IPL 2026: ਫਿਨ ਐਲਨ ਦਾ ਤੂਫ਼ਾਨੀ ਸ਼ਤਕ, KKR ਨੇ ਦਿੱਲੀ ਕੈਪੀਟਲਜ਼ ਨੂੰ 8 ਵਿਕਟਾਂ ਨਾਲ ਹਰਾਇਆ
IPL 2026: ਇੰਡੀਅਨ ਪ੍ਰੀਮੀਅਰ ਲੀਗ (IPL) 2026 ਦੇ 51ਵੇਂ ਮੁਕਾਬਲੇ ਵਿੱਚ ਕੋਲਕਾਤਾ ਨਾਈਟ ਰਾਈਡਰਜ਼ (KKR) ਨੇ ਦਿੱਲੀ ਕੈਪੀਟਲਜ਼ ਨੂੰ ਇੱਕਤਰਫ਼ਾ ਮੈਚ ਵਿੱਚ ਕਰਾਰੀ ਮਾਤ ਦਿੱਤੀ ਹੈ। ਅਰੁਣ ਜੇਟਲੀ ਸਟੇਡੀਅਮ ਵਿੱਚ ਖੇਡੇ ਗਏ ਇਸ ਮੈਚ ਵਿੱਚ ਕੇ.ਕੇ.ਆਰ. ਨੇ ਟਾਸ ਜਿੱਤ ਕੇ ਪਹਿਲਾਂ ਗੇਂਦਬਾਜ਼ੀ ਕਰਨ ਦਾ ਫੈਸਲਾ ਕੀਤਾ, ਜੋ ਕਿ ਪੂਰੀ ਤਰ੍ਹਾਂ ਸਹੀ ਸਾਬਤ ਹੋਇਆ।
Photo: (PTI)
ਇੰਡੀਅਨ ਪ੍ਰੀਮੀਅਰ ਲੀਗ (IPL) 2026 ਦੇ 51ਵੇਂ ਮੁਕਾਬਲੇ ਵਿੱਚ ਕੋਲਕਾਤਾ ਨਾਈਟ ਰਾਈਡਰਜ਼ (KKR) ਨੇ ਦਿੱਲੀ ਕੈਪੀਟਲਜ਼ ਨੂੰ ਇੱਕਤਰਫ਼ਾ ਮੈਚ ਵਿੱਚ ਕਰਾਰੀ ਮਾਤ ਦਿੱਤੀ ਹੈ। ਅਰੁਣ ਜੇਟਲੀ ਸਟੇਡੀਅਮ ਵਿੱਚ ਖੇਡੇ ਗਏ ਇਸ ਮੈਚ ਵਿੱਚ ਕੇ.ਕੇ.ਆਰ. ਨੇ ਟਾਸ ਜਿੱਤ ਕੇ ਪਹਿਲਾਂ ਗੇਂਦਬਾਜ਼ੀ ਕਰਨ ਦਾ ਫੈਸਲਾ ਕੀਤਾ, ਜੋ ਕਿ ਪੂਰੀ ਤਰ੍ਹਾਂ ਸਹੀ ਸਾਬਤ ਹੋਇਆ। ਦਿੱਲੀ ਕੈਪੀਟਲਜ਼ ਦੀ ਟੀਮ 20 ਓਵਰਾਂ ਵਿੱਚ ਮਹਿਜ਼ 142 ਦੌੜਾਂ ਹੀ ਬਣਾ ਸਕੀ, ਜਿਸ ਨੂੰ ਕੋਲਕਾਤਾ ਨੇ ਫਿਨ ਐਲਨ ਦੀ ਸ਼ਾਨਦਾਰ ਬੱਲੇਬਾਜ਼ੀ ਦੇ ਦਮ ‘ਤੇ ਸਿਰਫ਼ 14.2 ਓਵਰਾਂ ਵਿੱਚ ਹਾਸਲ ਕਰ ਲਿਆ।
