ਸਕੂਟੀ ਦੀ ਡਿੱਗੀ ‘ਚ ਤੁਸੀਂ ਵੀ ਰੱਖਦੇ ਹੋ ਪੈਸੇ ਤਾਂ ਹੋ ਜਾਓ ਸਾਵਧਾਨ, ਫਰੀਦਕੋਟ ‘ਚ ਚੋਰਾਂ ਨੇ ਮਿੰਟ ‘ਚ ਉਡਾਏ 3 ਲੱਖ ਰੁਪਏ

ਬੀਤੀ ਦਿਨੀਂ ਫ਼ਰੀਦਕੋਟ ਦੇ ਪਿੰਡ ਉਕੰਦਵਾਲਾ ਦੇ ਰਹਿਣ ਵਾਲੇ ਕੇਵਲ ਸਿੰਘ ਨੂੰ ਚੋਰਾਂ ਨੇ ਆਪਣਾ ਸ਼ਿਕਾਰ ਬਣਾਇਆ। ਕੇਵਲ ਸਿੰਘ ਨੇ ਜਦੋਂ ਬੈਂਕ ‘ਚੋਂ ਪੈਸੇ ਕਢਵਾ ਕੇ ਆਪਣੀ ਸਕੂਟੀ ਦੀ ਡਿੱਗੀ ‘ਚ ਰੱਖੇ ਤਾਂ ਨਜ਼ਰ ਹਟਦੇ ਹੀ ਚੋਰਾਂ ਨੇ ਡਿੱਗੀ ਦੀ ਲੋਕ ਖੋਲ੍ਹ ਕੇ ਪੈਸੇ ਚੋਰੀ ਕਰ ਲਏ। ਕੇਵਲ ਸਿੰਘ ਜੋ ਕਿ ਇੱਕ ਵੇਅਰਹਾਊਸ ‘ਚ ਮਜ਼ਦੂਰ ਦਾ ਕੰਮ ਕਰਦੇ ਹਨ, ਉਸ ਨੂੰ ਇਸ ਨਾਲ ਵੱਡਾ ਆਰਥਿਕ ਨੁਕਸਾਨ ਹੋਇਆ ਹੈ। ਪੁਲਿਸ ਵੱਲੋਂ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ।

ਪਲਾਟ ਵੇਚ ਕੇ ਮਿਲੇ ਸੀ 3 ਲੱਖ ਰੁਪਏ, ਹੋਏ ਚੋਰੀ

ਕੇਵਲ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਦੇ ਮਾਤਾ ਦੇ ਨਾਮ ‘ਤੇ ਇੱਕ ਪਲਾਟ ਸੀ, ਜਿਸ ਨੂੰ 6 ਲੱਖ ਰੁਪਏ ਦੀ ਕੀਮਤ ‘ਤੇ ਵੇਚਿਆ ਗਿਆ। ਦੋ ਭਰਾ ਹੋਣ ਕਰਕੇ ਦੋਵੇਂ ਭਰਾਵਾਂ ਦੇ ਹਿੱਸੇ 3-3 ਲੱਖ ਰੁਪਏ ਆਏ। ਕੇਵਲ ਸਿੰਘ ਨੇ ਦੱਸਿਆ ਕਿ ਪੈਸੇ ਦੀ ਵਰਤੋਂ ਕਰਨ ਲਈ ਉਹ ਤੇ ਉਨ੍ਹਾਂ ਦੀ ਮਾਤਾ ਬੈਂਕ ਪਹੁੰਚੇ ਸਨ। ਉਨ੍ਹਾਂ ਦੱਸਿਆ ਕਿ ਪਹਿਲਾਂ ਉਨ੍ਹਾਂ ਵੱਲੋਂ ਬੈਂਕ ‘ਚ 50 ਹਜ਼ਾਰ ਰੁਪਏ ਦੀ ਐਫਡੀ ਕਰਵਾਈ ਗਈ।

