Riyan Parag Vaping: ਰਿਆਨ ਪਰਾਗ ਨੂੰ ਮਿਲੀ ਵੱਡੀ ਸਜ਼ਾ, ਡਰੈਸਿੰਗ ਰੂਮ ‘ਚ ਕੀਤੀ ਸੀ ਇਹ ਗਲਤੀ

ਰਾਜਸਥਾਨ ਰਾਇਲਜ਼ ਦੇ ਕਪਤਾਨ ਰਿਆਨ ਪਰਾਗ ਦੀ ਸਜ਼ਾ ਦਾ ਰਸਮੀ ਐਲਾਨ ਹੋ ਚੁੱਕਾ ਹੈ। ਉਨ੍ਹਾਂ ਨੂੰ ਡਰੈਸਿੰਗ ਰੂਮ ਦੇ ਅੰਦਰ ਈ-ਸਿਗਰੇਟ ਦੇ ਕਸ਼ ਲਗਾਉਣ ਦਾ ਦੋਸ਼ੀ ਪਾਇਆ ਗਿਆ ਹੈ, ਜਿਸ ਲਈ ਹੁਣ ਉਨ੍ਹਾਂ ਖਿਲਾਫ ਸਖ਼ਤ ਕਾਰਵਾਈ ਕੀਤੀ ਗਈ ਹੈ। ਰਾਜਸਥਾਨ ਰਾਇਲਜ਼ ਦੇ ਕਪਤਾਨ ਨੇ ਇਹ ਗਲਤੀ ਪੰਜਾਬ ਕਿੰਗਜ਼ ਦੇ ਖਿਲਾਫ ਨਿਊ ਚੰਡੀਗੜ੍ਹ ਵਿੱਚ ਖੇਡੇ ਗਏ ਮੁਕਾਬਲੇ ਦੌਰਾਨ ਕੀਤੀ ਸੀ। ਸੋਸ਼ਲ ਮੀਡੀਆ ‘ਤੇ ਰਿਆਨ ਪਰਾਗ ਦੀ ਈ-ਸਿਗਰੇਟ ਪੀਂਦੇ ਹੋਏ ਦੀ ਵੀਡੀਓ ਵਾਇਰਲ ਹੋਈ ਸੀ, ਜਿਸ ਤੋਂ ਬਾਅਦ ਹੁਣ ਅਨੁਸ਼ਾਸਨੀ ਕਾਰਵਾਈ ਕਰਦੇ ਹੋਏ ਉਨ੍ਹਾਂ ‘ਤੇ ਤਗੜਾ ਜੁਰਮਾਨਾ ਲਗਾਇਆ ਗਿਆ ਹੈ।

ਰਿਆਨ ਪਰਾਗ ਨੂੰ ਕੀ ਮਿਲੀ ਸਜ਼ਾ?

ਡਰੈਸਿੰਗ ਰੂਮ ਵਿੱਚ ਈ-ਸਿਗਰੇਟ ਪੀਣ ਦੀ ਸਜ਼ਾ ਵਜੋਂ ਰਿਆਨ ਪਰਾਗ ਦੀ ਮੈਚ ਫੀਸ ਵਿੱਚ 25 ਪ੍ਰਤੀਸ਼ਤ ਦੀ ਕਟੌਤੀ ਕੀਤੀ ਗਈ ਹੈ। ਯਾਨੀ ਉਨ੍ਹਾਂ ਨੂੰ ਆਪਣੀ ਮੈਚ ਫੀਸ ਦਾ 25 ਫੀਸਦੀ ਜੁਰਮਾਨੇ ਵਜੋਂ ਭਰਨਾ ਪਵੇਗਾ। ਇਸ ਤੋਂ ਇਲਾਵਾ, ਉਨ੍ਹਾਂ ਦੇ ਖਾਤੇ ਵਿੱਚ ਇੱਕ ਡਿਮੇਰਿਟ ਪੁਆਇੰਟ ਵੀ ਜੋੜਿਆ ਗਿਆ ਹੈ। IPL 2026 ਵਿੱਚ ਰਿਆਨ ਪਰਾਗ ਤੋਂ ਪਹਿਲਾਂ ਵੀ ਕਈ ਕਪਤਾਨਾਂ ‘ਤੇ ਵੱਖ-ਵੱਖ ਕਾਰਨਾਂ ਕਰਕੇ ਜੁਰਮਾਨਾ ਲੱਗ ਚੁੱਕਾ ਹੈ, ਪਰ ‘ਵੈਪਿੰਗ’ ਯਾਨੀ ਈ-ਸਿਗਰੇਟ ਪੀਣ ਕਾਰਨ ਜੁਰਮਾਨਾ ਭੁਗਤਣ ਵਾਲੇ ਰਿਆਨ ਪਰਾਗ ਪਹਿਲੇ ਖਿਡਾਰੀ ਬਣ ਗਏ ਹਨ। ਰਿਆਨ ਪਰਾਗ ਨੂੰ IPL ਦੇ ਕੋਡ ਆਫ ਕੰਡਕਟ ਦੀ ਧਾਰਾ 2.22 ਦੇ ਤਹਿਤ ਦੋਸ਼ੀ ਮੰਨਿਆ ਗਿਆ ਹੈ। ਉਨ੍ਹਾਂ ਨੇ ਮੈਚ ਰੈਫਰੀ ਅਮਿਤ ਸ਼ਰਮਾ ਦੇ ਸਾਹਮਣੇ ਆਪਣੀ ਗਲਤੀ ਕਬੂਲ ਕਰ ਲਈ ਹੈ।

