ਹਰਿਆਣਾ ਲੈਂਡ ਡੀਲ: ਰਾਬਰਟ ਵਾਡਰਾ ਖਿਲਾਫ਼ ਚਾਰਜਸ਼ੀਟ ਦਾਇਰ, ED ਨੇ 18 ਘੰਟੇ ਕੀਤੀ ਸੀ ਪੁੱਛਗਿੱਛ

ਰਾਬਰਟ ਵਾਡਰਾ ਖਿਲਾਫ਼ ਚਾਰਜਸ਼ੀਟ ਦਾਇਰ

Follow Us On

ਕਾਂਗਰਸ ਸੰਸਦ ਮੈਂਬਰ ਪ੍ਰਿਯੰਕਾ ਗਾਂਧੀ ਵਾਡਰਾ ਦੇ ਪਤੀ ਅਤੇ ਕਾਰੋਬਾਰੀ ਰਾਬਰਟ ਵਾਡਰਾ ਦੀਆਂ ਮੁਸ਼ਕਲਾਂ ਵੱਧ ਸਕਦੀਆਂ ਹਨ। ਇਨਫੋਰਸਮੈਂਟ ਡਾਇਰੈਕਟੋਰੇਟ (ਈਡੀ) ਨੇ ਹਰਿਆਣਾ ਦੇ ਸ਼ਿਕੋਹਪੁਰ ਵਿੱਚ ਲੈਂਡ ਡੀਲ ਨਾਲ ਸਬੰਧਤ ਮਨੀ ਲਾਂਡਰਿੰਗ ਮਾਮਲੇ ਵਿੱਚ ਵਾਡਰਾ ਵਿਰੁੱਧ ਚਾਰਜਸ਼ੀਟ ਦਾਇਰ ਕੀਤੀ ਹੈ। ਉਨ੍ਹਾਂ ਦੇ ਨਾਲ, ਇਸ ਵਿੱਚ ਕਈ ਹੋਰ ਲੋਕਾਂ ਅਤੇ ਕੰਪਨੀਆਂ ਦੇ ਨਾਮ ਵੀ ਸ਼ਾਮਲ ਹਨ। ਇਹ ਮਾਮਲਾ ਸਤੰਬਰ 2018 ਦਾ ਹੈ, ਜਦੋਂ ਰਾਬਰਟ ਵਾਡਰਾ, ਹਰਿਆਣਾ ਦੇ ਤਤਕਾਲੀ ਮੁੱਖ ਮੰਤਰੀ ਭੂਪੇਂਦਰ ਸਿੰਘ ਹੁੱਡਾ, ਰੀਅਲ ਅਸਟੇਟ ਕੰਪਨੀ ਡੀਐਲਐਫ ਅਤੇ ਇੱਕ ਪ੍ਰਾਪਰਟੀ ਡੀਲਰ ਵਿਰੁੱਧ ਐਫਆਈਆਰ ਦਰਜ ਕੀਤੀ ਗਈ ਸੀ। ਐਫਆਈਆਰ ਵਿੱਚ ਭ੍ਰਿਸ਼ਟਾਚਾਰ, ਜਾਅਲਸਾਜ਼ੀ ਅਤੇ ਧੋਖਾਧੜੀ ਸਮੇਤ ਹੋਰ ਆਰੋਪ ਲਗਾਏ ਗਏ ਹਨ।

ਚਾਰਜਸ਼ੀਟ ਦੇ ਅਨੁਸਾਰ, ਵਾਡਰਾ ਦੀ ਕੰਪਨੀ ਸਕਾਈਲਾਈਟ ਹਾਸਪਿਟੈਲਿਟੀ ਨੇ 2008 ਵਿੱਚ 3.53 ਏਕੜ ਜ਼ਮੀਨ 7.5 ਕਰੋੜ ਰੁਪਏ ਵਿੱਚ ਖਰੀਦੀ ਸੀ। ਹਾਲਾਂਕਿ, ਪ੍ਰੋਜੈਕਟ ਨੂੰ ਪੂਰਾ ਕੀਤੇ ਬਿਨਾਂ ਇੰਨੀ ਹੀ ਜ਼ਮੀਨ 58 ਕਰੋੜ ਰੁਪਏ ਵਿੱਚ ਵੇਚ ਦਿੱਤੀ ਗਈ। ਚਾਰਜਸ਼ੀਟ ਵਿੱਚ ਰਾਬਰਟ ਵਾਡਰਾ ਨੂੰ ਆਰੋਪੀ ਬਣਾਇਆ ਗਿਆ ਹੈ। ਇਸ ਮਾਮਲੇ ਵਿੱਚ, ਏਜੰਸੀ ਨੇ ਵਾਡਰਾ ਤੋਂ 18 ਘੰਟਿਆਂ ਤੋਂ ਵੱਧ ਸਮੇਂ ਤੱਕ ਪੁੱਛਗਿੱਛ ਕੀਤੀ। ਨਾਲ ਹੀ ਹਰਿਆਣਾ ਦੇ ਕਈ ਹੋਰ ਕਾਂਗਰਸੀ ਨੇਤਾਵਾਂ ਤੋਂ ਵੀ ਪੁੱਛਗਿੱਛ ਕੀਤੀ ਗਈ। ਉਨ੍ਹਾਂ ਦੇ ਬਿਆਨਾਂ ਦਾ ਆਰੋਪ ਪੱਤਰ ਵਿੱਚ ਜ਼ਿਕਰ ਹੈ।

