ਚੰਡੀਗੜ੍ਹ ਕ੍ਰੈਸਟ ਘੁਟਾਲੇ ‘ਚ CBI ਦਾ ਖੁਲਾਸਾ, 205 ਕਰੋੜ ਟਰਾਂਸਫਰ ਕਰਕੇ ਲਾਇਆ 75 ਕਰੋੜ ਦਾ ਚੂਨਾ; 13 ਅਧਿਕਾਰੀਆਂ ‘ਤੇ ਚਾਰਜਸ਼ੀਟ

ਚੰਡੀਗੜ੍ਹ ਰਿਨਿਊਏਬਲ ਐਨਰਜੀ ਐਂਡ ਸਾਇੰਸ ਐਂਡ ਟੈਕਨਾਲੋਜੀ ਪ੍ਰਮੋਸ਼ਨ ਸੁਸਾਇਟੀ (CREST) ਵਿੱਚ ਹੋਏ ਕਰੋੜਾਂ ਰੁਪਏ ਦੇ ਬਹੁ-ਚਰਚਿਤ ਘੁਟਾਲੇ ਦੀ ਜਾਂਚ ਵਿੱਚ ਕੇਂਦਰੀ ਜਾਂਚ ਏਜੰਸੀ (CBI) ਨੇ ਬਹੁਤ ਵੱਡਾ ਖ਼ੁਲਾਸਾ ਕੀਤਾ ਹੈ। ਸੀ.ਬੀ.ਆਈ. ਨੇ ਆਪਣੀ ਮੁੱਢਲੀ ਜਾਂਚ ਮੁਕੰਮਲ ਕਰਦਿਆਂ ਜ਼ਿਲ੍ਹਾ ਅਦਾਲਤ ਵਿੱਚ ਚਾਰਜਸ਼ੀਟ ਦਾਖ਼ਲ ਕਰ ਦਿੱਤਾ ਹੈ। ਜਾਂਚ ਰਿਪੋਰਟ ਮੁਤਾਬਕ, ਕ੍ਰੈਸਟ ਦੇ ਉੱਚ ਅਧਿਕਾਰੀਆਂ ਅਤੇ ਬੈਂਕ ਕਰਮਚਾਰੀਆਂ ਨੇ ਆਪਸੀ ਮਿਲੀਭੁਗਤ ਨਾਲ ਪਿਛਲੇ ਦੋ ਸਾਲਾਂ ਦੌਰਾਨ ਸੁਸਾਇਟੀ ਦੇ ਖਾਤਿਆਂ ‘ਚੋਂ 205.75 ਕਰੋੜ ਰੁਪਏ ਫ਼ਰਜ਼ੀ ਕੰਪਨੀਆਂ ਦੇ ਖਾਤਿਆਂ ਵਿੱਚ ਟਰਾਂਸਫਰ ਕਰ ਦਿੱਤੇ। ਇਸ ਪੂਰੇ ਧੋਖਾਧੜੀ ਦੇ ਖੇਡ ਵਿੱਚ ਕ੍ਰੈਸਟ ਨੂੰ 75.34 ਕਰੋੜ ਰੁਪਏ ਦਾ ਸਿੱਧਾ ਵਿੱਤੀ ਨੁਕਸਾਨ ਹੋਇਆ ਹੈ, ਜੋ ਕਿ ਵਿਆਜ ਸਮੇਤ ਹੁਣ ਲਗਭਗ 82 ਕਰੋੜ ਰੁਪਏ ਤੱਕ ਪਹੁੰਚ ਚੁੱਕਾ ਹੈ।

ਜਾਂਚ ਏਜੰਸੀ ਅਨੁਸਾਰ, ਮੁਲਜ਼ਮਾਂ ਨੇ ਕਈ ਫ਼ਰਜ਼ੀ ਕੰਪਨੀਆਂ ਬਣਾ ਕੇ ਉਨ੍ਹਾਂ ਦੇ ਬੈਂਕ ਖਾਤਿਆਂ ਰਾਹੀਂ ਸਰਕਾਰੀ ਖ਼ਜ਼ਾਨੇ ਦਾ ਗਬਨ ਕੀਤਾ। ਘੁਟਾਲੇ ‘ਤੇ ਪਰਦਾ ਪਾਉਣ ਲਈ ਪਹਿਲਾਂ ਕੁੱਝ ਰਕਮ ਕ੍ਰੈਸਟ ਦੇ ਖਾਤੇ ਵਿੱਚ ਜਮ੍ਹਾਂ ਕਰਵਾਈ ਜਾਂਦੀ ਸੀ ਅਤੇ ਫਿਰ ਉਸ ਤੋਂ ਕਿਤੇ ਵੱਧ ਰਾਸ਼ੀ ਕੱਢਵਾ ਲਈ ਜਾਂਦੀ ਸੀ। ਜਾਂਚ ਵਿੱਚ ਸਾਹਮਣੇ ਆਇਆ ਹੈ ਕਿ ਪਿਛਲੇ ਦੋ ਸਾਲਾਂ ਵਿੱਚ ਕ੍ਰੈਸਟ ਦੇ ਖਾਤਿਆਂ ਵਿੱਚ 130.40 ਕਰੋੜ ਰੁਪਏ ਜਮ੍ਹਾਂ ਹੋਏ, ਜਦੋਂ ਕਿ 205.75 ਕਰੋੜ ਰੁਪਏ ਕੱਢਵਾਏ ਗਏ। ਇਸ ਦੌਰਾਨ 300 ਤੋਂ ਵੱਧ ਸ਼ੱਕੀ ਅਤੇ ਫ਼ਰਜ਼ੀ ਲੈਣ-ਦੇਣ ਕੀਤੇ ਗਏ।