KKR ਦੀ ਘਾਤਕ ਗੇਂਦਬਾਜ਼ੀ ਅੱਗੇ ਦਿੱਲੀ ਦੇ ਬੱਲੇਬਾਜ਼ ਲਾਚਾਰ
ਇਸ ਮੁਕਾਬਲੇ ਵਿੱਚ ਦਿੱਲੀ ਕੈਪੀਟਲਜ਼ ਦੀ ਬੱਲੇਬਾਜ਼ੀ ਬੇਹੱਦ ਫਾਡੀ ਰਹੀ। ਦਿੱਲੀ ਦੇ ਬੱਲੇਬਾਜ਼ਾਂ ਨੇ ਪੂਰੀ ਪਾਰੀ ਦੌਰਾਨ ਕੁੱਲ 51 ਡਾਟ ਗੇਂਦਾਂ ਖੇਡੀਆਂ, ਜਿਸ ਕਾਰਨ ਉਹ ਵੱਡਾ ਸਕੋਰ ਬਣਾਉਣ ਵਿੱਚ ਨਾਕਾਮ ਰਹੇ। ਦਿੱਲੀ ਨੇ 20 ਓਵਰਾਂ ਵਿੱਚ 8 ਵਿਕਟਾਂ ਦੇ ਨੁਕਸਾਨ ‘ਤੇ 142 ਦੌੜਾਂ ਬਣਾਈਆਂ। ਪਾਥੁਮ ਨਿਸਾਂਕਾ ਨੇ 30 ਗੇਂਦਾਂ ਵਿੱਚ 50 ਦੌੜਾਂ ਦੀ ਅਰਧ-ਸੈਂਕੜੇ ਵਾਲੀ ਪਾਰੀ ਖੇਡੀ, ਜਦਕਿ ਕੇ.ਐਲ. ਰਾਹੁਲ ਨੇ 14 ਗੇਂਦਾਂ ਵਿੱਚ 23 ਦੌੜਾਂ ਦਾ ਯੋਗਦਾਨ ਪਾਇਆ। ਆਸ਼ੂਤੋਸ਼ ਸ਼ਰਮਾ ਨੇ ਵੀ 28 ਗੇਂਦਾਂ ਵਿੱਚ 39 ਦੌੜਾਂ ਬਣਾਈਆਂ, ਪਰ ਬਾਕੀ ਕੋਈ ਵੀ ਬੱਲੇਬਾਜ਼ ਟਿਕ ਕੇ ਨਹੀਂ ਖੇਡ ਸਕਿਆ।
ਕੋਲਕਾਤਾ ਨਾਈਟ ਰਾਈਡਰਜ਼ ਵੱਲੋਂ ਅਨੁਕੂਲ ਰਾਏ ਅਤੇ ਕਾਰਤਿਕ ਤਿਆਗੀ ਸਭ ਤੋਂ ਸਫਲ ਗੇਂਦਬਾਜ਼ ਰਹੇ, ਜਿਨ੍ਹਾਂ ਨੇ 2-2 ਵਿਕਟਾਂ ਝਟਕਾਈਆਂ। ਇਸ ਤੋਂ ਇਲਾਵਾ ਵੈਭਵ ਅਰੋੜਾ, ਸੁਨੀਲ ਨਰੇਨ ਅਤੇ ਕੈਮਰਨ ਗ੍ਰੀਨ ਦੇ ਹਿੱਸੇ 1-1 ਵਿਕਟ ਆਈ। ਵਰੁਣ ਚੱਕਰਵਰਤੀ ਨੂੰ ਭਾਵੇਂ ਕੋਈ ਵਿਕਟ ਨਹੀਂ ਮਿਲੀ, ਪਰ ਉਨ੍ਹਾਂ ਨੇ ਆਪਣੇ 4 ਓਵਰਾਂ ਵਿੱਚ ਸਿਰਫ਼ 28 ਦੌੜਾਂ ਦੇ ਕੇ ਦਿੱਲੀ ‘ਤੇ ਦਬਾਅ ਬਣਾਈ ਰੱਖਿਆ।
