ਕਬੱਡੀ ‘ਤੇ ਕਬਜ਼ਾ, ਗੈਂਗ ਵਾਰ ਜਾਂ ਫਿਰੌਤੀ? ਪੰਜਾਬ ਤੋਂ ਕੈਨੇਡਾ ਤੱਕ ਗੈਂਗਸਟਰਾਂ ਦੇ ਨਿਸ਼ਾਨੇ ‘ਤੇ ਕਬੱਡੀ ਖਿਡਾਰੀ, 8 ਮਹੀਨਿਆਂ ‘ਚ ਛੇਹ ਕਤਲ

ਪੰਜਾਬ ਦੇ ਕਬੱਡੀ ਖਿਡਾਰੀ ਇਸ ਸਮੇਂ ਗੈਂਗਸਟਰਾਂ ਦੇ ਨਿਸ਼ਾਨੇ ‘ਤੇ ਹਨ। ਦੇਸ਼ ਹੋਵੇ ਜਾਂ ਵਿਦੇਸ਼, ਮੈਦਾਨ ਹੋਵੇ ਜਾਂ ਘਰ, ਗੈਂਗਸਟਰ ਰੋਜ਼ਾਨਾ ਕਬੱਡੀ ਖਿਡਾਰੀਆਂ ਦੇ ਟਿਕਾਣਿਆਂ ‘ਤੇ ਗੋਲੀਬਾਰੀ ਕਰ ਰਹੇ ਹਨ। ਹਾਲ ਹੀ ਦੇ ਸਾਲਾਂ ‘ਚ, ਕਈ ਕਬੱਡੀ ਖਿਡਾਰੀਆਂ ਨੇ ਆਪਣੀਆਂ ਜਾਨਾਂ ਗੁਆ ਦਿੱਤੀਆਂ ਹਨ। ਇਸ ਵਾਰ, ਲਾਰੈਂਸ ਬਿਸ਼ਨੋਈ ਗੈਂਗ ਨੇ ਕੈਨੇਡਾ ‘ਚ ਕਬੱਡੀ ਖਿਡਾਰੀ ਦਵਿੰਦਰ ਮਾਨ, ਜਿਸ ਨੂੰ ਦੇਵ ਮਾਨ ਵੀ ਕਿਹਾ ਜਾਂਦਾ ਹੈ, ਦੇ ਘਰ ‘ਤੇ ਗੋਲੀਬਾਰੀ ਕੀਤੀ। ਗੈਂਗ ਨੇ ਇੱਕ ਸੋਸ਼ਲ ਮੀਡੀਆ ਪੋਸਟ ਰਾਹੀਂ ਗੋਲੀਬਾਰੀ ਦੀ ਜ਼ਿੰਮੇਵਾਰੀ ਲਈ।

ਪੋਸਟ ‘ਚ ਲਿਖਿਆ ਸੀ, “ਵਾਹਿਗੁਰੂ ਜੀ ਕਾ ਖਾਲਸਾ, ਵਾਹਿਗੁਰੂ ਜੀ ਕੀ ਫਤਿਹ… ਮੈਂ, ਗੋਲਡੀ ਢਿੱਲੋਂ (ਲਾਰੈਂਸ ਬਿਸ਼ਨੋਈ ਗੈਂਗ),… ਕੱਲ੍ਹ ਸ਼ਾਮ, ਮੰਗਲਵਾਰ, ਕੈਨੇਡਾ ਦੇ ਸਰੀ (ਡੈਲਟਾ) ‘ਚ 8465 ਬਰੁੱਕ ਰੋਡ ‘ਤੇ, ਦੇਵ ਮਾਨ ਕੰਪਨੀ ਦੇ ਮਾਲਕ ਤੇ ਇੱਕ ਨੌਜਵਾਨ ਕਬੱਡੀ ਪ੍ਰਮੋਟਰ, ਦੇਵ ਮਾਨ ਦੇ ਘਰ ‘ਤੇ ਹੋਈ ਗੋਲੀਬਾਰੀ ਦੀ ਜ਼ਿੰਮੇਵਾਰੀ ਲੈਂਦਾ ਹਾਂ। ਅਸੀਂ ਪਹਿਲਾਂ ਉਸ ਨੂੰ ਸਮਝਾਉਣ ਦੀ ਕੋਸ਼ਿਸ਼ ਕੀਤੀ ਸੀ, ਪਰ ਉਸ ਨੇ ਇਨਕਾਰ ਕਰ ਦਿੱਤਾ। ਉਸ ਨੇ ਇੱਕ ਕਬੱਡੀ ਖਿਡਾਰੀ ਨੂੰ ਧੱਕਾ-ਮੁੱਕੀ ਕੀਤੀ ਤੇ ਅਪਰਾਧੀਆਂ ਦੇ ਨਾਮ ਦੀ ਵਰਤੋਂ ਕਰਦੇ ਹੋਏ ਉਸ ਨੂੰ ਧਮਕੀਆਂ ਦਿੰਦਾ ਰਿਹਾ। ਜੋ ਵੀ ਅਜਿਹੇ ਲੋਕਾਂ ਨਾਲ ਕੰਮ ਕਰਦਾ ਹੈ ਉਸ ਨੂੰ ਭਾਰੀ ਕੀਮਤ ਚੁਕਾਉਣੀ ਪਵੇਗੀ। ਵੇਟ ਐਂਡ ਵਾਚ, ਸਰਬਤ ਦਾ ਭਲਾ।”

