ਪੰਜਾਬ ਹਰਿਆਣਾ ਜਾਂ ਯੂਪੀ-ਨਹੀਂ… ਇਸ ਸੂਬੇ ਦੇ ਲੋਕ ਕੱਢਦੇ ਹਨ ਸਭ ਤੋਂ ਵੱਧ ਗਾਲ੍ਹਾਂ; ਸਰਵੇਖਣ ‘ਚ ਖੁਲਾਸਾ

ਗਾਲ੍ਹਾਂ ਕੱਢਣ 'ਚ ਟਾਪ ਤੇ ਦਿੱਲੀ ਵਾਲੇ

ਇੱਕ ਸਰਵੇਖਣ ਰਿਪੋਰਟ ਵਿੱਚ ਖੁਲਾਸਾ ਹੋਇਆ ਹੈ ਕਿ ਦਿੱਲੀ ਦੇ ਲੋਕ ਸਭ ਤੋਂ ਵੱਧ ਗਾਲ੍ਹਾਂ ਕੱਢਦੇ ਹਨ। ਮਾਂ, ਭੈਣ ਅਤੇ ਧੀ ਲਈ ਦਿੱਲੀ ਵਿੱਚ ਸਭ ਤੋਂ ਵੱਧ ਗਲਤ ਸ਼ਬਦ ਵਰਤੇ ਜਾਂਦੇ ਹਨ। ਗਾਲ੍ਹਾਂ ਕੱਢਣ ਵਾਲੇ ਰਾਜਾਂ ਵਿੱਚ ਦਿੱਲੀ ਹੀ ਨਹੀਂ ਸਗੋਂ ਪੰਜਾਬ, ਹਰਿਆਣਾ ਅਤੇ ਕਈ ਹੋਰ ਰਾਜ ਵੀ ਸ਼ਾਮਲ ਹਨ। ਸਰਵੇਖਣ ਤੋਂ ਪਤਾ ਲੱਗਾ ਹੈ ਕਿ ਗਾਲ੍ਹਾਂ ਕੱਢਣਾ ਦਿੱਲੀ ਦੇ ਲੋਕਾਂ ਦੀ ਆਦਤ ਬਣ ਗਈ ਹੈ, ਜੋ ਹਰ ਛੋਟੀ-ਛੋਟੀ ਗੱਲ ‘ਤੇ ਗਾਲ੍ਹਾਂ ਕੱਢਦੇ ਹਨ।

ਸਿਰਫ਼ ਮਰਦ ਹੀ ਗਾਲ੍ਹਾਂ ਨਹੀਂ ਕੱਢਦੇ, ਸਗੋਂ ਔਰਤਾਂ ਅਤੇ ਕੁੜੀਆਂ ਵੀ ਖੁਦ ਮਾਂ, ਭੈਣ ਅਤੇ ਧੀ ਲਈ ਵੀ ਇਤਰਾਜਯੋਗ ਸ਼ਬਦਾਂ ਦਾ ਇਸਤੇਮਾਲ ਕਰਦੀਆਂ ਹਨ। ਸਰਵੇਖਣ ਦੇ ਅਨੁਸਾਰ, 30 ਪ੍ਰਤੀਸ਼ਤ ਔਰਤਾਂ ਅਤੇ ਕੁੜੀਆਂ ਗਾਲ੍ਹਾਂ ਕੱਢਦੀਆਂ ਹਨ। ਹੈਰਾਨ ਕਰਨ ਵਾਲੀ ਗੱਲ ਇਹ ਹੈ ਕਿ ਕੁੜੀਆਂ ਦੇ ਸਕੂਲਾਂ ਅਤੇ ਕਾਲਜਾਂ ਵਿੱਚ ਵੀ ਗਾਲ੍ਹਾਂ ਕੱਢਣਾ ਆਮ ਗੱਲ ਹੈ।