ਭਾਰਤ ਵਿੱਚ ਵੈਪਿੰਗ ‘ਤੇ ਹੈ ਪਾਬੰਦੀ

ਦੱਸ ਦੇਈਏ ਕਿ ਭਾਰਤ ਵਿੱਚ 2019 ਤੋਂ ਹੀ ਵੈਪਿੰਗ ਯਾਨੀ ਈ-ਸਿਗਰੇਟ ਪੂਰੀ ਤਰ੍ਹਾਂ ਬੈਨ ਹੈ। BCCI ਦੇ ਨਿਯਮਾਂ ਅਨੁਸਾਰ ਵੀ ਚੋਣਵੀਆਂ ਥਾਵਾਂ ਨੂੰ ਛੱਡ ਕੇ ਸਟੇਡੀਅਮ ਦੇ ਅੰਦਰ ਸਿਗਰਟਨੋਸ਼ੀ ਅਤੇ ਵੈਪਿੰਗ ‘ਤੇ ਸਖ਼ਤ ਮਨਾਹੀ ਹੈ। ਪਰ ਰਿਆਨ ਪਰਾਗ ਡਰੈਸਿੰਗ ਰੂਮ ਦੇ ਅੰਦਰ ਹੀ ਇਹ ਕੰਮ ਕਰ ਰਹੇ ਸਨ, ਜਿਸ ਦਾ ਨਤੀਜਾ ਹੁਣ ਉਨ੍ਹਾਂ ਨੂੰ ਜੁਰਮਾਨੇ ਦੇ ਰੂਪ ਵਿੱਚ ਭੁਗਤਣਾ ਪਿਆ ਹੈ। ਹਾਲਾਂਕਿ ਰਿਆਨ ਪਰਾਗ ਇਕਲੌਤੇ ਅਜਿਹੇ ਕ੍ਰਿਕਟਰ ਨਹੀਂ ਹਨ ਜਿਨ੍ਹਾਂ ਨੂੰ ਸਿਗਰਟ ਪੀਂਦੇ ਦੇਖਿਆ ਗਿਆ ਹੋਵੇ। ਉਨ੍ਹਾਂ ਤੋਂ ਪਹਿਲਾਂ ਸਾਲ 2020 ਵਿੱਚ ਐਰੋਨ ਫਿੰਚ ਅਤੇ SA20 ਮੈਚਾਂ ਦੌਰਾਨ ਏਬੀ ਡਿਵਿਲੀਅਰਜ਼ ਨੂੰ ਵੀ ਅਜਿਹਾ ਕਰਦੇ ਦੇਖਿਆ ਜਾ ਚੁੱਕਾ ਹੈ।

ਬੱਲੇਬਾਜ਼ੀ ਫਲਾਪ ਪਰ ਕਪਤਾਨੀ ਹਿੱਟ

ਜੇਕਰ ਪ੍ਰਦਰਸ਼ਨ ਦੀ ਗੱਲ ਕਰੀਏ ਤਾਂ IPL 2026 ਵਿੱਚ ਰਿਆਨ ਪਰਾਗ ਦਾ ਬੱਲਾ ਹੁਣ ਤੱਕ ਸ਼ਾਂਤ ਰਿਹਾ ਹੈ। ਉਨ੍ਹਾਂ ਨੇ ਹੁਣ ਤੱਕ ਖੇਡੇ ਗਏ 9 ਮੈਚਾਂ ਵਿੱਚ ਸਿਰਫ਼ 14.6 ਦੀ ਔਸਤ ਨਾਲ 117 ਰਨ ਬਣਾਏ ਹਨ ਅਤੇ ਉਨ੍ਹਾਂ ਦਾ ਸਟ੍ਰਾਈਕ ਰੇਟ ਵੀ ਮਹਿਜ਼ 124.4 ਹੀ ਰਿਹਾ ਹੈ। ਹਾਲਾਂਕਿ, ਚੰਗੀ ਗੱਲ ਇਹ ਹੈ ਕਿ ਰਿਆਨ ਪਰਾਗ ਦੀ ਕਪਤਾਨੀ ਹੇਠ ਰਾਜਸਥਾਨ ਰਾਇਲਜ਼ ਦੀ ਟੀਮ ਸ਼ਾਨਦਾਰ ਪ੍ਰਦਰਸ਼ਨ ਕਰ ਰਹੀ ਹੈ ਅਤੇ ਅੰਕ ਸੂਚੀ ਵਿੱਚ ਮਜ਼ਬੂਤ ਸਥਿਤੀ ਵਿੱਚ ਹੈ।