ਨਾਗਪੁਰ ਵਿੱਚ ਦਹਿਸ਼ਤ, RSS ਹੈੱਡਕੁਆਰਟਰ ਤੋਂ ਥੋੜ੍ਹੀ ਦੂਰੀ ‘ਤੇ ਮਿਲੇ ਵਿਸਫੋਟਕ, ਜੈਲੇਟਿਨ ਸਟਿਕਸ, ਡੈਟੋਨੇਟਰ ਅਤੇ ਕਨੈਕਟਰ ਬਰਾਮਦ।

ਮਹਾਰਾਸ਼ਟਰ ਦੇ ਨਾਗਪੁਰ ਵਿੱਚ RSS ਹੈੱਡਕੁਆਰਟਰ ਦੇ ਨੇੜੇ ਧਮਾਕਾਖੇਜ ਸਮੱਗਰੀ ਮਿਲਣ ਨਾਲ ਸਨਸਨੀ ਫੈਲ ਗਈ ਹੈ, ਜਿਸ ਨਾਲ ਸ਼ਹਿਰ ਵਿੱਚ ਹਾਈ ਅਲਰਟ ਜਾਰੀ ਕਰ ਦਿੱਤਾ ਗਿਆ ਹੈ। ਮੌਕੇ ‘ਤੇ ਵੱਡੀ ਗਿਣਤੀ ਵਿੱਚ ਪੁਲਿਸ ਤਾਇਨਾਤ ਹੈ ਅਤੇ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਇੱਕ ਫੋਰੈਂਸਿਕ ਟੀਮ ਵੀ ਜਾਂਚ ਕਰ ਰਹੀ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਇਲਾਕੇ ਵਿੱਚ ਇੱਕ ਬੈਗ ਮਿਲਿਆ ਹੈ, ਜਿਸ ਵਿੱਚੋਂ 15 ਜੈਲੇਟਿਨ ਸਟਿਕਸ, 50 ਡੈਟੋਨੇਟਰ ਅਤੇ 8 ਕਨੈਕਟਰ ਬਰਾਮਦ ਹੋਏ ਹਨ। ਇਸ ਘਟਨਾ ਨੇ ਇਲਾਕੇ ਵਿੱਚ ਹਲਚਲ ਮਚਾ ਦਿੱਤੀ ਹੈ।

ਰਿਪੋਰਟਾਂ ਅਨੁਸਾਰ, ਨਾਗਪੁਰ ਦੇ ਸੀਏ ਰੋਡ ‘ਤੇ ਦੋਸਰ ਭਵਨ ਚੌਕ ਖੇਤਰ ਵਿੱਚ ਵੱਡੀ ਮਾਤਰਾ ਵਿੱਚ ਵਿਸਫੋਟਕ ਮਿਲੇ ਹਨ। ਮੈਟਰੋ ਸਟੇਸ਼ਨ ਦੇ ਨੇੜੇ ਇੱਕ ਘਰ ਦੇ ਇੱਕ ਛੋਟੇ ਜਿਹੇ ਗਾਰਡਨ ਵਿੱਚੋਂ 15 ਜੈਲੇਟਿਨ ਸਟਿਕਸ, 50 ਡੈਟੋਨੇਟਰ ਅਤੇ 8 ਕਨੈਕਟਰ ਵਾਲਾ ਇੱਕ ਬੈਗ ਮਿਲਿਆ।

ਧਮਾਕਾਖੇਜ ਸਮੱਗਰੀ ਨੂੰ ਕੀਤਾ ਗਿਆ ਜਬਤ

ਮੰਗਲਵਾਰ ਸਵੇਰੇ (7 ਅਪ੍ਰੈਲ) ਨੂੰ, ਘਰ ਦੇ ਮਾਲਕ ਨੇ ਬੈਗ ਵਿੱਚ ਜੈਲੇਟਿਨ ਸਟਿਕਸ ਵੇਖੇ ਅਤੇ ਤੁਰੰਤ ਪੁਲਿਸ ਨੂੰ ਸੂਚਿਤ ਕੀਤਾ। ਪੁਲਿਸ, ਬੰਬ ਸਕੁਐਡ ਅਤੇ ਫੋਰੈਂਸਿਕ ਟੀਮਾਂ ਮੌਕੇ ‘ਤੇ ਪਹੁੰਚੀਆਂ, ਇਲਾਕੇ ਨੂੰ ਘੇਰ ਲਿਆ, ਤਲਾਸ਼ੀ ਲਈ ਅਤੇ ਵਿਸਫੋਟਕਾਂ ਨੂੰ ਸੁਰੱਖਿਅਤ ਢੰਗ ਨਾਲ ਜ਼ਬਤ ਕਰ ਲਿਆ ਗਿਆ।

