ਰਣਜੀਤ ਸਿੰਘ ਐਨਕਾਊਂਟਰ ਮਾਮਲੇ ‘ਚ DGP ਤਲਬ, ਹਾਈ ਕੋਰਟ ਨੇ ਲਿਆ ਨੋਟਿਸ

ਰਣਜੀਤ ਸਿੰਘ ਐਨਕਾਊਂਟਰ ਮਾਮਲੇ 'ਚ DGP ਤਲਬ

ਗੁਰਦਾਸਪੁਰ ਦੀ ਆਦੀਆਂ ਪੁਲਿਸ ਚੌਕੀ ਕਤਲਕਾਂਡ ‘ਚ ਮੁਲਜ਼ਮ ਰਣਜੀਤ ਸਿੰਘ ਦੇ ਐਨਕਾਊਂਟਰ ਮਾਮਲੇ ‘ਚ ਪੰਜਾਬ ਤੇ ਹਰਿਆਣਾ ਹਾਈ ਕੋਰਟ ਨੇ ਨੋਟਿਸ ਲਿਆ ਹੈ। ਹਾਈ ਕੋਰਟ ਨੇ ਇਸ ਮਾਮਲੇ ‘ਚ ਪੰਜਾਬ ਦੇ ਡੀਜੀਪੀ ਗੌਰਵ ਯਾਦਵ ਨੂੰ ਤਲਬ ਕੀਤਾ ਹੈ। ਉਨ੍ਹਾਂ ਨੂੰ 2 ਵਜੇ ਕੋਰਟ ਦੇ ਸਾਹਮਣੇ ਪੇਸ਼ ਹੋਣ ਲਈ ਕਿਹਾ ਗਿਆ ਹੈ। ਇਹ ਪੇਸ਼ੀ ਵੀਡੀਓ ਕਾਨਫਰੰਸਿੰਗ ਰਾਹੀਂ ਹੋਵੇਗੀ।

ਦੱਸ ਦੇਈਏ ਕਿ ਐਨਕਾਊਂਟਰ ‘ਚ ਮਾਰੇ ਗਏ ਮੁਲਜ਼ਮ ਰਣਜੀਤ ਦੇ ਪਰਿਵਾਰਕ ਮੈਂਬਰਾਂ ਵੱਲੋਂ ਐਨਕਾਊਂਟਰ ‘ਤੇ ਸਵਾਲ ਚੁੱਕੇ ਜਾ ਰਹੇ ਹਨ। ਮੁਲਜ਼ਮ ਦੇ ਪਰਿਵਾਰਕ ਮੈਂਬਰਾਂ ਦਾ ਕਹਿਣਾ ਸੀ ਕਿ ਪੁਲਿਸ ਵਾਲੇ ਪੁੱਛ-ਗਿੱਛ ਦੇ ਲਈ ਰਣਜੀਤ ਸਿੰਘ ਨੂੰ ਲੈ ਕੇ ਗਈ ਸੀ ਤੇ ਬਾਅਦ ‘ਚ ਉਨ੍ਹਾਂ ਨੂੰ ਰਣਜੀਤ ਸਿੰਘ ਦੇ ਐਨਕਾਊਂਟਰ ਦੀ ਖ਼ਬਰ ਮਿਲੀ ਸੀ। ਪਰਿਵਾਰਕ ਮੈਂਬਰਾਂ ਨੇ ਪੁਲਿਸ ਦੀ ਕਾਰਵਾਈ ‘ਤੇ ਸਵਾਲ ਚੁੱਕੇ ਗਏ ਸਨ।

ਕੀ ਹੈ ਪੂਰਾ ਮਾਮਲਾ?

