T20 World Cup 2026 : ਇੱਕ ਨਹੀਂ, ਦੋ ਵਾਰ ਭਿੜਨਗੇ ਭਾਰਤ ਤੇ ਪਾਕਿਸਤਾਨ; ਜਾਣੋ ਕਿਵੇਂ

(Photo: Getty Images)

ਟੀ-20 ਵਰਲਡ ਕੱਪ 2026 ਵਿੱਚ ਭਾਰਤ ਅਤੇ ਪਾਕਿਸਤਾਨ ਵਿਚਾਲੇ ਹੋਣ ਵਾਲੇ ਮੁਕਾਬਲੇ ‘ਤੇ ਹੁਣ ਅਧਿਕਾਰਤ ਮੋਹਰ ਲੱਗ ਚੁੱਕੀ ਹੈ। ਪਰ ਕ੍ਰਿਕਟ ਪ੍ਰਸ਼ੰਸਕਾਂ ਲਈ ‘ਸੋਨੇ ‘ਤੇ ਸੁਹਾਗਾ’ ਵਾਲੀ ਗੱਲ ਇਹ ਹੈ ਕਿ ਇਸ ਵਾਰ ਟੂਰਨਾਮੈਂਟ ਵਿੱਚ ਭਾਰਤ-ਪਾਕਿਸਤਾਨ ਦੇ ਇੱਕ ਨਹੀਂ ਬਲਕਿ ਦੋ ਮੈਚ ਹੋਣ ਦੀ ਪੂਰੀ ਸੰਭਾਵਨਾ ਬਣ ਰਹੀ ਹੈ। ਜਿੱਥੇ ਕੁਝ ਸਮਾਂ ਪਹਿਲਾਂ ਤੱਕ ਇੱਕ ਮੈਚ ਹੋਣ ‘ਤੇ ਵੀ ਸ਼ੱਕ ਜਤਾਇਆ ਜਾ ਰਿਹਾ ਸੀ, ਉੱਥੇ ਹੁਣ ਦੋ ਚਿਰ-ਪ੍ਰਤੀਦਵੰਦੀਆਂ ਵਿਚਾਲੇ ਡਬਲ ਰੋਮਾਂਚ ਦੇਖਣ ਨੂੰ ਮਿਲ ਸਕਦਾ ਹੈ। ਹੁਣ ਸਵਾਲ ਇਹ ਉੱਠਦਾ ਹੈ ਕਿ ਇਹ ਸਭ ਕਿਵੇਂ ਸੰਭਵ ਹੋਵੇਗਾ?

ਗਰੁੱਪ ਸਟੇਜ ‘ਤੇ ਹੋਵੇਗੀ ਪਹਿਲੀ ਭਿੜੰਤ

ਭਾਰਤ ਅਤੇ ਪਾਕਿਸਤਾਨ ਵਿਚਾਲੇ ਪਹਿਲਾ ਮੁਕਾਬਲਾ 15 ਫਰਵਰੀ ਨੂੰ ਕੋਲੰਬੋ ਦੇ ਆਰ. ਪ੍ਰੇਮਦਾਸਾ ਸਟੇਡੀਅਮ ਵਿੱਚ ਖੇਡਿਆ ਜਾਵੇਗਾ। ਇਹ ਟੂਰਨਾਮੈਂਟ ਦਾ ਗਰੁੱਪ ਸਟੇਜ ਮੈਚ ਹੋਵੇਗਾ। ਵਰਲਡ ਕੱਪ ਵਿੱਚ ਖੇਡ ਰਹੀਆਂ 20 ਟੀਮਾਂ ਨੂੰ 4 ਵੱਖ-ਵੱਖ ਗਰੁੱਪਾਂ ਵਿੱਚ ਵੰਡਿਆ ਗਿਆ ਹੈ, ਜਿੱਥੇ ਹਰ ਗਰੁੱਪ ਵਿੱਚ 5-5 ਟੀਮਾਂ ਸ਼ਾਮਲ ਹਨ। ਗਰੁੱਪ ਸਟੇਜ ਦੌਰਾਨ ਹਰ ਗਰੁੱਪ ਦੀਆਂ ਟੀਮਾਂ ਨੇ ਇੱਕ-ਦੂਜੇ ਨਾਲ ਮੈਚ ਖੇਡਣੇ ਹਨ। ਇਸੇ ਕੜੀ ਦੇ ਤਹਿਤ ਗਰੁੱਪ-ਏ ਵਿੱਚ ਮੌਜੂਦ ਭਾਰਤ ਅਤੇ ਪਾਕਿਸਤਾਨ 15 ਫਰਵਰੀ ਨੂੰ ਆਹਮੋ-ਸਾਹਮਣੇ ਹੋਣਗੇ।

