ਅਕਾਸ਼ਦੀਪ ਸਿੰਘ: ਭਰਾ ਵੱਲੋਂ ਵਿਖਾਏ ਰਸਤੇ ਤੇ ਤੁਰ ਕੇ ਸ਼ੁਰੂ ਕੀਤਾ ਸੀ ਹਾਕੀ ਖੇਡਨਾ, ਛੋਟੇ ਜਿਹੇ ਪਿੰਡ ਤੋਂ ਨਿਕਲ ਕੇ ਬਣਿਆ ਟੀਮ ਇੰਡੀਆ ਦਾ ਹੀਰੋ

ਭਾਰਤੀ ਟੀਮ ਦੇ ਅਨੁਭਵੀ ਫਾਰਵਰਡ ਹਾਕੀ ਖਿਲਾੜੀ ਆਕਾਸ਼ਦੀਪ ਸਿੰਘ ਲੰਬੇ ਸਮੇਂ ਤੋਂ ਇੰਟਰਨੈਸ਼ਨਲ ਲੈਵਲ ਉੱਤੇ ਆਪਣੇ ਦੇਸ਼ ਦਾ ਨਾਂ ਚਮਕਾ ਰਹੇ ਹਨ। ਹਰ ਖਿਲਾੜੀ ਦੀ ਜ਼ਿੰਦਗੀ ਵਿਚ ਇਹੋ ਜਿਹਾ ਕੋਈ ਨਾ ਕੋਈ ਵਿਅਕਤੀ ਹੁੰਦਾ ਹੈ ਜੋ ਉਸ ਨੂੰ ਖਿਲਾੜੀ ਬਣਨ ਦੀ ਪ੍ਰੇਰਨਾ ਦਿੰਦਾ ਹੈ। ਪੰਜਾਬ ਦੇ ਇਕ ਛੋਟੇ ਜਿਹੇ ਪਿੰਡ ਦੇ ਰਹਿਣ ਵਾਲੇ ਅਕਾਸ਼ਦੀਪ ਨੂੰ ਇਹ ਪ੍ਰੇਰਣਾ ਆਪਣੇ ਭਰਾ ਵੱਲੋਂ ਮਿਲੀ ਸੀ। ਉਨ੍ਹਾਂ ਨੇ 9 ਸਾਲ ਦੀ ਉਮਰ ਵਿੱਚ ਹਾਕੀ ਖੇਡਣਾ ਸ਼ੁਰੂ ਕੀਤਾ ਤੇ ਸਾਲ 2015 ਵਿੱਚ ਹਾਕੀ ਇੰਡੀਆ ਲੀਗ ਦੇ ਸਭ ਤੋਂ ਮਹਿੰਗੇ ਖਿਲਾੜੀ ਬਣ ਗਏ। ਅਕਾਸ਼ਦੀਪ ਭਾਰਤ ਵਾਸਤੇ ਕਈ ਵੱਡੇ-ਵੱਡੇ ਹਾਕੀ ਮੁਕਾਬਲੇ ਖੇਡ ਚੁੱਕੇ ਹਨ। ਭਾਵੇਂ ਏਸ਼ੀਅਨ ਗੇਮਸ ਹੋਣ, ਕਾਮਨਵੈਲਥ ਗੇਮਸ ਹੋਣ, ਏਸ਼ੀਆ ਕੱਪ ਹੋਵੇ ਜਾਂ ਚੈਂਪੀਅਨ ਟ੍ਰਾਫ਼ੀ ਹੋਵੇ, ਅਕਾਸ਼ਦੀਪ ਹਰ ਵੱਡੇ ਮੁਕਾਬਲਿਆਂ ਵਿਚ ਹਿੱਸਾ ਲੈ ਚੁੱਕੇ ਹਨ। ਉਹਨਾਂ ਨੇ ਸਾਲ 2012 ਤੋਂ ਲੈ ਕੇ ਹੁਣ ਤਕ ਭਾਰਤੀ ਟੀਮ ਨੂੰ ਕਈ ਵੱਡੇ-ਵੱਡੇ ਹਾਕੀ ਮੁਕਾਬਲੇ ਜਿੱਤਵਾਏ ਹਨ ਅਤੇ ਇਹੀ ਵਜ੍ਹਾ ਹੈ ਕਿ ਉਹ ਹੁਣ ਟੀਮ ਇੰਡੀਆ ਦੀ ਰੀੜ੍ਹ ਬਣ ਚੁੱਕੇ ਹਨ। ਪਿਛਲੇ ਸਾਲ ਭਾਰਤ ਸਰਕਾਰ ਵੱਲੋਂ ਉਹਨਾਂ ਨੂੰ ਅਰਜੁਨ ਐਵਾਰਡ ਨਾਲ ਸਨਮਾਨਿਤ ਕੀਤਾ ਗਿਆ ਸੀ।