ਸੀ.ਬੀ.ਆਈ. ਦਾ ਕਹਿਣਾ ਹੈ ਕਿ ਇਸ ਪੂਰੇ ਧਾਂਦਲੇਬਾਜ਼ੀ ਦੇ ਖੇਡ ਵਿੱਚ ਕ੍ਰੈਸਟ ਦੇ ਤਤਕਾਲੀ ਪ੍ਰੋਜੈਕਟ ਡਾਇਰੈਕਟਰ, ਅਧਿਕਾਰੀਆਂ, ਅਕਾਊਂਟੈਂਟ ਅਤੇ ਬੈਂਕ ਕਰਮਚਾਰੀਆਂ ਨੇ ਮੁੱਖ ਭੂਮਿਕਾ ਨਿਭਾਈ। ਮੁਲਜ਼ਮਾਂ ਨੇ ਸਰਕਾਰੀ ਧਨ ਦੀ ਵਰਤੋਂ ਆਪਣੇ ਨਿੱਜੀ ਲਾਭਾਂ ਲਈ ਕੀਤੀ ਅਤੇ ਇਸ ਦੇ ਬਦਲੇ ਮੋਟੀਆਂ ਰਿਸ਼ਵਤਾਂ ਵੀ ਵਸੂਲੀਆਂ।

ਅਕਾਊਂਟੈਂਟ ‘ਤੇ ਵੀ ਗੰਭੀਰ ਆਰੋਪ

ਸੀ.ਬੀ.ਆਈ. ਦੀ ਜਾਂਚ ਮੁਤਾਬਕ, ਕ੍ਰੈਸਟ ਦੇ ਅਕਾਊਂਟੈਂਟ ਸਾਹਿਲ ਕੁੱਕੜ ਨੂੰ ਹਰ ਤਰ੍ਹਾਂ ਦੇ ਵਿੱਤੀ ਲੈਣ-ਦੇਣ ਦੀ ਪੂਰੀ ਜਾਣਕਾਰੀ ਸੀ। ਉਸ ਦੇ ਮੋਬਾਈਲ ‘ਤੇ ਬੈਂਕ ਵੱਲੋਂ ਡੈਬਿਟ ਅਤੇ ਕ੍ਰੈਡਿਟ ਦੇ ਸੁਨੇਹੇ ਵੀ ਆਉਂਦੇ ਸਨ, ਪਰ ਉਸ ਨੇ ਕਦੇ ਵੀ ਕਿਸੇ ਸ਼ੱਕੀ ਲੈਣ-ਦੇਣ ‘ਤੇ ਕੋਈ ਇਤਰਾਜ਼ ਨਹੀਂ ਜਤਾਇਆ। ਜਾਂਚ ਦੌਰਾਨ ਇਹ ਵੀ ਖ਼ੁਲਾਸਾ ਹੋਇਆ ਕਿ ਸਾਹਿਲ ਦੇ ਰਾਜਸਥਾਨ ਦੌਰੇ ਦੌਰਾਨ ਆਏ 2.91 ਲੱਖ ਰੁਪਏ ਦੇ ਹੋਟਲ ਦੇ ਬਿੱਲ ਇਸ ਘੁਟਾਲੇ ਦੇ ਮੁੱਖ ਮੁਲਜ਼ਮ ਨੇ ਭਰੇ ਸਨ। ਇਸ ਤੋਂ ਬਾਅਦ ਹੀ ਜਾਂਚ ਏਜੰਸੀ ਦੀ ਸ਼ੱਕ ਦੀ ਸੂਈ ਉਸ ਵੱਲ ਘੁੰਮੀ।

