ਮਾਨਸੂਨ ਦੀ ਹੋਈ ਵਾਪਸੀ, ਪੰਜਾਬ ਚ ਅਜੇ ਨਹੀਂ ਹੋਵੇਗੀ ਬਾਰਿਸ਼, ਤਾਪਮਾਨ ਵਿੱਚ ਵੀ ਹੋਵੇਗਾ ਵਾਧਾ

ਮੌਸਮ ਅਪਡੇਟ (ਸੰਕੇਤਕ ਤਸਵੀਰ)

Punjab Weather: ਪੰਜਾਬ ਵਿੱਚ ਇਸ ਮੌਨਸੂਨ ਸੀਜ਼ਨ (Monsoon) ਦਾ ਅੰਤ ਰਿਕਾਰਡ ਬਾਰਿਸ਼ ਨਾਲ ਹੋ ਰਿਹਾ ਹੈ। ਮਾਨਸੂਨ ਹੁਣ ਬਾਹਰ ਨਿਕਲਣ ਵਾਲਾ ਹੈ ਅਤੇ ਅਗਲੇ ਹਫ਼ਤੇ ਦੇ ਅੰਦਰ ਸੂਬੇ ਤੋਂ ਪੂਰੀ ਤਰ੍ਹਾਂ ਵਾਪਸ ਚਲਾ ਜਾਵੇਗਾ। ਮੌਸਮ ਵਿਭਾਗ ਦੇ ਅੰਕੜਿਆਂ ਅਨੁਸਾਰ, ਇਸ ਸਾਲ 1 ਜੂਨ ਤੋਂ 20 ਸਤੰਬਰ ਦੇ ਵਿਚਕਾਰ, ਸੂਬੇ ਵਿੱਚ 621.4 ਮਿਲੀਮੀਟਰ ਬਾਰਿਸ਼ ਹੋਈ, ਜੋ ਕਿ ਆਮ ਔਸਤ 418.1 ਮਿਲੀਮੀਟਰ ਤੋਂ 49% ਵੱਧ ਹੈ। ਇਹ ਬਾਰਿਸ਼ ਪਿਛਲੇ 125 ਸਾਲਾਂ ਵਿੱਚ ਦਰਜ ਕੀਤੀ ਗਈ 7ਵੀਂ ਸਭ ਤੋਂ ਵੱਧ ਬਾਰਿਸ਼ ਹੈ।

ਮੌਸਮ ਵਿਭਾਗ ਦੇ ਅੰਕੜਿਆਂ ਅਨੁਸਾਰ, ਮਾਨਸੂਨ ਲਗਭਗ 40 ਤੋਂ 45 ਦਿਨਾਂ ਤੱਕ ਸਰਗਰਮ ਰਿਹਾ, ਇਸ ਸਮੇਂ ਦੌਰਾਨ ਲਗਾਤਾਰ ਬਾਰਿਸ਼ ਦੇ ਕਈ ਦੌਰ ਦਿਖਾਈ ਦਿੱਤੇ। ਇਹਨਾਂ ਵਿੱਚੋਂ, ਲਗਭਗ 15 ਤੋਂ 20 ਦਿਨਾਂ ਵਿੱਚ ਆਮ ਨਾਲੋਂ ਕਾਫ਼ੀ ਜ਼ਿਆਦਾ ਬਾਰਿਸ਼ ਹੋਈ, ਖਾਸ ਕਰਕੇ ਜੁਲਾਈ ਅਤੇ ਅਗਸਤ ਦੇ ਮਹੀਨਿਆਂ ਵਿੱਚ। ਮੌਸਮ ਵਿਭਾਗ ਦੇ ਅਨੁਸਾਰ, ਅਗਲੇ ਹਫ਼ਤੇ ਸੂਬੇ ਵਿੱਚ ਮੀਂਹ ਪੈਣ ਦੀ ਕੋਈ ਸੰਭਾਵਨਾ ਨਹੀਂ ਹੈ। ਮੌਸਮ ਆਮ ਅਤੇ ਖੁਸ਼ਕ ਰਹੇਗਾ। ਇਸ ਸਮੇਂ ਦੌਰਾਨ ਤਾਪਮਾਨ ਵਿੱਚ ਥੋੜ੍ਹਾ ਜਿਹਾ ਵਾਧਾ ਵੀ ਦੇਖਿਆ ਜਾ ਸਕਦਾ ਹੈ।

