ਚੰਡੀਗੜ੍ਹ-ਉਦੈਪੁਰ ਵਿਚਾਲੇ ਚੱਲੇਗੀ ਸਪੈਸ਼ਨ ਨਵੀਂ ਟਰੇਨ, ਇਹ ਹੋਵੇਗਾ ਟਾਈਮ-ਟੇਬਲ

ਚੰਡੀਗੜ੍ਹ-ਉਦੈਪੁਰ ਵਿਚਕਾਰ ਨਵੀਂ ਰੇਲਗੱਡੀ ਦਾ ਤੋਹਫ਼ਾ ਪਹਿਲਾਂ ਹੀ ਮਿਲ ਚੁੱਕਾ ਹੈ। ਇਹ ਰੇਲਗੱਡੀ ਹਫ਼ਤੇ ਵਿੱਚ ਦੋ ਦਿਨ ਚੱਲੇਗੀ। ਇਸ ਨਾਲ ਉਦੈਪੁਰ ਡਿਵੀਜ਼ਨ ਦੇ ਲੋਕਾਂ ਨੂੰ ਚੰਡੀਗੜ੍ਹ ਤੱਕ ਸਿੱਧੀ ਸਹੂਲਤ ਮਿਲੇਗੀ। ਉਦੈਪੁਰ ਦੇ ਸੰਸਦ ਮੈਂਬਰ ਡਾ. ਮੰਨਲਾਲ ਰਾਵਤ ਨੇ ਵੀ ਰੇਲ ਮੰਤਰੀ ਦਾ ਧੰਨਵਾਦ ਕੀਤਾ।

ਰਾਜਪਾਲ ਅਤੇ ਚੰਡੀਗੜ੍ਹ ਦੇ ਪ੍ਰਸ਼ਾਸਕ ਗੁਲਾਬਚੰਦ ਕਟਾਰੀਆ ਨੇ ਕਿਹਾ ਕਿ ਹਾਲ ਹੀ ਵਿੱਚ ਉਨ੍ਹਾਂ ਨੇ ਦਿੱਲੀ ਵਿੱਚ ਕੇਂਦਰੀ ਰੇਲ ਮੰਤਰੀ ਅਸ਼ਵਨੀ ਵੈਸ਼ਨਵ ਨਾਲ ਮੁਲਾਕਾਤ ਕੀਤੀ ਅਤੇ ਉਦੈਪੁਰ ਤੋਂ ਚੰਡੀਗੜ੍ਹ ਅਤੇ ਚੰਡੀਗੜ੍ਹ ਤੋਂ ਉਦੈਪੁਰ ਲਈ ਇੱਕ ਨਵੀਂ ਰੇਲਗੱਡੀ ਚਲਾਉਣ ਦੀ ਬੇਨਤੀ ਕੀਤੀ, ਜਿਸ ਨੂੰ ਉਨ੍ਹਾਂ ਨੇ ਤੁਰੰਤ ਮਨਜ਼ੂਰੀ ਦੇ ਦਿੱਤੀ।

ਜਾਣਕਾਰੀ ਮੁਤਾਬਕ ਇਸ ਰੇਲਗੱਡੀ ਦਾ ਚਾਰਟ ਵੀ ਤਿਆਰ ਕਰ ਲਿਆ ਗਿਆ ਹੈ। ਉਦੈਪੁਰ-ਚੰਡੀਗੜ੍ਹ ਰੇਲਗੱਡੀ ਨੰਬਰ 20989 ਹੋਵੇਗਾ ਜੋ ਉਦੈਪੁਰ ਤੋਂ ਸ਼ਾਮ 4:05 ਵਜੇ ਰਵਾਨਾ ਹੋਵੇਗੀ ਅਤੇ ਵੱਖ-ਵੱਖ ਸਟੇਸ਼ਨਾਂ ਰਾਹੀਂ ਸਵੇਰੇ 9:50 ਵਜੇ ਚੰਡੀਗੜ੍ਹ ਪਹੁੰਚੇਗੀ।

ਇਸੇ ਤਰ੍ਹਾਂ ਰੇਲਗੱਡੀ ਨੰਬਰ 20990 ਚੰਡੀਗੜ੍ਹ ਤੋਂ ਸਵੇਰੇ 11:20 ਵਜੇ ਰਵਾਨਾ ਹੋਵੇਗੀ ਅਤੇ ਵੱਖ-ਵੱਖ ਸਟੇਸ਼ਨਾਂ ਰਾਹੀਂ ਸਵੇਰੇ 5:30 ਵਜੇ ਉਦੈਪੁਰ ਪਹੁੰਚੇਗੀ। ਇਹ ਬੁੱਧਵਾਰ ਤੇ ਸ਼ਨੀਵਾਰ ਨੂੰ ਉਦੈਪੁਰ ਤੋਂ ਅਤੇ ਵੀਰਵਾਰ ਅਤੇ ਐਤਵਾਰ ਨੂੰ ਚੰਡੀਗੜ੍ਹ ਤੋਂ ਚੱਲੇਗੀ।

ਇਹ ਗੱਡੀ ਰਾਣਾ ਪ੍ਰਤਾਪ ਨਗਰ ਉਦੈਪੁਰ, ਮਾਵਲੀ ਜੰਕਸ਼ਨ, ਕਪਾਸਨ, ਚੰਦੇਰੀਆ, ਭੀਲਵਾੜਾ, ਬਿਜਈ ਨਗਰ, ਅਜਮੇਰ, ਕਿਸ਼ਨਗੜ੍ਹ, ਫੁਲੇਰਾ, ਜੈਪੁਰ, ਗਾਂਧੀ ਨਗਰ, ਦੌਸਾ, ਬਾਂਦੀਕੁਈ, ਰਾਜਗੜ੍ਹ, ਅਲਵਰ, ਰੇਵਾੜੀ, ਝੱਜਰ, ਰੋਹਤਕ, ਜੀਂਦ, ਨਰਵਾਣਾ, ਕੈਥਲ, ਕਰੂਕਸ਼ੇਤਰਾ ਅਤੇ ਅੰਬਾਲਾ ਕੈਂਟ ਤੋਂ ਤੇ ਰੁਕੇਗੀ।

MP ਰਾਵਤ ਨੇ ਰੇਲ ਮੰਤਰੀ ਦਾ ਕੀਤਾ ਧੰਨਵਾਦ

ਸੰਸਦ ਮੈਂਬਰ ਡਾ. ਮੰਨਲਾਲ ਰਾਵਤ ਨੇ ਉਦੈਪੁਰ ਤੋਂ ਚੰਡੀਗੜ੍ਹ ਤੱਕ ਨਵੀਂ ਰੇਲ ਸੇਵਾ ਸ਼ੁਰੂ ਕਰਨ ਲਈ ਰੇਲ ਮੰਤਰੀ ਅਸ਼ਵਿਨ ਵੈਸ਼ਨਵ ਦਾ ਧੰਨਵਾਦ ਕੀਤਾ ਹੈ। ਉਨ੍ਹਾਂ ਕਿਹਾ ਕਿ ਉਦੈਪੁਰ ਦੇ ਲੋਕਾਂ ਨੂੰ ਇਸ ਨਵੀਂ ਰੇਲ ਸੇਵਾ ਦਾ ਸਿੱਧਾ ਲਾਭ ਮਿਲੇਗਾ।