ਭਰਾ ਨੂੰ ਵੇਖ ਕੇ ਸ਼ੁਰੂ ਕੀਤਾ ਸੀ ਹਾਕੀ ਖੇਡਣਾ

ਅਕਾਸ਼ਦੀਪ ਸਿੰਘ ਦਾ ਜਨਮ ਵੈਰੋਵਾਲ ਨਾਂ ਦੇ ਛੋਟੇ ਜਿਹੇ ਪਿੰਡ ਵਿੱਚ ਹੋਇਆ ਸੀ। ਅੱਜ ਦੀ ਤਰੀਕ ਵਿੱਚ ਅਕਾਸ਼ਦੀਪ ਨਾ ਸਿਰਫ਼ ਅਪਣੇ ਪਿੰਡ ਬਲਕਿ ਪੂਰੇ ਖਡੂਰ ਸਾਹਿਬ ਦਾ ਇਕ ਵੱਡਾ ਸਟਾਰ ਹੈ। ਉਹਨਾਂ ਦਾ ਹਾਕੀ ਖੇਡਣ ਦਾ ਸਫ਼ਰ ਉੱਤਮ ਸਿੰਘ ਸੀਨੀਅਰ ਸਕੂਲ ਵਿੱਚ ਸ਼ੁਰੂ ਹੋਇਆ ਸੀ। ਸਭ ਤੋਂ ਪਹਿਲੀ ਵਾਰੀ ਉਹਨਾਂ ਨੇ ਹਾਕੀ ਚੌਥੀ ਕਲਾਸ ਵਿੱਚ ਖੇਡੀ ਸੀ। ਉਨ੍ਹਾਂ ਦੇ ਵੱਡੇ ਭਰਾ ਪ੍ਰਭਦੀਪ ਸਿੰਘ ਵੀ ਟੀਮ ਇੰਡੀਆ ਵਾਸਤੇ ਖੇਡ ਚੁੱਕੇ ਹਨ। ਵਰਸ਼ 2006 ਦੇ ਵਿੱਚ ਅਕਾਸ਼ਦੀਪ ਆਪਣੇ ਭਰਾ ਦੇ ਕਹਿਣ ਤੇ ਹੀ ਲੁਧਿਆਣਾ ਦੀ ਪੀਏਯੂ ਵਿੱਚ ਗਏ ਸੀ ਅਤੇ ਓਥੋਂ ਦੀ ਜਲੰਧਰ ਦੀ ਨਾਮਵਰ ਸੁਰਜੀਤ ਹਾਕੀ ਅਕਾਡਮੀ ਚਲੇ ਗਏ। 2013 ਵਿੱਚ ਉਹਨਾਂ ਨੂੰ ਹਾਕੀ ਇੰਡੀਆ ਲੀਗ ਵਾਸਤੇ ਦਿੱਲੀ ਵੇਵਰਾਈਡਰ ਨੇ ਖ਼ਰੀਦ ਲਿਆ ਸੀ। ਦੋ ਵਰ੍ਹਿਆਂ ਬਾਅਦ ਉਹਨਾਂ ਨੂੰ ਕਰੀਬ 60 ਲੱਖ ਰੁਪਏ ਵਿੱਚ ਖਰੀਦਿਆ ਗਿਆ ਸੀ ਜੋ ਉਸ ਵੇਲੇ ਕਿਸੇ ਹਾਕੀ ਖਿਲਾੜੀ ਨੂੰ ਦਿੱਤੀ ਸਭ ਤੋਂ ਵੱਡੀ ਰਕਮ ਹੈ। ਸਾਲ 2014 ਵਿੱਚ ਉਹਨਾਂ ਨੂੰ ਹਾਕੀ ਵੱਲਡ ਕੱਪ ਵਾਸਤੇ ਚੁਣਿਆ ਗਿਆ ਸੀ ਜੋ ਹਾਲੈਂਡ ਵਿੱਚ ਹੋਇਆ ਸੀ ਅਤੇ ਉਥੇ ਉਹ ਟੀਮ ਇੰਡੀਆ ਦੀ ਫਾਰਵਾਰਡ ਲਾਈਨ ਦਾ ਮੁੱਖ ਹਿੱਸਾ ਬਣ ਗਏ।

