ਕੌਣ ਸੀ ਸਿੰਗਰ ਇੰਦਰ ਕੌਰ… ਜਿਸ ਦੀ ਜਾਨ ਲੈਣ ਲਈ ਕੈਨੇਡਾ ਤੋਂ ਆਇਆ ਕਾਤਲ?

Photo: inderkaurofficial

ਪੰਜਾਬੀ ਗਾਇਕਾ ਇੰਦਰ ਕੌਰ (Inder Kaur), ਜਿਸਨੂੰ ਯਸ਼ਿੰਦਰ ਕੌਰ (29) ਦੇ ਨਾਮ ਨਾਲ ਵੀ ਜਾਣਿਆ ਜਾਂਦਾ ਹੈ, ਦਾ ਲੁਧਿਆਣਾ ਵਿੱਚ ਕਤਲ ਕਰ ਦਿੱਤਾ ਗਿਆ। ਉਨ੍ਹਾਂ ਦੀ ਲਾਸ਼ ਅੱਜ ਸਵੇਰੇ 11 ਵਜੇ ਨੀਲੋ ਨਹਿਰ ਵਿੱਚੋਂ ਮਿਲੀ। ਇੰਦਰ ਨੂੰ ਛੇ ਦਿਨ ਪਹਿਲਾਂ ਬੰਦੂਕ ਦੀ ਨੋਕ ‘ਤੇ ਅਗਵਾ ਕੀਤਾ ਗਿਆ ਸੀ, ਜਿਸ ਮਗਰੋਂ ਉਨ੍ਹਾਂ ਦਾ ਪਰਿਵਾਰ ਉਨ੍ਹਾਂ ਦੀ ਭਾਲ ਕਰ ਰਿਹਾ ਸੀ।

ਪਰਿਵਾਰ ਨੇ ਦੱਸਿਆ ਕਿ ਮੋਗਾ ਦਾ ਇੱਕ ਵਿਅਕਤੀ ਉਸ ‘ਤੇ ਵਿਆਹ ਕਰਨ ਲਈ ਦਬਾਅ ਪਾ ਰਿਹਾ ਸੀ। ਜਦੋਂ ਉਨ੍ਹਾਂ ਨੇ ਇਨਕਾਰ ਕਰ ਦਿੱਤਾ, ਤਾਂ ਉਸਨੇ ਉਨ੍ਹਾਂ ਨੂੰ ਅਗਵਾ ਕਰ ਲਿਆ। ਉਸਨੂੰ ਮਾਰਨ ਤੋਂ ਬਾਅਦ, ਉਹ ਕੈਨੇਡਾ ਭੱਜ ਗਿਆ। ਉਹ ਕਤਲ ਕਰਨ ਲਈ ਨੇਪਾਲ ਰਾਹੀਂ ਕੈਨੇਡਾ ਤੋਂ ਪੰਜਾਬ ਆਇਆ ਸੀ, ਅਤੇ ਫਿਰ ਉਸੇ ਤਰ੍ਹਾਂ ਵਾਪਸ ਭੱਜ ਗਿਆ। ਦੋਵੇਂ ਪੰਜ ਸਾਲ ਪਹਿਲਾਂ ਇੰਸਟਾਗ੍ਰਾਮ ‘ਤੇ ਦੋਸਤ ਬਣੇ ਸਨ, ਪਰ ਜਿਵੇਂ ਹੀ ਇੰਦਰ ਨੂੰ ਪਤਾ ਲੱਗਾ ਕਿ ਮੁਲਜ਼ਮ ਵਿਆਹਿਆ ਹੋਇਆ ਹੈ ਅਤੇ ਉਸਦੇ ਬੱਚੇ ਹਨ, ਉਨ੍ਹਾਂ ਨੇ ਉਸ ਨਾਲ ਵਿਆਹ ਕਰਨ ਤੋਂ ਇਨਕਾਰ ਕਰ ਦਿੱਤਾ, ਜਿਸਤੋਂ ਬਾਅਦ ਮੁਲਜਮ ਭੜਕ ਗਿਆ।

ਕੌਣ ਸੀ ਇੰਦਰ ਕੌਰ?

