ਹੁਸ਼ਿਆਰਪੁਰ: 12 ਸਾਲ ਦੀ ਬੱਚੀ ਨਾਲ ਦੁਸ਼ਕਰਮ, ਸਕੂਲ ਦਾ ਹੈੱਡਮਾਸਟਰ ਗ੍ਰਿਫ਼ਤਾਰ

ਇੱਕ ਸ਼ਿਕਾਇਤ ‘ਤੇ ਕਾਰਵਾਈ ਕਰਦੇ ਹੋਏ ਥਾਣਾ ਹਰਿਆਣਾ (ਹੁਸ਼ਿਆਰਪੁਰ) ਪੁਲਿਸ ਨੇ ਸਰਕਾਰੀ ਸਕੂਲ ਅਰਨਿਆਲਾ ਸ਼ਾਹਪੁਰ ਦੇ ਹੈੱਡਮਾਸਟਰ ਅਨੁਜ ਵਾਸੂਦੇਵ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਅਨੁਜ ਵਾਸੂਦੇਵ ਵਾਸੀ ਸੂਰਜ ਨਗਰ (ਬਹਾਦਰਪੁਰ, ਹੁਸ਼ਿਆਰਪੁਰ) ਨੂੰ ਜਬਰ-ਜਨਹ ਦੇ ਇਲਜ਼ਾਮ ‘ਚ ਗ੍ਰਿਫ਼ਤਾਰ ਕੀਤਾ ਗਿਆ ਹੈ।

ਪੁਲਿਸ ਦੇ ਅਨੁਸਾਰ, ਪੀੜਤ ਪਰਿਵਾਰ ਨੇ ਰਿਪੋਰਟ ਦਿੱਤੀ ਕਿ 11 ਅਗਸਤ ਨੂੰ ਦੁਪਹਿਰ 1:30 ਵਜੇ ਤੋਂ 2:30 ਵਜੇ ਦੇ ਵਿਚਕਾਰ, ਮੁਲਜ਼ਮ ਉਨ੍ਹਾਂ ਦੀ ਨਾਬਾਲਗ ਧੀ (ਲਗਭਗ 12 ਸਾਲ ਦੀ ਉਮਰ) ਨੂੰ ਸ਼ਮਸ਼ਾਨਘਾਟ ਦੇ ਨੇੜੇ ਲੈ ਗਿਆ। ਉੱਥੇ, ਉਸ ਨੇ ਕਥਿਤ ਤੌਰ ‘ਤੇ ਉਸ ਨੂੰ ਚਿੱਟੀ ਨਸ਼ੀਲੀ ਗੋਲੀ ਖਿਲਾ ਦਿੱਤੀ ਤੇ ਉਸ ਨਾਲ ਦੁਸ਼ਕਰਮ ਕੀਤਾ।

ਇਸ ਮਾਮਲੇ ‘ਚ ਕਾਰਵਾਈ ਕਰਦੇ ਹੋਏ, ਪੁਲਿਸ ਨੇ 27 ਅਗਸਤ ਨੂੰ (ਐਫਆਈਆਰ ਨੰਬਰ 108) ਬੀਐਨਐਸ ਦੀ ਧਾਰਾ 65(2), ਪੋਕਸੋ ਐਕਟ ਦੀ ਧਾਰਾ 6, ਤੇ ਆਈਪੀਸੀ ਦੀ ਧਾਰਾ 376AB ਦੇ ਤਹਿਤ ਹਰਿਆਣਾ ਪੁਲਿਸ ਸਟੇਸ਼ਨ (ਹੁਸ਼ਿਆਰਪੁਰ) ‘ਚ ਮਾਮਲਾ ਦਰਜ ਕੀਤਾ ਤੇ ਬਾਅਦ ‘ਚ ਮੁਲਜ਼ਮ ਨੂੰ ਗ੍ਰਿਫ਼ਤਾਰ ਕਰ ਲਿਆ।

ਮੁਲਜ਼ਮ ਨੂੰ ਅਦਾਲਤ ‘ਚ ਪੇਸ਼ ਕੀਤਾ ਗਿਆ ਤੇ ਉਸ ਨੂੰ ਜੇਲ੍ਹ ਭੇਜ ਦਿੱਤਾ ਗਿਆ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਲੜਕੀ ਦੀ ਹਾਲਤ ਸਥਿਰ ਨਾ ਹੋਣ ਕਾਰਨ ਉਸ ਨੂੰ ਹਸਪਤਾਲ ‘ਚ ਦਾਖਲ ਕਰਵਾਇਆ ਗਿਆ ਹੈ।

ਵਕੀਲਾਂ ਨੇ ਲਗਾਏ ਗੰਭੀਰ ਇਲਜ਼ਾਮ

ਇਸ ਮਾਮਲੇ ‘ਚ ਪੀੜਤ ਪੱਖ ਦੇ ਵਕੀਲਾਂ ਨੇ ਗੰਭੀਰ ਇਲਜ਼ਾਮ ਲਗਾਏ ਹਨ ਕਿ ਬੱਚੀ ਨੂੰ 28 ਅਗਸਤ ਦਾ ਹਸਪਤਾਲ ‘ਚ ਦਾਖਲ ਕਰਵਾਇਆ ਗਿਆ ਹੈ। ਇਸ ਤੋਂ ਬਾਅਦ ਅਜੇ ਤੱਕ ਨਾ ਤਾਂ ਮੈਡੀਕਲ ਰਿਪੋਰਟ ਦਿੱਤੀ ਜਾ ਰਹੀ ਹੈ ਤੇ ਨਾ ਹੀ ਅਜੇ ਤੱਕ ਲੜਕੀ ਦੇ ਮੈਜੀਸਟ੍ਰੇਟ ਕੋਲ ਬਿਆਨ ਕਰਵਾਏ ਗਏ ਹਨ।

ਵਕੀਲਾਂ ਨੇ ਇਹ ਵੀ ਇਲਜ਼ਾਮ ਲਗਾਇਆ ਕਿ ਪੀੜਤ ਲੜਕੀ ਨੂੰ ਧਮਕਾਇਆ ਜਾ ਰਿਹਾ ਹੈ ਤੇ ਦਬਾਅ ਪਾਇਆ ਜਾ ਰਿਹਾ। ਉਨ੍ਹਾਂ ਕਿਹਾ ਕਿ ਐਫਆਈਆਰ ਹਰਿਆਣਾ ਥਾਣਾ ‘ਚ ਦਰਜ ਹੋਈ ਹੈ, ਜਦਕਿ ਅੱਜ ਤੱਕ ਹਰਿਆਣਾ ਥਾਣਾ ਤੋਂ ਕੋਈ ਵੀ ਪੁਲਿਸ ਮੁਲਾਜ਼ਮ ਇੱਥੇ ਨਹੀਂ ਪਹੁੰਚਿਆ ਹੈ ਤੇ ਸੀਏ ਸਟਾਫ਼ ਵਾਲੇ ਇੱਥੇ ਤਿੰਨ-ਚਾਰ ਵਾਰ ਆਏ ਹਨ। ਉਨ੍ਹਾਂ ਨੇ ਕਿਹਾ ਕਿ ਪੂਰਾ ਵਕੀਲ ਭਾਈਚਾਰਾ ਪੀੜਤ ਪਰਿਵਾਰ ਨਾਲ ਖੜ੍ਹਾ ਹੈ।