ਭਾਰਤੀ ਏਅਰਲਾਈਨਜ਼ ਦਾ ਵੱਡਾ ਫੈਸਲਾ, 350 ਉਡਾਣਾਂ ਰੱਦ; ਜਾਣੋ ਕਿਵੇਂ ਮਿਲੇਗਾ ਟਿਕਟ ਦਾ ਪੂਰਾ ਰਿਫੰਡ

ਭਾਰਤੀ ਏਅਰਲਾਈਨਜ਼ ਦਾ ਫੈਸਲਾ, 350 ਉਡਾਣਾਂ ਰੱਦ; ਜਾਣੋ ਕਿਵੇਂ ਮਿਲੇਗਾ ਰਿਫੰਡ

ਮੱਧ ਪੂਰਬ ਵਿੱਚ ਵਧਦੇ ਭੂ-ਰਾਜਨੀਤਿਕ ਤਣਾਅ ਨੇ ਹੁਣ ਭਾਰਤੀ ਮੁਸਾਫ਼ਰਾਂ ਦੀਆਂ ਯੋਜਨਾਵਾਂ ਅਤੇ ਜੇਬਾਂ ‘ਤੇ ਸਿੱਧਾ ਅਸਰ ਪਾਉਣਾ ਸ਼ੁਰੂ ਕਰ ਦਿੱਤਾ ਹੈ। ਐਤਵਾਰ, 1 ਮਾਰਚ ਨੂੰ ਭਾਰਤੀ ਏਅਰਲਾਈਨਜ਼ ਦੀਆਂ 350 ਤੋਂ ਵੱਧ ਉਡਾਣਾਂ ਰੱਦ ਕਰ ਦਿੱਤੀਆਂ ਗਈਆਂ। ਨਾਗਰਿਕ ਉਡਾਣ ਮੰਤਰਾਲੇ (MoCA) ਦੇ ਤਾਜ਼ਾ ਅੰਕੜਿਆਂ ਅਨੁਸਾਰ, ਮੱਧ ਪੂਰਬ ਦੇ ਹਵਾਈ ਖੇਤਰ ਵਿੱਚ ਲਗਾਈਆਂ ਗਈਆਂ ਪਾਬੰਦੀਆਂ ਕਾਰਨ ਹਵਾਬਾਜ਼ੀ ਖੇਤਰ ਵਿੱਚ ਇਹ ਵੱਡਾ ਉਲਟਫੇਰ ਹੋਇਆ ਹੈ। ਹਾਲਾਂਕਿ, ਪਹਿਲਾਂ 444 ਉਡਾਣਾਂ ਦੇ ਰੱਦ ਹੋਣ ਦਾ ਖ਼ਦਸ਼ਾ ਜਤਾਇਆ ਜਾ ਰਿਹਾ ਸੀ, ਪਰ ਰਾਹਤ ਦੀ ਗੱਲ ਇਹ ਰਹੀ ਕਿ ਇਹ ਗਿਣਤੀ 350 ਤੱਕ ਹੀ ਸੀਮਤ ਰਹੀ।

ਦਿੱਲੀ ਅਤੇ ਮੁੰਬਈ ਹਵਾਈ ਅੱਡਿਆਂ ‘ਤੇ ਸਭ ਤੋਂ ਵੱਧ ਪ੍ਰਭਾਵ

ਵਿਮਾਨਨ ਮੰਤਰਾਲੇ ਨੇ ਸਪੱਸ਼ਟ ਕੀਤਾ ਹੈ ਕਿ ਇਸ ਤੋਂ ਇੱਕ ਦਿਨ ਪਹਿਲਾਂ, 28 ਫਰਵਰੀ ਨੂੰ ਵੀ ਘਰੇਲੂ ਕੰਪਨੀਆਂ ਦੀਆਂ 410 ਉਡਾਣਾਂ ਰੱਦ ਹੋਈਆਂ ਸਨ। ਇਸ ਅੰਤਰਰਾਸ਼ਟਰੀ ਸੰਕਟ ਦਾ ਸਭ ਤੋਂ ਵੱਧ ਅਸਰ ਦੇਸ਼ ਦੇ ਸਭ ਤੋਂ ਵਿਅਸਤ ਹਵਾਈ ਅੱਡਿਆਂ ‘ਤੇ ਦੇਖਿਆ ਜਾ ਰਿਹਾ ਹੈ। ਸੂਤਰਾਂ ਅਨੁਸਾਰ, ਦਿੱਲੀ ਦੇ ਇੰਦਰਾ ਗਾਂਧੀ ਅੰਤਰਰਾਸ਼ਟਰੀ ਹਵਾਈ ਅੱਡੇ ‘ਤੇ 100 ਉਡਾਣਾਂ ਠੱਪ ਰਹੀਆਂ, ਜਦਕਿ ਮੁੰਬਈ ਹਵਾਈ ਅੱਡੇ ‘ਤੇ 125 ਉਡਾਣਾਂ ਨੂੰ ਰੱਦ ਕਰਨਾ ਪਿਆ।

