Holika Dahan 2026 kab Hai: 2 ਜਾਂ 3 ਮਾਰਚ? ਇਸ ਵਾਰ ਬਦਲ ਗਈ ਹੋਲਿਕਾ ਦਹਿਨ ਦੀ ਤਰੀਕ; ਜਾਣੋ ਸਹੀ ਦਿਨ ਅਤੇ ਸ਼ੁਭ ਮਹੂਰਤ

Image Credit source: PTI

ਹਰ ਸਾਲ ਫੱਗਣ ਮਹੀਨੇ ਵਿੱਚ ਮਨਾਇਆ ਜਾਣ ਵਾਲਾ ਹੋਲੀ ਦਾ ਤਿਉਹਾਰ ਖੁਸ਼ੀਆਂ, ਰੰਗਾਂ ਅਤੇ ਆਪਸੀ ਪਿਆਰ ਦਾ ਪ੍ਰਤੀਕ ਮੰਨਿਆ ਜਾਂਦਾ ਹੈ। ਪਰ ਸਾਲ 2026 ਵਿੱਚ ਹੋਲਿਕਾ ਦਹਿਨ ਅਤੇ ਹੋਲੀ ਦੀ ਤਰੀਕ ਨੂੰ ਲੈ ਕੇ ਲੋਕਾਂ ਵਿੱਚ ਕਾਫੀ ਭੰਬਲਭੂਸਾ ਬਣਿਆ ਹੋਇਆ ਹੈ। ਇਸ ਦਾ ਮੁੱਖ ਕਾਰਨ ਇਸ ਵਾਰ ਬਣ ਰਿਹਾ ‘ਭਦਰਾ ਕਾਲ’ ਅਤੇ ਸਾਲ ਦਾ ਪਹਿਲਾ ‘ਚੰਦਰ ਗ੍ਰਹਿਣ’ ਦੱਸਿਆ ਜਾ ਰਿਹਾ ਹੈ। ਜੋਤਿਸ਼ਾਚਾਰੀਆਂ ਅਨੁਸਾਰ, ਇਨ੍ਹਾਂ ਦੋਵਾਂ ਖਗੋਲੀ ਸਥਿਤੀਆਂ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਇਸ ਵਾਰ ਹੋਲਿਕਾ ਦਹਿਨ ਦਾ ਸ਼ੁਭ ਸਮਾਂ ਥੋੜ੍ਹਾ ਬਦਲ ਗਿਆ ਹੈ।

ਪੰਚਾਂਗ ਅਨੁਸਾਰ, ਫੱਗਣ ਮਹੀਨੇ ਦੀ ਪੂਰਨਮਾਸ਼ੀ ਨੂੰ ਹੋਲਿਕਾ ਦਹਿਨ ਕੀਤਾ ਜਾਂਦਾ ਹੈ। ਪਰ ਇਸ ਵਾਰ 2 ਮਾਰਚ ਦੀ ਸ਼ਾਮ ਨੂੰ ਭਦਰਾ ਦਾ ਪ੍ਰਭਾਵ ਰਹਿਣ ਕਾਰਨ ਸ਼ਾਮ ਦੇ ਸਮੇਂ ਦਹਿਨ ਕਰਨਾ ਵਰਜਿਤ ਮੰਨਿਆ ਜਾ ਰਿਹਾ ਹੈ। ਇਸ ਦੇ ਨਾਲ ਹੀ, 3 ਮਾਰਚ 2026 ਨੂੰ ਸਾਲ ਦਾ ਪਹਿਲਾ ਚੰਦਰ ਗ੍ਰਹਿਣ ਲੱਗ ਰਿਹਾ ਹੈ, ਜਿਸ ਕਾਰਨ ਸੂਤਕ ਕਾਲ ਅਤੇ ਗ੍ਰਹਿਣ ਦੇ ਨਿਯਮਾਂ ਦੀ ਪਾਲਣਾ ਕਰਨੀ ਹੋਵੇਗੀ।

ਕਦੋਂ ਕੀਤਾ ਜਾਵੇਗਾ ਹੋਲਿਕਾ ਦਹਿਨ?