ਸੁਪਰ-8 ਦਾ ਗਣਿਤ ਅਤੇ ਸੰਭਾਵਿਤ ਗਰੁੱਪ

ਗਰੁੱਪ ਸਟੇਜ ਤੋਂ ਬਾਅਦ ਟੂਰਨਾਮੈਂਟ ਸੁਪਰ-8 ਪੜਾਅ ਵਿੱਚ ਦਾਖਲ ਹੋਵੇਗਾ। ਸੁਪਰ-8 ਵਿੱਚ ਦੋ ਗਰੁੱਪ ਬਣਾਏ ਜਾਣਗੇ, ਜਿਨ੍ਹਾਂ ਵਿੱਚ ਗਰੁੱਪ ਸਟੇਜ ਦੇ ਹਰ ਗਰੁੱਪ ਦੀਆਂ ਟੌਪ-2 ਟੀਮਾਂ ਨੂੰ ਉਨ੍ਹਾਂ ਦੀ ਰੈਂਕਿੰਗ ਦੇ ਅਧਾਰ ‘ਤੇ ਰੱਖਿਆ ਜਾਵੇਗਾ। ਜੇਕਰ ਭਾਰਤ ਅਤੇ ਪਾਕਿਸਤਾਨ ਆਪਣੇ ਗਰੁੱਪ-ਏ ਵਿੱਚ ਟੌਪ ‘ਤੇ ਰਹਿੰਦੇ ਹਨ ਅਤੇ ਬਾਕੀ ਗਰੁੱਪਾਂ ਵਿੱਚੋਂ ਆਸਟ੍ਰੇਲੀਆ, ਸ੍ਰੀਲੰਕਾ, ਇੰਗਲੈਂਡ, ਵੈਸਟਇੰਡੀਜ਼, ਨਿਊਜ਼ੀਲੈਂਡ ਅਤੇ ਦੱਖਣੀ ਅਫ਼ਰੀਕਾ ਵਰਗੀਆਂ ਟੀਮਾਂ ਅੱਗੇ ਵਧਦੀਆਂ ਹਨ, ਤਾਂ ਸੁਪਰ-8 ਦੇ ਗਰੁੱਪ ਕੁਝ ਇਸ ਤਰ੍ਹਾਂ ਹੋ ਸਕਦੇ ਹਨ:

ਗਰੁੱਪ-1: ਭਾਰਤ, ਆਸਟ੍ਰੇਲੀਆ, ਵੈਸਟਇੰਡੀਜ਼, ਦੱਖਣੀ ਅਫ਼ਰੀਕਾ

ਗਰੁੱਪ-2: ਇੰਗਲੈਂਡ, ਨਿਊਜ਼ੀਲੈਂਡ, ਪਾਕਿਸਤਾਨ, ਸ੍ਰੀਲੰਕਾ

ਸੁਪਰ-8 ਪੜਾਅ ‘ਤੇ ਹਰ ਟੀਮ ਨੇ ਆਪਣੇ ਗਰੁੱਪ ਦੀਆਂ ਬਾਕੀ ਟੀਮਾਂ ਨਾਲ ਇੱਕ-ਇੱਕ ਮੈਚ ਖੇਡਣਾ ਹੈ। ਇਸ ਗਣਿਤ ਮੁਤਾਬਕ ਸੁਪਰ-8 ਵਿੱਚ ਭਾਰਤ-ਪਾਕਿਸਤਾਨ ਦੀ ਭਿੜੰਤ ਹੁੰਦੀ ਨਜ਼ਰ ਨਹੀਂ ਆ ਰਹੀ।

