ਕੌਣ ਹਨ ISKON ਦੇ ਚਿਨਮਯ ਦਾਸ, ਜਿਨ੍ਹਾਂ ਦੀ ਗ੍ਰਿਫਤਾਰੀ ਨੇ ਬਾਂਗਲਾਦੇਸ਼ ‘ਚ ਵਧਾਈ ਹਲਚਲ?

ISKCON: ਸੋਮਵਾਰ 25 ਨਵੰਬਰ ਨੂੰ ਢਾਕਾ ਪੁਲਿਸ ਨੇ ਬਾਂਗਲਾਦੇਸ਼ ਇਸਕੋਨ ਦੇ ਬੁਲਾਰੇ ਚਿਨਮਯ ਦਾਸ ਨੂੰ ਗ੍ਰਿਫਤਾਰ ਕੀਤਾ ਹੈ। ਇਸ ਤੋਂ ਬਾਅਦ ਦੇਸ਼ ‘ਚ ਵਿਰੋਧ ਪ੍ਰਦਰਸ਼ਨ ਸ਼ੁਰੂ ਹੋਏ, ਜੋ ਹੁਣ ਤੱਕ ਰੁਕੇ ਨਹੀਂ ਹਨ। ਖਾਸ ਤੌਰ ‘ਤੇ ਰਾਜਧਾਨੀ ਢਾਕਾ ਅਤੇ ਨਾਲ ਲੱਗਦੇ ਸ਼ਾਹਬਾਗ ਇਲਾਕੇ ‘ਚ ਲੋਕ ਚਿਨਮਯ ਦਾਸ ਦੀ ਰਿਹਾਈ ਦੀ ਮੰਗ ਨੂੰ ਲੈ ਕੇ ਸੜਕਾਂ ‘ਤੇ ਹਨ।

ਮੀਡੀਆ ਰਿਪੋਰਟਾਂ ਮੁਤਾਬਕ ਚਿਨਮਯ ਦਾਸ ਕੱਲ੍ਹ ਦੁਪਹਿਰ 3.30 ਵਜੇ ਰਾਜਧਾਨੀ ਢਾਕਾ ਦੇ ਹਜ਼ਰਤ ਸ਼ਾਹਜਲਾਲ ਅੰਤਰਰਾਸ਼ਟਰੀ ਹਵਾਈ ਅੱਡੇ ‘ਤੇ ਪਹੁੰਚੇ। ਉਹ ਚਟਗਾਂਵ ਜਾ ਰਹੇ ਸਨ। ਫਿਰ ਸਾਦੀ ਵਰਦੀ ਵਿਚ ਕੁਝ ਲੋਕ, ਜੋ ਖੁਦ ਨੂੰ ਖੁਫੀਆ ਵਿਭਾਗ ਦੇ ਮੈਂਬਰ ਹੋਣ ਦਾ ਦਾਅਵਾ ਕਰਦੇ ਹਨ, ਹਵਾਈ ਅੱਡੇ ਵਿਚ ਦਾਖਲ ਹੋਏ ਅਤੇ ਉਨ੍ਹਾਂ ਨੂੰ ਆਪਣੇ ਨਾਲ ਲੈ ਗਏ।

ਚਿਨਮਯ ਦਾਸ ‘ਤੇ ਕੀ ਹਨ ਦੋਸ਼?

ਢਾਕਾ ਪੁਲਿਸ ਨੇ ਕਿਹਾ ਹੈ ਕਿ ਚਿਨਮਯ ਦਾਸ ਨੂੰ ਦਰਜ ਸ਼ਿਕਾਇਤ ਦੇ ਆਧਾਰ ‘ਤੇ ਗ੍ਰਿਫਤਾਰ ਕੀਤਾ ਗਿਆ ਹੈ। ਦਾਸ ‘ਤੇ ਬਾਂਗਲਾਦੇਸ਼ ਦੇ ਰਾਸ਼ਟਰੀ ਝੰਡੇ ਦਾ ਅਪਮਾਨ ਕਰਨ ਦਾ ਦੋਸ਼ ਹੈ। ਬੀਐਨਪੀ ਦੇ ਸਾਬਕਾ ਨੇਤਾ ਫਿਰੋਜ਼ ਖਾਨ ਨੇ ਚਿਨਮਯ ਦਾਸ ‘ਤੇ ਇਹ ਦੋਸ਼ ਲਗਾਏ ਹਨ। ਖਾਨ ਨੇ ਦੋਸ਼ ਲਾਇਆ ਕਿ 25 ਅਕਤੂਬਰ ਨੂੰ ਚਟਗਾਂਵ ਵਿੱਚ ਹਿੰਦੂ ਭਾਈਚਾਰੇ ਦੀ ਰੈਲੀ ਹੋਈ ਸੀ।