ਪੰਚਾਂਗ ਅਤੇ ਜੋਤਿਸ਼ ਗਣਨਾ ਅਨੁਸਾਰ, ਇਸ ਵਾਰ ਹੋਲਿਕਾ ਦਹਿਨ 2 ਮਾਰਚ 2026 ਦੀ ਰਾਤ ਨੂੰ ਕੀਤਾ ਜਾਵੇਗਾ। ਹਾਲਾਂਕਿ, ਸ਼ੁਭ ਮਹੂਰਤ ਦੇਰ ਰਾਤ ਯਾਨੀ 3 ਮਾਰਚ ਦੀ ਬ੍ਰਹਮ ਮਹੂਰਤ ਮਿਆਦ ਵਿੱਚ ਰਹੇਗਾ। ਜੋਤਿਸ਼ੀਆਂ ਅਨੁਸਾਰ, 3 ਮਾਰਚ ਦੀ ਰਾਤ 12:50 AM ਤੋਂ 02:02 AM ਤੱਕ ਹੋਲਿਕਾ ਦਹਿਨ ਕਰਨਾ ਸਭ ਤੋਂ ਸ਼ੁਭ ਮੰਨਿਆ ਜਾ ਰਿਹਾ ਹੈ। ਇਸ ਸਮੇਂ ਵਿੱਚ ਹੋਲਿਕਾ ਦਹਿਨ ਕਰਨ ਨਾਲ ਭਦਰਾ ਅਤੇ ਗ੍ਰਹਿਣ ਦਾ ਦੋਸ਼ ਨਹੀਂ ਲੱਗਦਾ ਅਤੇ ਪੂਜਾ ਦਾ ਪੂਰਾ ਫਲ ਮਿਲਦਾ ਹੈ।

ਕਿਉਂ ਬਦਲੀ ਹੋਲਿਕਾ ਦਹਿਨ ਦੀ ਤਰੀਕ?

ਹਿੰਦੂ ਧਰਮ ਵਿੱਚ ਕਿਸੇ ਵੀ ਸ਼ੁਭ ਕੰਮ ਨੂੰ ਕਰਨ ਤੋਂ ਪਹਿਲਾਂ ਭਦਰਾ ਕਾਲ ਦਾ ਵਿਸ਼ੇਸ਼ ਧਿਆਨ ਰੱਖਿਆ ਜਾਂਦਾ ਹੈ। ਮਾਨਤਾ ਹੈ ਕਿ ਭਦਰਾ ਕਾਲ ਵਿੱਚ ਕੀਤੇ ਗਏ ਸ਼ੁਭ ਕੰਮ ਅਸ਼ੁਭ ਨਤੀਜੇ ਦੇ ਸਕਦੇ ਹਨ। ਇਸ ਵਾਰ 2 ਮਾਰਚ ਨੂੰ ਭਦਰਾ ਦਾ ਪ੍ਰਭਾਵ ਰਹਿਣ ਕਾਰਨ ਦਿਨ ਵਿੱਚ ਜਾਂ ਸ਼ਾਮ ਨੂੰ ਹੋਲਿਕਾ ਦਹਿਨ ਕਰਨਾ ਸ਼ੁਭ ਨਹੀਂ ਮੰਨਿਆ ਜਾ ਰਿਹਾ। ਇਸੇ ਕਾਰਨ ਜੋਤਿਸ਼ਾਚਾਰੀ ਦੇਰ ਰਾਤ ਦਾ ਸਮਾਂ ਵਧੇਰੇ ਸ਼ੁਭ ਦੱਸ ਰਹੇ ਹਨ।

ਕਦੋਂ ਖੇਡੀ ਜਾਵੇਗੀ ਰੰਗਾਂ ਵਾਲੀ ਹੋਲੀ?