ਗੁਰਦਾਸਪੁਰ ਦੇ ਨੌਜਵਾਨ ਰਣਜੀਤ ਸਿੰਘ ਦੇ ਐਨਕਾਊਂਟਰ ਨੂੰ ਪੰਜਾਬ ਦੀਆਂ ਵਿਰੋਧੀ ਪਾਰਟੀਆਂ ਅਤੇ ਨੌਜਵਾਨ ਦੇ ਪਰਿਵਾਰ ਨੇ ਫਰਜ਼ੀ ਐਨਕਾਊਂਟਰ ਕਰਾਰ ਦਿੱਤਾ। ਫਰਜ਼ੀ ਐਨਕਾਊਂਟਰ ਦੇ ਦੋਸ਼ਾਂ ‘ਤੇ ਗੁੱਸਾ ਵਧਦਾ ਜਾ ਰਿਹਾ ਹੈ। ਇਸ ਘਟਨਾ ਤੋਂ ਬਾਅਦ ਮ੍ਰਿਤਕ ਰਣਜੀਤ ਸਿੰਘ ਦੇ ਪਰਿਵਾਰ ਨੇ ਖੁੱਲ੍ਹ ਕੇ ਵਿਰੋਧ ਕਰਨ ਦਾ ਫੈਸਲਾ ਕੀਤਾ ਹੈ। ਪਰਿਵਾਰ ਦਾ ਦੋਸ਼ ਹੈ ਕਿ ਰਣਜੀਤ ਸਿੰਘ ਦਾ ਐਨਕਾਊਂਟਰ ਪੂਰੀ ਤਰ੍ਹਾਂ ਮਨਘੜਤ ਕਹਾਣੀ ਦੇ ਆਧਾਰ ਤੇ ਕੀਤਾ ਗਿਆ ਸੀ।

ਇਸ ਮਾਮਲੇ ‘ਚ ਪਹਿਲਾਂ ਤਾਂ ਰਣਜੀਤ ਸਿੰਘ ਦੇ ਪਰਿਵਾਰਕ ਮੈਂਬਰ ਪੋਸਟਮਾਰਟਮ ਕਰਨ ਦੇ ਲਈ ਰਾਜ਼ੀ ਨਹੀਂ ਹੋ ਰਹੇ ਸਨ। ਬਾਅਦ ‘ਚ ਉਨ੍ਹਾਂ ਨੇ ਇਸ ਲਈ ਹਾਂ ਕਹੀ ਸੀ। ਹਾਲਾਂਕਿ, ਹੁਣ ਪਰਿਵਾਰਕ ਮੈਂਬਰ ਪੋਸਟਮਾਰਟਮ ਤੋਂ ਬਾਅਦ ਮ੍ਰਿਤਕ ਰਣਜੀਤ ਦੇ ਸਸਕਾਰ ਨਾ ਕਰਨ ‘ਤੇ ਅੜੀ ਹੋਏ ਹਨ। ਉਨ੍ਹਾਂ ਵੱਲੋਂ ਲਗਾਤਾਰ ਇਸ ਮਾਮਲੇ ਦੀ ਜਾਂਚ ਦੀ ਮੰਗ ਕਹੀ ਗਈ ਹੈ।

ਕਤਲ ਮਾਮਲੇ ‘ਚ ਨਵਾਂ ਮੋੜ

ਪਰਿਵਾਰ ਦੇ ਦੋਸ਼ਾਂ ਦੇ ਬਾਵਜੂਦ, ਪੁਲਿਸ ਮੁਲਾਜ਼ਮ ਕਤਲ ਮਾਮਲੇ ‘ਚ ਇੱਕ ਨਵਾਂ ਮੋੜ ਆਇਆ। ਗ੍ਰਿਫ਼ਤਾਰ ਮੁਲਜ਼ਮ ਦਿਲਾਵਰ ਸਿੰਘ ਨੇ ਮੀਡੀਆ ਸਾਹਮਣੇ ਕਬੂਲ ਕੀਤਾ ਕਿ ਰਣਜੀਤ ਸਿੰਘ ਤੇ ਇੰਦਰਜੀਤ ਸਿੰਘ ਨੇ ਪੁਲਿਸ ਵਾਲਿਆਂ ਤੇ ਗੋਲੀਬਾਰੀ ਕੀਤੀ ਸੀ, ਭਾਵੇਂ ਉਹ ਉਨ੍ਹਾਂ ਨੂੰ ਮੌਕੇ ਤੋਂ ਲੈ ਕੇ ਆਇਆ ਸੀ।

