IND vs AUS: ਪਰਥ ਦੇ ਅਰਸ਼ ਤੋਂ ਐਡੀਲੇਡ ਦੇ ਫਰਸ਼ ਤੇ ਆਈ ਟੀਮ ਇੰਡੀਆ, 4 ਸਾਲ ਬਾਅਦ ਆਸਟ੍ਰੇਲੀਆ ਤੋਂ ਮਿਲੀ ਸ਼ਿਕਸਤ
India vs Australia: ਭਾਰਤੀ ਟੀਮ ਇਸ ਡੇ-ਨਾਈਟ ਟੈਸਟ ਦੀਆਂ ਦੋਵੇਂ ਪਾਰੀਆਂ ਵਿੱਚ 200 ਤੋਂ ਘੱਟ ਦੌੜਾਂ ਦੇ ਸਕੋਰ ਨਾਲ ਢੇਰ ਹੋ ਗਈ। ਟੀਮ ਇੰਡੀਆ ਪਹਿਲੀ ਪਾਰੀ 'ਚ ਸਿਰਫ 180 ਦੌੜਾਂ 'ਤੇ ਹੀ ਸੀਮਤ ਰਹੀ, ਜਿਸ ਤੋਂ ਬਾਅਦ ਆਸਟ੍ਰੇਲੀਆ ਨੇ 337 ਦੌੜਾਂ ਬਣਾਈਆਂ ਅਤੇ ਭਾਰਤ 'ਤੇ 157 ਦੌੜਾਂ ਦੀ ਬੜ੍ਹਤ ਲੈ ਲਈ।
IND vs AUS: ਪਰਥ ਦੇ ਅਰਸ਼ ਤੋਂ ਐਡੀਲੇਡ ਦੇ ਫਰਸ਼ ਤੇ ਆਈ ਟੀਮ ਇੰਡੀਆ
ਪਰਥ ਟੈਸਟ ਜਿੱਤ ਕੇ ਸੱਤਵੇਂ ਆਸਮਾਨ ‘ਤੇ ਪਹੁੰਚੀ ਟੀਮ ਇੰਡੀਆ ਨੂੰ ਐਡੀਲੇਡ ‘ਚ ਜ਼ਬਰਦਸਤ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਐਡੀਲੇਡ ‘ਚ ਖੇਡੇ ਗਏ ਡੇ-ਨਾਈਟ ਟੈਸਟ ‘ਚ ਆਸਟ੍ਰੇਲੀਆ ਨੇ ਇਕ ਵਾਰ ਫਿਰ ਆਪਣਾ ਦਬਦਬਾ ਕਾਇਮ ਰੱਖਿਆ ਅਤੇ ਟੀਮ ਇੰਡੀਆ ਨੂੰ ਕਰਾਰੀ ਹਾਰ ਦਿੱਤੀ। ਪਹਿਲੀ ਪਾਰੀ ‘ਚ ਆਸਟ੍ਰੇਲੀਆ ਤੋਂ 157 ਦੌੜਾਂ ਨਾਲ ਪਿੱਛੇ ਰਹਿਣ ਤੋਂ ਬਾਅਦ ਟੀਮ ਇੰਡੀਆ ਦੂਜੀ ਪਾਰੀ ‘ਚ ਸਿਰਫ 175 ਦੌੜਾਂ ਹੀ ਬਣਾ ਸਕੀ। ਇਸ ਤਰ੍ਹਾਂ ਆਸਟਰੇਲੀਆ ਨੂੰ ਸਿਰਫ਼ 19 ਦੌੜਾਂ ਦਾ ਟੀਚਾ ਮਿਲਿਆ, ਜਿਸ ਨੂੰ ਮੇਜ਼ਬਾਨ ਟੀਮ ਨੇ ਆਸਾਨੀ ਨਾਲ ਹਾਸਲ ਕਰ ਲਿਆ ਅਤੇ 10 ਵਿਕਟਾਂ ਨਾਲ ਜਿੱਤ ਹਾਸਲ ਕਰ ਲਈ। ਇੰਨਾ ਹੀ ਨਹੀਂ ਬਾਰਡਰ-ਗਾਵਸਕਰ ਟਰਾਫੀ ‘ਚ ਵੀ 1-1 ਦੀ ਬਰਾਬਰੀ ਹੈ।
