Hiroshima 80th Anniversary: 18,000 ਸਾਲ ਪਿੱਛੇ ਚੱਲ ਜਾਵੇਗੀ ਦੁਨੀਆ… ਜੇਕਰ ਦੁਬਾਰਾ ਹੋਇਆ ਪਰਮਾਣੂ ਹਮਲਾ

ਮਿਤੀ- 6 ਅਗਸਤ 1945। ਸਥਾਨ- ਜਾਪਾਨ ਦਾ ਹੀਰੋਸ਼ੀਮਾ ਸ਼ਹਿਰ। ਸਵੇਰ ਆਮ ਵਾਂਗ ਸ਼ੁਰੂ ਹੋਈ, ਲੋਕ ਆਪਣੇ ਰੋਜ਼ਾਨਾ ਦੇ ਕੰਮਾਂ ਵਿੱਚ ਰੁੱਝੇ ਹੋਏ ਸਨ। ਕਿਸੇ ਨੂੰ ਅੰਦਾਜ਼ਾ ਨਹੀਂ ਸੀ ਕਿ ਕੁਝ ਪਲਾਂ ਵਿੱਚ ਪੂਰਾ ਸ਼ਹਿਰ ਇਤਿਹਾਸ ਬਣ ਜਾਵੇਗਾ। ਇੱਕ ਅਜਿਹਾ ਇਤਿਹਾਸ ਜਿਸ ਨੂੰ ਕੋਈ ਦੁਹਰਾਉਣਾ ਨਹੀਂ ਚਾਹੇਗਾ। ਸਵੇਰੇ 8 ਵਜੇ ਦੇ ਕਰੀਬ ਸੀ, ਅਚਾਨਕ ਅਸਮਾਨ ‘ਚ ਹਲਚਲ ਹੋਈ। ਅਮਰੀਕਾ ਨੇ ‘ਲਿਟਲ ਬੁਆਏ’ ਨਾਮ ਦਾ ਇੱਕ ਐਟਮ ਬੰਬ ਸੁੱਟਿਆ ਤੇ ਫਿਰ ਸਭ ਕੁਝ ਖਤਮ ਹੋ ਗਿਆ। ਹੀਰੋਸ਼ੀਮਾ ਕੁਝ ਮਿੰਟਾਂ ‘ਚ ਹੀ ਉਜਾੜ ਹੋ ਗਿਆ। ਗਰਮੀ ਇੰਨੀ ਵੱਧ ਗਈ ਕਿ ਲੋਕ ਸੜ ਗਏ। ਦਰੱਖਤ ਤੇ ਪੌਦੇ ਸੜ ਗਏ। ਸ਼ਹਿਰ ਦਾ ਅੱਧੇ ਤੋਂ ਵੱਧ ਹਿੱਸਾ ਸੁਆਹ ਹੋ ਗਿਆ।

ਇਹ ਤਬਾਹੀ ਇੱਥੇ ਹੀ ਨਹੀਂ ਰੁਕੀ, ਸਗੋਂ ਲੋਕ ਸਾਲਾਂ ਤੱਕ ਰੇਡੀਏਸ਼ਨ ਨਾਲ ਮਰਦੇ ਰਹੇ। ਇਹ ਮਨੁੱਖੀ ਇਤਿਹਾਸ ਦਾ ਪਹਿਲਾ ਪ੍ਰਮਾਣੂ ਹਮਲਾ ਸੀ। ਅੱਜ ਉਸ ਤਬਾਹੀ ਨੂੰ 80 ਸਾਲ ਬੀਤ ਗਏ ਹਨ, ਪਰ ਖ਼ਤਰਾ ਹੁਣ ਪਹਿਲਾਂ ਨਾਲੋਂ ਕਿਤੇ ਜ਼ਿਆਦਾ ਨੇੜੇ ਮਹਿਸੂਸ ਹੁੰਦਾ ਹੈ। ਦੁਨੀਆ ਇੱਕ ਵਾਰ ਫਿਰ ਉਸੇ ਮੋੜ ‘ਤੇ ਖੜ੍ਹੀ ਹੈ। ਪ੍ਰਮਾਣੂ ਹਥਿਆਰਾਂ ਦੀ ਗਿਣਤੀ ਵਧ ਰਹੀ ਹੈ ਤੇ ਉਨ੍ਹਾਂ ਦੀ ਵਰਤੋਂ ਦੀਆਂ ਧਮਕੀਆਂ ਹੁਣ ਆਮ ਹੋ ਗਈਆਂ ਹਨ। ਮਾਹਰ ਕਹਿ ਰਹੇ ਹਨ ਕਿ ਜੇਕਰ ਦੁਬਾਰਾ ਪ੍ਰਮਾਣੂ ਹਮਲਾ ਹੁੰਦਾ ਹੈ ਤਾਂ ਹੀਰੋਸ਼ੀਮਾ ਵਰਗੀ ਤਬਾਹੀ ਮਾਮੂਲੀ ਜਾਪ ਸਕਦੀ ਹੈ। ਕਲਪਨਾ ਕਰੋ ਕਿ ਜੇਕਰ ਇੱਕ ਸ਼ਹਿਰ ਇੱਕ ਬੰਬ ਨਾਲ ਤਬਾਹ ਹੋ ਜਾਂਦਾ ਹੈ ਤਾਂ ਅੱਜ ਦੇ ਉੱਚ-ਤਕਨੀਕੀ, ਵਧੇਰੇ ਸ਼ਕਤੀਸ਼ਾਲੀ ਪ੍ਰਮਾਣੂ ਬੰਬਾਂ ਤੋਂ ਕੀ ਬਚੇਗਾ?