21 ਫਰਵਰੀ ਦੀ ਰਾਤ ਨੂੰ ਭਾਰਤ-ਪਾਕਿਸਤਾਨ ਅੰਤਰਰਾਸ਼ਟਰੀ ਸਰਹੱਦ ਦੇ ਨੇੜੇ ਗੁਰਦਾਸਪੁਰ ‘ਚ ਆਦੀਆਂ ਪੁਲਿਸ ਚੌਕੀ ਤੇ ਹੋਮ ਗਾਰਡ ਜਵਾਨ ਅਸ਼ੋਕ ਕੁਮਾਰ ਤੇ ਏਐਸਆਈ ਗੁਰਨਾਮ ਸਿੰਘ ਦੀ ਗੋਲੀ ਮਾਰ ਕੇ ਹੱਤਿਆ ਕਰ ਦਿੱਤੀ ਗਈ ਸੀ। ਪੁਲਿਸ ਨੇ ਦੋਸ਼ੀ ਦਿਲਾਵਰ ਸਿੰਘ (ਲੀਨੰਗਲ) ਨੂੰ ਗ੍ਰਿਫ਼ਤਾਰ ਕੀਤਾ ਸੀ, ਜਿਸ ਨੇ ਪੁੱਛਗਿੱਛ ਦੌਰਾਨ ਖੁਲਾਸਾ ਕੀਤਾ ਕਿ ਰਣਜੀਤ ਸਿੰਘ ਤੇ ਇੰਦਰਜੀਤ ਸਿੰਘ (ਆਦੀਆਂ ਦੇ ਵਸਨੀਕ) ਨੇ ਇਹ ਕਤਲ ਕੀਤਾ ਸੀ।

ਪਾਕਿਸਤਾਨੀ ਹੈਂਡਲਰ ਦੇ ਸੰਪਰਕ ‘ਚ ਸਨ ਕਾਤਲ

ਬਾਅਦ ‘ਚ ਪੁਲਿਸ ਨੇ ਰਣਜੀਤ ਸਿੰਘ ਨੂੰ ਗ੍ਰਿਫ਼ਤਾਰ ਕਰ ਲਿਆ, ਜੋ ਬੁੱਧਵਾਰ ਨੂੰ ਇੱਕ ਪੁਲਿਸ ਮੁਕਾਬਲੇ ‘ਚ ਮਾਰਿਆ ਗਿਆ ਸੀ। ਦੋਸ਼ੀ ਇੰਦਰਜੀਤ ਸਿੰਘ ਨੂੰ ਸ਼ੁੱਕਰਵਾਰ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ। ਪੁਲਿਸ ਅਨੁਸਾਰ, ਇਹ ਮੁਲਜ਼ਮ ਚਾਚਾ ਨਾਮਕ ਇੱਕ ਹੈਂਡਲਰ ਦੇ ਸੰਪਰਕ ‘ਚ ਸਨ, ਜੋ ਪਾਕਿਸਤਾਨ ‘ਚ ਰਹਿੰਦਾ ਹੈ। ਪੁਲਿਸ ਨੇ ਸ਼ੁਰੂ ‘ਚ ਇਸ ਮਾਮਲੇ ‘ਚ ਦਿਲਾਵਰ ਸਿੰਘ ਨੂੰ ਗ੍ਰਿਫ਼ਤਾਰ ਕੀਤਾ ਸੀ। ਉਸ ਨੂੰ ਕਤਲਾਂ ਵਿੱਚ ਸਹਾਇਤਾ ਕਰਨ ਲਈ 20,000 ਰੁਪਏ ਦੀ ਪੇਸ਼ਕਸ਼ ਕੀਤੀ ਗਈ ਸੀ, ਜਿਸ ‘ਚੋਂ ਉਸ ਨੂੰ ਸਿਰਫ਼ 3,000 ਰੁਪਏ ਮਿਲੇ ਸਨ।

ਸੂਤਰਾਂ ਅਨੁਸਾਰ, ਇੰਦਰਜੀਤ ਹੈਰੋਇਨ ਦਾ ਆਦੀ ਸੀ ਤੇ ਇਸ ਕਾਰਨ ਹੀ ਉਹ ਪਾਕਿਸਤਾਨ ‘ਚ ਚਾਚਾ ਨਾਮਕ ਇੱਕ ਹੈਂਡਲਰ ਦੇ ਸੰਪਰਕ ‘ਚ ਆਇਆ। ਬਾਅਦ ‘ਚ, ਇੰਦਰਜੀਤ ਰਾਹੀਂ, ਰਣਜੀਤ ਤੇ ਦਿਲਾਵਰ ਚਾਚਾ ਨਾਲ ਜੁੜੇ। ਚਾਚਾ ਦੇ ਕਹਿਣ ਤੇ ਹੀ ਰਣਜੀਤ ਤੇ ਇੰਦਰਜੀਤ ਨੇ ਪੁਲਿਸ ਵਾਲਿਆਂ ਨੂੰ ਗੋਲੀ ਮਾਰ ਦਿੱਤੀ।

ਬਾਈਕ ਤੇ ਪਿਸਤੌਲ ਕਿਵੇਂ ਮਿਲੇ?