ਇੱਕ ਤੋਂ ਡੇਢ ਮਹੀਨੇ ਤੋਂ ਰੱਖੇ ਹੋਣ ਦਾ ਖਦਸ਼ਾ

ਪੁਲਿਸ ਦੇ ਅਨੁਸਾਰ, ਇਹ ਵਿਸਫੋਟਕ ਪਿਛਲੇ ਡੇਢ ਮਹੀਨੇ ਤੋਂ ਇੱਥੇ ਰੱਖੇ ਕੀਤੇ ਜਾਣ ਦਾ ਸ਼ੱਕ ਹੈ। ਸ਼ੁਰੂਆਤੀ ਜਾਂਚ ਵਿੱਚ ਕਾਟੋਲ ਖੇਤਰ ਵਿੱਚ ਹਾਲ ਹੀ ਵਿੱਚ ਹੋਏ ਵਿਸਫੋਟਕ ਕੰਪਨੀ ਹਾਦਸੇ ਨਾਲ ਸਬੰਧ ਹੋਣ ਦਾ ਸੰਕੇਤ ਮਿਲਦਾ ਹੈ, ਹਾਲਾਂਕਿ ਇਸਦੀ ਅਜੇ ਪੁਸ਼ਟੀ ਨਹੀਂ ਹੋਈ ਹੈ। ਮਾਮਲੇ ਦੀ ਫਿਲਹਾਲ ਜਾਂਚ ਕੀਤੀ ਜਾ ਰਹੀ ਹੈ ਅਤੇ ਲੋਕਾਂ ਤੋਂ ਪੁੱਛਗਿੱਛ ਕੀਤੀ ਜਾ ਰਹੀ ਹੈ।

ਸੰਵੇਦਨਸ਼ੀਲ ਹੈ ਇਲਾਕਾ

ਇਸ ਖੇਤਰ ਨੂੰ ਬਹੁਤ ਸੰਵੇਦਨਸ਼ੀਲ ਮੰਨਿਆ ਜਾਂਦਾ ਹੈ। ਲਗਭਗ 200 ਮੀਟਰ ਦੂਰ ਜਾਮਾ ਮਸਜਿਦ ਸਥਿਤ ਹੈ, 500 ਮੀਟਰ ਦੂਰ ਪੋਦਾਰੇਸ਼ਵਰ ਰਾਮ ਮੰਦਰ ਸਥਿਤ ਹੈ ਅਤੇ ਡੇਢ ਤੋਂ ਦੋ ਕਿਲੋਮੀਟਰ ਦੂਰ ਰਾਸ਼ਟਰੀ ਸਵੈਮ ਸੇਵਕ ਸੰਘ (RSS) ਦਾ ਮੁੱਖ ਦਫਤਰ ਸਥਿਤ ਹੈ। ਇਸ ਲਈ ਸੁਰੱਖਿਆ ਏਜੰਸੀਆਂ ਹਾਈ ਅਲਰਟ ‘ਤੇ ਹਨ।

ਹਰ ਐਂਗਲ ਤੋਂ ਕੀਤੀ ਜਾ ਰਹੀ ਜਾਂਚ

ਨਾਗਪੁਰ ਦੇ ਸੰਯੁਕਤ ਪੁਲਿਸ ਕਮਿਸ਼ਨਰ ਨਵੀਨ ਚੰਦਰ ਰੈਡੀ ਨੇ ਦੱਸਿਆ ਕਿ ਮਾਮਲੇ ਦੀ ਹਰ ਐਂਗਲ ਤੋਂ ਜਾਂਚ ਕੀਤੀ ਜਾ ਰਹੀ ਹੈ। ਉਨ੍ਹਾਂ ਅੱਗੇ ਕਿਹਾ ਕਿ ਗਰਡਨ ਵਿੱਚ ਵਿਸਫੋਟਕ ਕਿਸਨੇ ਰੱਖੇ, ਹਮਲੇ ਪਿੱਛੇ ਕੀ ਮਨਸ਼ਾ ਸੀ, ਅਤੇ ਇਨ੍ਹਾਂ ਦੀ ਵਰਤੋਂ ਕਿੱਥੇ ਕੀਤੀ ਜਾਣੀ ਸੀ, ਅਜਿਹੇ ਸਾਰੇ ਸਵਾਲਾਂ ਦੇ ਜਵਾਬ ਲੱਭੇ ਜਾ ਰਹੇ ਹਨ। ਇਸ ਵੇਲੇ, ਇਲਾਕੇ ਵਿੱਚ ਵੱਡੀ ਪੁਲਿਸ ਫੋਰਸ ਤਾਇਨਾਤ ਹੈ, ਅਤੇ ਸ਼ੱਕੀਆਂ ਦੀ ਭਾਲ ਤੇਜ਼ ਕਰ ਦਿੱਤੀ ਗਈ ਹੈ।