ਦੁਨੀਆ 18 ਹਜ਼ਾਰ ਸਾਲ ਪਿੱਛੇ ਚਲੀ ਜਾਵੇਗੀ

ICAN ਦੇ ਅਨੁਸਾਰ, ਇੱਕ ਪ੍ਰਮਾਣੂ ਬੰਬ ਇੱਕ ਹੀ ਝਟਕੇ ‘ਚ ਲੱਖਾਂ ਲੋਕਾਂ ਨੂੰ ਮਾਰ ਦੇਵੇਗਾ। ਜੇਕਰ 10 ਜਾਂ ਸੈਂਕੜੇ ਬੰਬ ਡਿੱਗਦੇ ਹਨ, ਤਾਂ ਨਾ ਸਿਰਫ਼ ਲੱਖਾਂ ਲੋਕ ਮਰ ਜਾਣਗੇ, ਸਗੋਂ ਧਰਤੀ ਦੀ ਪੂਰੀ ਜਲਵਾਯੂ ਪ੍ਰਣਾਲੀ ਤਬਾਹ ਹੋ ਜਾਵੇਗੀ। ਇਸ ਦੇ ਨਤੀਜੇ ਵਜੋਂ ਜ਼ਿਆਦਾਤਰ ਖੇਤਰਾਂ ‘ਚ ਮੀਂਹ ਨਹੀਂ ਪਵੇਗਾ। ਵਿਸ਼ਵਵਿਆਪੀ ਬਾਰਿਸ਼ 45% ਘੱਟ ਜਾਵੇਗੀ ‘ਤੇ ਇਸ ਨਾਲ ਧਰਤੀ ਦੀ ਸਤ੍ਹਾ ਦਾ ਔਸਤ ਤਾਪਮਾਨ -7 ਤੋਂ -8 ਡਿਗਰੀ ਸੈਲਸੀਅਸ ਤੱਕ ਪਹੁੰਚ ਜਾਵੇਗਾ। ਜੇਕਰ ਅਸੀਂ ਇਸ ਦੀ ਤੁਲਨਾ 18 ਹਜ਼ਾਰ ਸਾਲ ਪਹਿਲਾਂ ਨਾਲ ਕਰੀਏ, ਜਦੋਂ ਆਈਸ ਏਜ਼ ਸੀ ਤਾਂ ਤਾਪਮਾਨ -5 ਡਿਗਰੀ ਹੀ ਸੈਲਸੀਅਸ ਸੀ। ਯਾਨੀ ਕਿ ਦੁਨੀਆ 18 ਹਜ਼ਾਰ ਸਾਲ ਪਿੱਛੇ ਚਲੀ ਜਾਵੇਗੀ। ਜੇਕਰ ਤਾਪਮਾਨ ਘੱਟ ਜਾਂਦਾ ਹੈ, ਤਾਂ ਇਹ ਵੀ ਅੰਦਾਜ਼ਾ ਲਗਾਇਆ ਗਿਆ ਹੈ ਕਿ ਸੂਰਜ ਦੀ ਰੌਸ਼ਨੀ ਘੱਟੋ-ਘੱਟ 10% ਥਾਵਾਂ ‘ਤੇ ਨਹੀਂ ਪਹੁੰਚੇਗੀ।

ਜੇਕਰ ਕਿਸੇ ਪਰਮਾਣੂ ਪਲਾਂਟ ‘ਤੇ ਪਰਮਾਣੂ ਹਮਲਾ ਹੁੰਦਾ ਹੈ ਤਾਂ ਕੀ ਹੋਵੇਗਾ?

