾਮ ਅਤੇ ਰਿਕਵਰੀ ਕਰਨ ਦੀ ਸਲਾਹ ਦਿੱਤੀ ਹੈ।

‘ਟਾਈਮਜ਼ ਆਫ਼ ਇੰਡੀਆ’ ਨੂੰ ਸਰੋਤਾਂ ਨੇ ਦੱਸਿਆ ਕਿ ਬੁਮਰਾਹ ਦੇ ਮਾਮਲੇ ਵਿੱਚ ਕੋਈ ਵੀ ਲਾਪ੍ਰਵਾਹੀ ਨਹੀਂ ਵਰਤੀ ਜਾ ਸਕਦੀ। ਇਸ ਲਈ ਉਨ੍ਹਾਂ ਦੀ ਪੂਰੀ ਰਿਕਵਰੀ ਹੀ ਸਭ ਤੋਂ ਪਹਿਲਾ ਮਕਸਦ ਹੈ। ਸਰੋਤਾਂ ਮੁਤਾਬਕ, ਇਸ ਸਾਲ ਅਜੇ ਕਾਫ਼ੀ ਕ੍ਰਿਕਟ ਖੇਡੀ ਜਾਣੀ ਹੈ। ਅੱਗੇ ਏਸ਼ੀਅਨ ਗੇਮਜ਼, ਨਿਊਜ਼ੀਲੈਂਡ ਦਾ ਦੌਰਾ ਅਤੇ ਬਾਰਡਰ-ਗਾਵਸਕਰ ਟਰਾਫ਼ੀ ਵਰਗੇ ਵੱਡੇ ਟੂਰਨਾਮੈਂਟ ਹਨ, ਜਿੱਥੇ ਭਾਰਤੀ ਟੀਮ ਨੂੰ ਬੁਮਰਾਹ ਦੀ ਬੇਹੱਦ ਲੋੜ ਪਵੇਗੀ।

ਬੁਮਰਾਹ ਦੀ ਜਗ੍ਹਾ ਕੌਣ ਲਵੇਗਾ?

ਬੁਮਰਾਹ ਦੇ ਸ਼੍ਰੀਲੰਕਾ ਖ਼ਿਲਾਫ਼ ਟੈਸਟ ਸੀਰੀਜ਼ ਤੋਂ ਬਾਹਰ ਹੋਣ ਤੋਂ ਬਾਅਦ ਹੁਣ ਵੱਡਾ ਸਵਾਲ ਇਹ ਹੈ ਕਿ ਟੀਮ ਵਿੱਚ ਉਨ੍ਹਾਂ ਦੀ ਜਗ੍ਹਾ ਕੌਣ ਲਵੇਗਾ? TOI ਦੀ ਰਿਪੋਰਟ ਮੁਤਾਬਕ, ਆਕਿਬ ਨਬੀ ਦਾ ਨਾਂ ਇਸ ਰੇਸ ਵਿੱਚ ਸਭ ਤੋਂ ਅੱਗੇ ਚੱਲ ਰਹਾ ਹੈ, ਜੋ ਇਸ ਵੇਲੇ ਟੀਮ ਨਾਲ ਟ੍ਰੇਨਿੰਗ ਵੀ ਕਰ ਰਹੇ ਹਨ। ਆਕਿਬ ਨਬੀ ਨੇ ਜੰਮੂ-ਕਸ਼ਮੀਰ ਲਈ ਘਰੇਲੂ ਕ੍ਰਿਕਟ ਵਿੱਚ ਬਹੁਤ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ ਹੈ। ਇਸ ਤੋਂ ਇਲਾਵਾ, ਹਾਲ ਹੀ ਵਿੱਚ ਇੰਡੀਆ-ਏ ਨਾਲ ਸ਼੍ਰੀਲੰਕਾ ਦੌਰੇ ‘ਤੇ ਖੇਡੇ ਗਏ 2 ਰੈੱਡ-ਬਾਲ (ਟੈਸਟ) ਮੈਚਾਂ ਵਿੱਚ ਵੀ ਉਨ੍ਹਾਂ ਨੇ 6 ਵਿਕਟਾਂ ਚਟਕਾਈਆਂ ਸਨ।