IPL 2026: ਚੇਨਈ ਨੇ ਮੁੰਬਈ ਨੂੰ ਫਿਰ ਚਟਾਈ ਧੂੜ; ਸੀਜ਼ਨ ‘ਚ ਲਗਾਤਾਰ ਦੂਜੀ ਵਾਰ ਹਰਾ ਕੇ ਦਰਜ ਕੀਤੀ ਚੌਥੀ ਜਿੱਤ

Image Credit source: PTI

ਚੇਨਈ ਸੁਪਰ ਕਿੰਗਜ਼ (CSK) ਨੇ ਆਈ.ਪੀ.ਐੱਲ. 2026 ਦੇ ਸੀਜ਼ਨ ਵਿੱਚ ਆਪਣੀ ਸਭ ਤੋਂ ਕੱਟੜ ਵਿਰੋਧੀ ਟੀਮ ਮੁੰਬਈ ਇੰਡੀਅਨਜ਼ (MI) ਵਿਰੁੱਧ ਦਬਦਬਾ ਬਣਾਉਂਦੇ ਹੋਏ ਦੋਵੇਂ ਮੈਚ ਜਿੱਤ ਲਏ ਹਨ। ਕੁਝ ਦਿਨ ਪਹਿਲਾਂ ਮੁੰਬਈ ਨੂੰ ਉਸ ਦੇ ਘਰ ਵਾਨਖੇੜੇ ਸਟੇਡੀਅਮ ਵਿੱਚ ਬੁਰੀ ਤਰ੍ਹਾਂ ਹਰਾਉਣ ਤੋਂ ਬਾਅਦ, ਚੇਨਈ ਨੇ ਇਸ ਵਾਰ ਆਪਣੇ ਹੋਮ ਗਰਾਊਂਡ ਚੇਪੌਕ ਸਟੇਡੀਅਮ ਵਿੱਚ ਵੀ ਆਸਾਨ ਜਿੱਤ ਦਰਜ ਕੀਤੀ ਹੈ। ਆਈ.ਪੀ.ਐੱਲ. 2026 ਦੇ 44ਵੇਂ ਮੈਚ ਵਿੱਚ ਚੇਨਈ ਨੇ ਅੰਸ਼ੁਲ ਕੰਬੋਜ, ਨੂਰ ਅਹਿਮਦ ਅਤੇ ਕਪਤਾਨ ਰੁਤੂਰਾਜ ਗਾਇਕਵਾੜ ਦੇ ਦਮਦਾਰ ਪ੍ਰਦਰਸ਼ਨ ਦੀ ਬਦੌਲਤ 8 ਵਿਕਟਾਂ ਨਾਲ ਜਿੱਤ ਹਾਸਲ ਕੀਤੀ। ਦੂਜੇ ਪਾਸੇ ਮੁੰਬਈ ਇੰਡੀਅਨਜ਼ ਨੂੰ ਇਸ ਸੀਜ਼ਨ ਵਿੱਚ ਆਪਣੀ 7ਵੀਂ ਹਾਰ ਦਾ ਸਾਹਮਣਾ ਕਰਨਾ ਪਿਆ।

ਮੁੰਬਈ ਦੀ ਬੱਲੇਬਾਜ਼ੀ ਰਹੀ ਫਲਾਪ

ਸ਼ਨੀਵਾਰ, 2 ਮਈ ਨੂੰ ਖੇਡੇ ਗਏ ਇਸ ਮੁਕਾਬਲੇ ਵਿੱਚ ਮੁੰਬਈ ਦੇ ਕਪਤਾਨ ਹਾਰਦਿਕ ਪੰਡਯਾ ਨੇ ਟਾਸ ਜਿੱਤ ਕੇ ਪਹਿਲਾਂ ਬੱਲੇਬਾਜ਼ੀ ਕਰਨ ਦਾ ਫੈਸਲਾ ਕੀਤਾ ਸੀ। ਹਾਲਾਂਕਿ, ਟੀਮ ਇਸ ਦਾ ਫਾਇਦਾ ਨਹੀਂ ਉਠਾ ਸਕੀ ਅਤੇ 20 ਓਵਰਾਂ ਵਿੱਚ 7 ਵਿਕਟਾਂ ਗੁਆ ਕੇ ਸਿਰਫ 159 ਰਨ ਹੀ ਬਣਾ ਸਕੀ। ਮੁੰਬਈ ਲਈ ਨਮਨ ਧੀਰ ਨੇ 57 ਰਨਾਂ ਦੀ ਪਾਰੀ ਖੇਡੀ, ਜਦਕਿ ਸਲਾਮੀ ਬੱਲੇਬਾਜ਼ ਰਾਇਨ ਰਿਕਲਟਨ ਨੇ ਤੇਜ਼ੀ ਨਾਲ 37 ਰਨ ਜੋੜੇ। ਪਰ ਕਪਤਾਨ ਹਾਰਦਿਕ ਪੰਡਯਾ ਨੇ 23 ਗੇਂਦਾਂ ਵਿੱਚ ਸਿਰਫ 18 ਰਨ ਬਣਾ ਕੇ ਟੀਮ ਦੀ ਰਫ਼ਤਾਰ ਨੂੰ ਹੌਲੀ ਕਰ ਦਿੱਤਾ।

