ਬੈੱਡ ਵਿਛਾਉਣ ਤੋਂ ਲੈ ਕੇ ਸਫ਼ਾਈ ਤੱਕ, ਆ ਗਏ ਇਨਸਾਨਾਂ ਵਾਂਗ ਕੰਮ ਕਰਨ ਵਾਲੇ Ai ਰੋਬੋਟ
ਉਹ ਸਮਾਂ ਹੁਣ ਬਹੁਤ ਦੂਰ ਨਹੀਂ ਲੱਗ ਰਿਹਾ ਜਦੋਂ ਘਰਾਂ ਦੇ ਰੋਜ਼ਾਨਾ ਕੰਮਾਂ ਵਿੱਚ ਇਨਸਾਨਾਂ ਦੀ ਜਗ੍ਹਾ AI ਰੋਬੋਟ ਲੈਂਦੇ ਨਜ਼ਰ ਆਉਣਗੇ। ਮਸ਼ਹੂਰ ਰੋਬੋਟਿਕਸ ਕੰਪਨੀ ਫਿਗਰ AI ਨੇ ਅਜਿਹੇ ਅਧੁਨਿਕ ਹਿਊਮਨਾਈਡ ਰੋਬੋਟ ਪੇਸ਼ ਕੀਤੇ ਹਨ, ਜੋ ਬਿਨਾਂ ਕਿਸੇ ਇਨਸਾਨੀ ਕੰਟਰੋਲ ਦੇ ਬੈੱਡ ਵਿਛਾ ਸਕਦੇ ਹਨ, ਕੱਪੜੇ ਫੋਲਡ ਕਰ ਸਕਦੇ ਹਨ ਅਤੇ ਪੂਰੇ ਕਮਰੇ ਦੀ ਸਫ਼ਾਈ ਕਰ ਸਕਦੇ ਹਨ।
ਉਹ ਸਮਾਂ ਹੁਣ ਬਹੁਤ ਦੂਰ ਨਹੀਂ ਲੱਗ ਰਿਹਾ ਜਦੋਂ ਘਰਾਂ ਦੇ ਰੋਜ਼ਾਨਾ ਕੰਮਾਂ ਵਿੱਚ ਇਨਸਾਨਾਂ ਦੀ ਜਗ੍ਹਾ AI ਰੋਬੋਟ ਲੈਂਦੇ ਨਜ਼ਰ ਆਉਣਗੇ। ਮਸ਼ਹੂਰ ਰੋਬੋਟਿਕਸ ਕੰਪਨੀ ਫਿਗਰ AI ਨੇ ਅਜਿਹੇ ਅਧੁਨਿਕ ਹਿਊਮਨਾਈਡ ਰੋਬੋਟ ਪੇਸ਼ ਕੀਤੇ ਹਨ, ਜੋ ਬਿਨਾਂ ਕਿਸੇ ਇਨਸਾਨੀ ਕੰਟਰੋਲ ਦੇ ਬੈੱਡ ਵਿਛਾ ਸਕਦੇ ਹਨ, ਕੱਪੜੇ ਫੋਲਡ ਕਰ ਸਕਦੇ ਹਨ ਅਤੇ ਪੂਰੇ ਕਮਰੇ ਦੀ ਸਫ਼ਾਈ ਕਰ ਸਕਦੇ ਹਨ। ਸਭ ਤੋਂ ਦਿਲਚਸਪ ਗੱਲ ਇਹ ਹੈ ਕਿ ਇਹ ਰੋਬੋਟ ਇੱਕ-ਦੂਜੇ ਦੇ ਤਾਲਮੇਲ ਨਾਲ ਬਿਲਕੁਲ ਇਨਸਾਨਾਂ ਵਾਂਗ ਕੰਮ ਕਰਦੇ ਹਨ। ਕੰਪਨੀ ਵੱਲੋਂ ਜਾਰੀ ਕੀਤੇ ਗਏ ਵੀਡੀਓ ਨੂੰ ਦੇਖ ਕੇ ਸੋਸ਼ਲ ਮੀਡੀਆ ਯੂਜ਼ਰਸ ਇਸ ਨੂੰ ਅਸਲੀ ਜਾਰਵਿਸ ਤਕਨੀਕ ਦੱਸ ਰਹੇ ਹਨ।