ਇਸ ਕਤਲ ਮਾਮਲੇ ਤੋਂ ਬਾਅਦ ਇੰਦਰਜੀਤ ਨੇ ਰਣਜੀਤ ਨੂੰ ਦੱਸਿਆ ਸੀ ਕਿ ਉਹ ਪੈਸੇ ਲੈਣ ਲਈ ਬਟਾਲਾ ਜਾ ਰਿਹਾ ਹੈ। ਇਸ ਦੌਰਾਨ, ਰਣਜੀਤ ਸਿੰਘ ਨੂੰ ਪੁਲਿਸ ਨੇ ਕਾਬੂ ਕਰ ਲਿਆ। ਪੰਜਾਬ ਪੁਲਿਸ ਦੇ ਅਨੁਸਾਰ, ਰਣਜੀਤ ਨੂੰ ਹਥਿਆਰ ਬਰਾਮਦ ਕਰਨ ਲਈ ਲਿਜਾਇਆ ਜਾ ਰਿਹਾ ਸੀ, ਪਰ ਰਸਤੇ ‘ਚ ਉਨ੍ਹਾਂ ਦੀ ਗੱਡੀ ਪਲਟ ਗਈ, ਜਿਸ ਤੋਂ ਬਾਅਦ ਇਹ ਐਨਕਾਊਟਰ ਹੋਇਆ।

ਸਵਾਲ ਇਹ ਹੈ ਕਿ ਕੀ ਉਹ ਪਿਸਤੌਲ ਜਿਸ ਨੇ ਐਨਕਾਊਟਰ ਦੌਰਾਨ ਪੁਲਿਸ ਵਾਲਿਆਂ ਨੂੰ ਜ਼ਖਮੀ ਕੀਤਾ ਸੀ ਤੇ ਜਿਸ ਨਾਲ ਰਣਜੀਤ ਨੇ ਕਥਿਤ ਤੌਰ ਤੇ ਉਨ੍ਹਾਂ ਤੇ ਹਮਲਾ ਕੀਤਾ ਸੀ, ਉਹ ਵੀ ਆਦੀਆਂ ‘ਚ ਪੁਲਿਸ ਵਾਲਿਆਂ ਦੇ ਕਤਲ ਲਈ ਵਰਤੀ ਗਈ ਸੀ? ਸਵਾਲ ਇਹ ਵੀ ਹੈ ਕਿ ਕੀ ਰਣਜੀਤ ਦਾ ਐਨਕਾਊਟਰ ਸਵੇਰੇ 6 ਵਜੇ ਹੋਇਆ ਸੀ? ਭੱਜਣ ਤੋਂ ਤਿੰਨ ਘੰਟੇ ਬਾਅਦ ਤੇ ਐਨਕਾਊਟਰ ਦੇ ਸਮੇਂ ਤੱਕ ਉਸ ਨੂੰ ਬਾਈਕ ਤੇ ਪਿਸਤੌਲ ਕਿਵੇਂ ਮਿਲਿਆ?

ਸੀਸੀਟੀਵੀ ਹਟਾਉਣ ਦੇ ਦੋਸ਼

ਰਣਜੀਤ ਦੇ ਰਿਸ਼ਤੇਦਾਰਾਂ ਤੇ ਪਰਿਵਾਰ ਦਾ ਦਾਅਵਾ ਹੈ ਕਿ ਪੁਲਿਸ ਨੇ ਉਸ ਨੂੰ ਹਿਰਾਸਤ ‘ਚ ਲੈਣ ਤੋਂ ਪਹਿਲਾਂ ਇਲਾਕੇ ਤੋਂ ਸੀਸੀਟੀਵੀ ਫੁਟੇਜ ਹਟਾ ਦਿੱਤੇ। ਅਜਿਹਾ ਕਿਉਂ ਕੀਤਾ ਗਿਆ? ਪਰਿਵਾਰ ਇਹ ਵੀ ਸਵਾਲ ਕੀਤਾ ਕਿ ਉਸ ਨੂੰ ਕਾਨੂੰਨੀ ਪ੍ਰਕਿਰਿਆ ਦੀ ਪਾਲਣਾ ਕਰਨ ਦੀ ਬਜਾਏ 20 ਕਿਲੋਮੀਟਰ ਦੂਰ ਪੁਰਾਣਾਸ਼ਾਲਾ ਪਿੰਡ ਕਿਉਂ ਲਿਜਾਇਆ ਗਿਆ। ਰਣਜੀਤ ਦੇ ਪਰਿਵਾਰ ਨੇ ਮੁਕਾਬਲੇ ਦੌਰਾਨ ਜ਼ਖਮੀ ਹੋਏ ਐਸਐਚਓ ਗੁਰਮੀਤ ਸਿੰਘ ਨੂੰ ਲੱਗੇ ਸੱਟਾਂ ਦੀ ਜਾਂਚ ਦੀ ਵੀ ਮੰਗ ਕੀਤੀ ਹੈ, ਅ ਸਵਾਲ ਕੀਤਾ ਹੈ ਕਿ ਕੀ ਇਹ ਅਸਲ ਸਨ।