ਕਬੱਡੀ ਖਿਡਾਰੀ ਦਾ ਸਮਰਥਨ ਕਰਨ ‘ਤੇ ਬਾਊਂਸਰ ਦਾ ਕਤਲ

ਦੋ ਦਿਨ ਪਹਿਲਾਂ ਹੀ, ਪੰਜਾਬ ਦੇ ਲੁਧਿਆਣਾ ‘ਚ ਇੱਕ ਸਾਬਕਾ ਕਬੱਡੀ ਖਿਡਾਰੀ ਤੇ ਬਾਊਂਸਰ ਦਾ ਦਿਨ-ਦਿਹਾੜੇ ਗੋਲੀ ਮਾਰ ਕੇ ਕਤਲ ਕਰ ਦਿੱਤਾ ਗਿਆ ਸੀ। ਮ੍ਰਿਤਕ ਦੀ ਪਛਾਣ ਗਗਨਦੀਪ ਸਿੰਘ (32) ਵਜੋਂ ਹੋਈ ਹੈ, ਜੋ ਕਿ ਹਠੂਰ ਥਾਣਾ ਖੇਤਰ ਦੇ ਜਗਰਾਉਂ ਦੇ ਪਿੰਡ ਮਾਣੂਕੇ ਦਾ ਰਹਿਣ ਵਾਲਾ ਸੀ। ਗਗਨਦੀਪ ਸਿੰਘ ਪਿੰਡ ਦੇ ਇੱਕ ਨੌਜਵਾਨ ਕਬੱਡੀ ਖਿਡਾਰੀ ਦਾ ਸਮਰਥਨ ਕਰਦਾ ਸੀ ਤੇ ਇਸ ਮੁੱਦੇ ‘ਤੇ ਪਿੰਡ ਦੇ ਕੁੱਝ ਹੋਰ ਨੌਜਵਾਨਾਂ ਨਾਲ ਉਸ ਦੀ ਦੁਸ਼ਮਣੀ ਸੀ।

ਘਾਤ ਲਗਾ ਬੈਠੇ ਬਦਮਾਸ਼ਾਂ ਨੇ ਮਾਰੀਆਂ ਗੋਲੀਆਂ

5 ਜਨਵਰੀ ਦੀ ਦੁਪਹਿਰ ਨੂੰ, ਜਦੋਂ ਗਗਨਦੀਪ ਸਿੰਘ ਆਪਣੇ 10-12 ਸਾਥੀਆਂ ਨਾਲ ਅਨਾਜ ਮੰਡੀ ਪਹੁੰਚਿਆ, ਤਾਂ ਉੱਥੇ ਪਹਿਲਾਂ ਹੀ ਇੱਕ ਹੋਰ ਗੈਂਗ ਦੇ ਲਗਭਗ ਚਾਰ ਨੌਜਵਾਨ ਮੌਜੂਦ ਸਨ। ਭੀੜ ਨੂੰ ਦੇਖ ਕੇ, ਦੋਸ਼ੀਆਂ ਨੇ ਆਪਣੇ ਹਥਿਆਰ ਕੱਢੇ ਤੇ ਗੋਲੀਆਂ ਚਲਾ ਦਿੱਤੀਆਂ। ਗਗਨ ਹਮਲੇ ‘ਚ ਗੰਭੀਰ ਜ਼ਖਮੀ ਹੋ ਗਿਆ ਤੇ ਇਲਾਜ ਦੌਰਾਨ ਉਸ ਦੀ ਮੌਤ ਹੋ ਗਈ। ਪਿੰਡ ਵਾਸੀਆਂ ਨੇ ਦੱਸਿਆ ਕਿ ਗਗਨਦੀਪ ਸਿੰਘ ਪਹਿਲਾਂ ਕਬੱਡੀ ਖੇਡਦਾ ਸੀ, ਪਰ ਬਾਅਦ ‘ਚ ਬਾਊਂਸਰ ਵਜੋਂ ਕੰਮ ਕਰਨਾ ਸ਼ੁਰੂ ਕਰ ਦਿੱਤਾ।