ICAN ਦੇ ਅਨੁਸਾਰ, ਜੇਕਰ ਕਿਸੇ ਪਰਮਾਣੂ ਪਾਵਰ ਪਲਾਂਟ ‘ਤੇ ਇੱਕ ਛੋਟਾ ਜਿਹਾ ਪਰਮਾਣੂ ਹਮਲਾ ਵੀ ਹੁੰਦਾ ਹੈ, ਉਦਾਹਰਨ ਲਈ 10 ਕਿਲੋਟਨ ਦਾ ਵਿਸਫੋਟ ਹੁੰਦਾ ਹੈ, ਤਾਂ ਧਮਾਕਾ ਤੇ ਇਸ ਦੁਆਰਾ ਪੈਦਾ ਹੋਈ ਗਰਮੀ ਰਿਐਕਟਰਾਂ ਤੇ ਆਲੇ-ਦੁਆਲੇ ਦੀਆਂ ਇਮਾਰਤਾਂ ਨੂੰ ਪੂਰੀ ਤਰ੍ਹਾਂ ਉਡਾ ਸਕਦੀ ਹੈ। ਦੂਜੇ ਵਿਸ਼ਵ ਯੁੱਧ ਦੌਰਾਨ ਜਾਪਾਨ ਦੇ ਹੀਰੋਸ਼ੀਮਾ ‘ਤੇ ਸੁੱਟਿਆ ਗਿਆ ਅਮਰੀਕੀ ਪਰਮਾਣੂ ਬੰਬ 15 ਕਿਲੋਟਨ ਸੀ। ਅੱਜ ਦੇ ਪਰਮਾਣੂ ਬੰਬ ਇੱਕ ਹਜ਼ਾਰ ਕਿਲੋਟਨ ਤੱਕ ਹੋ ਸਕਦੇ ਹਨ। ਜਿਵੇਂ ਹੀ ਇੰਨੇ ਵੱਡੇ ਪਰਮਾਣੂ ਹਥਿਆਰ ਦੀ ਵਰਤੋਂ ਤੋਂ ਬਾਅਦ ਧਮਾਕਾ ਹੁੰਦਾ ਹੈ, ਇਸ ਦੇ ਆਲੇ-ਦੁਆਲੇ ਕੁਝ ਵੀ ਨਹੀਂ ਬਚੇਗਾ।

ਰਿਐਕਟਰ ਦੇ ਅੰਦਰ ਈਂਧਨ ਦੀਆਂ ਰਾਡਾਂ ਹੁੰਦੀਆਂ ਹਨ, ਉਹ ਟੁਕੜਿਆਂ ‘ਚ ਟੁੱਟ ਸਕਦੀਆਂ ਹਨ ਜਾਂ ਹਮਲੇ ਕਾਰਨ ਭਾਫ਼ ਦੇ ਰੂਪ ‘ਚ ਉੱਡ ਸਕਦੀਆਂ ਹਨ। ਇਸ ਨਾਲ ਰੇਡੀਏਸ਼ਨ ਦਾ ਖ਼ਤਰਾ ਵੱਧ ਜਾਂਦਾ ਹੈ। ICAN ਦੀ ਰਿਪੋਰਟ ਕਹਿੰਦੀ ਹੈ ਕਿ ਪਰਮਾਣੂ ਪਲਾਂਟ ‘ਤੇ ਹਮਲੇ ਦੌਰਾਨ, ਰਿਐਕਟਰ ਕੋਰ ਤੇ ਖਰਚ ਕੀਤੇ ਗਏ ਈਂਧਨ ਪੂਲ ‘ਚ ਮੌਜੂਦ ਸੀਜ਼ੀਅਮ-137 ਦਾ 100% ਵਾਯੂਮੰਡਲ ‘ਚ ਨਿਕਲ ਸਕਦਾ ਹੈ। ਇਹ ਮੰਨਿਆ ਜਾਂਦਾ ਹੈ ਕਿ ਹਰ 10 ਲੱਖ ਕਿਊਰੀ ਛੱਡਣ ਨਾਲ, ਲਗਭਗ 2,000 ਵਰਗ ਕਿਲੋਮੀਟਰ ਦਾ ਖੇਤਰ ਰਹਿਣ ਯੋਗ ਨਹੀਂ ਰਹਿੰਦਾ।

