Adventure ਬਣ ਗਿਆ ਮੌਤ ਦਾ ਸਫ਼ਰ …ਯਮਨ ਨੇੜੇ ਵੱਡਾ ਸਮੁੰਦਰੀ ਹਾਦਸਾ, 4 ਕਿਸ਼ਤੀਆਂ ਡੁੱਬੀਆਂ, 180 ਲੋਕ ਲਾਪਤਾ
07 Mar 2025 21:55 PM
Yaman Boat Soaked: ਯਮਨ ਅਤੇ ਜਿਬੂਤੀ ਦੇ ਤੱਟ 'ਤੇ ਚਾਰ ਕਿਸ਼ਤੀਆਂ ਡੁੱਬਣ ਤੋਂ ਬਾਅਦ 180 ਤੋਂ ਵੱਧ ਪ੍ਰਵਾਸੀ ਲਾਪਤਾ ਹਨ। ਇਹ ਘਟਨਾ ਇਥੋਪੀਆਈ ਪ੍ਰਵਾਸੀਆਂ ਲਈ ਬਹੁਤ ਖਤਰਨਾਕ ਸਮੁੰਦਰੀ ਰਸਤੇ 'ਤੇ ਵਾਪਰੀ। ਇਸ ਵੇਲੇ ਇਹ ਘਟਨਾ ਪ੍ਰਵਾਸੀਆਂ ਦੀ ਸੁਰੱਖਿਆ ਬਾਰੇ ਗੰਭੀਰ ਸਵਾਲ ਖੜ੍ਹੇ ਕਰ ਰਹੀ ਹੈ।
ਯਮਨ ਅਤੇ ਜਿਬੂਤੀ ਵਿਚਕਾਰ ਪ੍ਰਵਾਸੀਆਂ ਨੂੰ ਲਿਜਾ ਰਹੀਆਂ ਚਾਰ ਕਿਸ਼ਤੀਆਂ ਸਮੁੰਦਰ ਵਿੱਚ ਡੁੱਬ ਗਈਆਂ। ਇਸ ਹਾਦਸੇ ਕਾਰਨ 180 ਤੋਂ ਵੱਧ ਲੋਕ ਲਾਪਤਾ ਹੋ ਗਏ ਹਨ। ਸੰਯੁਕਤ ਰਾਸ਼ਟਰ ਅੰਤਰਰਾਸ਼ਟਰੀ ਪ੍ਰਵਾਸ ਸੰਗਠਨ (IOM) ਨੇ ਇਸ ਘਟਨਾ ਦੀ ਪੁਸ਼ਟੀ ਕੀਤੀ ਹੈ ਅਤੇ ਇਸਨੂੰ ਦੁਨੀਆ ਦੇ ਸਭ ਤੋਂ ਖਤਰਨਾਕ ਪ੍ਰਵਾਸ ਮਾਰਗਾਂ ਵਿੱਚੋਂ ਇੱਕ ਕਿਹਾ ਹੈ। ਇਸ ਰਸਤੇ ਦੀ ਵਰਤੋਂ ਮੁੱਖ ਤੌਰ ‘ਤੇ ਇਥੋਪੀਆਈ ਪ੍ਰਵਾਸੀਆਂ ਦੁਆਰਾ ਖਾੜੀ ਦੇਸ਼ਾਂ ਵਿੱਚ ਕੰਮ ਦੀ ਭਾਲ ਕਰਨ ਜਾਂ ਸੰਘਰਸ਼ ਤੋਂ ਬਚਣ ਲਈ ਕੀਤੀ ਜਾਂਦੀ ਹੈ।
