ਚੰਡੀਗੜ੍ਹ ਦੇ ਪੰਪ ਨੇ ਪੈਟਰੋਲ-ਡੀਜ਼ਲ ਖ਼ਰੀਦ ‘ਤੇ ਲਗਾਈ ਲਿਮਿਟ, ਮੋਟਰਸਾਈਕਲ ਨੂੰ 500 ਤੇ ਕਾਰ ਨੂੰ 1500 ਦਾ ਹੀ ਮਿਲੇਗਾ ਤੇਲ

ਚੰਡੀਗੜ੍ਹ ‘ਚ ਸੈਕਟਰ- 17 ਦੇ ਇੱਕ ਪੈਟਰੋਲ ਪੰਪ ‘ਚ ਤੇਲ ਭਰਵਾਉਣ ‘ਤੇ ਲਿਮਿਟ ਲਗਾ ਦਿੱਤੀ ਗਈ ਹੈ। ਇੱਥੇ ਬਾਈਕ ਤੇ ਸਕੂਟੀ ਸਮੇਤ ਹੋਰ ਦੋ ਪਹੀਆ ਵਾਹਨਾਂ ਨੂੰ ਵੱਧ ਤੋਂ ਵੱਧ 500 ਰੁਪਏ ਦਾ ਤੇਲ ਦਿੱਤਾ ਜਾ ਰਿਹਾ ਹੈ, ਜਦਕਿ ਕਾਰ, ਪਿੱਕਅਪ ਟਰੱਕ ਸਮੇਤ ਹੋਰ ਚਾਰ ਪਹੀਆ ਵਾਹਨਾਂ ਨੂੰ 1500 ਰੁਪਏ ਦਾ ਹੀ ਤੇਲ ਦਿੱਤਾ ਜਾ ਰਿਹਾ ਹੈ। ਸੈਕਟਰ-17 ਦੇ ਪੈਟਰੋਲ ਪੰਪ ‘ਤੇ ਬਾਕਾਇਦਾ ਪੋਸਟਰ ਲਗਾਏ ਗਏ ਹਨ, ਜਿਸ ‘ਚ ਪੈਟਰੋਲ ਤੇ ਡੀਜ਼ਲ ਭਰਵਾਉਣ ਦੀ ਲਿਮਟ ਲਿਖੀ ਹੋਈ ਹੈ। ਹਾਲਾਂਕਿ, ਇਹ ਲਿਮਟ ਸੈਕਟਰ-17 ਦੇ ਇੱਕ ਹੀ ਪੈਟਰੋਲ ਪੰਪ ‘ਤੇ ਲਾਗੂ ਹੈ।

ਦਰਅਸਲ, ਸੈਕਟਰ-17 ਦੀ ਐਚਜੀ ਪੈਟਰੋ ਕੇਅਰ ਪੈਟਰੋਲ ਪੰਪ ‘ਚ ਤੇਲ ਸਪਲਾਈ ਦੀ ਘਾਟ ਕਾਰਨ ਇਹ ਫੈਸਲਾ ਲਿਆ ਗਿਆ। ਪੈਟਰੋਲ ਪੰਪ ਦੇ ਇੱਕ ਕਰਮਚਾਰੀ ਨੇ ਦੱਸਿਆ ਕਿ ਹਾਲ ਹੀ ਦਿਨਾਂ ‘ਚ ਤੇਲ ਦੀ ਸਪਲਾਈ ‘ਚ ਕਮੀ ਆਈ ਹੈ, ਜਿਸ ਕਾਰਨ ਉਨ੍ਹਾਂ ਕੋਲ ਸਟਾਕ ਦੀ ਘਾਟ ਹੈ। ਇਹ ਫੈਸਲਾ ਇਸ ਲਈ ਲਿਆ ਗਿਆ ਤਾਂ ਜੋ ਉਪਲਬਧ ਸਟਾਕ ਦਾ ਸਹੀ ਪ੍ਰਬੰਧਨ ਕੀਤਾ ਜਾ ਸਕੇ ਤੇ ਸਾਰਿਆਂ ਲਈ ਸਪਲਾਈ ਯਕੀਨੀ ਬਣਾਈ ਜਾ ਸਕੇ।

