Chandrayaan3: ਸਲੀਪ ਮੋਡ ‘ਤੇ ਰੋਵਰ ਪ੍ਰਗਿਆਨ ਅਤੇ ਲੈਂਡਰ ਵਿਕਰਮ, 22 ਸਤੰਬਰ ਨੂੰ ਮੜ ਸਰਗਰਮ ਹੋਣ ਦੀ ਉਮੀਦ

ਭਾਰਤੀ ਪੁਲਾੜ ਖੋਜ ਸੰਗਠਨ (ਇਸਰੋ) ਵੱਲੋਂ ਭੇਜੇ ਗਏ ਚੰਦਰਯਾਨ-3 ਦੇ ਰੋਵਰ ਪ੍ਰਗਿਆਨ ਤੋਂ ਬਾਅਦ ਹੁਣ ਲੈਂਡਰ ਵਿਕਰਮ ਵੀ ਸਲੀਪ ਮੋਡ ਵਿੱਚ ਚਲਾ ਗਿਆ ਹੈ। ਇਸਰੋ ਦੇ ਵਿਗਿਆਨੀਆਂ ਮੁਤਾਬਕ, ਚੰਦਰਯਾਨ-3 ਨੇ ਆਪਣਾ ਕੰਮ ਪੂਰਾ ਕਰ ਲਿਆ ਹੈ। ਚੰਦਰਯਾਨ ਤੋਂ ਜਿੰਨੀ ਉਮੀਦ ਕੀਤੀ ਜਾ ਰਹੀ ਸੀ, ਉਸ ਤੋਂ ਬਿਹਤਰ ਨਤੀਜੇ ਸਾਹਮਣੇ ਆਏ ਹਨ। ਇਸ ਜਾਣਕਾਰੀ ਦੇ ਨਾਲ ਹੀ ਇਸਰੋ ਨੇ ‘ਮੂਨ ਹੋਪ’ ਦੀ ਇੱਕ ਖਾਸ ਤਸਵੀਰ ਵੀ ਸ਼ੇਅਰ ਕੀਤੀ ਹੈ।

ਇਸਰੋ ਨੇ ਟਵੀਟ ਕਰਕੇ ਚੰਦਰਮਾ ਦੀ ਧਰਤੀ ‘ਤੇ ਮੌਜੂਦ ਰੋਵਰ ਪ੍ਰਗਿਆਨ ਅਤੇ ਲੈਂਡਰ ਵਿਕਰਮ ਦੀ ਜਾਣਕਾਰੀ ਦਿੱਤੀ ਹੈ। ਟਵੀਟ ਰਾਹੀਂ ਦੱਸਿਆ ਗਿਆ ਹੈ ਕਿ ਵਿਕਰਮ ਲੈਂਡਰ ਨੂੰ ਅੱਜ ਭਾਰਤੀ ਸਮੇਂ ਮੁਤਾਬਕ 8 ਵਜੇ ਸਲੀਪ ਮੋਡ ‘ਤੇ ਭੇਜ ਦਿੱਤਾ ਗਿਆ ਹੈ। ਵਿਗਿਆਨੀਆਂ ਨੇ ਦੱਸਿਆ ਕਿ ਲੈਂਡਰ ਰਿਸੀਵਰ ਨੂੰ ਚਾਲੂ ਰੱਖਿਆ ਗਿਆ ਹੈ ਅਤੇ ਸੂਰਜੀ ਊਰਜਾ ਖਤਮ ਹੋਣ ਤੋਂ ਬਾਅਦ, ਵਿਕਰਮ ਲੈਂਡਰ ਰੋਵਰ ਪ੍ਰਗਿਆਨ ਦੇ ਕੋਲ ਸਲੀਪ ਮੋਡ ‘ਤੇ ਪਹੁੰਚ ਗਿਆ ਹੈ। ਹੁਣ ਹਰ ਕੋਈ 22 ਸਤੰਬਰ ਨੂੰ ਵਿਕਰਮ ਅਤੇ ਪ੍ਰਗਿਆਨ ਦੇ ਮੁੜ ਸਰਗਰਮ ਹੋਣ ਦੀ ਉਮੀਦ ਕਰ ਰਿਹਾ ਹੈ।

