ਰੱਖੜੀ ਤੇ ਤਿਉਹਾਰਾਂ ‘ਤੇ ਚੱਲਿਆ UPI ਦਾ ਜਾਦੂ! ₹29.82 ਲੱਖ ਕਰੋੜ ਦੇ ਕਰੀਬ ਪਹੁੰਚਿਆ ਡਿਜੀਟਲ ਟ੍ਰਾਂਜ਼ੈਕਸ਼
Digital India: ਅਗਸਤ 'ਚ ਟ੍ਰਾਂਜ਼ੈਕਸ਼ਨ ਦੀ ਕੁੱਲ ਵੈਲਿਊ 29.82 ਲੱਖ ਕਰੋੜ ਰੁਪਏ ਰਹੀ, ਜੋ ਇੱਕ ਸਾਲ ਪਹਿਲਾਂ ਇਸੇ ਮਹੀਨੇ ਵਿੱਚ 24.85 ਲੱਖ ਕਰੋੜ ਰੁਪਏ ਸੀ। ਇਸ ਤਰ੍ਹਾਂ ਇਸ ਵਿੱਚ ਸਾਲਾਨਾ ਆਧਾਰ 'ਤੇ 20 ਫੀਸਦੀ ਦਾ ਵਾਧਾ ਦਰਜ ਕੀਤਾ ਗਿਆ।
ਅਗਸਤ 'ਚ UPI ਨੇ ਬਣਾਇਆ ਰਿਕਾਰਡ
ਪੇਮੈਂਟ ਪਲੇਟਫਾਰਮ UPI ਰਾਹੀਂ ਅਗਸਤ ਵਿੱਚ 29.8 ਲੱਖ ਕਰੋੜ ਰੁਪਏ ਦੇ ਟ੍ਰਾਂਜ਼ੈਕਸ਼ਨ ਹੋਏ, ਜੋ ਰਿਕਾਰਡ ਪੱਧਰ ਦੇ ਕਰੀਬ ਹੈ। ਭਾਰਤੀ ਰਾਸ਼ਟਰੀ ਭੁਗਤਾਨ ਨਿਗਮ (NPCI) ਵੱਲੋਂ ਜਾਰੀ ਅੰਕੜਿਆਂ ਵਿੱਚ ਇਹ ਜਾਣਕਾਰੀ ਦਿੱਤੀ ਗਈ। ਯੂਨੀਫਾਈਡ ਪੇਮੈਂਟਸ ਇੰਟਰਫੇਸ (UPI) ਰਾਹੀਂ ਟ੍ਰਾਂਜ਼ੈਕਸ਼ਨ ਦੀ ਵੈਲਿਊ ਮਈ ਅਤੇ ਜੁਲਾਈ 2026 ਵਿੱਚ ਰਿਕਾਰਡ 29.9 ਲੱਖ ਕਰੋੜ ਰੁਪਏ ਰਹੀ ਸੀ। ਮੰਗਲਵਾਰ ਨੂੰ ਜਾਰੀ ਕੀਤੇ ਗਏ ਅੰਕੜਿਆਂ ਮੁਤਾਬਕ, ਅਗਸਤ ਵਿੱਚ UPI ਟ੍ਰਾਂਜ਼ੈਕਸ਼ਨ ਦੀ ਗਿਣਤੀ ਰਿਕਾਰਡ 2,451 ਕਰੋੜ ਤੱਕ ਪਹੁੰਚ ਗਈ, ਜੋ ਪਿਛਲੇ ਮਹੀਨੇ ਦੇ 2,366 ਕਰੋੜ ਦੇ ਮੁਕਾਬਲੇ ਕਾਫ਼ੀ ਜ਼ਿਆਦਾ ਹੈ। ਇਸ ਸਾਲ ਜੂਨ ਵਿੱਚ ਟ੍ਰਾਂਜ਼ੈਕਸ਼ਨ ਦੀ ਗਿਣਤੀ 2,272 ਕਰੋੜ ਅਤੇ ਮਈ ਵਿੱਚ 2,320 ਕਰੋੜ ਰਹੀ ਸੀ। ਅਗਸਤ ਵਿੱਚ ਟ੍ਰਾਂਜ਼ੈਕਸ਼ਨ ਦੀ ਕੁੱਲ ਵੈਲਿਊ 29.82 ਲੱਖ ਕਰੋੜ ਰੁਪਏ ਰਹੀ, ਜੋ ਇੱਕ ਸਾਲ ਪਹਿਲਾਂ ਇਸੇ ਮਹੀਨੇ ਵਿੱਚ 24.85 ਲੱਖ ਕਰੋੜ ਰੁਪਏ ਸੀ। ਇਸ ਤਰ੍ਹਾਂ ਇਸ ਵਿੱਚ ਸਾਲਾਨਾ ਆਧਾਰ ‘ਤੇ 20 ਫੀਸਦੀ ਦਾ ਵਾਧਾ ਦਰਜ ਕੀਤਾ ਗਿਆ।
ਸਾਲਾਨਾ ਆਧਾਰ ‘ਤੇ 22 ਫੀਸਦੀ ਦਾ ਵਾਧਾ
NPCI ਦੇ ਅੰਕੜਿਆਂ ਮੁਤਾਬਕ, ਇਸੇ ਮਿਆਦ ਦੌਰਾਨ UPI ਟ੍ਰਾਂਜ਼ੈਕਸ਼ਨਾਂ ਦੀ ਗਿਣਤੀ ਸਾਲਾਨਾ ਆਧਾਰ ‘ਤੇ 22 ਫੀਸਦੀ ਵਧ ਕੇ ਅਗਸਤ ਵਿੱਚ 2,451 ਕਰੋੜ ਹੋ ਗਈ, ਜਦਕਿ ਪਿਛਲੇ ਸਾਲ ਇਸੇ ਮਹੀਨੇ ਇਹ ਅੰਕੜਾ 1,963 ਕਰੋੜ ਸੀ। ਭਾਰਤੀ ਰਿਜ਼ਰਵ ਬੈਂਕ (RBI) ਅਤੇ ਭਾਰਤੀ ਬੈਂਕ ਐਸੋਸੀਏਸ਼ਨ (IBA) ਦੀ ਪਹਿਲਕਦਮੀ NPCI ਭਾਰਤ ਵਿੱਚ ਰਿਟੇਲ ਪੇਮੈਂਟ ਅਤੇ ਸੈਟਲਮੈਂਟ ਸਿਸਟਮ ਦੇ ਸੰਚਾਲਨ ਲਈ ਇੱਕ ਪ੍ਰਮੁੱਖ ਸੰਗਠਨ ਹੈ। ਇਹ UPI ਦਾ ਸੰਚਾਲਨ ਕਰਦਾ ਹੈ, ਜਿਸ ਦੀ ਵਰਤੋਂ ਲੋਕਾਂ ਵਿਚਾਲੇ ਜਾਂ ਖਰੀਦਦਾਰੀ ਦੌਰਾਨ ਵਪਾਰੀਆਂ ਨੂੰ ਰੀਅਲ-ਟਾਈਮ ਭੁਗਤਾਨ ਕਰਨ ਲਈ ਕੀਤੀ ਜਾਂਦੀ ਹੈ।
ਰੱਖੜੀ ਦੇ ਤਿਉਹਾਰ ਦਾ ਵੀ ਮਿਲਿਆ ਫਾਇਦਾ
ਕੈਸ਼ਫ੍ਰੀ ਪੇਮੈਂਟਸ ਦੇ ਕੋ-ਫਾਊਂਡਰ ਰਿਜੂ ਦੱਤਾ ਨੇ ਕਿਹਾ ਕਿ ਅਗਸਤ ਵਿੱਚ ਟ੍ਰਾਂਜ਼ੈਕਸ਼ਨਾਂ ਦੀ ਗਿਣਤੀ ਵਿੱਚ ਵਾਧੇ ਨੂੰ ਰੱਖੜੀ ਵਰਗੇ ਤਿਉਹਾਰਾਂ ਤੋਂ ਵੀ ਹੁਲਾਰਾ ਮਿਲਿਆ। ਇਸ ਕਾਰਨ ਰੋਜ਼ਾਨਾ ਹੋਣ ਵਾਲੇ ਵਿਅਕਤੀ-ਤੋਂ-ਵਿਅਕਤੀ (P2P) ਟ੍ਰਾਂਸਫਰ ਅਤੇ ਛੋਟੀ ਰਕਮ ਦੇ ਤੋਹਫ਼ਿਆਂ ਨਾਲ ਜੁੜੇ ਭੁਗਤਾਨਾਂ ਵਿੱਚ ਕੁਦਰਤੀ ਤੌਰ ‘ਤੇ ਤੇਜ਼ੀ ਆਈ। ਉਨ੍ਹਾਂ ਕਿਹਾ ਕਿ ਪਿਛਲੇ ਤਿੰਨ ਮਹੀਨਿਆਂ ਵਿੱਚ ਟ੍ਰਾਂਜ਼ੈਕਸ਼ਨਾਂ ਦੀ ਗਿਣਤੀ ਵਧਣ ਦੇ ਨਾਲ ਕੁੱਲ ਟ੍ਰਾਂਜ਼ੈਕਸ਼ਨ ਵੈਲਿਊ ਵਿੱਚ ਲਗਾਤਾਰ ਮਜ਼ਬੂਤੀ UPI ਸਿਸਟਮ ਦੀ ਵਧਦੀ ਪਹੁੰਚ ਅਤੇ ਵਿਆਪਕ ਵਰਤੋਂ ਨੂੰ ਦਰਸਾਉਂਦੀ ਹੈ।
ਵਿਦੇਸ਼ਾਂ ਵਿੱਚ UPI ਟ੍ਰਾਂਜ਼ੈਕਸ਼ਨ
ਵਿਦੇਸ਼ਾਂ ਵਿੱਚ UPI ਦੀ ਮੌਜੂਦਗੀ ਦੀ ਗੱਲ ਕਰੀਏ ਤਾਂ ਹੁਣ 11 ਦੇਸ਼ਾਂ ਵਿੱਚ UPI ਨੂੰ ਸਵੀਕਾਰ ਕੀਤਾ ਜਾਂਦਾ ਹੈ। ਉਜ਼ਬੇਕਿਸਤਾਨ ਇਸ ਵਿੱਚ ਸ਼ਾਮਲ ਹੋਣ ਵਾਲਾ ਸਭ ਤੋਂ ਨਵਾਂ ਦੇਸ਼ ਹੈ। ਹੋਰ ਦੇਸ਼ਾਂ ਵਿੱਚ ਸਿੰਗਾਪੁਰ, ਸੰਯੁਕਤ ਅਰਬ ਅਮੀਰਾਤ (UAE), ਫਰਾਂਸ, ਮੌਰੀਸ਼ਸ, ਨੇਪਾਲ, ਭੂਟਾਨ, ਕਤਰ, ਸ਼੍ਰੀਲੰਕਾ, ਕੰਬੋਡੀਆ ਅਤੇ ਯੂਨਾਨ ਸ਼ਾਮਲ ਹਨ, ਜਿੱਥੇ UPI ਸਵੀਕਾਰ ਕੀਤਾ ਜਾਂਦਾ ਹੈ। UPI ਦੀ ਸ਼ੁਰੂਆਤ 25 ਅਗਸਤ, 2016 ਨੂੰ ਹੋਈ ਸੀ ਅਤੇ ਉਦੋਂ ਤੋਂ ਇਸ ਨੇ ਭਾਰਤ ਦੇ ਡਿਜੀਟਲ ਪੇਮੈਂਟ ਦੇ ਖੇਤਰ ਨੂੰ ਬਦਲ ਦਿੱਤਾ ਹੈ। ਇਸ ਦੀ ਟ੍ਰਾਂਜ਼ੈਕਸ਼ਨ ਵੈਲਿਊ ਵਿੱਤੀ ਸਾਲ 2016-17 ਦੇ 0.07 ਲੱਖ ਕਰੋੜ ਰੁਪਏ ਤੋਂ ਵਧ ਕੇ ਵਿੱਤੀ ਸਾਲ 2025-26 ਵਿੱਚ ਲਗਭਗ 314 ਲੱਖ ਕਰੋੜ ਰੁਪਏ ਹੋ ਗਈ। ਯਾਨੀ ਇੱਕ ਦਹਾਕੇ ਵਿੱਚ ਇਸ ਵਿੱਚ 4,000 ਗੁਣਾ ਤੋਂ ਵੱਧ ਦਾ ਵਾਧਾ ਹੋਇਆ ਹੈ।