ਪਰਿਵਾਰ ਦੇ ਅਨੁਸਾਰ, 19 ਸਾਲਾ ਰਣਜੀਤ ਗੁਰਦਾਸਪੁਰ ਕਾਲਜ ‘ਚ ਬੀਏ ਦਾ ਵਿਦਿਆਰਥੀ ਸੀ। ਪੁਲਿਸ ਸ਼ਾਮ 4 ਵਜੇ ਉਸ ਦੇ ਘਰ ਪਹੁੰਚੀ, ਘਰੋਂ ਪੁੱਛਗਿੱਛ ਕੀਤੀ ਤੇ ਫਿਰ ਉਸ ਨੂੰ ਲੈ ਗਈ। ਪਰਿਵਾਰ ਦੇ ਅਨੁਸਾਰ, ਉਨ੍ਹਾਂ ਨੂੰ ਇਸ ਬਾਰੇ ਕੋਈ ਜਾਣਕਾਰੀ ਨਹੀਂ ਦਿੱਤੀ ਗਈ ਕਿ ਉਸ ਨੂੰ ਕਿੱਥੇ ਲਿਜਾਇਆ ਜਾ ਰਿਹਾ ਹੈ। ਪੁਲਿਸ ਨੇ ਪਿੰਡ ਦੇ ਕਈ ਸੀਸੀਟੀਵੀ ਤੇ ਡੀਵੀਆਰ ਵੀ ਆਪਣੇ ਕਬਜ਼ੇ ‘ਚ ਲੈ ਲਏ, ਇੱਥੋਂ ਤੱਕ ਕਿ ਗੁਰਦੁਆਰੇ ਤੋਂ ਸੀਸੀਟੀਵੀ ਫੁਟੇਜ ਵੀ ਪੁਲਿਸ ਲੈ ਗਈ। ਬਾਅਦ ‘ਚ ਉਸ ਸਵੇਰੇ, ਪਰਿਵਾਰ ਨੂੰ ਐਨਕਾਊਂਟਰ ‘ਚ ਰਣਜੀਤ ਦੀ ਮੌਤ ਬਾਰੇ ਪਤਾ ਲੱਗਾ।

ਪਰਿਵਾਰ ਦੇ ਅਨੁਸਾਰ, ਜਦੋਂ ਪੁਲਿਸ ਰਣਜੀਤ ਨੂੰ ਆਪਣੇ ਨਾਲ ਲੈ ਗਈ, ਤਾਂ ਉਸ ਨੂੰ ਹੱਥਕੜੀ ਲਗਾ ਕੇ ਲੈ ਗਈ। ਅਜਿਹੀ ਸਥਿਤੀ ‘ਚ, ਜੇਕਰ ਰਣਜੀਤ ਹੱਥਕੜੀ ਲੱਗਣ ਦੇ ਬਾਵਜੂਦ ਪੁਲਿਸ ਹਿਰਾਸਤ ‘ਚੋਂ ਭੱਜ ਜਾਂਦਾ ਹੈ, ਤਾਂ ਉਹ ਹਥਿਆਰ ਕਿਵੇਂ ਲੱਭ ਸਕਦਾ ਹੈ ਤੇ ਪੁਲਿਸ ਵਾਲਿਆਂ ਤੇ ਗੋਲੀਬਾਰੀ ਕਿਵੇਂ ਕਰ ਸਕਦਾ ਹੈ।

