ਹਾਂਗ ਕਾਂਗ ਦੀ ਹਾਈਰਾਈਜ ਸੋਸਾਇਟੀ ‘ਚ ਕਿਵੇਂ ਲੱਗੀ ਇੰਨੀ ਭਿਆਨਕ ਅੱਗ? 44 ਲੋਕਾਂ ਦੀ ਮੌਤ, ਸੈਂਕੜੇ ਲਾਪਤਾ, 3 ਗ੍ਰਿਫ਼ਤਾਰ

ਹਾਂਗ ਕਾਂਗ ਦੀ ਹਾਈਰਾਈਜ ਸੋਸਾਇਟੀ 'ਚ ਕਿਵੇਂ ਲੱਗੀ ਇੰਨੀ ਭਿਆਨਕ ਅੱਗ? 44 ਲੋਕਾਂ ਦੀ ਮੌਤ, ਸੈਂਕੜੇ ਲਾਪਤਾ, 3 ਗ੍ਰਿਫ਼ਤਾਰ

ਹਾਂਗ ਕਾਂਗ ਨੇ ਤਿੰਨ ਦਹਾਕਿਆਂ ‘ਚ ਆਪਣੀ ਸਭ ਤੋਂ ਭਿਆਨਕ ਅੱਗ ਦੇਖੀ ਹੈ। ਇਹ ਘਟਨਾ ਹਾਈਰਾਈਜ ਇਮਾਰਤਾਂ ‘ਚ ਵਾਪਰੀ। ਇਸ ਘਟਨਾ ‘ਚ 44 ਲੋਕਾਂ ਦੀ ਮੌਤ ਹੋ ਗਈ ਹੈ। ਅੱਗ ਇੰਨੀ ਭਿਆਨਕ ਹੈ ਕਿ ਲਗਭਗ 300 ਲੋਕ ਅਜੇ ਵੀ ਲਾਪਤਾ ਹਨ ਤੇ ਉਨ੍ਹਾਂ ਦੀ ਭਾਲ ਕੀਤੀ ਜਾ ਰਹੀ ਹੈ। ਭਿਆਨਕ ਅੱਗ ਲੱਗਣ ਕਾਰਨ ਸੈਂਕੜੇ ਲੋਕਾਂ ਨੂੰ ਆਪਣੇ ਘਰ ਛੱਡਣ ਲਈ ਮਜਬੂਰ ਹੋਣਾ ਪਿਆ, ਜਿਨ੍ਹਾਂ ‘ਚ ਬਹੁਤ ਸਾਰੇ ਬਜ਼ੁਰਗ ਨਿਵਾਸੀ ਵੀ ਸ਼ਾਮਲ ਹਨ।

ਇਸ ਵੇਲੇ, ਲਗਭਗ 900 ਲੋਕਾਂ ਨੂੰ ਅਸਥਾਈ ਆਸਰਾ ਸਥਾਨਾਂ ‘ਚ ਲਿਜਾਇਆ ਗਿਆ ਹੈ। ਅੱਗ ਬੁਝਾਉਣ ਵਾਲੇ 140 ਤੋਂ ਵੱਧ ਫਾਇਰ ਟਰੱਕ ਤੇ 60 ਐਂਬੂਲੈਂਸਾਂ ਤਾਇਨਾਤ ਕੀਤੀਆਂ ਗਈਆਂ ਹਨ। ਕਈ ਸਥਾਨਕ ਨਿਊਜ਼ ਆਉਟਲੈਟਾਂ ਦੇ ਅਨੁਸਾਰ, ਪੁਲਿਸ ਨੇ ਇਸ ਮਾਮਲੇ ਦੇ ਸਬੰਧ ‘ਚ ਤਿੰਨ ਲੋਕਾਂ ਨੂੰ ਗ੍ਰਿਫਤਾਰ ਕੀਤਾ ਹੈ। ਉਨ੍ਹਾਂ ‘ਤੇ ਗੈਰ-ਇਰਾਦਤਨ ਕਤਲ ਦਾ ਸ਼ੱਕ ਹੈ ਤੇ ਉਹ ਅੱਗ ਦੀ ਇਸ ਘਟਨਾ ‘ਚ ਸ਼ਾਮਲ ਹੋ ਸਕਦੇ ਹਨ।

ਇੰਨੀ ਭਿਆਨਕ ਅੱਗ ਕਿਵੇਂ ਸ਼ੁਰੂ ਹੋਈ?