11 ਸਾਲਾਂ ਵਿੱਚ 70 ਹਜ਼ਾਰ ਲੋਕਾਂ ‘ਤੇ ਸਰਵੇਖਣ

ਸੈਲਫੀ ਵਿਦ ਡਾਟਰ ਫਾਊਂਡੇਸ਼ਨ ਦੇ ਸੰਸਥਾਪਕ ਅਤੇ ਮਹਾਰਿਸ਼ੀ ਦਯਾਨੰਦ ਯੂਨੀਵਰਸਿਟੀ ਦੇ ਪ੍ਰੋਫੈਸਰ ਆਫ਼ ਪ੍ਰੈਕਟਿਸ ਡਾ. ਸੁਨੀਲ ਜਗਲਾਨ ਨੇ ਗਾਲ੍ਹਾਂ ਬੰਦ ਕਰ ਮੁਹਿੰਮ ਚਲਾਈ ਅਤੇ ਇਸਦੇ ਤਹਿਤ ਇੱਕ ਸਰਵੇਖਣ ਕੀਤਾ। 11 ਸਾਲਾਂ ਵਿੱਚ ਇਸ ਸਰਵੇਖਣ ਵਿੱਚ ਲਗਭਗ 70 ਹਜ਼ਾਰ ਲੋਕਾਂ ਨੂੰ ਸ਼ਾਮਲ ਕੀਤਾ ਗਿਆ। ਇਨ੍ਹਾਂ ਲੋਕਾਂ ਵਿੱਚ ਨੌਜਵਾਨ, ਮਾਪੇ, ਅਧਿਆਪਕ, ਡਾਕਟਰ, ਆਟੋ ਡਰਾਈਵਰ, ਸਕੂਲ ਅਤੇ ਕਾਲਜ ਦੇ ਵਿਦਿਆਰਥੀ, ਪੁਲਿਸ ਕਰਮਚਾਰੀ, ਵਕੀਲ, ਕਾਰੋਬਾਰੀ, ਸਫਾਈ ਕਰਮਚਾਰੀ, ਪ੍ਰੋਫੈਸਰ, ਪੰਚਾਇਤ ਮੈਂਬਰ ਸ਼ਾਮਲ ਸਨ।

ਦਿੱਲੀ ਵਿੱਚ ਜ਼ਿਆਦਾਤਰ ਲੋਕ ਕੱਢਦੇ ਹਨ ਗਾਲ੍ਹਾਂ

ਸਰਵੇਖਣ ਤੋਂ ਸਾਹਮਣੇ ਆਏ ਅੰਕੜਿਆਂ ਅਨੁਸਾਰ, ਦਿੱਲੀ ਦੇ 80 ਪ੍ਰਤੀਸ਼ਤ ਲੋਕ ਗਾਲ੍ਹਾਂ ਕੱਢਦੇ ਹਨ ਅਤੇ ਇਹ ਦੇਸ਼ ਦਾ ਇੱਕ ਅਜਿਹਾ ਰਾਜ ਹੈ ਜਿੱਥੇ ਲੋਕ ਸਭ ਤੋਂ ਵੱਧ ਗਾਲ੍ਹਾਂ ਕੱਢਦੇ ਹਨ। ਪੰਜਾਬ ਦੂਜੇ ਨੰਬਰ ‘ਤੇ ਆਉਂਦਾ ਹੈ, ਜਿੱਥੇ 78 ਪ੍ਰਤੀਸ਼ਤ ਲੋਕ ਇਤਰਾਜਯੋਗ ਸ਼ਬਦਾਂ ਦੀ ਵਰਤੋਂ ਕਰਦੇ ਹਨ। ਗਾਲ੍ਹਾਂ ਕੱਢਣ ਦੇ ਅੰਕੜਿਆਂ ਵਿੱਚ ਬਿਹਾਰ ਅਤੇ ਉੱਤਰ ਪ੍ਰਦੇਸ਼ ਦੀ ਸਥਿਤੀ ਇੱਕੋ ਜਿਹੀ ਹੈ। ਯੂਪੀ ਅਤੇ ਬਿਹਾਰ ਦੇ 74 ਪ੍ਰਤੀਸ਼ਤ ਲੋਕ ਗਾਲ੍ਹਾਂ ਕੱਢਦੇ ਹਨ।