ਵਾਡਰਾ ਖਿਲਾਫ ਆਰੋਪ

ਵਾਡਰਾ ‘ਤੇ ਆਰੋਪ ਹੈ ਕਿ ਉਨ੍ਹਾਂ ਦੀ ਕੰਪਨੀ ਸਕਾਈਲਾਈਟ ਹਾਸਪਿਟੈਲਿਟੀ ਪ੍ਰਾਈਵੇਟ ਲਿਮਟਿਡ ਨੇ ਓਮਕਾਰੇਸ਼ਵਰ ਪ੍ਰਾਪਰਟੀਜ਼ ਤੋਂ 3.5 ਏਕੜ ਜ਼ਮੀਨ 7.5 ਕਰੋੜ ਰੁਪਏ ਵਿੱਚ ਖਰੀਦੀ ਸੀ। ਇਸ ਸੌਦੇ ਦਾ ਇੰਤਕਾਲ ਵੀ ਅਸਾਧਾਰਨ ਤਰੀਕੇ ਨਾਲ ਕੀਤਾ ਗਿਆ ਸੀ। ਆਰੋਪ ਹੈ ਕਿ ਹਰਿਆਣਾ ਦੀ ਤਤਕਾਲੀ ਭੂਪੇਂਦਰ ਸਿੰਘ ਹੁੱਡਾ ਸਰਕਾਰ ਨੇ ਰਾਬਰਟ ਵਾਡਰਾ ਦੀ ਕੰਪਨੀ ਨੂੰ ਲਾਇਸੈਂਸ ਦਿੱਤਾ, ਜਿਸ ਨਾਲ ਇਸ ਜ਼ਮੀਨ ਦੇ 2.70 ਏਕੜ ਨੂੰ ਵਪਾਰਕ ਕਲੋਨੀ ਵਜੋਂ ਵਿਕਸਤ ਕਰਨ ਦੀ ਇਜਾਜ਼ਤ ਦਿੱਤੀ ਗਈ। ਰਿਹਾਇਸ਼ੀ ਪ੍ਰੋਜੈਕਟ ਲਈ ਲਾਇਸੈਂਸ ਮਿਲਣ ਤੋਂ ਬਾਅਦ, ਜ਼ਮੀਨ ਦੀ ਕੀਮਤ ਵਧ ਗਈ। ਬਾਅਦ ਵਿੱਚ, ਵਾਡਰਾ ਨਾਲ ਜੁੜੀ ਕੰਪਨੀ ਨੇ ਇਹ ਜ਼ਮੀਨ ਡੀਐਲਐਫ ਨੂੰ 58 ਕਰੋੜ ਰੁਪਏ ਵਿੱਚ ਵੇਚ ਦਿੱਤੀ।

ਅੱਗੇ ਚੱਲ ਕੇ, ਹੁੱਡਾ ਸਰਕਾਰ ਨੇ ਰਿਹਾਇਸ਼ੀ ਪ੍ਰੋਜੈਕਟ ਦਾ ਲਾਇਸੈਂਸ ਡੀਐਲਐਫ ਨੂੰ ਤਬਦੀਲ ਕਰ ਦਿੱਤਾ। ਆਰੋਪ ਹੈ ਕਿ ਇਸ ਪੂਰੇ ਸੌਦੇ ਵਿੱਚ ਕਈ ਬੇਨਿਯਮੀਆਂ ਕੀਤੀਆਂ ਗਈਆਂ ਸਨ। ਹਰਿਆਣਾ ਪੁਲਿਸ ਨੇ 2018 ਵਿੱਚ ਇਸ ਡੀਲ ਨਾਲ ਸਬੰਧਤ ਇੱਕ ਕੇਸ ਦਰਜ ਕੀਤਾ ਸੀ। ਬਾਅਦ ਵਿੱਚ, ਈਡੀ ਨੇ ਵੀ ਇਸ ਮਾਮਲੇ ਵਿੱਚ ਇੱਕ ਕੇਸ ਦਰਜ ਕਰ ਜਾਂਚ ਸ਼ੁਰੂ ਕੀਤੀ ਸੀ।