ਸੈਮੀਫਾਈਨਲ ਜਾਂ ਫਾਈਨਲ ਵਿੱਚ ਦੂਜੀ ਟੱਕਰ ਦੀ ਉਮੀਦ

ਭਾਰਤ ਅਤੇ ਪਾਕਿਸਤਾਨ ਵਿਚਾਲੇ ਦੂਜਾ ਮੁਕਾਬਲਾ ਹੋਣ ਦੇ ਅਸਾਰ ਉਦੋਂ ਬਣਨਗੇ ਜੇਕਰ ਦੋਵੇਂ ਟੀਮਾਂ ਆਪਣੇ-ਆਪਣੇ ਸੁਪਰ-8 ਗਰੁੱਪਾਂ ਵਿੱਚੋਂ ਸੈਮੀਫਾਈਨਲ ਲਈ ਕੁਆਲੀਫਾਈ ਕਰਦੀਆਂ ਹਨ। ਜੇਕਰ ਭਾਰਤ ਆਪਣੇ ਗਰੁੱਪ-1 ਵਿੱਚ ਟੌਪ ‘ਤੇ ਰਹਿੰਦਾ ਹੈ ਅਤੇ ਪਾਕਿਸਤਾਨ ਦੀ ਟੀਮ ਗਰੁੱਪ-2 ਵਿੱਚ ਦੂਜੇ ਸਥਾਨ ‘ਤੇ ਰਹਿੰਦੀ ਹੈ (ਜਾਂ ਇਸ ਦੇ ਉਲਟ), ਤਾਂ ਸੈਮੀਫਾਈਨਲ ਵਿੱਚ ਇਨ੍ਹਾਂ ਦੋਵਾਂ ਟੀਮਾਂ ਵਿਚਾਲੇ ਘਮਾਸਾਨ ਦੇਖਣ ਨੂੰ ਮਿਲ ਸਕਦਾ ਹੈ।

ਇਸ ਤੋਂ ਇਲਾਵਾ, ਜੇਕਰ ਭਾਰਤ ਅਤੇ ਪਾਕਿਸਤਾਨ ਦੋਵੇਂ ਹੀ ਆਪਣੇ ਸੁਪਰ-8 ਗਰੁੱਪਾਂ ਵਿੱਚ ਟੌਪ ‘ਤੇ ਰਹਿੰਦੇ ਹਨ ਅਤੇ ਆਪਣੇ-ਆਪਣੇ ਸੈਮੀਫਾਈਨਲ ਜਿੱਤ ਜਾਂਦੇ ਹਨ, ਤਾਂ ਕ੍ਰਿਕਟ ਜਗਤ ਨੂੰ ਟੀ-20 ਵਰਲਡ ਕੱਪ 2026 ਦਾ ਸਭ ਤੋਂ ਵੱਡਾ ‘ਫਾਈਨਲ ਮੁਕਾਬਲਾ’ ਦੇਖਣ ਨੂੰ ਮਿਲੇਗਾ। ਇਸ ਤਰ੍ਹਾਂ ਕ੍ਰਿਕਟ ਪ੍ਰਸ਼ੰਸਕਾਂ ਨੂੰ ਇੱਕ ਹੀ ਵਰਲਡ ਕੱਪ ਵਿੱਚ ਦੋ ਵਾਰ ਭਾਰਤ-ਪਾਕਿਸਤਾਨ ਦੀ ਜੰਗ ਦੇਖਣ ਦਾ ਮੌਕਾ ਮਿਲ ਸਕਦਾ ਹੈ।