ਐਡੀਲੇਡ ਓਵਲ ਮੈਦਾਨ ‘ਤੇ ਮੈਚ ਦੇ ਤੀਜੇ ਦਿਨ ਹੀ ਟੀਮ ਇੰਡੀਆ ਦੀ ਖੇਡ ਖਤਮ ਹੋ ਗਈ। ਐਤਵਾਰ 8 ਦਸੰਬਰ ਨੂੰ ਟੀਮ ਇੰਡੀਆ ਨੇ 5 ਵਿਕਟਾਂ ‘ਤੇ 128 ਦੌੜਾਂ ਦੇ ਸਕੋਰ ਨਾਲ ਆਪਣੀ ਦੂਜੀ ਪਾਰੀ ਦੀ ਸ਼ੁਰੂਆਤ ਕੀਤੀ। ਰਿਸ਼ਭ ਪੰਤ ਅਤੇ ਨਿਤੀਸ਼ ਕੁਮਾਰ ਰੈੱਡੀ ਕਰੀਜ਼ ‘ਤੇ ਸਨ। ਨਤੀਜਾ ਪਹਿਲਾਂ ਹੀ ਸਾਫ਼ ਦਿਖਾਈ ਦੇ ਰਿਹਾ ਸੀ ਪਰ ਉਮੀਦ ਸੀ ਕਿ ਪੰਤ ਅਤੇ ਰੈੱਡੀ ਆਸਟਰੇਲੀਆ ਨੂੰ ਇਸ ਨਤੀਜੇ ਲਈ ਲੰਬਾ ਸਮਾਂ ਉਡੀਕ ਕਰਵਾਉਣਗੇ। ਪਰ ਅਜਿਹਾ ਨਹੀਂ ਹੋ ਸਕਿਆ ਕਿਉਂਕਿ ਮਿਸ਼ੇਲ ਸਟਾਰਕ ਨੇ ਜਲਦੀ ਹੀ ਪੰਤ ਨੂੰ ਪੈਵੇਲੀਅਨ ਵਾਪਸ ਭੇਜ ਦਿੱਤਾ।
ਦੋਵੇਂ ਪਾਰੀਆਂ ਵਿੱਚ 200 ਦੌੜਾਂ ਨਹੀਂ ਬਣਾ ਸਕਿਆ ਭਾਰਤ
ਇੱਥੋਂ ਇਹ ਤੈਅ ਹੋ ਗਿਆ ਸੀ ਕਿ ਇਹ ਮੈਚ ਜ਼ਿਆਦਾ ਦੇਰ ਨਹੀਂ ਚੱਲੇਗਾ ਅਤੇ ਆਸਟਰੇਲੀਆਈ ਕਪਤਾਨ ਪੈਟ ਕਮਿੰਸ ਨੇ ਇਸ ਦੀ ਜ਼ਿੰਮੇਵਾਰੀ ਲਈ ਹੈ। ਉਸ ਨੇ ਜਲਦੀ ਹੀ ਰਵੀਚੰਦਰਨ ਅਸ਼ਵਿਨ ਅਤੇ ਹਰਸ਼ਿਤ ਰਾਣਾ ਨੂੰ ਵੀ ਆਊਟ ਕਰ ਦਿੱਤਾ। ਉੱਧਰ, ਨਿਤੀਸ਼ ਨੇ ਆਪਣਾ ਦਮਦਾਰ ਪ੍ਰਦਰਸ਼ਨ ਜਾਰੀ ਰੱਖਿਆ ਅਤੇ ਕੁਝ ਸ਼ਾਨਦਾਰ ਸ਼ਾਟ ਲਗਾ ਕੇ ਟੀਮ ਨੂੰ 157 ਦੌੜਾਂ ਤੋਂ ਪਾਰ ਪਹੁਚਾਉਂਦਿਆਂ ਪਾਰੀ ਦੀ ਹਾਰ ਦੇ ਖ਼ਤਰੇ ਨੂੰ ਟਾਲ ਦਿੱਤਾ। ਹਾਲਾਂਕਿ ਕਮਿੰਸ ਨੇ ਰੈੱਡੀ ਨੂੰ ਆਊਟ ਕਰਕੇ ਆਪਣੀਆਂ 5 ਵਿਕਟਾਂ ਪੂਰੀਆਂ ਕੀਤੀਆਂ। ਆਖ਼ਰੀ ਵਿਕਟ ਸਕਾਟ ਬੋਲੈਂਡ ਦੇ ਹੱਥ ਲੱਗੀ, ਜਿਸ ਨੇ ਪਹਿਲੀ ਪਾਰੀ ਵਾਂਗ ਦੂਜੀ ਪਾਰੀ ਵਿੱਚ ਵੀ ਟਾਪ ਆਰਡਰ ਦੀਆਂ ਅਹਿਮ ਵਿਕਟਾਂ ਲਈਆਂ ਸਨ। ਪੂਰੀ ਭਾਰਤੀ ਟੀਮ ਸਿਰਫ 175 ਦੌੜਾਂ ‘ਤੇ ਆਊਟ ਹੋ ਗਈ ਅਤੇ ਇਸ ਤਰ੍ਹਾਂ ਟੀਮ ਇੰਡੀਆ ਦੋਵੇਂ ਪਾਰੀਆਂ ‘ਚ 200 ਦੌੜਾਂ ਦਾ ਅੰਕੜਾ ਵੀ ਪਾਰ ਨਹੀਂ ਕਰ ਸਕੀ।