ਇਹ ਹਨ ਵੱਖ-ਵੱਖ ਰਾਜਾਂ ਦੇ ਅੰਕੜੇ

ਰਾਜਸਥਾਨ ਦੇ 68 ਪ੍ਰਤੀਸ਼ਤ ਲੋਕ, ਹਰਿਆਣਾ ਦੇ 62 ਪ੍ਰਤੀਸ਼ਤ ਲੋਕ, ਮਹਾਰਾਸ਼ਟਰ ਦੇ 58 ਪ੍ਰਤੀਸ਼ਤ ਲੋਕ, ਗੁਜਰਾਤ ਦੇ 55 ਪ੍ਰਤੀਸ਼ਤ ਲੋਕ, ਮੱਧ ਪ੍ਰਦੇਸ਼ ਦੇ 48 ਪ੍ਰਤੀਸ਼ਤ ਲੋਕ, ਉਤਰਾਖੰਡ ਦੇ 45 ਪ੍ਰਤੀਸ਼ਤ ਲੋਕ, ਕਸ਼ਮੀਰ ਦੇ 15 ਪ੍ਰਤੀਸ਼ਤ ਲੋਕ ਗਾਲੀ-ਗਲੋਚ ਕਰਦੇ ਹਨ, ਯਾਨੀ ਕਿ ਗੰਦੀ ਭਾਸ਼ਾ ਦੀ ਵਰਤੋਂ ਕਰਦੇ ਹਨ। ਉੱਤਰ-ਪੂਰਬ ਅਤੇ ਹੋਰ ਰਾਜਾਂ ਦੇ 20-30 ਪ੍ਰਤੀਸ਼ਤ ਲੋਕ ਗਾਲ੍ਹਾਂ ਕੱਢਦੇ ਹਨ।

2014 ਵਿੱਚ ਸ਼ੁਰੂ ਕੀਤੀ ਗਈ ਸੀ ਗਾਲ੍ਹ ਬੰਦ ਕਰ ਮੁਹਿੰਮ

ਡਾ. ਸੁਨੀਲ ਜਗਲਾਨ ਕਹਿੰਦੇ ਹਨ ਕਿ ਗਾਲੀ-ਗਲੋਚ ਕਰਨਾ ਕੋਈ ਸੰਸਕਾਰ ਨਹੀਂ, ਸਗੋਂ ਇੱਕ ਬਿਮਾਰੀ ਹੈ। ਜਦੋਂ ਕੋਈ ਬੱਚਾ ਵੱਡਾ ਹੋ ਰਿਹਾ ਹੁੰਦਾ ਹੈ ਅਤੇ ਉਹ ਫ਼ੋਨ ‘ਤੇ ਜਾਂ ਆਪਣੇ ਆਲੇ-ਦੁਆਲੇ ਗਾਲੀ-ਗਲੋਚ ਸੁਣਦਾ ਹੈ, ਤਾਂ ਇਹ ਉਸਦੇ ਦਿਮਾਗ ਵਿੱਚ ਬਹਿ ਜਾਂਦਾ ਹੈ। ਫਿਰ ਇਹ ਉਸਦੀ ਆਦਤ ਬਣ ਜਾਂਦੀ ਹੈ। ਉਨ੍ਹਾਂ ਨੇ ਸਾਲ 2014 ਵਿੱਚ ਗਾਲੀ ਬੰਦ ਘਰ ਮੁਹਿੰਮ ਸ਼ੁਰੂ ਕੀਤੀ ਸੀ। ਇਸ ਮੁਹਿੰਮ ਦੇ ਤਹਿਤ, ਦੇਸ਼ ਭਰ ਵਿੱਚ 60 ਹਜ਼ਾਰ ਤੋਂ ਵੱਧ ਥਾਵਾਂ ‘ਤੇ ਗਾਲ੍ਹ ਬੰਦ ਘਰ ਚਾਰਟ ਲਗਾਏ ਗਏ ਹਨ। ਅੱਜ ਉਨ੍ਹਾਂ ਦੀ ਮੁਹਿੰਮ ਵਿਸ਼ਵ ਪੱਧਰ ‘ਤੇ ਮਸ਼ਹੂਰ ਹੋ ਗਈ ਹੈ।