ਡੈਂਟਿਸਟ ਤੋਂ UPSE ਤੱਕ: ਜਾਣੋ ਕੌਣ ਹੈ ਲੁਧਿਆਣਾ ਦਾ IPS ਅਫ਼ਸਰ ਅਜੇ ਪਾਲ ਸ਼ਰਮਾ, ਜਿਨ੍ਹਾਂ ਬੰਗਾਲ ਚੋਣਾਂ ਚ ਦਿਖਾਇਆ ‘ਸਿੰਘਮ’ ਵਾਲਾ ਅੰਦਾਜ਼

“ਜੇਕਰ ਕਿਸੇ ਨੇ ਬਦਮਾਸ਼ੀ ਕੀਤੀ ਤਾਂ ਉਸ ਦਾ ਕਾਇਦੇ ਨਾਲ ਇਲਾਜ ਹੋਵੇਗਾ…” ਪੱਛਮੀ ਬੰਗਾਲ ਦੀਆਂ ਵਿਧਾਨ ਸਭਾ ਚੋਣਾਂ ਦੌਰਾਨ ਇਹ ਸਖ਼ਤ ਚੇਤਾਵਨੀ ਦੇਣ ਵਾਲੇ ਉੱਤਰ ਪ੍ਰਦੇਸ਼ ਕੇਡਰ ਦੇ ਆਈਪੀਐਸ (IPS) ਅਫ਼ਸਰ ਅਜੇ ਪਾਲ ਸ਼ਰਮਾ ਇਨੀਂ ਦਿਨੀਂ ਚਰਚਾ ਦਾ ਵਿਸ਼ਾ ਬਣੇ ਹੋਏ ਹਨ। ਲੁਧਿਆਣਾ ਵਿੱਚ ਪਲੇ-ਬੜੇ ਇਸ ਅਧਿਕਾਰੀ ਦਾ ਬੇਖੌਫ਼ ਅੰਦਾਜ਼ ਉਸ ਵੇਲੇ ਦੇਖਣ ਨੂੰ ਮਿਲਿਆ ਜਦੋਂ ਉਨ੍ਹਾਂ ਨੂੰ ਪੁਲਿਸ ਆਬਜ਼ਰਵਰ ਵਜੋਂ ਮੈਦਾਨ ਵਿੱਚ ਉਤਾਰਿਆ ਗਿਆ।

ਬੰਗਾਲ ‘ਚ ਕਿਉਂ ਦਿਖਾਉਣੀ ਪਈ ਸਖ਼ਤੀ?

ਦੱਖਣੀ 24 ਪਰਗਨਾ ਦੇ ਫਲਤਾ ਖੇਤਰ ਵਿੱਚ ਵੋਟਰਾਂ ਨੂੰ ਧਮਕਾਉਣ ਅਤੇ ਚੋਣ ਪ੍ਰਕਿਰਿਆ ਵਿੱਚ ਵਿਘਨ ਪਾਉਣ ਦੀਆਂ ਲਗਾਤਾਰ ਸ਼ਿਕਾਇਤਾਂ ਮਿਲ ਰਹੀਆਂ ਸਨ। ਅਜਿਹੇ ਨਾਜ਼ੁਕ ਹਾਲਾਤ ਵਿੱਚ ਅਜੇ ਪਾਲ ਸ਼ਰਮਾ ਖੁਦ CRPF ਦੀ ਟੀਮ ਨਾਲ ਮੌਕੇ ‘ਤੇ ਪਹੁੰਚੇ। ਉਨ੍ਹਾਂ ਨੇ ਦੋਸ਼ਾਂ ਦੇ ਘੇਰੇ ਵਿੱਚ ਆਏ ਉਮੀਦਵਾਰ ਜਹਾਂਗੀਰ ਖਾਨ ਦੇ ਇਲਾਕੇ ਵਿੱਚ ਜਾ ਕੇ ਸਖ਼ਤ ਲਹਿਜੇ ਵਿੱਚ ਚੇਤਾਵਨੀ ਦਿੱਤੀ। ਉਨ੍ਹਾਂ ਸਾਫ਼ ਸ਼ਬਦਾਂ ਵਿੱਚ ਕਿਹਾ ਕਿ ਜੇਕਰ ਕਿਸੇ ਨੇ ਲੋਕਾਂ ਨੂੰ ਡਰਾਉਣ ਜਾਂ ਪ੍ਰੇਸ਼ਾਨ ਕਰਨ ਦੀ ਕੋਸ਼ਿਸ਼ ਕੀਤੀ, ਤਾਂ ਉਸ ਦੀ “ਖ਼ਬਰ ਚੰਗੀ ਤਰ੍ਹਾਂ ਲਈ ਜਾਵੇਗੀ”। ਉਨ੍ਹਾਂ ਦਾ ਮੁੱਖ ਮਕਸਦ ਨਿਰਪੱਖ ਅਤੇ ਆਜ਼ਾਦ ਚੋਣਾਂ ਨੂੰ ਯਕੀਨੀ ਬਣਾਉਣਾ ਸੀ।