ਪੰਜਾਬ ਵਿੱਚ ਖੇਡਾਂ ਨੂੰ ਅੱਗੇ ਵਧਾਉਣਾ ਹੀ ਅਕਾਸ਼ਦੀਪ ਦੀ ਪ੍ਰਾਥਮਿਕਤਾ ਹੈ

ਅਕਾਸ਼ਦੀਪ ਨੇ ਅੰਡਰ-23 ਅਤੇ ਜੂਨੀਅਰ ਟੀਮ ਸਹਿਤ ਨੌਜਵਾਨ ਟੀਮਾਂ ਦੀ ਦੇਸ਼ ਵਾਸਤੇ ਕਪਤਾਨੀ ਕੀਤੀ ਹੈ। ਅਕਾਸ਼ਦੀਪ 2014 ਵਿੱਚ ਇੰਚਿਓਂਨ ਏਸ਼ੀਅਨ ਗੇਮ ਦੀ ਗੋਲਡ ਮੈਡਲਿਸਟ ਅਤੇ 2018 ਵਿਚ ਜਕਾਰਤਾ ਮੁਕਾਬਲੇ ਵਿੱਚ ਕਾਂਸ ਪਦਕ ਜਿੱਤਣ ਵਾਲੀ ਭਾਰਤੀ ਹਾਕੀ ਟੀਮ ਦਾ ਹਿੱਸਾ ਰਹੇ ਸਨ। 2016 ਵਿਚ ਹਾਕੀ ਚੈਂਪੀਅਨ ਟਰਾਫੀ ਵਿਚ ਵੀ ਅਕਾਸ਼ਦੀਪ ਸਿਲਵਰ ਮੈਡਲਿਸਟ ਰਹੇ ਸਨ। ਅਕਾਸ਼ਦੀਪ ਦਾ ਕਹਿਣਾ ਹੈ ਕਿ ਪੰਜਾਬ ਵਿੱਚ ਨਸ਼ਾ ਹਮੇਸ਼ਾ ਤੋਂ ਹੀ ਇੱਕ ਵੱਡਾ ਮਸਲਾ ਰਿਹਾ ਹੈ। ਉਹ ਕਈ ਵਾਰ ਸਰਕਾਰ ਨੂੰ ਅਪੀਲ ਕਰ ਚੁੱਕੇ ਹਨ ਕਿ ਨੌਜਵਾਨਾਂ ਨੂੰ ਨਸ਼ਾਖੋਰੀ ਤੋਂ ਬਾਹਰ ਕੱਢਣ ਦਾ ਇਕੋ ਹੀ ਤਰੀਕਾ ਹੈ ਕਿ ਉਨ੍ਹਾਂ ਨੂੰ ਖੇਡਾਂ ਨਾਲ ਜੋੜਿਆ ਜਾਵੇ।