ਹਾਲਾਤ ਨੂੰ ਦੇਖਦੇ ਹੋਏ ਸਾਰੇ ਪ੍ਰਮੁੱਖ ਭਾਰਤੀ ਹਵਾਈ ਅੱਡਿਆਂ ਨੂੰ ਓਪਰੇਸ਼ਨਲ ਅਲਰਟ ‘ਤੇ ਰੱਖਿਆ ਗਿਆ ਹੈ। ਮੰਤਰਾਲਾ, ਏਅਰਲਾਈਨਜ਼ ਅਤੇ ਹਵਾਈ ਅੱਡਾ ਸੰਚਾਲਕ ਲਗਾਤਾਰ ਇੱਕ-ਦੂਜੇ ਦੇ ਸੰਪਰਕ ਵਿੱਚ ਹਨ। ਯਾਤਰੀਆਂ ਦੀ ਭੀੜ ਨੂੰ ਸੰਭਾਲਣ ਅਤੇ ਉਨ੍ਹਾਂ ਨੂੰ ਜ਼ਰੂਰੀ ਸਹਾਇਤਾ ਮੁਹੱਈਆ ਕਰਵਾਉਣ ਲਈ ਸੀਨੀਅਰ ਅਧਿਕਾਰੀਆਂ ਦੀ ਤੈਨਾਤੀ ਕੀਤੀ ਗਈ ਹੈ, ਤਾਂ ਜੋ ਕਿਸੇ ਵੀ ਅਚਨਚੇਤ ਡਾਇਵਰਸ਼ਨ ਨਾਲ ਸੁਚਾਰੂ ਰੂਪ ਵਿੱਚ ਨਿਪਟਿਆ ਜਾ ਸਕੇ।

ਅੰਤਰਰਾਸ਼ਟਰੀ ਉਡਾਣਾਂ ‘ਤੇ ਵੀ ਲੱਗੀ ਰੋਕ

ਇਹ ਸੰਕਟ ਕੇਵਲ ਘਰੇਲੂ ਰੂਟਾਂ ਤੱਕ ਸੀਮਤ ਨਹੀਂ ਹੈ। ਟਾਟਾ ਸਮੂਹ ਦੀ ਮਲਕੀਅਤ ਵਾਲੀ ਏਅਰ ਇੰਡੀਆ ਨੇ ਐਤਵਾਰ ਲਈ 22 ਵਾਧੂ ਅੰਤਰਰਾਸ਼ਟਰੀ ਸੇਵਾਵਾਂ ਰੱਦ ਕਰ ਦਿੱਤੀਆਂ ਹਨ। ਇਸ ਦੇ ਨਾਲ ਹੀ, ਮਿਡਲ ਈਸਟ ਸੰਕਟ ਕਾਰਨ ਏਅਰ ਇੰਡੀਆ ਵੱਲੋਂ ਰੱਦ ਕੀਤੀਆਂ ਗਈਆਂ ਵਿਦੇਸ਼ੀ ਉਡਾਣਾਂ ਦੀ ਕੁੱਲ ਗਿਣਤੀ ਹੁਣ 50 ਤੱਕ ਪਹੁੰਚ ਗਈ ਹੈ। ਏਅਰਲਾਈਨ ਨੇ ਮੱਧ ਪੂਰਬ ਦੇ ਹਵਾਈ ਖੇਤਰ ਦੀ ਵਰਤੋਂ ਕਰਨ ਵਾਲੀਆਂ ਚੋਣਵੀਆਂ ਅੰਤਰਰਾਸ਼ਟਰੀ ਉਡਾਣਾਂ ਦੀ ਮੁਅੱਤਲੀ 2 ਮਾਰਚ ਤੱਕ ਵਧਾ ਦਿੱਤੀ ਹੈ।