ਬਾਰਿਸ਼ ਦੇ ਪੈਟਰਨ ਵਿੱਚ ਤਬਦੀਲੀ

ਮੌਸਮ ਵਿਭਾਗ ਨੇ ਪਹਿਲਾਂ ਹੀ ਭਵਿੱਖਬਾਣੀ ਕੀਤੀ ਸੀ ਕਿ ਬਾਰਿਸ਼ ਆਮ ਤੋਂ ਵੱਧ ਹੋਵੇਗੀ, ਅਤੇ ਬਿਲਕੁਲ ਅਜਿਹਾ ਹੀ ਹੋਇਆ। ਪੈਟਰਨ ਵਿੱਚ ਇਹ ਤਬਦੀਲੀ ਭਵਿੱਖ ਵਿੱਚ ਜਾਰੀ ਰਹਿਣ ਦੀ ਉਮੀਦ ਹੈ। ਇਸ ਸਾਲ ਦੀ ਬਾਰਿਸ਼ ਪਿਛਲੇ 125 ਸਾਲਾਂ ਵਿੱਚ 7ਵੀਂ ਸਭ ਤੋਂ ਭਾਰੀ ਹੈ। ਮੌਸਮ ਵਿਭਾਗ ਦੇ ਅਨੁਸਾਰ, ਇਸ ਸਾਲ ਦੀ ਬਾਰਿਸ਼ ਪੰਜਾਬ ਦੇ ਇਤਿਹਾਸ ਵਿੱਚ ਖਾਸ ਮੰਨੀ ਜਾਂਦੀ ਹੈ। 2025 ਦਾ ਮਾਨਸੂਨ ਪਿਛਲੇ 125 ਸਾਲਾਂ ਵਿੱਚ ਸੱਤਵਾਂ ਸਭ ਤੋਂ ਭਾਰੀ ਬਾਰਿਸ਼ ਸੀ। ਇਹ ਬਾਰਿਸ਼ 1988 ਤੋਂ ਬਾਅਦ ਸਭ ਤੋਂ ਵੱਧ ਸੀ।

ਜ਼ਿਕਰਯੋਗ ਹੈ ਕਿ 1988 ਵਿੱਚ, 22 ਤੋਂ 27 ਸਤੰਬਰ ਦੇ ਵਿਚਕਾਰ ਸਿਰਫ਼ ਚਾਰ ਦਿਨਾਂ ਵਿੱਚ 634 ਮਿਲੀਮੀਟਰ ਤੋਂ ਵੱਧ ਬਾਰਿਸ਼ ਹੋਈ, ਜਿਸ ਕਾਰਨ ਪੰਜਾਬ ਵਿੱਚ ਭਿਆਨਕ ਹੜ੍ਹ ਆਏ ਸਨ ਇਸ ਤੋਂ ਬਾਅਦ ਪੰਜਾਬ ਵਿੱਚ 1993 ਵਿੱਚ ਵੀ ਹੜ੍ਹ ਆਏ। 2019 ਵਿੱਚ, ਭਾਰੀ ਬਾਰਿਸ਼ ਨੇ ਸੈਂਕੜੇ ਪਿੰਡ ਡੁੱਬ ਗਏ ਅਤੇ ਲੱਖਾਂ ਹੈਕਟੇਅਰ ਤੋਂ ਵੱਧ ਫਸਲਾਂ ਤਬਾਹ ਕਰ ਦਿੱਤੀਆਂ ਸੀ। 2023 ਵਿੱਚ, ਜੂਨ-ਜੁਲਾਈ ਦੌਰਾਨ ਆਮ ਨਾਲੋਂ ਕਿਤੇ ਜ਼ਿਆਦਾ ਬਾਰਿਸ਼ ਦਰਜ ਕੀਤੀ ਗਈ। ਘੱਗਰ ਨਦੀ ਦੇ ਪਾਣੀ ਦਾ ਪੱਧਰ ਵਧਣ ਤੋਂ ਬਾਅਦ ਪਟਿਆਲਾ ਵਿੱਚ ਹੜ੍ਹ ਵਰਗੀ ਸਥਿਤੀ ਦੇਖੀ ਗਈ ਸੀ।