IPL 2026: ਸ਼ੁਭਮਨ ਗਿੱਲ ਦੇ ਸ਼ਤਕ ਨਾਲ ਫਾਈਨਲ ‘ਚ ਪਹੁੰਚੀ ਗੁਜਰਾਤ, ਰਾਜਸਥਾਨ ਦੀ ਇੱਕ ਗ਼ਲਤੀ ਨੇ ਖ਼ਤਮ ਕੀਤਾ ਸਫ਼ਰ
IPL 2026: ਸ਼ੁਭਮਨ ਗਿੱਲ ਦੀ ਕਪਤਾਨੀ ਵਾਲੀ ਗੁਜਰਾਤ ਟਾਈਟਨਜ਼ ਨੇ ਆਈ.ਪੀ.ਐੱਲ. 2026 ਦੇ ਦੂਜੇ ਕੁਆਲੀਫਾਇਰ ਵਿੱਚ ਧਮਾਕੇਦਾਰ ਪ੍ਰਦਰਸ਼ਨ ਕਰਦੇ ਹੋਏ ਰਾਜਸਥਾਨ ਰਾਇਲਜ਼ ਨੂੰ 7 ਵਿਕਟਾਂ ਨਾਲ ਹਰਾ ਕੇ ਫਾਈਨਲ ਵਿੱਚ ਜਗ੍ਹਾ ਬਣਾ ਲਈ ਹੈ। 5 ਸੀਜ਼ਨਾਂ ਵਿੱਚ ਇਹ ਤੀਜੀ ਵਾਰ ਹੈ ਜਦੋਂ ਗੁਜਰਾਤ ਫਾਈਨਲ ਵਿੱਚ ਪਹੁੰਚੀ ਹੈ, ਜਿੱਥੇ ਹੁਣ ਉਸ ਦਾ ਸਾਹਮਣਾ ਮੌਜੂਦਾ ਚੈਂਪੀਅਨ ਰਾਇਲ ਚੈਲੇਂਜਰਜ਼ ਬੈਂਗਲੁਰੂ ਨਾਲ ਹੋਵੇਗਾ।
Photo: (PTI)
ਸ਼ੁਭਮਨ ਗਿੱਲ ਦੀ ਕਪਤਾਨੀ ਵਾਲੀ ਗੁਜਰਾਤ ਟਾਈਟਨਜ਼ ਨੇ ਆਈ.ਪੀ.ਐੱਲ. 2026 ਦੇ ਦੂਜੇ ਕੁਆਲੀਫਾਇਰ ਵਿੱਚ ਧਮਾਕੇਦਾਰ ਪ੍ਰਦਰਸ਼ਨ ਕਰਦੇ ਹੋਏ ਰਾਜਸਥਾਨ ਰਾਇਲਜ਼ ਨੂੰ 7 ਵਿਕਟਾਂ ਨਾਲ ਹਰਾ ਕੇ ਫਾਈਨਲ ਵਿੱਚ ਜਗ੍ਹਾ ਬਣਾ ਲਈ ਹੈ। 5 ਸੀਜ਼ਨਾਂ ਵਿੱਚ ਇਹ ਤੀਜੀ ਵਾਰ ਹੈ ਜਦੋਂ ਗੁਜਰਾਤ ਫਾਈਨਲ ਵਿੱਚ ਪਹੁੰਚੀ ਹੈ, ਜਿੱਥੇ ਹੁਣ ਉਸ ਦਾ ਸਾਹਮਣਾ ਮੌਜੂਦਾ ਚੈਂਪੀਅਨ ਰਾਇਲ ਚੈਲੇਂਜਰਜ਼ ਬੈਂਗਲੁਰੂ ਨਾਲ ਹੋਵੇਗਾ। ਗੁਜਰਾਤ ਨੂੰ ਇਹ ਜਿੱਤ ਕਪਤਾਨ ਗਿੱਲ ਨੇ ਦਿਵਾਈ, ਜਿਨ੍ਹਾਂ ਨੇ 215 ਦੌੜਾਂ ਦੇ ਟੀਚੇ ਦਾ ਪਿੱਛਾ ਕਰਦਿਆਂ 103 ਦੌੜਾਂ ਦੀ ਧਮਾਕੇਦਾਰ ਪਾਰੀ ਖੇਡੀ। ਇਸ ਪਾਰੀ ਨੇ ਰਾਜਸਥਾਨ ਦੇ ਵੈਭਵ ਸੂਰਿਆਵੰਸ਼ੀ ਦੀਆਂ 96 ਦੌੜਾਂ ਦੀ ਪਾਰੀ ਨੂੰ ਫਿੱਕਾ ਕਰ ਦਿੱਤਾ ਅਤੇ ਰਾਜਸਥਾਨ ਦੇ ਸ਼ਾਨਦਾਰ ਸਫ਼ਰ ਦਾ ਅੰਤ ਕੀਤਾ।