ਪਿਤਾ ਦਾ ਸੁਪਨਾ ਅਤੇ ਡੈਂਟਿਸਟ ਤੋਂ IPS ਤੱਕ ਦਾ ਸਫ਼ਰ

ਅਜੇ ਪਾਲ ਸ਼ਰਮਾ ਦੀ ਕਹਾਣੀ ਸਿਰਫ਼ ਇੱਕ ਸਖ਼ਤ ਅਫ਼ਸਰ ਦੀ ਹੀ ਨਹੀਂ, ਸਗੋਂ ਪਿਤਾ ਦੇ ਸੁਪਨੇ ਨੂੰ ਪੂਰਾ ਕਰਨ ਵਾਲੇ ਇੱਕ ਹੋਣਹਾਰ ਪੁੱਤਰ ਦੀ ਵੀ ਹੈ। ਉਨ੍ਹਾਂ ਦੇ ਪਿਤਾ ਅਮਰਜੀਤ ਸ਼ਰਮਾ ਇੱਕ ਸਰਕਾਰੀ ਸਕੂਲ ਵਿੱਚ ਅਧਿਆਪਕ ਸਨ ਅਤੇ ਚਾਹੁੰਦੇ ਸਨ ਕਿ ਉਨ੍ਹਾਂ ਦਾ ਪੁੱਤਰ ਸਿਵਲ ਸੇਵਾਵਾਂ ਵਿੱਚ ਜਾਵੇ। ਅਜੇ ਪਾਲ ਨੇ ਪਹਿਲਾਂ ਬੀਡੀਐਸ (BDS) ਕਰਕੇ ਡੈਂਟਿਸਟ ਬਣਨ ਦਾ ਰਾਹ ਚੁਣਿਆ ਸੀ, ਪਰ ਉਨ੍ਹਾਂ ਦੇ ਪਿਤਾ ਇਸ ਤੋਂ ਖ਼ੁਸ਼ ਨਹੀਂ ਸਨ। ਪਿਤਾ ਦੀ ਨਾਰਾਜ਼ਗੀ ਨੂੰ ਚੁਣੌਤੀ ਵਜੋਂ ਲੈਂਦਿਆਂ ਉਨ੍ਹਾਂ ਨੇ UPSC ਦੀ ਤਿਆਰੀ ਸ਼ੁਰੂ ਕੀਤੀ ਅਤੇ ਆਈਪੀਐਸ ਬਣ ਕੇ ਆਪਣੇ ਪਿਤਾ ਦਾ ਮਾਣ ਵਧਾਇਆ।

ਦੋਵੇਂ ਭਰਾ ਸਿਵਲ ਸਰਵਿਸਿਜ਼ ਵਿੱਚ

ਇਹ ਬਹੁਤ ਮਾਣ ਵਾਲੀ ਗੱਲ ਹੈ ਕਿ ਅਜੇ ਪਾਲ ਸ਼ਰਮਾ ਦੇ ਛੋਟੇ ਭਰਾ ਅਮਿਤਪਾਲ ਸ਼ਰਮਾ ਨੇ ਵੀ UPSC ਦੀ ਪ੍ਰੀਖਿਆ ਪਾਸ ਕੀਤੀ ਅਤੇ ਆਈਏਐਸ (IAS) ਬਣੇ। ਦੋਵਾਂ ਭਰਾਵਾਂ ਨੂੰ ਉੱਤਰ ਪ੍ਰਦੇਸ਼ ਕੇਡਰ ਮਿਲਿਆ। ਦਿਲਚਸਪ ਗੱਲ ਇਹ ਹੈ ਕਿ ਦੋਵਾਂ ਨੇ ਪਹਿਲਾਂ ਡਾਕਟਰੀ ਦੀ ਪੜ੍ਹਾਈ ਕੀਤੀ ਸੀ ਅਤੇ ਬਾਅਦ ਵਿੱਚ ਦੇਸ਼ ਸੇਵਾ ਲਈ ਸਿਵਲ ਸੇਵਾਵਾਂ ਨੂੰ ਚੁਣਿਆ। ਹਾਲ ਹੀ ਵਿੱਚ ਪ੍ਰਯਾਗਰਾਜ ਵਿੱਚ ਦੋਵਾਂ ਭਰਾਵਾਂ ਦੀ ਇਕੱਠੀ ਤੈਨਾਤੀ ਵੀ ਕਾਫ਼ੀ ਚਰਚਾ ਵਿੱਚ ਰਹੀ ਸੀ।