ਜਾਣਕਾਰੀ ਮੁਤਾਬਕ, ਚੰਡੀਗੜ੍ਹ ‘ਚ ਲਗਭਗ 86 ਪੈਟਰੋਲ ਪੰਪ ਹਨ, ਪਰ ਹੁਣ ਤੱਕ ਸਿਰਫ਼ ਸੈਕਟਰ-17 ਦੇ ਪੈਟਰੋਲ ਪੰਪ ‘ਤੇ ਹੀ ਤੇਲ ਖਰੀਦ ‘ਤੇ ਲਿਮਟ ਸੰਬੰਧੀ ਪੋਸਟਰ ਲਗਾਏ ਗਏ ਹਨ। ਹਾਲਾਂਕਿ, ਇਸ ਦੌਰਾਨ ਵੱਖ-ਵੱਖ ਇਲਾਕਿਆਂ ਦੇ ਪੈਟਰੋਲ ਪੰਪ ਮਾਲਕਾਂ ਨੇ ਸਵੀਕਾਰ ਕੀਤਾ ਹੈ ਕਿ ਪੈਟਰੋਲ ਤੇ ਡੀਜ਼ਲ ਦੀ ਮੰਗ ‘ਚ ਤੇਜ਼ੀ ਨਾਲ ਵਾਧਾ ਹੋਇਆ ਹੈ, ਜਦੋਂ ਕਿ ਈਂਧਨ ਦੀ ਸਪਲਾਈ ਵਧਦੀ ਮੰਗ ਦੇ ਅਨੁਸਾਰ ਨਹੀਂ ਹੈ।

ਇਹ ਮਾਮਲਾ ਅਜਿਹੇ ਸਮੇਂ ‘ਚ ਆਇਆ ਹੈ, ਜਦੋਂ 15 ਮਈ ਨੂੰ ਚੰਡੀਗੜ੍ਹ ਤੇ ਪੰਜਾਬ ਸਮੇਤ ਦੇਸ਼ ਭਰ ‘ਚ ਪੈਟਰੋਲ ਦੇ ਡੀਜ਼ਲ ਦੀਆਂ ਕੀਮਤਾਂ ‘ਚ ਸਿੱਧਾ 3 ਰੁਪਏ ਦਾ ਵਾਧਾ ਕੀਤਾ ਗਿਆ। ਇਸ ਫੈਸਲੇ ਨੇ ਲੋਕਾਂ ਵਿਚਕਾਰ ਤੇਲ ਦੀ ਸਪਲਾਈ ਤੇ ਵਧਦੀਆਂ ਕੀਮਤਾਂ ‘ਤੇ ਚਿੰਤਾ ਹੋਰ ਵਧਾ ਦਿੱਤੀ ਹੈ। ਇਸ ਤੋਂ ਪਹਿਲਾਂ ਵੀ ਪੰਜਾਬ ‘ਚ ਗੁਰਦਾਸਪੁਰ, ਹੁਸ਼ਿਆਰਪੁਰ ਤੇ ਅੰਮ੍ਰਿਤਸਰ ਸਮੇਤ ਹੋਰ ਜ਼ਿਲ੍ਹਿਆਂ ‘ਚ ਲੋਕਾਂ ਵੱਲੋਂ ਤੇਲ ਦੀ ਪੈਨਿਕ ਖਰੀਦਦਾਰੀ ਦੀਆਂ ਰਿਪੋਰਟਾਂ ਸਾਹਮਣੇ ਆ ਚੁੱਕੀਆਂ ਹਨ। ਹੁਣ, ਚੰਡੀਗੜ੍ਹ ਦੇ ਇਸ ਪੈਟਰੋਲ ਪੰਪ ‘ਤੇ ਲੱਗੀ ਲਿਮਟ ਨੇ ਤੇਲ ਦੀ ਸਪਲਾਈ ਦਾ ਮੁੱਦਾ ਉਜਾਗਰ ਕੀਤਾ ਹੈ।