ਦੂਜੇ ਪਾਸੇ, ਸਪਾਈਸਜੈੱਟ ਨੇ ਵੀ 2 ਮਾਰਚ, 2026 ਲਈ ਭਾਰਤ ਅਤੇ ਸੰਯੁਕਤ ਅਰਬ ਅਮੀਰਾਤ ਵਿਚਕਾਰ ਆਪਣੀਆਂ 33 ਉਡਾਣਾਂ ਰੱਦ ਕਰ ਦਿੱਤੀਆਂ ਹਨ। ਇਸ ਤੋਂ ਇਲਾਵਾ ਲੁਫਥਾਂਸਾ ਅਤੇ ਐਮੀਰੇਟਸ ਵਰਗੀਆਂ ਵਿਸ਼ਵਵਿਆਪੀ ਏਅਰਲਾਈਨਜ਼ ਦਾ ਸੰਚਾਲਨ ਵੀ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋਇਆ ਹੈ।

ਰਿਫੰਡ ਅਤੇ ਰੀ-ਸ਼ਡਿਊਲ ਦੇ ਨਿਯਮ: ਮੁਸਾਫ਼ਰਾਂ ਨੂੰ ਵੱਡੀ ਰਾਹਤ

ਸਭ ਤੋਂ ਵੱਧ ਪ੍ਰੇਸ਼ਾਨੀ ਉਨ੍ਹਾਂ ਯਾਤਰੀਆਂ ਨੂੰ ਹੋ ਰਹੀ ਹੈ ਜਿਨ੍ਹਾਂ ਦੀ ਬੁਕਿੰਗ ਪਹਿਲਾਂ ਤੋਂ ਸੀ ਅਤੇ ਜਿਨ੍ਹਾਂ ਨੇ ਜ਼ਰੂਰੀ ਕੰਮ ਲਈ ਯਾਤਰਾ ਕਰਨੀ ਸੀ। ਹਾਲਾਂਕਿ, ਵਿਮਾਨਨ ਕੰਪਨੀਆਂ ਨੇ ਇਸ ਮੁਸ਼ਕਲ ਘੜੀ ਵਿੱਚ ਗਾਹਕਾਂ ਨੂੰ ਆਰਥਿਕ ਨੁਕਸਾਨ ਤੋਂ ਬਚਾਉਣ ਦੀ ਕੋਸ਼ਿਸ਼ ਕੀਤੀ ਹੈ:

ਇੰਡੀਗੋ :ਕੰਪਨੀ ਨੇ ਐਲਾਨ ਕੀਤਾ ਹੈ ਕਿ 28 ਫਰਵਰੀ ਜਾਂ ਉਸ ਤੋਂ ਪਹਿਲਾਂ ਬੁੱਕ ਕੀਤੇ ਗਏ ਟਿਕਟਾਂ ‘ਤੇ 7 ਮਾਰਚ ਤੱਕ ਦੀ ਯਾਤਰਾ ਲਈ ਬਿਨਾਂ ਕਿਸੇ ਵਾਧੂ ਖਰਚੇ ਦੇ ਟਿਕਟ ਰੀ-ਸ਼ਡਿਊਲ ਕਰਨ ਜਾਂ ਪੂਰਾ ਰਿਫੰਡ ਲੈਣ ਦੀ ਸਹੂਲਤ ਮਿਲੇਗੀ।

ਏਅਰ ਇੰਡੀਆ: ਏਅਰ ਇੰਡੀਆ ਨੇ 28 ਫਰਵਰੀ ਤੱਕ ਕੀਤੀਆਂ ਗਈਆਂ ਬੁਕਿੰਗਾਂ (ਜਿਨ੍ਹਾਂ ਦੀ ਯਾਤਰਾ 5 ਮਾਰਚ ਤੱਕ ਤੈਅ ਸੀ) ਲਈ ਫੁੱਲ ਰਿਫੰਡ ਜਾਂ ਮੁਫ਼ਤ ਰੀ-ਸ਼ਡਿਊਲਿੰਗ ਦੀ ਸਹੂਲਤ ਪ੍ਰਦਾਨ ਕੀਤੀ ਹੈ।