ਲੁਧਿਆਣਾ ਨਾਲ ਡੂੰਘਾ ਸਬੰਧ

ਅਜੇ ਪਾਲ ਸ਼ਰਮਾ ਦਾ ਪਰਿਵਾਰ ਲੁਧਿਆਣਾ ਦੇ ਵਿਕਾਸ ਨਗਰ ਇਲਾਕੇ ਵਿੱਚ ਰਹਿੰਦਾ ਹੈ। ਉਨ੍ਹਾਂ ਨੇ ਆਪਣੀ ਮੁਢਲੀ ਸਿੱਖਿਆ ਪੰਜਾਬ ਸਕੂਲ ਸਿੱਖਿਆ ਬੋਰਡ ਨਾਲ ਸਬੰਧਤ ਆਰ.ਐਸ. ਮਾਡਲ ਸਕੂਲ ਤੋਂ ਹਾਸਲ ਕੀਤੀ। ਸਥਾਨਕ ਲੋਕ ਉਨ੍ਹਾਂ ਨੂੰ ਸਾਦਗੀ ਅਤੇ ਮਿਹਨਤ ਦੀ ਮਿਸਾਲ ਮੰਨਦੇ ਹਨ। ਉਨ੍ਹਾਂ ਦੀ ਮਾਤਾ ਪ੍ਰੇਮ ਸ਼ਰਮਾ ਨੇ ਪਰਿਵਾਰ ਨੂੰ ਸੰਭਾਲਣ ਅਤੇ ਬੱਚਿਆਂ ਨੂੰ ਮਜ਼ਬੂਤ ਸੰਸਕਾਰ ਦੇਣ ਵਿੱਚ ਅਹਿਮ ਭੂਮਿਕਾ ਨਿਭਾਈ। ਉਨ੍ਹਾਂ ਦੇ ਪਿਤਾ ਅਮਰਜੀਤ ਸ਼ਰਮਾ ਨੂੰ ਅੱਜ ਵੀ ਲੋੜਵੰਦ ਵਿਦਿਆਰਥੀਆਂ ਨੂੰ ਮੁਫ਼ਤ ਸਿੱਖਿਆ ਦੇਣ ਲਈ ਜਾਣਿਆ ਜਾਂਦਾ ਹੈ।

ਐਨਕਾਊਂਟਰ ਸਪੈਸ਼ਲਿਸਟ ਵਜੋਂ ਪਛਾਣ

ਆਪਣੀ ਬੇਖੌਫ਼ ਕਾਰਜਸ਼ੈਲੀ ਕਾਰਨ ਅਜੇ ਪਾਲ ਸ਼ਰਮਾ ਨੂੰ ਐਨਕਾਊਂਟਰ ਸਪੈਸ਼ਲਿਸਟ ਦੇ ਨਾਂ ਨਾਲ ਵੀ ਜਾਣਿਆ ਜਾਂਦਾ ਹੈ। ਉਨ੍ਹਾਂ ਨੇ ਆਪਣੇ ਕਰੀਅਰ ਵਿੱਚ 500 ਤੋਂ ਵੱਧ ਪੁਲਿਸ ਐਕਸ਼ਨਾਂ (ਮੁਕਾਬਲੇ ਅਤੇ ਗ੍ਰਿਫ਼ਤਾਰੀਆਂ) ਦੀ ਅਗਵਾਈ ਕੀਤੀ ਹੈ। ਜੌਨਪੁਰ ਵਿੱਚ ਐਸਪੀ ਰਹਿੰਦਿਆਂ ਉਨ੍ਹਾਂ ਨੇ 22 ਮਹੀਨਿਆਂ ਵਿੱਚ 136 ਮੁਕਾਬਲਿਆਂ ਦੀ ਅਗਵਾਈ ਕੀਤੀ। ਇਸ ਤੋਂ ਇਲਾਵਾ ਰਾਮਪੁਰ ਵਿੱਚ ਤੈਨਾਤੀ ਦੌਰਾਨ ਉਨ੍ਹਾਂ ਨੇ ਦਿੱਗਜ ਨੇਤਾ ਆਜ਼ਮ ਖਾਨ ਵਿਰੁੱਧ ਸਖ਼ਤ ਕਾਰਵਾਈ ਕਰਕੇ ਵੀ ਸੁਰਖੀਆਂ ਬਟੋਰੀਆਂ ਸਨ।