ਆਈਓਐਮ ਦੇ ਮੁਤਾਬਕ, ਵੀਰਵਾਰ ਰਾਤ ਨੂੰ ਚਾਰ ਕਿਸ਼ਤੀਆਂ ਡੁੱਬ ਗਈਆਂ, ਜਿਨ੍ਹਾਂ ਵਿੱਚ ਸਵਾਰ 180 ਤੋਂ ਵੱਧ ਲੋਕ ਅਜੇ ਵੀ ਲਾਪਤਾ ਹਨ। ਇਹ ਹਾਦਸਾ ਯਮਨ ਅਤੇ ਜਿਬੂਤੀ ਦੇ ਤੱਟਾਂ ਨੇੜੇ ਵਾਪਰਿਆ। ਇਹ ਪ੍ਰਵਾਸੀ ਰਸਤਾ ਪਹਿਲਾਂ ਵੀ ਘਾਤਕ ਸਾਬਤ ਹੋ ਚੁੱਕਾ ਹੈ। 2024 ਵਿੱਚ, 60,000 ਤੋਂ ਵੱਧ ਪ੍ਰਵਾਸੀ ਇਸ ਰਸਤੇ ਰਾਹੀਂ ਯਮਨ ਪਹੁੰਚੇ, ਜਦੋਂ ਕਿ ਇਸ ਸਮੇਂ ਦੌਰਾਨ 558 ਲੋਕਾਂ ਦੀ ਮੌਤ ਹੋ ਗਈ।
ਪਹਿਲਾਂ ਵੀ ਵਾਪਰ ਚੁੱਕੀਆਂ ਹਨ ਦੁਖਦਾਈ ਘਟਨਾਵਾਂ
ਇਸ ਸਾਲ ਜਨਵਰੀ ਵਿੱਚ ਵੀ ਇੱਕ ਕਿਸ਼ਤੀ ਹਾਦਸਾ ਹੋਇਆ ਸੀ, ਜਿਸ ਵਿੱਚ 20 ਇਥੋਪੀਆਈ ਪ੍ਰਵਾਸੀਆਂ ਦੀ ਮੌਤ ਹੋ ਗਈ ਸੀ। ਇਨ੍ਹਾਂ ਲਗਾਤਾਰ ਵਾਪਰ ਰਹੀਆਂ ਘਟਨਾਵਾਂ ਨੇ ਪ੍ਰਵਾਸੀਆਂ ਦੀ ਸੁਰੱਖਿਆ ਬਾਰੇ ਗੰਭੀਰ ਚਿੰਤਾਵਾਂ ਪੈਦਾ ਕਰ ਦਿੱਤੀਆਂ ਹਨ। ਬਹੁਤ ਸਾਰੇ ਲੋਕ ਬਿਹਤਰ ਜ਼ਿੰਦਗੀ ਦੀ ਭਾਲ ਵਿੱਚ ਇਸ ਖ਼ਤਰਨਾਕ ਸਮੁੰਦਰੀ ਰਸਤੇ ਨੂੰ ਅਪਣਾਉਂਦੇ ਹਨ, ਪਰ ਇਸ ਸਮੇਂ ਦੌਰਾਨ ਉਨ੍ਹਾਂ ਨੂੰ ਹਮੇਸ਼ਾ ਆਪਣੀ ਜਾਨ ਗੁਆਉਣ ਦੇ ਜੋਖ਼ਮ ਦਾ ਸਾਹਮਣਾ ਕਰਨਾ ਪੈਂਦਾ ਹੈ।
ਬਚਾਅ ਕਾਰਜ ਜਾਰੀ
ਆਈਓਐਮ ਅਤੇ ਹੋਰ ਰਾਹਤ ਏਜੰਸੀਆਂ ਲਾਪਤਾ ਲੋਕਾਂ ਦੀ ਭਾਲ ਕਰ ਰਹੀਆਂ ਹਨ। ਹਾਲਾਂਕਿ, ਸਮੁੰਦਰੀ ਸਥਿਤੀਆਂ ਅਤੇ ਸੀਮਤ ਸਰੋਤਾਂ ਕਾਰਨ ਬਚਾਅ ਕਾਰਜਾਂ ਵਿੱਚ ਮੁਸ਼ਕਲਾਂ ਆ ਰਹੀਆਂ ਹਨ। ਸਥਾਨਕ ਪ੍ਰਸ਼ਾਸਨ ਅਤੇ ਮਛੇਰਿਆਂ ਦੀ ਮਦਦ ਨਾਲ ਕੁੱਝ ਲੋਕਾਂ ਨੂੰ ਬਚਾਉਣ ਦੀਆਂ ਕੋਸ਼ਿਸ਼ਾਂ ਕੀਤੀਆਂ ਜਾ ਰਹੀਆਂ ਹਨ, ਪਰ ਅਜੇ ਤੱਕ ਕਿਸੇ ਦੇ ਵੀ ਸੁਰੱਖਿਅਤ ਹੋਣ ਦੀ ਪੁਸ਼ਟੀ ਨਹੀਂ ਹੋਈ ਹੈ।
ਯਮਨ-ਜਿਬੂਤੀ ਅਧਿਕਾਰੀਆਂ ਦੀਆਂ ਚਿੰਤਾਵਾਂ
ਯਮਨ ਅਤੇ ਜਿਬੂਤੀ ਦੇ ਅਧਿਕਾਰੀ ਵੀ ਇਸ ਘਟਨਾ ਦੀ ਨਿਗਰਾਨੀ ਕਰ ਰਹੇ ਹਨ। ਇਨ੍ਹਾਂ ਵਾਰ-ਵਾਰ ਹੋਣ ਵਾਲੇ ਕਿਸ਼ਤੀ ਹਾਦਸਿਆਂ ਦੇ ਮੱਦੇਨਜ਼ਰ, ਸੁਰੱਖਿਆ ਉਪਾਵਾਂ ਨੂੰ ਹੋਰ ਮਜ਼ਬੂਤ ਕਰਨ ਦੀ ਲੋੜ ਹੈ। ਪ੍ਰਵਾਸੀਆਂ ਨੂੰ ਸਮੁੰਦਰ ਰਾਹੀਂ ਯਾਤਰਾ ਕਰਨ ਤੋਂ ਰੋਕਣ ਅਤੇ ਉਨ੍ਹਾਂ ਨੂੰ ਸੁਰੱਖਿਅਤ ਵਿਕਲਪ ਪ੍ਰਦਾਨ ਕਰਨ ਦੀ ਮੰਗ ਵੱਧ ਰਹੀ ਹੈ।
ਇਹ ਵੀ ਪੜ੍ਹੋ
ਸਮੁੰਦਰੀ ਮਾਰਗਾਂ ਵਿੱਚ ਵਧ ਰਹੇ ਖ਼ਤਰੇ
ਇਸ ਘਟਨਾ ਨੇ ਇੱਕ ਵਾਰ ਫਿਰ ਇਸ ਖ਼ਤਰਨਾਕ ਪ੍ਰਵਾਸੀ ਰਸਤੇ ‘ਤੇ ਚਰਚਾ ਛੇੜ ਦਿੱਤੀ ਹੈ। ਸੰਯੁਕਤ ਰਾਸ਼ਟਰ ਅਤੇ ਅੰਤਰਰਾਸ਼ਟਰੀ ਸੰਗਠਨਾਂ ਦਾ ਮੰਨਣਾ ਹੈ ਕਿ ਜਦੋਂ ਤੱਕ ਅਫਰੀਕੀ ਦੇਸ਼ਾਂ ਵਿੱਚ ਸਥਿਰਤਾ ਅਤੇ ਰੁਜ਼ਗਾਰ ਦੇ ਮੌਕੇ ਨਹੀਂ ਵਧਦੇ, ਉੱਦੋ ਤੱਕ ਲੋਕਾਂ ਨੂੰ ਜੋਖ਼ਮ ਭਰੀਆਂ ਯਾਤਰਾਵਾਂ ਕਰਨ ਲਈ ਮਜਬੂਰ ਹੁੰਦੇ ਰਹਿਣਗੇ। ਇਹ ਘਟਨਾ ਪ੍ਰਵਾਸੀਆਂ ਦੀ ਸੁਰੱਖਿਆ ਲਈ ਇੱਕ ਵੱਡੀ ਚੁਣੌਤੀ ਵਜੋਂ ਉਭਰੀ ਹੈ।