ਪੰਜਾਬ ‘ਚ ਮਈ ਮਹੀਨੇ ਦੂਰ ਹੋ ਜਾਵੇਗਾ ਬਿਜਲੀ ਸੰਕਟ, 10 ਮਈ ਤੱਕ ਚਾਲੂ ਹੋਣਗੇ ਸਾਰੇ ਹਾਈਡਲ ਪਲਾਂਟ

ਪੰਜਾਬ 'ਚ ਮਈ ਮਹੀਨੇ ਦੂਰ ਹੋ ਜਾਵੇਗਾ ਬਿਜਲੀ ਸੰਕਟ, 10 ਮਈ ਤੱਕ ਮੁਕੇਰੀਆਂ ਪਲਾਂਟ ਮੁੜ ਹੋਵੇਗਾ ਸ਼ੁਰੂ

ਪੰਜਾਬ ‘ਚ ਮਈ ਮਹੀਨੇ ਦੀ ਸ਼ੁਰੂਆਤ ‘ਚ ਬਿਜਲੀ ਸੰਕਟ ਪੂਰੀ ਤਰ੍ਹਾਂ ਖ਼ਤਮ ਹੋ ਜਾਵੇਗਾ। ਸੂਬੇ ਦੇ ਬਿਜਲੀ ਮੰਤਰੀ ਸੰਜੀਵ ਅਰੋੜਾ ਨੇ ਐਲਾਨ ਕੀਤਾ ਕਿ ਬਿਜਲੀ ਦੀ ਘਾਟ 1 ਮਈ ਤੱਕ ਮੁੱਖ ਤੌਰ ‘ਤੇ ਹੱਲ ਹੋ ਜਾਵੇਗੀ, ਜਦੋਂ 10 ਮਈ ਤੱਕ ਪੰਜਾਬ ਦੇ ਸਾਰੇ ਹਾਈਡਲ ਪਲਾਂਟ ਦੁਬਾਰਾ ਕੰਮ ਸ਼ੁਰੂ ਕਰ ਦੇਣਗੇ, ਜਿਸ ਨਾਲ ਬਿਜਲੀ ਸਪਲਾਈ ‘ਚ ਹੋਰ ਸੁਧਾਰ ਹੋਣ ਦੀ ਉਮੀਦ ਹੈ।

ਪ੍ਰੈਸ ਕਾਨਫਰੰਸ ਕਰਦੇ ਹੋਏ ਅਰੋੜਾ ਨੇ ਕਿਹਾ ਕਿ ਹੜ੍ਹਾਂ ਕਾਰਨ ਹੋਏ ਨੁਕਸਾਨ ਕਾਰਨ ਕਈ ਹਾਈਡਲ ਪਲਾਂਟ ਬੰਦ ਕਰ ਦਿੱਤੇ ਗਏ ਸਨ, ਪਰ 10 ਮਈ ਤੋਂ ਇਹ ਸਾਰੇ ਪਲਾਂਟ ਦੁਬਾਰਾ ਚਾਲੂ ਹੋ ਜਾਣਗੇ। ਉਨ੍ਹਾਂ ਕਿਹਾ ਕਿ 18 ਅਪ੍ਰੈਲ ਤੋਂ ਬਿਜਲੀ ਦੀ ਮੰਗ ‘ਚ ਅਚਾਨਕ ਵਾਧੇ ਨੇ ਅਧਿਕਾਰੀਆਂ ਨੂੰ ਹੈਰਾਨ ਕਰ ਦਿੱਤਾ, ਕਿਉਂਕਿ ਖਪਤ ਦਾ ਪੱਧਰ ਆਮ ਤੌਰ ‘ਤੇ ਮਈ ਦੇ ਅਖੀਰ ਜਾਂ ਜੂਨ ਦੇ ਸ਼ੁਰੂ ‘ਚ ਦੇਖਿਆ ਜਾਂਦਾ ਹੈ।

ਮੰਤਰੀ ਨੇ ਦੱਸਿਆ ਕਿ ਮੰਗ ਵਿੱਚ ਵਾਧਾ ਅਚਾਨਕ ਸੀ ਤੇ ਨਾ ਸਿਰਫ਼ ਪੰਜਾਬ ‘ਚ ਸਗੋਂ ਪੂਰੇ ਉੱਤਰੀ ਭਾਰਤ ‘ਚ ਤੇਜ਼ ਗਰਮੀ ਕਾਰਨ ਹੋਇਆ ਸੀ। ਉਨ੍ਹਾਂ ਨੇ ਕਿਹਾ ਕਿ ਅਸੀਂ ਸੀਜ਼ਨ ਦੇ ਅਖੀਰ ‘ਚ ਉੱਚ ਮੰਗ ਲਈ ਤਿਆਰੀ ਕੀਤੀ ਸੀ, ਪਰ ਇਸ ਸਾਲ ਇਹ ਮੰਗ ਪਹਿਲਾਂ ਹੀ ਆ ਗਈ। ਚੁਣੌਤੀਆਂ ਦੇ ਬਾਵਜੂਦ, ਸਰਕਾਰ ਸਥਿਤੀ ਨੂੰ ਸੰਭਾਲਣ ਲਈ ਨਿਰੰਤਰ ਯਤਨ ਕਰ ਰਹੀ ਹੈ, ਜਿਸ ‘ਚ ਕਈ ਰਾਜਾਂ ਤੇ ਨਿੱਜੀ ਸਪਲਾਇਰਾਂ ਤੋਂ ਬਿਜਲੀ ਪ੍ਰਾਪਤ ਕਰਨਾ ਸ਼ਾਮਲ ਹੈ।