ਪਹਿਲੀ ਪਾਰੀ ‘ਚ ਟੀਮ ਇੰਡੀਆ ਸਿਰਫ 180 ਦੌੜਾਂ ‘ਤੇ ਹੀ ਢੇਰ ਹੋ ਗਈ ਸੀ। ਟੀਮ ‘ਚ ਵਾਪਸੀ ਕਰਨ ਵਾਲੇ ਕਪਤਾਨ ਰੋਹਿਤ ਸ਼ਰਮਾ ਦੋਵੇਂ ਪਾਰੀਆਂ ‘ਚ ਅਸਫਲ ਰਹੇ। ਮਿਡਲ ਆਰਡਰ ‘ਚ ਉਨ੍ਹਾਂ ਦਾ ਖੇਡਣਾ ਵੀ ਟੀਮ ਨੂੰ ਕੋਈ ਫਾਇਦਾ ਨਹੀਂ ਨਹੀਂ ਪਹੁੰਚਾ ਸਕਿਆ ਅਤੇ ਉਹ ਦੋਵੇਂ ਪਾਰੀਆਂ ‘ਚ ਮਿਲਾ ਕੇ ਸਿਰਫ 9 ਦੌੜਾਂ ਹੀ ਬਣਾ ਸਕੇ। ਉਥੇ ਹੀ ਪਰਥ ਟੈਸਟ ਦੇ ਸਟਾਰ ਯਸ਼ਸਵੀ ਜੈਸਵਾਲ ਅਤੇ ਵਿਰਾਟ ਕੋਹਲੀ ਵੀ ਇਸ ਮੈਚ ‘ਚ ਅਸਫਲ ਰਹੇ। ਭਾਰਤ ਲਈ ਨੌਜਵਾਨ ਆਲਰਾਊਂਡਰ ਨਿਤੀਸ਼ ਕੁਮਾਰ ਰੈੱਡੀ ਨੇ ਦੋਵੇਂ ਪਾਰੀਆਂ ਵਿੱਚ ਸਭ ਤੋਂ ਵੱਧ ਦੌੜਾਂ ਬਣਾਈਆਂ। ਉਨ੍ਹਾਂ ਨੇ ਦੋਵੇਂ ਪਾਰੀਆਂ ਵਿੱਚ 42-42 ਦੌੜਾਂ ਬਣਾਈਆਂ। ਟੀਮ ਇੰਡੀਆ ਦਾ ਬੁਰਾ ਹਸ਼ਰ ਕਰਨ ‘ਚ ਮਿਸ਼ੇਲ ਸਟਾਰਕ ਦੀ ਵੱਡੀ ਭੂਮਿਕਾ ਰਹੀ, ਜਿਨ੍ਹਾਂ ਨੇ 6 ਵਿਕਟਾਂ ਲਈਆਂ।
ਹੈੱਡ ਦਾ ਸੈਂਕੜਾ, ਨਹੀਂ ਚੱਲੇ ਭਾਰਤੀ ਗੇਂਦਬਾਜ਼
ਉਥੇ ਹੀ ਆਸਟ੍ਰੇਲੀਆ ਨੇ ਪਹਿਲੀ ਪਾਰੀ ‘ਚ ਹੀ 337 ਦੌੜਾਂ ਬਣਾ ਕੇ ਟੀਮ ਇੰਡੀਆ ਨੂੰ ਮੈਚ ‘ਚੋਂ ਬਾਹਰ ਕਰ ਦਿੱਤਾ ਸੀ। ਉਸ ਦੇ ਲਈ ਟ੍ਰੈਵਿਸ ਹੈੱਡ ਨੇ 140 ਦੌੜਾਂ ਦੀ ਸ਼ਾਨਦਾਰ ਪਾਰੀ ਖੇਡੀ, ਉਥੇ ਹੀ ਮਾਰਨਸ ਲੈਬੁਸ਼ਗਨ ਨੇ ਵੀ ਸ਼ਾਨਦਾਰ ਪਾਰੀ ਖੇਡੀ। ਟੀਮ ਇੰਡੀਆ ਦੀ ਗੇਂਦਬਾਜ਼ੀ ਬਿਲਕੁਲ ਵੀ ਚੰਗੀ ਨਹੀਂ ਰਹੀ। ਜਸਪ੍ਰੀਤ ਬੁਮਰਾਹ ਇਕ ਵਾਰ ਫਿਰ ਸਭ ਤੋਂ ਪ੍ਰਭਾਵਸ਼ਾਲੀ ਰਹੇ ਪਰ ਮੁਹੰਮਦ ਸਿਰਾਜ ਅਤੇ ਹਰਸ਼ਿਤ ਰਾਣਾ ਨੇ ਕਾਫੀ ਨਿਰਾਸ਼ ਕੀਤਾ। ਹਰਸ਼ਿਤ ਦੀ ਚੋਣ ‘ਤੇ ਪਹਿਲਾਂ ਹੀ ਸਵਾਲ ਉੱਠ ਰਹੇ ਸਨ ਅਤੇ ਇਸ ਦਾ ਕਾਰਨ ਵੀ ਸਾਹਮਣੇ ਆ ਗਿਆ।