29 ਸਾਲਾ ਇੰਦਰ ਕੌਰ ਯਾਨੀ ਯਸ਼ਇੰਦਰ ਕੌਰ ਨੇ ਪੰਜਾਬੀ ਸੰਗੀਤ ਉਦਯੋਗ ਵਿੱਚ ਆਪਣੇ ਲਈ ਸ਼ਾਨਦਾਰ ਥਾਂ ਬਣਾਈ ਹੈ। ਇੰਦਰ ਕੌਰ ਦਾ ਪੂਰਾ ਨਾਮ ਯਸ਼ ਇੰਦਰ ਕੌਰ ਹੈ, ਅਤੇ ਉਸਦਾ ਪਰਿਵਾਰਕ ਪਿਛੋਕੜ ਵੀ ਸੰਗੀਤ ਨਾਲ ਜੁੜਿਆ ਹੋਇਆ ਹੈ। ਗਾਇਕਾ ਨੇ ਆਪਣਾ ਸੰਗੀਤਕ ਸਫ਼ਰ “ਤੇਰੀ ਸ਼ਰਟ ਨਾਲ ਦੀ ਚੁੰਨੀ” ਨਾਲ ਸ਼ੁਰੂ ਕੀਤਾ, ਜੋ ਕਿ 2015 ਵਿੱਚ ਰਿਲੀਜ਼ ਹੋਇਆ ਸੀ। ਰਿਪੋਰਟਾਂ ਦੇ ਅਨੁਸਾਰ, ਇੰਦਰ ਦੇ ਪਿਤਾ ਵੀ ਗਾਇਕ ਹਨ, ਹਾਲਾਂਕਿ ਉਨ੍ਹਾਂ ਬਾਰੇ ਬਹੁਤੀ ਜਾਣਕਾਰੀ ਸਾਹਮਣੇ ਨਹੀਂ ਆਈ ਹੈ।

ਕਈ ਗੀਤਾਂ ਨੂੰ ਦਿੱਤੀ ਆਵਾਜ਼

ਰਿਪੋਰਟਾਂ ਦੇ ਅਨੁਸਾਰ, ਇੰਦਰ ਬਚਪਨ ਤੋਂ ਹੀ ਗਾਉਣ ਅਤੇ ਅਦਾਕਾਰੀ ਦਾ ਸ਼ੌਕੀਨ ਸੀ। ਉਨ੍ਹਾਂ ਨੇ ਆਪਣਾ ਪਹਿਲਾ ਗੀਤ ਜੌਰਡਨ ਸੰਧੂ ਨਾਲ ਗਾਇਆ, ਜਿਸ ਲਈ ਉਸਨੂੰ ਕਾਫੀ ਤਾਰੀਫ ਮਿਲੀ। “ਤੇਰੀ ਸ਼ਰਟ ਨਾਲ ਦੀ ਚੁੰਨੀ” ਤੋਂ ਇਲਾਵਾ, ਉਨ੍ਹਾਂਨੇ ਕਈ ਹੋਰ ਪੰਜਾਬੀ ਗੀਤਾਂ ਨੂੰ ਵੀ ਆਪਣੀ ਆਵਾਜ਼ ਦਿੱਤੀ ਹੈ, ਜਿਨ੍ਹਾਂ ਵਿੱਚ “ਨਾ ਚਲਦਾ,” “ਲਾਣੇਦਾਰਨੀ,” “ਹੈਲ ਕੈਟ,” “ਨਬਾਜ਼ ਜੱਟੀ ਦੀ,” ਅਤੇ “ਦੇਸੀ ਸਿਰੇ ਦਾ” ਸ਼ਾਮਲ ਹਨ। ਐਲਬਮਾਂ ਤੋਂ ਇਲਾਵਾ, ਉਨ੍ਹਾਂ ਨੇ ਪੰਜਾਬੀ ਫਿਲਮਾਂ ਵਿੱਚ ਵੀ ਗੀਤ ਗਾਏ ਹਨ।