13 ਮੁਲਜ਼ਮਾਂ ਖ਼ਿਲਾਫ਼ ਚਾਰਜਸ਼ੀਟ ਦਾਖ਼ਲ

ਸੀ.ਬੀ.ਆਈ. ਨੇ ਇਸ ਮਾਮਲੇ ਵਿੱਚ ਹੁਣ ਤੱਕ 13 ਮੁਲਜ਼ਮਾਂ ਦੇ ਨਾਂ ਚਾਰਜਸ਼ੀਟ ਵਿੱਚ ਸ਼ਾਮਲ ਕੀਤੇ ਹਨ। ਇਹਨਾਂ ਵਿੱਚ ਰਿਭਵ ਰਿਸ਼ੀ, ਅਭੈ ਕੁਮਾਰ, ਸੀਮਾ ਧੀਮਾਨ, ਪ੍ਰਿਯੰਕਾ ਭਟੋਆ, ਅਨੁਜ ਕੌਸ਼ਲ, ਅਭਿਸ਼ੇਕ ਸਿੰਗਲਾ, ਸਵਾਤੀ ਸਿੰਗਲਾ, ਅੰਕੁਰ ਸ਼ਰਮਾ, ਸੁਖਵਿੰਦਰ ਸਿੰਘ ਅਬਰੋਲ, ਸਾਹਿਲ ਕੁੱਕੜ, ਸਵਾਤੀ ਦੇਸ਼ ਪ੍ਰੋਜੈਕਟ ਕੰਪਨੀ, ਐੱਸ.ਆਰ. ਪਲਾਨਿੰਗ ਗੁਰੂਜ਼ ਅਤੇ ਵਿਕਰਮ ਵਾਧਵਾ ਦੇ ਨਾਂ ਸ਼ਾਮਲ ਹਨ।

ਜਾਂਚ ਏਜੰਸੀ ਅਨੁਸਾਰ, ਰਿਭਵ ਰਿਸ਼ੀ, ਸੁਖਵਿੰਦਰ ਸਿੰਘ ਅਬਰੋਲ ਅਤੇ ਵਿਕਰਮ ਵਾਧਵਾ ਦੀ ਭੂਮਿਕਾ ਸਭ ਤੋਂ ਅਹਿਮ ਰਹੀ ਹੈ। ਇਸ ਮਾਮਲੇ ਵਿੱਚ ਕ੍ਰੈਸਟ ਦੇ ਤਤਕਾਲੀ ਮੁੱਖ ਕਾਰਜਕਾਰੀ ਅਧਿਕਾਰੀ (CEO) ਨਵਨੀਤ ਸ੍ਰੀਵਾਸਤਵ ਨੂੰ ਪਹਿਲਾਂ ਹੀ ਗ੍ਰਿਫ਼ਤਾਰ ਕੀਤਾ ਜਾ ਚੁੱਕਾ ਹੈ, ਹਾਲਾਂਕਿ ਉਨ੍ਹਾਂ ਖ਼ਿਲਾਫ਼ ਅਜੇ ਚਾਰਜਸ਼ੀਟ ਦਾਖ਼ਲ ਨਹੀਂ ਕੀਤੀ ਗਈ ਹੈ। ਸੀ.ਬੀ.ਆਈ. ਵੱਲੋਂ ਹੋਰ ਸ਼ੱਕੀਆਂ ਦੀ ਭੂਮਿਕਾ ਦੀ ਵੀ ਡੂੰਘਾਈ ਨਾਲ ਜਾਂਚ ਕੀਤੀ ਜਾ ਰਹੀ ਹੈ।

2007 ਵਿੱਚ ਬਣਾਈ ਗਈ ਸੀ ਕ੍ਰੈਸਟ ਸੁਸਾਇਟੀ

ਜ਼ਿਕਰਯੋਗ ਹੈ ਕਿ ਕ੍ਰੈਸਟ (CREST) ਦੀ ਸਥਾਪਨਾ ਸਾਲ 2007 ਵਿੱਚ ਚੰਡੀਗੜ੍ਹ ਪ੍ਰਸ਼ਾਸਨ ਵੱਲੋਂ ਵਿਗਿਆਨ ਅਤੇ ਨਵਿਆਉਣਯੋਗ ਊਰਜਾ ਨੂੰ ਉਤਸ਼ਾਹਿਤ ਕਰਨ ਦੇ ਮਕਸਦ ਨਾਲ ਕੀਤੀ ਗਈ ਸੀ। ਇਸ ਸੰਸਥਾ ਦਾ ਮੁੱਖ ਕੰਮ ਸ਼ਹਿਰ ਵਿੱਚ ਸਾਇੰਸ, ਨਵੀਂ ਤਕਨਾਲੋਜੀ ਅਤੇ ਸਾਫ਼-ਸੁਥਰੀ ਊਰਜਾ ਨਾਲ ਜੁੜੇ ਵੱਡੇ ਪ੍ਰੋਜੈਕਟਾਂ ਨੂੰ ਚਲਾਉਣਾ ਸੀ। ਪਰ ਹੁਣ ਇਸੇ ਸਰਕਾਰੀ ਸੰਸਥਾ ਵਿੱਚ ਕਰੋੜਾਂ ਰੁਪਏ ਦੇ ਘੁਟਾਲੇ ਦਾ ਪਰਦਾਫਾਸ਼ ਹੋਣ ਤੋਂ ਬਾਅਦ ਸਰਕਾਰੀ ਫੰਡਾਂ ਦੀ ਨਿਗਰਾਨੀ ਅਤੇ ਕਾਰਜਪ੍ਰਣਾਲੀ ‘ਤੇ ਗੰਭੀਰ ਸਵਾਲ ਖੜ੍ਹੇ ਹੋ ਰਹੇ ਹਨ।