ਪਲਟ ਗਈ ਪੁਲਿਸ ਦੀ ਗੱਡੀ

ਪੰਜਾਬ ਪੁਲਿਸ ਨੇ ਕਿਹਾ ਸੀ ਕਿ ਰਣਜੀਤ ਨੂੰ ਦੇਰ ਰਾਤ ਸ਼ੱਕ ਦੇ ਆਧਾਰ ਤੇ ਉਸ ਦੇ ਘਰ ਤੋਂ ਚੁੱਕਿਆ ਗਿਆ ਸੀ। ਫਿਰ, 2 ਤੋਂ 3 ਵਜੇ ਦੇ ਵਿਚਕਾਰ, ਜਾਂਚ ਲਈ ਐਸਐਚਓ ਤੇ ਸੀਆਈਏ ਸਟਾਫ ਰਣਜੀਤ ਅਪਰਾਧ ‘ਚ ਵਰਤੇ ਗਏ ਹਥਿਆਰ ਨੂੰ ਬਰਾਮਦ ਕਰਨ ਲਈ ਨਿਕਲੇ। ਮੁਲਜ਼ਮ ਰਣਜੀਤ ਨੂੰ ਧੁੰਦ ‘ਚ ਪੁਲਿਸ ਗੱਡੀ ਲੈ ਕੇ ਜਾ ਰਹੀ ਸੀ, ਪਰ 23 ਕਿਲੋਮੀਟਰ ਦੂਰ ਗੱਡੀ ਹਾਦਸੇ ਦਾ ਸ਼ਿਕਾਰ ਹੋ ਗਈ। ਗੱਡੀ ਪਲਟ ਗਈ ਤੇ ਰਣਜੀਤ ਬਾਅਦ ਵਿੱਚ ਹਿਰਾਸਤ ‘ਚੋਂ ਫਰਾਰ ਹੋ ਗਿਆ।

ਪੰਜਾਬ ਪੁਲਿਸ ਦਾ ਦਾਅਵਾ ਹੈ ਕਿ ਲਗਭਗ ਤਿੰਨ ਘੰਟੇ ਬਾਅਦ, ਰਣਜੀਤ, ਜੋ ਕਿ ਇੱਕ ਬਾਈਕ ਤੇ ਯਾਤਰਾ ਕਰ ਰਿਹਾ ਸੀ, ਨੂੰ ਇੱਕ ਪੁਲਿਸ ਚੌਕੀ ਤੇ ਰੋਕਿਆ ਗਿਆ, ਪਰ ਉਸ ਨੇ ਪੁਲਿਸ ਤੇ ਗੋਲੀਬਾਰੀ ਕਰ ਦਿੱਤੀ। ਜਵਾਬੀ ਕਾਰਵਾਈ ‘ਚ ਉਹ ਮਾਰਿਆ ਗਿਆ। ਪੁਲਿਸ ਦੇ ਅਨੁਸਾਰ, ਦਿਲਾਵਰ, ਰਣਜੀਤ ਤੇ ਇੰਦਰਜੀਤ ਨੂੰ ਇਹ ਕੰਮ ਇੱਕ ਆਈਐਸਆਈ ਹੈਂਡਲਰ ਤੋਂ ਮਿਲਿਆ ਸੀ ਤੇ 20,000 ਰੁਪਏ ਵਿੱਚੋਂ 3,000 ਰੁਪਏ ਦੀ ਪੇਸ਼ਗੀ ਰਕਮ ਪ੍ਰਾਪਤ ਹੋਈ ਸੀ।

ਪਰਿਵਾਰ ਦਾ ਦੋਸ਼ ਹੈ ਕਿ ਪੁਲਿਸ ਨੇ ਅਜੇ ਤੱਕ ਉਨ੍ਹਾਂ ਦਾ ਫ਼ੋਨ ਨੰਬਰ, ਬੈਂਕ ਖਾਤੇ ਦੇ ਵੇਰਵੇ, ਜਾਂ ਇਸ ਦਾਅਵੇ ਨਾਲ ਸਬੰਧਤ ਕੋਈ ਹੋਰ ਤੱਥ ਜਾਂ ਤਕਨੀਕੀ ਜਾਣਕਾਰੀ ਜਾਰੀ ਨਹੀਂ ਕੀਤੀ ਹੈ। ਪੰਜਾਬ ਪੁਲਿਸ ਅਨੁਸਾਰ ਪੁਲਿਸ ਕਤਲ ਕੇਸ ਦਾ ਦੋਸ਼ੀ ਇੰਦਰਜੀਤ ਵੀ ਇਸੇ ਪਿੰਡ ਦਾ ਰਹਿਣ ਵਾਲਾ ਹੈ।