ਇਸ ਤੋਂ ਬਾਅਦ ਉਨ੍ਹਾਂ ਨੇ 3 ਲੱਖ ਰੁਪਏ ਕਢਵਾਏ। ਉਨ੍ਹਾਂ ਵੱਲੋਂ ਪੈਸੇ ਗਿਣੇ ਗਏ ਤੇ ਇਸ ਦੌਰਾਨ ਉਨ੍ਹਾਂ ਦੀ ਮਾਤਾ ਵੱਲੋਂ ਪੈਸੇ ਸਕੂਟੀ ‘ਚ ਡਿੱਗੀ ‘ਚ ਰੱਖਣ ਲਈ ਕਿਹਾ ਗਿਆ। ਕੇਵਲ ਸਿੰਘ ਜਦੋਂ ਸਕੂਟੀ ਦੀ ਡਿੱਗੀ ‘ਚ ਪੈਸੇ ਰੱਖ ਕੇ ਬੈਂਕ ਅੰਦਰ ਆਪਣੀ ਮਾਤਾ ਨੂੰ ਲੈਣ ਗਏ ਤਾਂ ਚੋਰਾਂ ਨੇ ਮਿੰਟਾਂ ‘ਚ ਹੀ ਸਕੂਟੀ ਦੀ ਡਿੱਗੀ ਦਾ ਲੋਕ ਖੋਲ੍ਹ ਕੇ ਪੈਸੇ ਚੋਰ ਕਰ ਲਏ।

ਘਰ ਪਹੁੰਚ ਕੇ ਚੋਰੀ ਦਾ ਲੱਗਾ ਪਤਾ

ਹਾਲਾਂਕਿ, ਕੇਵਲ ਸਿੰਘ ਤੇ ਉਨ੍ਹਾਂ ਦੀ ਮਾਤਾ ਜਦੋਂ ਬੈਂਕ ਤੋਂ ਬਾਹਰ ਨਿਕਲੇ ਤਾਂ ਉਨ੍ਹਾਂ ਨੂੰ ਚੋਰੀ ਬਾਰੇ ਕੁਝ ਪਤਾ ਨਹੀਂ ਸੀ। ਉਹ ਸਕੂਟੀ ਲੈ ਕੇ ਆਪਣੇ ਘਰ ਪਹੁੰਚੇ। ਇਸ ਤੋਂ ਬਾਅਦ ਜਦੋਂ ਉਨ੍ਹਾਂ ਵੱਲੋਂ ਸਕੂਟੀ ਦੀ ਡਿੱਗੀ ਖੋਲ੍ਹੀ ਗਈ ਤਾਂ ਡਿੱਗੀ ਖਾਲੀ ਦੇਖ ਕੇ ਉਹ ਹੈਰਾਨ ਰਹਿ ਗਏ। ਉਹ ਦੁਬਾਰਾ ਬੈਂਕ ਪਹੁੰਚੇ ਤਾਂ ਬੈਂਕ ਕਰਮਚਾਰੀਆਂ ਵੱਲੋਂ ਪਹਿਲਾਂ ਪੁਲਿਸ ਸ਼ਿਕਾਇਤ ਕਰਵਾਉਣ ਲਈ ਕਿਹਾ ਗਿਆ। ਪੁਲਿਸ ਸ਼ਿਕਾਇਤ ਕਰਵਾਉਣ ਤੋਂ ਬਾਅਦ ਜਦੋਂ ਬੈਂਕ ਦੇ ਕੈਮਰੇ ਚੈੱਕ ਕੀਤੇ ਗਏ ਤਾਂ ਉਸ ‘ਚ 2 ਵਿਅਕਤੀ ਚੋਰੀ ਦੀ ਵਾਰਦਾਤ ਨੂੰ ਅੰਜਾਮ ਦਿਖਾਈ ਦਿੱਤੇ। ਪੁਲਿਸ ਇਸ ਮਾਮਲੇ ਦੀ ਜਾਂਚ ਕਰ ਰਹੀ ਹੈ ਤੇ ਚੋਰਾਂ ਦੀ ਪਹਿਚਾਣ ਕੀਤੀ ਜਾ ਰਹੀ ਹੈ।