ਇੱਥੇ ਹੀ ਚਿਨਮਯ ਦਾਸ ਅਤੇ 18 ਹੋਰ ਲੋਕਾਂ ਨੇ ਬਾਂਗਲਾਦੇਸ਼ ਦੇ ਰਾਸ਼ਟਰੀ ਝੰਡੇ ਦੀ ਬੇਅਦਬੀ ਕੀਤੀ ਸੀ। ਹਾਲਾਂਕਿ ਦਿਲਚਸਪ ਗੱਲ ਇਹ ਹੈ ਕਿ ਫਿਰੋਜ਼ ਖਾਨ, ਜੋ ਉਸ ਸਮੇਂ ਬੀਐਨਪੀ ਦੇ ਨੇਤਾ ਸਨ, ਨੂੰ ਪਾਰਟੀ ਵਿਰੋਧੀ ਗਤੀਵਿਧੀਆਂ ਦੇ ਇਲਜ਼ਾਮ ਲਗਾਉਣ ਦੇ ਕੁਝ ਦਿਨਾਂ ਵਿੱਚ ਹੀ ਬੀਐਨਪੀ ਵਿੱਚੋਂ ਕੱਢ ਦਿੱਤਾ ਗਿਆ ਸੀ। ਦੂਜੇ ਪਾਸੇ ਪੁਲਿਸ ਨੇ ਇਸ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ ਅਤੇ ਦੋ ਵਿਅਕਤੀਆਂ ਨੂੰ ਗ੍ਰਿਫਤਾਰ ਕਰ ਲਿਆ ਹੈ।

ਕੌਣ ਹਨ ਚਿਨਮਯ ਦਾਸ, ਕਿਉਂ ਚਰਚਾ ‘ਚ?

ਚਿਨਮਯ ਦਾਸ ਪੁੰਡਰਿਕ ਧਾਮ ਦੀ ਅਗਵਾਈ ਕਰਦਾ ਹੈ, ਜੋ ਕਿ ਚਟਗਾਂਵ (ਬੰਗਲਾਦੇਸ਼ ਦਾ ਦੂਜਾ ਸਭ ਤੋਂ ਵੱਡਾ ਸ਼ਹਿਰ) ਤੋਂ ਚਲਦਾ ਹੈ। ਦਾਸ, ਹਿੰਦੂ ਭਾਈਚਾਰੇ ਦਾ ਇੱਕ ਪ੍ਰਮੁੱਖ ਚਿਹਰਾ, ਇਸਕਾਨ ਦੇ ਬੁਲਾਰੇ ਵਜੋਂ ਵੀ ਜਾਣਿਆ ਜਾਂਦਾ ਹੈ। ਉਨ੍ਹਾਂ ਦੇ ਪੈਰੋਕਾਰ ਪੂਰੇ ਦੇਸ਼ ਵਿਚ ਹਨ। ਪੁੰਡਰਿਕ ਧਾਮ ਵੀ ਬੰਗਲਾਦੇਸ਼ ਇਸਕਨ ਦਾ ਇੱਕ ਹਿੱਸਾ ਹੈ।

ਦਾਸ ਨੇ ਬਾਂਗਲਾਦੇਸ਼ ਦੀਆਂ ਧਾਰਮਿਕ ਘੱਟ ਗਿਣਤੀਆਂ ਦੇ ਹੱਕਾਂ ਬਾਰੇ ਬਹੁਤ ਜ਼ੋਰਦਾਰ ਆਵਾਜ਼ ਉਠਾਈ ਹੈ। ਸ਼ੇਖ ਹਸੀਨਾ ਦੀ ਸਰਕਾਰ ਛੱਡਣ ਤੋਂ ਬਾਅਦ ਤੋਂ ਹਿੰਦੂਆਂ ਅਤੇ ਹੋਰ ਘੱਟ ਗਿਣਤੀਆਂ ‘ਤੇ ਹੋ ਰਹੇ ਹਮਲਿਆਂ ਦੀ ਉਨ੍ਹਾਂ ਨੇ ਸਖ਼ਤ ਨਿੰਦਾ ਕੀਤੀ ਹੈ।

ਪਿਛਲੇ ਮਹੀਨੇ, ਇੱਕ ਪ੍ਰੈਸ ਕਾਨਫਰੰਸ ਰਾਹੀਂ, ਦਾਸ ਨੇ ਫਿਰਕੂ ਸਦਭਾਵਨਾ ਦੀ ਸਥਾਪਨਾ ਵਿੱਚ ਜਮਾਤ-ਏ-ਇਸਲਾਮੀ ਬਾਂਗਲਾਦੇਸ਼ ਸਮੇਤ ਹੋਰ ਸਿਆਸੀ ਪਾਰਟੀਆਂ ਦੇ ਸਮਰਥਨ ਦੀ ਸ਼ਲਾਘਾ ਕੀਤੀ ਸੀ। ਉਨ੍ਹਾਂ ਇਸ ਸਬੰਧੀ ਬੀਐਨਪੀ ਵਰਗੀਆਂ ਪਾਰਟੀਆਂ ਨਾਲ ਮੀਟਿੰਗਾਂ ਵੀ ਕੀਤੀਆਂ ਹਨ।