ਇਨਸਾਨਾਂ ਵਾਂਗ ਮਿਲ ਕੇ ਕੰਮ ਕਰਦੇ ਦਿਖੇ ਰੋਬੋਟ
ਫਿਗਰ AI ਵੱਲੋਂ ਸਾਂਝੀ ਕੀਤੀ ਗਈ ਵੀਡੀਓ ਵਿੱਚ ਦੋ ਹਿਊਮਨਾਈਡ ਰੋਬੋਟ ਇੱਕ ਬੈੱਡਰੂਮ ਵਿੱਚ ਦਾਖ਼ਲ ਹੁੰਦੇ ਹਨ ਅਤੇ ਤੁਰੰਤ ਸਫ਼ਾਈ ਦੀ ਕਮਾਨ ਸੰਭਾਲ ਲੈਂਦੇ ਹਨ। ਇੱਕ ਰੋਬੋਟ ਕੋਟ ਅਤੇ ਹੈੱਡਫੋਨ ਨੂੰ ਚੁੱਕ ਕੇ ਸਹੀ ਜਗ੍ਹਾ ਟੰਗਦਾ ਹੈ, ਜਦਕਿ ਦੂਜਾ ਲੈਪਟਾਪ ਬੰਦ ਕਰਕੇ ਵਿਵਸਥਿਤ ਕਰਦਾ ਹੈ। ਇਸ ਤੋਂ ਬਾਅਦ ਦੋਵੇਂ ਰੋਬੋਟ ਮਿਲ ਕੇ ਬੈੱਡ ਠੀਕ ਕਰਦੇ ਹਨ ਅਤੇ ਸਿਰਹਾਣਿਆਂ ਨੂੰ ਸਹੀ ਤਰੀਕੇ ਨਾਲ ਟਿਕਾਉਂਦੇ ਹਨ। ਇਹ ਪੂਰਾ ਦ੍ਰਿਸ਼ ਕਿਸੇ ਸਾਇੰਸ ਫ਼ਿਕਸ਼ਨ ਫ਼ਿਲਮ ਵਰਗਾ ਜਾਪਦਾ ਹੈ, ਪਰ ਕੰਪਨੀ ਦਾ ਦਾਅਵਾ ਹੈ ਕਿ ਇਹ ਪੂਰੀ ਤਰ੍ਹਾਂ ਅਸਲੀ ਅਤੇ ਕਾਰਜਸ਼ੀਲ ਤਕਨੀਕ ਹੈ। ਇਹ ਰੋਬੋਟ ਕਿਸੇ ਦੀ ਮਦਦ ਤੋਂ ਬਿਨਾਂ ਖ਼ੁਦ ਫੈਸਲੇ ਲੈਣ ਦੀ ਸਮਰੱਥਾ ਰੱਖਦੇ ਹਨ।
ਕਿਸੇ ਰਿਮੋਟ ਕੰਟਰੋਲ ਦੀ ਲੋੜ ਨਹੀਂ
ਕੰਪਨੀ ਨੇ ਸਪੱਸ਼ਟ ਕੀਤਾ ਹੈ ਕਿ ਇਨ੍ਹਾਂ ਰੋਬੋਟਾਂ ਨੂੰ ਚਲਾਉਣ ਲਈ ਕਿਸੇ ਇਨਸਾਨ ਨੂੰ ਰਿਮੋਟ ਜਾਂ ਕਮਾਂਡ ਦੇਣ ਦੀ ਲੋੜ ਨਹੀਂ ਪੈਂਦੀ। ਇਹ ਆਟੋਨੋਮਸ ਤਰੀਕੇ ਨਾਲ ਕੰਮ ਕਰਦੇ ਹਨ। ਹੈਰਾਨੀ ਦੀ ਗੱਲ ਇਹ ਹੈ ਕਿ ਦੋਵੇਂ ਰੋਬੋਟ ਆਪਸ ਵਿੱਚ ਕਿਸੇ ਮੈਸੇਜਿੰਗ ਸਿਸਟਮ ਰਾਹੀਂ ਗੱਲ ਨਹੀਂ ਕਰਦੇ, ਸਗੋਂ ਸਿਰਫ਼ ਵਿਜ਼ੂਅਲ ਸਿਗਨਲ ਜਿਵੇਂ ਕਿ ਸਿਰ ਹਿਲਾਉਣ ਜਾਂ ਇੱਕ-ਦੂਜੇ ਦੀ ਹਰਕਤ ਦੇਖ ਕੇ ਹੀ ਤਾਲਮੇਲ ਬਿਠਾਉਂਦੇ ਹਨ। ਕੰਪਨੀ ਮੁਤਾਬਕ, ਬੈੱਡ ਬਣਾਉਣਾ ਇਨਸਾਨਾਂ ਲਈ ਸੌਖਾ ਹੋ ਸਕਦਾ ਹੈ, ਪਰ ਰੋਬੋਟ ਲਈ ਇਹ ਬਹੁਤ ਔਖਾ ਕੰਮ ਹੈ ਕਿਉਂਕਿ ਕੰਬਲ ਅਤੇ ਚਾਦਰਾਂ ਹਰ ਸਕਿੰਟ ਆਪਣੀ ਸ਼ਕਲ ਬਦਲਦੀਆਂ ਹਨ। ਅਜਿਹੇ ਵਿੱਚ ਰੋਬੋਟ ਨੂੰ ਹਰ ਮੂਵਮੈਂਟ ਨੂੰ ਰੀਅਲ ਟਾਈਮ ਵਿੱਚ ਸਮਝਣਾ ਪੈਂਦਾ ਹੈ।
ਹੈਲਿਕਸ 02 ਮਾਡਲ ਦੀ ਤਾਕਤ
ਇਨ੍ਹਾਂ ਰੋਬੋਟਾਂ ਦੀ ਕਾਰਜਕੁਸ਼ਲਤਾ ਦੇ ਪਿੱਛੇ ਫਿਗਰ AI ਦਾ ਨਵਾਂ ਹੈਲਿਕਸ 02 ਮਾਡਲ ਕੰਮ ਕਰ ਰਿਹਾ ਹੈ। ਇਸ AI ਸਿਸਟਮ ਨੂੰ ਖ਼ਾਸ ਤੌਰ ‘ਤੇ ਘਰੇਲੂ ਕੰਮਾਂ ਅਤੇ ਲੌਜਿਸਟਿਕਸ ਲਈ ਸਿਖਲਾਈ ਦਿੱਤੀ ਗਈ ਹੈ। ਇਹੀ ਕਾਰਨ ਹੈ ਕਿ ਇਹ ਰੋਬੋਟ ਸਿਰਫ਼ ਬੈੱਡ ਹੀ ਨਹੀਂ ਬਣਾਉਂਦੇ, ਸਗੋਂ ਦਰਵਾਜ਼ੇ ਖੋਲ੍ਹਣਾ, ਫਰਨੀਚਰ ਖਿਸਕਾਉਣਾ, ਰਸੋਈ ਸਾਫ਼ ਕਰਨਾ ਅਤੇ ਕੱਪੜੇ ਤਹਿ ਕਰਨਾ ਵੀ ਜਾਣਦੇ ਹਨ।
ਹਾਲਾਂਕਿ ਇਹ ਤਕਨੀਕ ਅਜੇ ਆਮ ਜਨਤਾ ਲਈ ਬਾਜ਼ਾਰ ਵਿੱਚ ਉਪਲਬਧ ਨਹੀਂ ਹੈ, ਪਰ ਇਸ ਦਾ ਡੈਮੋ ਇਹ ਸੰਕੇਤ ਦਿੰਦਾ ਹੈ ਕਿ ਆਉਣ ਵਾਲੇ ਕੁਝ ਸਾਲਾਂ ਵਿੱਚ ਇਹ ਰੋਬੋਟ ਸਾਡੇ ਪਰਿਵਾਰ ਦੇ ਸਥਾਈ ਮੈਂਬਰ ਬਣ ਸਕਦੇ ਹਨ। ਮਾਹਿਰਾਂ ਦਾ ਮੰਨਣਾ ਹੈ ਕਿ ਇਹ ਤਕਨੀਕ ਬਜ਼ੁਰਗਾਂ ਦੀ ਦੇਖਭਾਲ ਅਤੇ ਹੋਟਲ ਉਦਯੋਗ ਵਿੱਚ ਵੱਡੀ ਕ੍ਰਾਂਤੀ ਲਿਆ ਸਕਦੀ ਹੈ।
ਇਹ ਵੀ ਪੜ੍ਹੋ