ਇੰਦਰ ਕੌਰ ਲੁਧਿਆਣਾ ਦੇ ਜਮਾਲਪੁਰ ਵਿੱਚ ਰਹਿੰਦੀ ਸੀ। ਉਨ੍ਹਾਂ ਦੇ ਪਰਿਵਾਰ ਵਿੱਚ 3 ਭਰ੍ਹਾ ਅਤੇ ਮਾਤਾ-ਪਿਤਾ ਹਨ। ਇੰਦਰ ਨੇ ਤਕਰੀਬਨ 5 ਸਾਲ ਪਹਿਲਾਂ ਸਿੰਗਿੰਗ ਛੱਡ ਕੇ ਬੁਟੀਕ ਅਤੇ ਮੇਕਅਪ ਆਰਟਿਸਟ ਦਾ ਕੰਮ ਸ਼ੁਰੂ ਕਰ ਦਿੱਤਾ।ਸੋਸ਼ਲ ਮੀਡੀਆ ਤੇ ਕਾਫੀ ਲੋਕ ਉਨ੍ਹਾਂ ਨੂੰ ਫਾਲੋ ਕਰਦੇ ਸਨ। ਇੰਸਟਾਗ੍ਰਾਮ ਤੇ 124K ਅਤੇ ਫੇਸਬੁੱਕ ਤੇ 258K ਫਾਲੋਅਰਸ ਹਨ।

5 ਸਾਲ ਪਹਿਲਾਂ ਇੰਸਟਾਗ੍ਰਾਮ ‘ਤੇ ਹੋਈ ਸੀ ਦੋਸਤੀ

ਪੰਜ ਸਾਲ ਪਹਿਲਾਂ, ਇੰਦਰ ਕੌਰ ਨੇ ਗਾਉਣਾ ਛੱਡ ਦਿੱਤਾ ਸੀ ਅਤੇ ਹੁਣ ਇੱਕ ਬੁਟੀਕ ਅਤੇ ਮੇਕਅਪ ਆਰਟਿਸਟ ਵਜੋਂ ਕੰਮ ਕਰ ਰਹੀ ਸੀ। ਇੰਦਰ ਕੌਰ ਅਤੇ ਮੁਲਜ਼ਮ, ਸੁਖਵਿੰਦਰ, ਪਿਛਲੇ ਪੰਜ ਸਾਲਾਂ ਤੋਂ ਇੰਸਟਾਗ੍ਰਾਮ ‘ਤੇ ਦੋਸਤ ਸਨ। ਉਹ ਅਕਸਰ ਉਨ੍ਹਾਂ ਦੇ ਘਰ ਆਉਂਦਾ-ਜਾਂਦਾ ਸੀ। ਉਸਦਾ ਕੈਨੇਡਾ ਵਿੱਚ ਉਸਾਰੀ ਦਾ ਕੰਮ ਸੀ। ਇੰਦਰ ਦੇ ਭਰ੍ਹਾ ਦੀ ਵੀ ਉਸ ਨਾਲ ਗੱਲ ਹੁੰਦੀ ਰਹਿੰਦੀ ਸੀ।

ਜਦੋਂ ਇੰਦਰ ਕੌਰ ਨੂੰ ਪਤਾ ਲੱਗਾ ਕਿ ਉਹ ਵਿਆਹਿਆ ਹੋਇਆ ਹੈ, ਤਾਂ ਉਨ੍ਹਾਂ ਨੇ ਉਸ ਨਾਲ ਵਿਆਹ ਕਰਨ ਤੋਂ ਇਨਕਾਰ ਕਰ ਦਿੱਤਾ। ਉਸਨੇ ਆਖਰੀ ਵਾਰ 13 ਮਈ ਨੂੰ ਰਾਤ 10 ਵਜੇ ਇੰਦਰ ਕੌਰ ਨਾਲ ਗੱਲ ਕੀਤੀ ਸੀ। ਉਸਨੇ ਕਿਹਾ ਕਿ ਉਹ ਘਰ ਆ ਰਿਹਾ ਹੈ। ਉਸ ਤੋਂ ਬਾਅਦ, ਉਸਦਾ ਫ਼ੋਨ ਬੰਦ ਹੋ ਗਿਆ।