ਹਾਂਗ ਕਾਂਗ ‘ਚ, ਅੱਗ ਇੱਕ 32 ਮੰਜ਼ਿਲਾ ਟਾਵਰ ਦੇ ਬਾਹਰ ਇੱਕ ਬਾਂਸ ਦੇ ਸਕੈਫੋਲਡਿੰਗ ਤੋਂ ਸ਼ੁਰੂ ਹੋਈ। ਇਹੀ ਕਾਰਨ ਹੈ ਕਿ ਇਹ ਇੰਨੀ ਤੇਜ਼ੀ ਨਾਲ ਫੈਲ ਗਈ ਅਤੇ ਅੱਠ-ਟਾਵਰ ਹਾਊਸਿੰਗ ਕੰਪਲੈਕਸ ਦੀਆਂ ਸੱਤ ਇਮਾਰਤਾਂ ਨੂੰ ਆਪਣੀ ਲਪੇਟ ਵਿੱਚ ਲੈ ਲਿਆ। ਨਿਰਮਾਣ ਜਾਲ ਤੇ ਤੇਜ਼ ਹਵਾਵਾਂ ਨੇ ਅੱਗ ਨੂੰ ਇਮਾਰਤਾਂ ਉੱਤੇ ਧੱਕ ਦਿੱਤਾ। ਜਿਵੇਂ ਹੀ ਅੱਗ ਫੈਲੀ, ਸੰਘਣੇ ਧੂੰਏਂ ਨੇ ਨਿਊ ਟੈਰੀਟਰੀਜ਼ ਦੇ ਪੂਰੇ ਉਪਨਗਰ ਨੂੰ ਢੱਕ ਲਿਆ।

ਹਾਂਗ ਕਾਂਗ ਦੇ ਮੁੱਖ ਕਾਰਜਕਾਰੀ, ਜੌਨ ਲੀ, ਨੇ ਕਿਹਾ ਕਿ ਮੁੱਢਲੀ ਜਾਂਚ ਚੱਲ ਰਹੀ ਹੈ ਤੇ ਐਮਰਜੈਂਸੀ ਕਰੂ ਲਾਪਤਾ ਲੋਕਾਂ ਦੀ ਭਾਲ ਕਰ ਰਹੇ ਹਨ। ਉਨ੍ਹਾਂ ਅੱਗੇ ਕਿਹਾ ਕਿ ਪੁਲਿਸ ਤੇ ਫਾਇਰ ਸਰਵਿਸਿਜ਼ ਵਿਭਾਗ ਨੇ ਅੱਗ ਦੇ ਕਾਰਨਾਂ ਦਾ ਪਤਾ ਲਗਾਉਣ ਲਈ ਪਹਿਲਾਂ ਹੀ ਇੱਕ ਵਿਸ਼ੇਸ਼ ਜਾਂਚ ਟੀਮ ਬਣਾਈ ਹੈ। ਲੀ ਨੇ ਕਿਹਾ ਕਿ ਅੱਧੀ ਰਾਤ ਤੋਂ ਥੋੜ੍ਹੀ ਦੇਰ ਬਾਅਦ ਅੱਗ ‘ਤੇ ਕਾਬੂ ਪਾ ਲਿਆ ਗਿਆ।