2 ਅਰਬ ਲੋਕ ਭੁੱਖਮਰੀ ਦੇ ਕੰਢੇ ‘ਤੇ ਹੋਣਗੇ

ਜੇਕਰ ਅਮਰੀਕਾ ਤੇ ਰੂਸ ਵਿਚਕਾਰ ਪ੍ਰਮਾਣੂ ਯੁੱਧ ‘ਚ 500 ਪ੍ਰਮਾਣੂ ਬੰਬ ਵਰਤੇ ਜਾਂਦੇ ਹਨ ਤਾਂ ਅੱਧੇ ਘੰਟੇ ਦੇ ਅੰਦਰ 10 ਕਰੋੜ ਤੋਂ ਵੱਧ ਲੋਕ ਮਰ ਜਾਣਗੇ। ਇੰਨਾ ਹੀ ਨਹੀਂ, ਜੇਕਰ ਦੁਨੀਆ ਵਿੱਚ ਮੌਜੂਦ ਪ੍ਰਮਾਣੂ ਹਥਿਆਰਾਂ ‘ਚੋਂ 1% ਤੋਂ ਘੱਟ ਯੁੱਧ ‘ਚ ਵਰਤੇ ਜਾਂਦੇ ਹਨ, ਤਾਂ 2 ਅਰਬ ਲੋਕ ਭੁੱਖਮਰੀ ਦੇ ਕੰਢੇ ‘ਤੇ ਪਹੁੰਚ ਜਾਣਗੇ। ਇਸ ਦੇ ਨਾਲ ਹੀ, ਪੂਰੀ ਸਿਹਤ ਪ੍ਰਣਾਲੀ ਵੀ ਤਬਾਹ ਹੋ ਜਾਵੇਗੀ, ਜਿਸ ਕਾਰਨ ਜ਼ਖਮੀਆਂ ਦਾ ਇਲਾਜ ਨਹੀਂ ਹੋ ਸਕੇਗਾ।

ਜੇਕਰ ਭਾਰਤ ਅਤੇ ਪਾਕਿਸਤਾਨ ਵਿਚਕਾਰ ਪ੍ਰਮਾਣੂ ਯੁੱਧ ਛਿੜ ਜਾਵੇ ਤਾਂ ਕੀ ਹੋਵੇਗਾ?

ਮਈ 2025 ‘ਚ, ਭਾਰਤ ਤੇ ਪਾਕਿਸਤਾਨ ਵਿਚਕਾਰ ਤਣਾਅ ਆਪਣੇ ਸਿਖਰ ‘ਤੇ ਸੀ। ਇਸ ਦੌਰਾਨ, ਮਾਮਲਾ ਪ੍ਰਮਾਣੂ ਯੁੱਧ ਛਿੜਨ ਦੇ ਬਿੰਦੂ ‘ਤੇ ਪਹੁੰਚ ਗਿਆ ਸੀ। ਬੁਲੇਟਿਨ ਆਫ਼ ਦ ਐਟੋਮਿਕ ਸਾਇੰਟਿਸਟਸ ਦੀ ਰਿਪੋਰਟ ਦੇ ਅਨੁਸਾਰ, ਜੇਕਰ ਭਾਰਤ ਤੇ ਪਾਕਿਸਤਾਨ ਵਿਚਕਾਰ ਇੱਕ ਖੇਤਰੀ ਪ੍ਰਮਾਣੂ ਯੁੱਧ ਹੁੰਦਾ ਹੈ, ਜਿਸ ‘ਚ ਸ਼ਹਿਰੀ ਖੇਤਰਾਂ ‘ਤੇ ਲਗਭਗ 100 ਪ੍ਰਮਾਣੂ ਹਥਿਆਰ (ਹਰੇਕ ਬੰਬ ਜਿਸ ਦੀ ਸਮਰੱਥਾ 15 ਕਿਲੋਟਨ ਹੈ) ਦਾਗੇ ਜਾਂਦੇ ਹਨ, ਤਾਂ ਇਹ ਸਿੱਧੇ ਤੌਰ ‘ਤੇ ਲਗਭਗ 2.7 ਕਰੋੜ ਲੋਕਾਂ ਦੀ ਮੌਤ ਦਾ ਕਾਰਨ ਬਣ ਸਕਦਾ ਹੈ।