ਚੇਨਈ ਦੇ ਗੇਂਦਬਾਜ਼ਾਂ ਦਾ ਕਮਾਲ

ਗੇਂਦਬਾਜ਼ੀ ਦੀ ਗੱਲ ਕਰੀਏ ਤਾਂ ਚੇਨਈ ਲਈ ਤੇਜ਼ ਗੇਂਦਬਾਜ਼ ਅੰਸ਼ੁਲ ਕੰਬੋਜ ਨੇ ਇੱਕ ਵਾਰ ਫਿਰ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ। ਉਨ੍ਹਾਂ ਨੇ ਆਪਣੇ 4 ਓਵਰਾਂ ਵਿੱਚ ਸਿਰਫ 32 ਰਨ ਦੇ ਕੇ 3 ਅਹਿਮ ਵਿਕਟਾਂ ਲਈਆਂ। ਸਪਿਨਰ ਨੂਰ ਅਹਿਮਦ ਨੇ ਵੀ ਬਿਹਤਰੀਨ ਗੇਂਦਬਾਜ਼ੀ ਕਰਦਿਆਂ ਸਿਰਫ 26 ਰਨ ਖਰਚ ਕੇ 2 ਸ਼ਿਕਾਰ ਕੀਤੇ। ਇਨ੍ਹਾਂ ਤੋਂ ਇਲਾਵਾ ਜੇਮੀ ਓਵਰਟਨ (1/23) ਦਾ ਸਪੈੱਲ ਵੀ ਕਾਫੀ ਪ੍ਰਭਾਵਸ਼ਾਲੀ ਰਿਹਾ।

ਗਾਇਕਵਾੜ ਅਤੇ ਕਾਰਤਿਕ ਸ਼ਰਮਾ ਦੀ ਇਤਿਹਾਸਕ ਸਾਂਝੇਦਾਰੀ

160 ਰਨਾਂ ਦੇ ਟੀਚੇ ਦਾ ਪਿੱਛਾ ਕਰਨ ਉਤਰੀ ਚੇਨਈ ਦੀ ਸ਼ੁਰੂਆਤ ਥੋੜੀ ਖਰਾਬ ਰਹੀ। ਦੂਜੇ ਹੀ ਓਵਰ ਵਿੱਚ ਜਸਪ੍ਰੀਤ ਬੁਮਰਾਹ ਨੇ ਸ਼ਾਨਦਾਰ ਫਾਰਮ ਵਿੱਚ ਚੱਲ ਰਹੇ ਸੰਜੂ ਸੈਮਸਨ ਨੂੰ ਆਊਟ ਕਰ ਦਿੱਤਾ। ਪਰ ਕਪਤਾਨ ਰੁਤੂਰਾਜ ਗਾਇਕਵਾੜ ਨੇ ਇੱਕ ਸਿਰੇ ਤੋਂ ਮੋਰਚਾ ਸੰਭਾਲੀ ਰੱਖਿਆ। ਉਰਵਿਲ ਪਟੇਲ ਨੇ 49 ਰਨਾਂ ਦੀ ਸਾਂਝੇਦਾਰੀ ਕਰਕੇ ਕਪਤਾਨ ਦਾ ਸਾਥ ਦਿੱਤਾ।

ਅਸਲੀ ਖੇਡ ਉਦੋਂ ਦੇਖਣ ਨੂੰ ਮਿਲੀ ਜਦੋਂ ‘ਇੰਪੈਕਟ ਪਲੇਅਰ’ ਵਜੋਂ ਆਏ ਨੌਜਵਾਨ ਬੱਲੇਬਾਜ਼ ਕਾਰਤਿਕ ਸ਼ਰਮਾ ਅਤੇ ਗਾਇਕਵਾੜ ਵਿਚਾਲੇ ਸਾਂਝੇਦਾਰੀ ਹੋਈ। ਦੋਵਾਂ ਨੇ ਮੁੰਬਈ ਦੇ ਗੇਂਦਬਾਜ਼ਾਂ ਨੂੰ ਵਾਪਸੀ ਦਾ ਕੋਈ ਮੌਕਾ ਨਹੀਂ ਦਿੱਤਾ। ਗਾਇਕਵਾੜ ਨੇ ਆਪਣਾ ਲਗਾਤਾਰ ਦੂਜਾ ਅਰਧ ਸੈਂਕੜਾ ਪੂਰਾ ਕੀਤਾ, ਜਦਕਿ ਕਾਰਤਿਕ ਸ਼ਰਮਾ ਨੇ ਵੀ ਆਪਣੀ ਪਹਿਲੀ ਆਈ.ਪੀ.ਐੱਲ. ਫਿਫਟੀ ਜੜੀ। ਦੋਵਾਂ ਵਿਚਾਲੇ ਹੋਈ 98 ਰਨਾਂ ਦੀ ਅਜੇਤੂ ਸਾਂਝੇਦਾਰੀ ਦੀ ਬਦੌਲਤ ਚੇਨਈ ਨੇ 18.1 ਓਵਰਾਂ ਵਿੱਚ ਹੀ ਟੀਚਾ ਹਾਸਲ ਕਰ ਲਿਆ ਅਤੇ ਸੀਜ਼ਨ ਦੀ ਚੌਥੀ ਜਿੱਤ ਦਰਜ ਕੀਤੀ।