ਪਰ ਇਸ ਪ੍ਰਸ਼ੰਸਾ ਦੇ ਨਾਲ-ਨਾਲ ਚਿਨਮਯ ਦਾਸ ਨੇ ਪ੍ਰੋਫ਼ੈਸਰ ਮੁਹੰਮਦ ਯੂਨਸ ਦੀ ਅਗਵਾਈ ਵਾਲੀ ਅੰਤਰਿਮ ਸਰਕਾਰ ਦੀ ਵੀ ਆਲੋਚਨਾ ਕੀਤੀ। ਦਾਸ ਨੇ ਦੋਸ਼ ਲਾਇਆ ਕਿ ਯੂਨਸ ਦੀ ਸਰਕਾਰ ਘੱਟ ਗਿਣਤੀ ਹਿੰਦੂਆਂ ‘ਤੇ ਤਿੰਨ ਹਜ਼ਾਰ ਦੇ ਕਰੀਬ ਹਮਲਿਆਂ ਨੂੰ ਰੋਕਣ ‘ਚ ਨਾਕਾਮ ਰਹੀ ਹੈ।

ਬਾਂਗਲਾਦੇਸ਼ੀ ਹਿੰਦੂ ਅਤੇ ਤਾਜ਼ਾ ਹਿੰਸਾ

ਬਾਂਗਲਾਦੇਸ਼ ਦੀ ਆਬਾਦੀ ਦਾ ਲਗਭਗ 8 ਫੀਸਦੀ ਹਿੰਦੂ ਹਨ। ਇਸਕੋਨ ਦੇ ਬਾਂਗਲਾਦੇਸ਼ ਵਿੱਚ 77 ਤੋਂ ਵੱਧ ਮੰਦਰ ਹਨ। ਇਸ ਸੰਸਥਾ ਨਾਲ ਕਰੀਬ 50 ਹਜ਼ਾਰ ਲੋਕ ਜੁੜੇ ਹੋਏ ਹਨ।

ਪਿਛਲੇ ਕੁਝ ਮਹੀਨਿਆਂ ਵਿੱਚ, ਖਾਸ ਕਰਕੇ ਸ਼ੇਖ ਹਸੀਨਾ ਦੀ ਸਰਕਾਰ ਦੇ ਜਾਣ ਤੋਂ ਬਾਅਦ, ਬਾਂਗਲਾਦੇਸ਼ ਵਿੱਚ ਹਿੰਦੂ ਭਾਈਚਾਰੇ ਨਾਲ ਵਿਤਕਰੇ ਅਤੇ ਹਿੰਸਾ ਦੀਆਂ ਘਟਨਾਵਾਂ ਵਿੱਚ ਵਾਧਾ ਹੋਇਆ ਹੈ। ਸੰਯੁਕਤ ਰਾਸ਼ਟਰ ਅਤੇ ਡੋਨਾਲਡ ਟਰੰਪ ਨੇ ਅਮਰੀਕੀ ਰਾਸ਼ਟਰਪਤੀ ਚੋਣਾਂ ਦੌਰਾਨ ਇਸ ਦਾ ਨੋਟਿਸ ਲਿਆ ਸੀ।

ਭਾਰਤ ਦੇ ਪ੍ਰਧਾਨ ਮੰਤਰੀ ਨਰੇਂਦਰ ਮੋਦੀ ਨੇ ਵੀ ਇਸ ਦਾ ਜ਼ਿਕਰ ਕੀਤਾ ਹੈ। ਹੁਣ ਹਿੰਦੂ ਕੌਮ ਦੀ ਬੁਲੰਦ ਅਵਾਜ਼ ਦੀ ਗ੍ਰਿਫਤਾਰੀ ਨਾਲ ਹਾਲਾਤ ਹੋਰ ਵਿਗੜਨ ਦਾ ਖਦਸ਼ਾ ਹੈ। ਰਿਪੋਰਟਾਂ ਦੀ ਮੰਨੀਏ ਤਾਂ ਉਸ ਦੀ ਰਿਹਾਈ ਨੂੰ ਲੈ ਕੇ ਚੱਲ ਰਹੇ ਪ੍ਰਦਰਸ਼ਨ ਹਿੰਸਕ ਹੋਣ ਦੀਆਂ ਵੀ ਖਬਰਾਂ ਹਨ।