ਪੰਚਾਂਗ ਅਨੁਸਾਰ, 3 ਮਾਰਚ 2026 ਨੂੰ ਸਾਲ ਦਾ ਪਹਿਲਾ ਚੰਦਰ ਗ੍ਰਹਿਣ ਲੱਗਣ ਵਾਲਾ ਹੈ। ਧਾਰਮਿਕ ਮਾਨਤਾਵਾਂ ਅਨੁਸਾਰ ਗ੍ਰਹਿਣ ਦੇ ਦਿਨ ਕੋਈ ਵੀ ਸ਼ੁਭ ਜਾਂ ਉਤਸਵ ਨਾਲ ਜੁੜਿਆ ਕੰਮ ਕਰਨਾ ਉਚਿਤ ਨਹੀਂ ਮੰਨਿਆ ਜਾਂਦਾ। ਇਸੇ ਕਾਰਨ ਇਸ ਵਾਰ ਰੰਗਾਂ ਦੀ ਹੋਲੀ 4 ਮਾਰਚ 2026 ਨੂੰ ਖੇਡੀ ਜਾਵੇਗੀ।

ਹੋਲਿਕਾ ਦਹਿਨ ਦਾ ਧਾਰਮਿਕ ਮਹੱਤਵ

ਹੋਲਿਕਾ ਦਹਿਨ ਬੁਰਾਈ ‘ਤੇ ਸੱਚਾਈ ਦੀ ਜਿੱਤ ਦਾ ਪ੍ਰਤੀਕ ਮੰਨਿਆ ਜਾਂਦਾ ਹੈ। ਪੌਰਾਣਿਕ ਕਥਾ ਅਨੁਸਾਰ, ਭਗਵਾਨ ਵਿਸ਼ਨੂੰ ਦੇ ਭਗਤ ਪ੍ਰਹਿਲਾਦ ਨੂੰ ਮਾਰਨ ਲਈ ਉਸ ਦੀ ਭੂਆ ਹੋਲਿਕਾ ਨੇ ਅੱਗ ਵਿੱਚ ਬੈਠਣ ਦੀ ਕੋਸ਼ਿਸ਼ ਕੀਤੀ ਸੀ, ਪਰ ਭਗਵਾਨ ਦੀ ਕਿਰਪਾ ਨਾਲ ਪ੍ਰਹਿਲਾਦ ਸੁਰੱਖਿਅਤ ਬਚ ਗਏ ਅਤੇ ਹੋਲਿਕਾ ਸੜ ਕੇ ਸੁਆਹ ਹੋ ਗਈ। ਉਦੋਂ ਤੋਂ ਹੀ ਹਰ ਸਾਲ ਹੋਲਿਕਾ ਦਹਿਨ ਕਰਕੇ ਬੁਰਾਈ ਦੇ ਅੰਤ ਅਤੇ ਸੱਚਾਈ ਦੀ ਜਿੱਤ ਦਾ ਸੰਦੇਸ਼ ਦਿੱਤਾ ਜਾਂਦਾ ਹੈ।

ਹੋਲਿਕਾ ਦਹਿਨ ਦੌਰਾਨ ਕੀ ਕਰੀਏ?

ਹੋਲਿਕਾ ਦਹਿਨ ਦੇ ਸਮੇਂ ਕੁਝ ਵਿਸ਼ੇਸ਼ ਧਾਰਮਿਕ ਕਾਰਜ ਕਰਨਾ ਸ਼ੁਭ ਮੰਨਿਆ ਜਾਂਦਾ ਹੈ:

ਹੋਲਿਕਾ ਵਿੱਚ ਸੁੱਕੇ ਪਾਥੇ, ਲੱਕੜ ਅਤੇ ਕਣਕ ਦੀਆਂ ਬੱਲੀਆਂ ਅਰਪਿਤ ਕਰੋ।

ਪਰਿਵਾਰ ਦੀ ਸੁਖ-ਸਮ੍ਰਿਧੀ ਲਈ ਹੋਲਿਕਾ ਦੀ ਪਰਿਕਰਮਾ ਕਰੋ।

ਨਵੀਂ ਫ਼ਸਲ ਅਤੇ ਅੰਨ ਨੂੰ ਅਗਨੀ ਵਿੱਚ ਭੇਟ ਕਰਨਾ ਸ਼ੁਭ ਮੰਨਿਆ ਜਾਂਦਾ ਹੈ।

ਘਰ ਦੀ ਨਕਾਰਾਤਮਕ ਊਰਜਾ ਦੂਰ ਕਰਨ ਲਈ ਅਗਨੀ ਵਿੱਚ ਨਾਰੀਅਲ ਚੜ੍ਹਾਇਆ ਜਾਂਦਾ ਹੈ।