ਵੈਭਵ ਸੂਰਿਆਵੰਸ਼ੀ ਦੀ ਸ਼ਾਨਦਾਰ ਪਾਰੀ ਅਤੇ ਫਰੇਰਾ ਦੇ ਛੱਕੇ
ਇਸ ਮੈਚ ਵਿੱਚ ਰਾਜਸਥਾਨ ਦੇ ਕਪਤਾਨ ਰਿਆਨ ਪਰਾਗ ਨੇ ਟਾਸ ਜਿੱਤ ਕੇ ਪਹਿਲਾਂ ਬੱਲੇਬਾਜ਼ੀ ਚੁਣੀ, ਪਰ ਸ਼ੁਰੂਆਤੀ 2 ਓਵਰਾਂ ਵਿੱਚ ਹੀ ਯਸ਼ਸਵੀ ਜਾਇਸਵਾਲ ਅਤੇ ਰਿਆਨ ਪਰਾਗ ਦੇ ਵਿਕਟ ਡਿੱਗ ਗਏ। ਅਜਿਹੇ ਵਿੱਚ ਟੀਮ ਦਬਾਅ ਵਿੱਚ ਸੀ, ਪਰ ਵੈਭਵ ਸੂਰਿਆਵੰਸ਼ੀ ਨੇ ਰਵੀਂਦਰ ਜਡੇਜਾ ਨਾਲ ਮਿਲ ਕੇ ਟੀਮ ਨੂੰ ਸੰਭਾਲਿਆ। ਵੈਭਵ ਆਪਣੇ ਵਿਸਫੋਟਕ ਅੰਦਾਜ਼ ਵਿੱਚ ਨਹੀਂ ਸਨ, ਪਰ ਫਿਰ ਵੀ ਉਨ੍ਹਾਂ ਦੀਆਂ ਦੌੜਾਂ ਬਾਕੀ ਬੱਲੇਬਾਜ਼ਾਂ ਨਾਲੋਂ ਤੇਜ਼ ਆ ਰਹੀਆਂ ਸਨ।
ਵੈਭਵ ਨੇ ਇਸ ਸੀਜ਼ਨ ਦਾ ਆਪਣਾ ਪੰਜਵਾਂ ਅਰਧ-ਸੈਂਕੜਾ ਲਗਾਇਆ, ਪਰ ਉਹ ਲਗਾਤਾਰ ਦੂਜੇ ਮੈਚ ਵਿੱਚ ਸੈਂਕੜੇ ਦੇ ਨੇੜੇ ਆ ਕੇ ਥਰਡ ਮੈਨ ‘ਤੇ ਕੈਚ ਦੇ ਬੈਠੇ ਅਤੇ 47 ਗੇਂਦਾਂ ਵਿੱਚ 96 ਦੌੜਾਂ ਬਣਾ ਕੇ ਆਊਟ ਹੋ ਗਏ। ਆਖਰੀ ਓਵਰ ਵਿੱਚ ਡੋਨੋਵਨ ਫਰੇਰਾ ਨੇ ਰਾਸ਼ਿਦ ਖਾਨ ‘ਤੇ 4 ਛੱਕੇ ਜੜ ਕੇ 11 ਗੇਂਦਾਂ ਵਿੱਚ ਨਾਬਾਦ 38 ਦੌੜਾਂ ਬਣਾਈਆਂ ਅਤੇ ਟੀਮ ਨੂੰ 214 ਦੌੜਾਂ ਤੱਕ ਪਹੁੰਚਾਇਆ। ਗੁਜਰਾਤ ਵੱਲੋਂ ਜੇਸਨ ਹੋਲਡਰ ਅਤੇ ਕਗਿਸੋ ਰਬਾਡਾ ਨੇ 2-2 ਵਿਕਟਾਂ ਲਈਆਂ।