ਮੰਤਰੀ ਅਰੋੜਾ ਨੇ ਕਿਹਾ ਕਿ ਰਾਤ ਦੇ ਸਮੇਂ ਦੌਰਾਨ, ਖਾਸ ਕਰਕੇ ਸ਼ਾਮ 6 ਵਜੇ ਤੋਂ ਬਾਅਦ, ਦਿੱਕਤ ਆਉਂਦੀ ਹੈ, ਜਦੋਂ ਕਿ ਦਿਨ ਵੇਲੇ ਸਪਲਾਈ ਕਾਫੀ ਸਥਿਰ ਰਹੀ। ਉਨ੍ਹਾਂ ਨੇ ਕਿਹਾ ਕਿ ਉਦਯੋਗਾਂ ਨੂੰ 6 ਵਜੇ ਸ਼ਾਮ ਤੋਂ ਅਗਲੇ ਦਿਨ ਸਵੇਰੇ 6 ਵਜੇ ਤੱਕ ਲਈ ਖੁੱਲ੍ਹੇ ਬਜ਼ਾਰ ‘ਚੋਂ ਬਿਜਲੀ ਖ਼ਰੀਦਣ ਦੀ ਛੋਟ ਦੇ ਦਿੱਤੀ ਗਈ ਹੈ। ਇਸ ਦੇ ਨਾਲ ਦੂਜੇ ਸੂਬਿਆਂ ਤੋਂ ਪਾਵਰ ਬੈਂਕਿੰਗ ਸੈਟਲਮੈਂਟ ਅਧੀਨ ਲੋੜੀਂਦੀ ਬਿਜਲੀ ਦੇ ਪ੍ਰਬੰਧਾਂ ਲਈ ਕੰਮ ਜਾਰੀ ਹੈ। ਉਨ੍ਹਾਂ ਨੇ ਕਿਹਾ ਕਿ ਇਸ ਦੇ ਨਾਲ ਹੀ ਸਰਕਾਰ 1500 ਮੈਗਾਵਾਟ ਬਿਜਲੀ ਦੀ ਖ਼ਰੀਦ ਵੱਖਰੇ ਤੌਰ ‘ਤੇ ਕਰਨ ਜਾ ਰਹੀ ਹੈ। ਮੰਤਰੀ ਨੇ ਜਾਣਕਾਰੀ ਦਿੱਤੀ ਕਿ ਸਰਕਾਰ ਹੁਣ ਤੱਕ ਗਰਿੱਡ ਅਪਗ੍ਰੇਡਸ਼ਨ ‘ਤੇ 6 ਹਜ਼ਾਰ ਕਰੋੜ ਰੁਪਏ ਖ਼ਰਚ ਕਰ ਚੁੱਕੀ ਹੈ।

ਮੰਤਰੀ ਨੇ ਜਾਣਕਾਰੀ ਦਿੱਤੀ ਕਿ ਕਿ ਪੰਜਾਬ ਆਰਟੀਐਮ ਰਾਹੀਂ ਬਿਜਲੀ ਪ੍ਰਾਪਤ ਕਰ ਰਿਹਾ ਹੈ, ਹਾਲਾਂਕਿ ਇਸ ਰਸਤੇ ਰਾਹੀਂ ਲੋੜੀਂਦੀ ਬਿਜਲੀ ਦਾ ਸਿਰਫ ਇੱਕ ਛੋਟਾ ਜਿਹਾ ਪ੍ਰਤੀਸ਼ਤ ਹੀ ਉਪਲਬਧ ਹੋਇਆ ਹੈ। ਰਾਜ ਨੇ ਟਾਟਾ ਵਰਗੀਆਂ ਕੰਪਨੀਆਂ ਤੋਂ ਬੈਕਅੱਪ ਬਿਜਲੀ ਦਾ ਪ੍ਰਬੰਧ ਵੀ ਕੀਤਾ ਹੈ। ਸਥਿਤੀ ‘ਚ ਸੁਧਾਰ ਹੋ ਰਿਹਾ ਹੈ। ਉਨ੍ਹਾਂ ਦੱਸਿਆ ਕਿ ਪਿਛਲੇ ਸਾਲ ਦੇ ਮੁਕਾਬਲੇ ਅਨਪਲੈਨਡ ਸ਼ਾਰਟੇਜ਼ ਦੀ 70 ਪ੍ਰਤੀਸ਼ਤ ਘੱਟ ਗਈ ਹੈ। ਅਸੀਂ ਸਪਲਾਈ ਨੂੰ ਸਥਿਰ ਕਰਨ ਲਈ ਲਗਾਤਾਰ ਕੰਮ ਕਰ ਰਹੇ ਹਾਂ। ਮੁਕੇਰੀਆਂ ਪਲਾਂਟ ਦੇ ਮੁੜ ਚਾਲੂ ਹੋਣ ਤੇ ਵਾਧੂ ਬਿਜਲੀ ਪ੍ਰਬੰਧਾਂ ਦੇ ਨਾਲ, ਸਰਕਾਰ ਨੂੰ ਭਰੋਸਾ ਹੈ ਕਿ ਆਉਣ ਵਾਲੇ ਹਫ਼ਤਿਆਂ ‘ਚ ਪੰਜਾਬ ‘ਚ ਬਿਜਲੀ ਦੀ ਸਥਿਤੀ ਆਮ ਵਾਂਗ ਹੋ ਜਾਵੇਗੀ।