ਆਈਏਐਸ ਅਸ਼ੋਕ ਖੇਮਕਾ ਨੇ ਕੀਤਾ ਸੀ ਖੁਲਾਸਾ

ਆਈਏਐਸ ਅਸ਼ੋਕ ਖੇਮਕਾ ਨੇ ਰਾਬਰਟ ਵਾਡਰਾ ਨਾਲ ਸਬੰਧਤ ਇਸ ਮਾਮਲੇ ਵਿੱਚ ਬੇਨਿਯਮੀਆਂ ਦਾ ਖੁਲਾਸਾ ਕੀਤਾ ਸੀ। ਦਸੰਬਰ 2023 ਵਿੱਚ, ਈਡੀ ਨੇ ਇਸ ਮਾਮਲੇ ਵਿੱਚ ਯੂਏਈ-ਅਧਾਰਤ ਕਾਰੋਬਾਰੀ ਸੀਸੀ ਥੰਪੀ ਅਤੇ ਯੂਕੇ ਦੇ ਹਥਿਆਰ ਡੀਲਰ ਸੰਜੇ ਭੰਡਾਰੀ ਦੇ ਰਿਸ਼ਤੇਦਾਰ ਸੁਮਿਤ ਚੱਢਾ ਵਿਰੁੱਧ ਚਾਰਜਸ਼ੀਟ ਦਾਇਰ ਕੀਤੀ ਸੀ। ਚਾਰਜਸ਼ੀਟ ਵਿੱਚ ਵਾਡਰਾ ਅਤੇ ਉਨ੍ਹਾਂ ਦੀ ਪਤਨੀ ਪ੍ਰਿਯੰਕਾ ਗਾਂਧੀ ਨੂੰ ਆਰੋਪੀ ਵਜੋਂ ਨਾਮਜ਼ਦ ਨਹੀਂ ਹਨ, ਪਰ ਉਨ੍ਹਾਂ ਦੀ ਜ਼ਮੀਨ ਦੀ ਖਰੀਦ ਅਤੇ ਵਿਕਰੀ ਦੇ ਵੇਰਵੇ ਸ਼ਾਮਲ ਹਨ।

ਈਡੀ ਨੇ ਕਿਹਾ ਸੀ ਕਿ ਵਾਡਰਾ ਨਾਲ ਕਥਿਤ ਤੌਰ ‘ਤੇ ਜੁੜੇ ਥੰਪੀਨੇ 2005 ਤੋਂ 2008 ਦੇ ਵਿਚਕਾਰ ਦਿੱਲੀ-ਐਨਸੀਆਰ ਸਥਿਤ ਰੀਅਲ ਅਸਟੇਟ ਏਜੰਟ ਐਚਐਲ ਪਾਹਵਾ ਰਾਹੀਂ ਹਰਿਆਣਾ ਦੇ ਫਰੀਦਾਬਾਦ ਦੇ ਅਮੀਰਪੁਰ ਪਿੰਡ ਵਿੱਚ ਲਗਭਗ 486 ਏਕੜ ਜ਼ਮੀਨ ਖਰੀਦੀ ਸੀ। ਚਾਰਜਸ਼ੀਟ ਦੇ ਅਨੁਸਾਰ, ਰਾਬਰਟ ਵਾਡਰਾ ਨੇ 2005-2006 ਵਿੱਚ ਐਚਐਲ ਪਾਹਵਾ ਤੋਂ ਅਮੀਰਪੁਰ ਵਿੱਚ 334 ਕਨਾਲ (40.08 ਏਕੜ) ਜ਼ਮੀਨ ਦੇ ਤਿੰਨ ਟੁਕੜੇ ਖਰੀਦੇ ਸਨ ਅਤੇ ਦਸੰਬਰ 2010 ਵਿੱਚ ਉਹੀ ਜ਼ਮੀਨ ਐਚਐਲ ਪਾਹਵਾ ਨੂੰ ਵੇਚ ਦਿੱਤੀ ਸੀ। ਈਡੀ ਦੇ ਅਨੁਸਾਰ, ਰਾਬਰਟ ਵਾਡਰਾ ਦੀ ਪਤਨੀ ਪ੍ਰਿਯੰਕਾ ਗਾਂਧੀ ਵਾਡਰਾ ਨੇ ਵੀ ਅਪ੍ਰੈਲ 2006 ਵਿੱਚ ਹਰਿਆਣਾ ਦੇ ਫਰੀਦਾਬਾਦ ਜ਼ਿਲ੍ਹੇ ਦੇ ਅਮੀਰਪੁਰ ਪਿੰਡ ਵਿੱਚ 40 ਕਨਾਲ (05 ਏਕੜ) ਖੇਤੀਬਾੜੀ ਜ਼ਮੀਨ ਐਚਐਲ ਪਾਹਵਾ ਤੋਂ ਖਰੀਦੀ ਸੀ ਅਤੇ ਫਰਵਰੀ 2010 ਵਿੱਚ ਉਹੀ ਜ਼ਮੀਨ ਐਚਐਲ ਪਾਹਵਾ ਨੂੰ ਵੇਚ ਦਿੱਤੀ ਸੀ।