ਰੋਵਰ ਨੇ ਚੰਦ ‘ਤੇ ਪੂਰਾ ਕੀਤਾ ਆਪਣਾ ਮਿਸ਼ਨ

14 ਜੁਲਾਈ ਨੂੰ ਲਾਂਚ ਕੀਤੇ ਗਏ ਚੰਦਰਯਾਨ-3 ਦੇ ਰੋਵਰ ਪ੍ਰਗਿਆਨ ਅਤੇ ਲੈਂਡਰ ਵਿਕਰਮ ਨੇ ਹੁਣ ਤੱਕ ਕੰਮ ਪੂਰਾ ਕਰ ਲਿਆ ਹੈ। ਰੋਵਰ ਦੁਆਰਾ ਧਰਤੀ ‘ਤੇ ਹੁਣ ਤੱਕ ਜੋ ਵੀ ਜਾਣਕਾਰੀ ਭੇਜੀ ਗਈ ਹੈ, ਉਸ ਦਾ ਅਧਿਐਨ ਕੀਤਾ ਜਾ ਰਿਹਾ ਹੈ। ਦੱਸ ਦੇਈਏ ਕਿ ਰੋਵਰ ਪ੍ਰਗਿਆਨ ਨੇ ਆਕਸੀਜਨ ਦੇ ਨਾਲ ਚੰਦਰਮਾ ਦੇ ਦੱਖਣੀ ਧਰੁਵ ‘ਤੇ ਐਲੂਮੀਨੀਅਮ, ਆਇਰਨ, ਟਾਈਟੇਨੀਅਮ, ਕੈਲਸ਼ੀਅਮ, ਮੈਂਗਨੀਜ਼, ਸਿਲੀਕਾਨੋਲ ਅਤੇ ਸਲਫਰ ਦਾ ਪਤਾ ਲਗਾਇਆ ਹੈ। ਇਸ ਖੋਜ ਨਾਲ ਭਾਰਤ ਦੁਨੀਆ ਦਾ ਪਹਿਲਾ ਅਜਿਹਾ ਦੇਸ਼ ਹੈ ਜਿਸ ਨੇ ਚੰਦਰਮਾ ਦੇ ਦੱਖਣੀ ਧਰੁਵ ‘ਤੇ ਆਕਸੀਜਨ ਦਾ ਸਬੂਤ ਦਿੱਤਾ ਹੈ। ਇਸਰੋ ਦਾ ਅਗਲਾ ਸਟਾਪ ਚੰਦ ਦੇ ਇਸ ਹਿੱਸੇ ਵਿੱਚ ਜੀਵਨ ਦੇ ਸਬੂਤ ਲੱਭਣਾ ਹੈ।

ਰੋਵਰ ਨੇ ਪ੍ਰਗਿਆਨ ‘ਚ 10 ਦਿਨਾਂ ‘ਚ 100 ਮੀਟਰ ਦਾ ਸਫਰ ਤੈਅ ਕੀਤਾ

ਇਸਰੋ ਦੇ ਵਿਗਿਆਨੀਆਂ ਨੇ 23 ਅਗਸਤ ਨੂੰ ਸ਼ਾਮ 6:30 ਵਜੇ ਚੰਦਰਮਾ ਦੀ ਸਤ੍ਹਾ ‘ਤੇ ਸਾਫਟ ਲੈਂਡਿੰਗ ਕਰਕੇ ਇਤਿਹਾਸ ਰਚ ਦਿੱਤਾ ਸੀ। ਲੈਂਡਰ ਵਿਕਰਮ ਦੇ ਚੰਦਰਮਾ ‘ਤੇ ਉਤਰਨ ਤੋਂ ਲਗਭਗ ਚਾਰ ਘੰਟੇ ਬਾਅਦ ਰੋਵਰ ਪ੍ਰਗਿਆਨ ਨੇ ਚੰਦਰਮਾ ‘ਤੇ ਕਦਮ ਰੱਖਿਆ। ਰੋਵਰ ਪ੍ਰਗਿਆਨ ਨੇ ਚੰਦਰਮਾ ‘ਤੇ ਸ਼ਿਵਸ਼ਕਤੀ ਬਿੰਦੂ ਤੋਂ ਪਿਛਲੇ 10 ਦਿਨਾਂ ‘ਚ 100 ਮੀਟਰ ਦੀ ਦੂਰੀ ਤੈਅ ਕੀਤੀ ਹੈ ਜਿੱਥੇ ਲੈਂਡਰ ਵਿਕਰਮ ਨੇ ਕਦਮ ਰੱਖਿਆ ਸੀ। 10 ਦਿਨਾਂ ਦੀ ਯਾਤਰਾ ਪੂਰੀ ਕਰਨ ਤੋਂ ਬਾਅਦ, ਇਹ ਹੁਣ ਸਲੀਪ ਮੋਡ ਵਿੱਚ ਚਲਾ ਗਿਆ ਹੈ।