ਕਬੱਡੀ ਪ੍ਰਮੋਟਰ ਦਾ ਮੈਦਾਨ ‘ਚ ਗੋਲੀਆਂ ਮਾਰ ਕੇ ਕਤਲ

ਰਾਣਾ ਬਲਾਚੌਰੀਆ (ਕੰਵਰ ਦਿਗਵਿਜੇ ਸਿੰਘ) ਦਾ 15 ਦਸੰਬਰ, 2025 ਦੀ ਸ਼ਾਮ ਨੂੰ ਮੋਹਾਲੀ ਦੇ ਸੋਹਾਣਾ ‘ਚ ਇੱਕ ਕਬੱਡੀ ਟੂਰਨਾਮੈਂਟ ਦੌਰਾਨ ਗੋਲੀ ਮਾਰ ਕੇ ਕਤਲ ਕਰ ਦਿੱਤਾ ਗਿਆ ਸੀ। ਰਾਣਾ ਬਲਾਚੌਰੀਆ ਇੱਕ ਨੌਜਵਾਨ ਕਬੱਡੀ ਖਿਡਾਰੀ, ਪ੍ਰਮੋਟਰ, ਮਾਡਲ ਤੇ ਸੋਸ਼ਲ ਮੀਡੀਆ ਇਨਫਲੂਐਂਸਰ ਸੀ। ਰਾਣਾ ਦਾ ਇੱਕ ਕਬੱਡੀ ਮੈਚ ਦੌਰਾਨ ਗੋਲੀਆਂ ਮਾਰ ਕੇ ਕਤਲ ਕਰ ਦਿੱਤਾ ਗਿਆ ਸੀ। ਇਸ ਕਤਲ ਨੂੰ ਸਿੱਧੂ ਮੂਸੇਵਾਲਾ ਕਤਲ ਕਾਂਡ ਨਾਲ ਜੋੜਿਆ ਗਿਆ ਸੀ, ਤੇ ਬੰਬੀਹਾ ਗੈਂਗ ਨੇ ਜ਼ਿੰਮੇਵਾਰੀ ਲਈ ਸੀ। ਹਾਲਾਂਕਿ, ਮੋਹਾਲੀ ਪੁਲਿਸ ਨੇ ਇਸ ਨੂੰ ਗੈਂਗ ਵਾਰ ਦੱਸਿਆ ਤੇ ਮੁੱਖ ਦੋਸ਼ੀ ਨੂੰ ਇੱਕ ਮੁਕਾਬਲੇ ‘ਚ ਢੇਰ ਕਰ ਦਿੱਤਾ।

8 ਮਹੀਨਿਆਂ ‘ਚ 6 ਖਿਡਾਰੀਆਂ ਦਾ ਕਤਲ

• 6 ਜੂਨ, 2025: ਪੰਚਕੂਲਾ ‘ਚ ਸੋਨੂੰ ਨੋਲਟਾ।
• 31 ਅਕਤੂਬਰ, 2025: ਲੁਧਿਆਣਾ ‘ਚ ਤੇਜਪਾਲ ਸਿੰਘ।
• 5 ਨਵੰਬਰ, 2025: ਸਮਰਾਲਾ, ਲੁਧਿਆਣਾ‘ਚ ਗੁਰਵਿੰਦਰ ਸਿੰਘ।
• 15 ਦਸੰਬਰ, 2025: ਮੋਹਾਲੀ ‘ਚ ਰਾਣਾ ਬਲਾਚੌਰੀਆ। (ਬੰਬੀਹਾ ਗੈਂਗ ਨੇ ਜ਼ਿੰਮੇਵਾਰੀ ਲਈ)
• 5 ਜਨਵਰੀ, 2026: ਸਾਬਕਾ ਕਬੱਡੀ ਖਿਡਾਰੀ ਤੇ ਬਾਊਂਸਰ ਗਗਨਦੀਪ ਸਿੰਘ।
• 6 ਜਨਵਰੀ, 2026: ਕਬੱਡੀ ਖਿਡਾਰੀ ਦਵਿੰਦਰ ਮਾਨ ਉਰਫ਼ ਦੇਵ ਮਾਨ ਦੇ ਕੈਨੇਡੀਅਨ ਟਿਕਾਣੇ ‘ਤੇ ਗੋਲੀਬਾਰੀ। (ਲਾਰੈਂਸ ਬਿਸ਼ਨੋਈ ਗੈਂਗ ਨੇ ਜ਼ਿੰਮੇਵਾਰੀ ਲਈ)