ਉੱਚ ਤਾਪਮਾਨ ਕਾਰਨ ਬਚਾਅ ‘ਚ ਰੁਕਾਵਟ

ਅਧਿਕਾਰੀਆਂ ਦੇ ਅਨੁਸਾਰ, ਘੱਟੋ-ਘੱਟ 45 ਲੋਕਾਂ ਦਾ ਇਸ ਸਮੇਂ ਹਸਪਤਾਲਾਂ ‘ਚ ਇਲਾਜ ਕੀਤਾ ਜਾ ਰਿਹਾ ਹੈ, ਜਿਨ੍ਹਾਂ ‘ਚੋਂ ਕੁਝ ਗੰਭੀਰ ਜ਼ਖਮੀ ਹਨ। ਫਾਇਰ ਕਮਾਂਡਰਾਂ ਨੇ ਕਿਹਾ ਕਿ ਇਮਾਰਤਾਂ ਦੇ ਅੰਦਰ ਵਧਦੇ ਤਾਪਮਾਨ ਨੇ ਬਚਾਅ ਟੀਮਾਂ ਲਈ, ਲੋਕਾਂ ਨੂੰ ਬਾਹਰ ਕੱਢਣ ਲਈ ਮਹੱਤਵਪੂਰਨ ਚੁਣੌਤੀਆਂ ਖੜ੍ਹੀਆਂ ਕਰ ਦਿੱਤੀਆਂ। ਫਾਇਰ ਸਰਵਿਸ ਓਪਰੇਸ਼ਨਜ਼ ਦੇ ਡਿਪਟੀ ਡਾਇਰੈਕਟਰ, ਡੇਰੇਕ ਆਰਮਸਟ੍ਰਾਂਗ ਚੈਨ ਨੇ ਕਿਹਾ ਕਿ ਪ੍ਰਭਾਵਿਤ ਇਮਾਰਤਾਂ ਤੋਂ ਮਲਬਾ ਅਤੇ ਸਕੈਫੋਲਡਿੰਗ ਹੇਠਾਂ ਡਿੱਗ ਰਹੇ ਹਨ। ਇਮਾਰਤਾਂ ਦੇ ਅੰਦਰ ਤਾਪਮਾਨ ਬਹੁਤ ਜ਼ਿਆਦਾ ਹੈ। ਉਨ੍ਹਾਂ ਲਈ ਇਮਾਰਤਾਂ ‘ਚ ਦਾਖਲ ਹੋਣਾ ਤੇ ਉੱਪਰ ਜਾ ਕੇ ਅੱਗ ਬੁਝਾਉਣਾ ਤੇ ਬਚਾਅ ਕਾਰਜ ਚਲਾਉਣਾ ਮੁਸ਼ਕਲ ਹੈ।

ਅੱਗ ਲੱਗਣ ਤੋਂ ਬਾਅਦ ਲੈਵਲ 5 ਦਾ ਅਲਾਰਮ ਵਜਾਇਆ ਗਿਆ, ਜੋ ਕਿ ਹਾਂਗ ਕਾਂਗ ਦਾ ਸਭ ਤੋਂ ਉੱਚਾ ਐਮਰਜੈਂਸੀ ਵਰਗੀਕਰਣ ਅਪਗ੍ਰੇਡ ਹੈ। ਇਹ ਸ਼ਾਮ ਤੱਕ ਵੱਜਦਾ ਰਿਹਾ, ਕਈ ਬਲਾਕਾਂ ਤੋਂ ਸੰਘਣਾ ਧੂੰਆਂ ਉੱਠ ਰਿਹਾ ਸੀ। ਫਾਇਰਫਾਈਟਰਾਂ ਨੇ ਉੱਪਰਲੀਆਂ ਮੰਜ਼ਿਲਾਂ ‘ਤੇ ਪਾਣੀ ਪਾਉਣ ਲਈ ਲੈਡਰ ਟਰੈਕ ਦੀ ਵਰਤੋਂ ਕੀਤੀ। ਪੁਲਿਸ ਤੇ ਪੈਰਾਮੈਡਿਕਸ ਨੇ ਮੁਸੀਬਤ ‘ਚ ਫਸੇ ਲੋਕਾਂ ਦੀ ਮਦਦ ਕੀਤੀ।