ਫਿਨ ਐਲਨ ਦਾ ਇਤਿਹਾਸਕ ਸ਼ਤਕ
ਰਨ ਚੇਜ਼ ਦੌਰਾਨ ਨਿਊਜ਼ੀਲੈਂਡ ਦੇ ਵਿਸਫੋਟਕ ਸਲਾਮੀ ਬੱਲੇਬਾਜ਼ ਫਿਨ ਐਲਨ ਦਾ ਬੱਲਾ ਜ਼ੋਰਦਾਰ ਗਰਜਿਆ। ਐਲਨ ਨੇ ਆਪਣੇ ਆਈ.ਪੀ.ਐਲ. ਕਰੀਅਰ ਦਾ ਪਹਿਲਾ ਸੈਂਕੜਾ ਜੜ ਕੇ ਇਤਿਹਾਸ ਰਚ ਦਿੱਤਾ। ਉਨ੍ਹਾਂ ਨੇ ਸਿਰਫ਼ 47 ਗੇਂਦਾਂ ਵਿੱਚ 100 ਦੌੜਾਂ ਦੀ ਨਾਬਾਦ ਪਾਰੀ ਖੇਡੀ, ਜਿਸ ਵਿੱਚ 5 ਚੌਕੇ ਅਤੇ 10 ਅਸਮਾਨੀ ਛੱਕੇ ਸ਼ਾਮਲ ਸਨ। 212.76 ਦੇ ਸਟ੍ਰਾਈਕ ਰੇਟ ਨਾਲ ਬੱਲੇਬਾਜ਼ੀ ਕਰਦਿਆਂ ਐਲਨ ਨੇ ਕੇ.ਕੇ.ਆਰ. ਲਈ ਸਭ ਤੋਂ ਤੇਜ਼ ਸੈਂਕੜਾ ਲਗਾਉਣ ਦਾ ਰਿਕਾਰਡ ਵੀ ਆਪਣੇ ਨਾਂ ਕਰ ਲਿਆ।
ਐਲਨ ਦੇ ਇਸ ਤੂਫ਼ਾਨ ਅੱਗੇ ਦਿੱਲੀ ਦੇ ਗੇਂਦਬਾਜ਼ ਪੂਰੀ ਤਰ੍ਹਾਂ ਬੇਵੱਸ ਨਜ਼ਰ ਆਏ। ਕੈਮਰਨ ਗ੍ਰੀਨ ਨੇ ਵੀ ਦੂਜੇ ਪਾਸੇ ਤੋਂ 27 ਗੇਂਦਾਂ ਵਿੱਚ 33 ਦੌੜਾਂ ਬਣਾ ਕੇ ਨਾਬਾਦ ਸਾਥ ਦਿੱਤਾ। ਦਿੱਲੀ ਵੱਲੋਂ ਸਿਰਫ਼ ਅਕਸ਼ਰ ਪਟੇਲ ਹੀ 1 ਵਿਕਟ ਹਾਸਲ ਕਰ ਸਕੇ, ਜਦਕਿ ਬਾਕੀ ਸਾਰੇ ਗੇਂਦਬਾਜ਼ ਕਾਫੀ ਮਹਿੰਗੇ ਸਾਬਤ ਹੋਏ। ਇਸ ਸ਼ਾਨਦਾਰ ਜਿੱਤ ਨਾਲ ਕੇ.ਕੇ.ਆਰ. ਨੇ ਅੰਕ ਸੂਚੀ ਵਿੱਚ ਆਪਣੀ ਸਥਿਤੀ ਹੋਰ ਮਜ਼ਬੂਤ ਕਰ ਲਈ ਹੈ।