ਗੁਜਰਾਤ ਦੀ ਇਤਿਹਾਸਕ ਚੇਜ਼ ਅਤੇ ਕਪਤਾਨ ਗਿੱਲ ਦਾ ਧਮਾਕਾ
ਗੁਜਰਾਤ ਨੇ ਇਸ ਤੋਂ ਪਹਿਲਾਂ ਆਈ.ਪੀ.ਐੱਲ. ਵਿੱਚ ਕਦੇ ਵੀ 210 ਤੋਂ ਵੱਧ ਦਾ ਟੀਚਾ ਹਾਸਲ ਨਹੀਂ ਸੀ ਕੀਤਾ ਅਤੇ ਅਜਿਹੇ ਸਾਰੇ 7 ਮੈਚ ਹਾਰੇ ਸਨ। ਟੀਮ ਨੂੰ ਸ਼ਾਨਦਾਰ ਬੱਲੇਬਾਜ਼ੀ ਅਤੇ ਕਿਸਮਤ ਦੀ ਲੋੜ ਸੀ। ਕਪਤਾਨ ਸ਼ੁਭਮਨ ਗਿੱਲ ਅਤੇ ਸਾਈ ਸੁਦਰਸ਼ਨ ਨੇ ਟੀਮ ਨੂੰ ਦਮਦਾਰ ਸ਼ੁਰੂਆਤ ਦਿਵਾਈ। ਮੈਚ ਦੌਰਾਨ ਡੋਨੋਵਨ ਫਰੇਰਾ ਨੇ ਸਾਈ ਸੁਦਰਸ਼ਨ ਦਾ ਕੈਚ ਛੱਡ ਦਿੱਤਾ ਜਦੋਂ ਉਹ ਸਿਰਫ਼ 14 ਦੌੜਾਂ ‘ਤੇ ਸਨ, ਜੋ ਰਾਜਸਥਾਨ ਨੂੰ ਭਾਰੀ ਪਿਆ।
ਸੁਦਰਸ਼ਨ ਨੇ 26 ਗੇਂਦਾਂ ਵਿੱਚ ਅਤੇ ਗਿੱਲ ਨੇ 30 ਗੇਂਦਾਂ ਵਿੱਚ ਅਰਧ-ਸੈਂਕੜਾ ਪੂਰਾ ਕਰਦੇ ਹੋਏ 13 ਓਵਰਾਂ ਵਿੱਚ 167 ਦੌੜਾਂ ਦੀ ਸਾਂਝੇਦਾਰੀ ਕੀਤੀ, ਜਿਸ ਨੇ ਰਾਜਸਥਾਨ ਨੂੰ ਮੈਚ ਤੋਂ ਬਾਹਰ ਕਰ ਦਿੱਤਾ। ਹਾਲਾਂਕਿ ਲਗਾਤਾਰ ਦੂਜੇ ਮੈਚ ਵਿੱਚ ਸੁਦਰਸ਼ਨ ਹਿੱਟ ਵਿਕਟ ਆਊਟ ਹੋਏ, ਪਰ ਕਪਤਾਨ ਗਿੱਲ ਨੇ ਪਲੇਅ-ਆਫ ਮੁਕਾਬਲਿਆਂ ਵਿੱਚ ਆਪਣਾ ਦੂਜਾ ਸੈਂਕੜਾ ਜੜ ਕੇ ਟੀਮ ਨੂੰ ਜਿੱਤ ਦੇ ਨੇੜੇ ਪਹੁੰਚਾਇਆ। ਗਿੱਲ ਨੇ 53 ਗੇਂਦਾਂ ਵਿੱਚ 104 ਦੌੜਾਂ ਬਣਾਈਆਂ। ਆਖ਼ਰਕਾਰ, ਜੋਸ ਬਟਲਰ, ਵਾਸ਼ਿੰਗਟਨ ਸੁੰਦਰ ਅਤੇ ਰਾਹੁਲ ਤੇਵਤੀਆ ਨੇ 18.4 ਓਵਰਾਂ ਵਿੱਚ ਹੀ ਟੀਮ ਨੂੰ ਜਿੱਤ ਦੇ ਟੀਚੇ ਤੱਕ ਪਹੁੰਚਾ ਦਿੱਤਾ।