ਪ੍ਰਦੂਸ਼ਣ ਤੋਂ ਹੁਣ ਬਚਾਏਗਾ ਨਕਲੀ ਮੀਂਹ! …ਦਿੱਲੀ ਸਰਕਾਰ ਨੇ ਕੇਂਦਰ ਨੂੰ ਲਿਖਿਆ ਪੱਤਰ

ਪ੍ਰਦੂਸ਼ਣ ਤੋਂ ਹੁਣ ਨਕਲੀ ਮੀਂਹ ਬਚਾਏਗਾ! ਦਿੱਲੀ ਸਰਕਾਰ ਨੇ ਕੇਂਦਰ ਨੂੰ ਲਿਖੀ ਚਿੱਠੀ

ਰਾਸ਼ਟਰੀ ਰਾਜਧਾਨੀ ਦਿੱਲੀ ‘ਚ ਹਵਾ ਪ੍ਰਦੂਸ਼ਣ ਕਾਰਨ ਸਾਹ ਲੈਣਾ ਮੁਸ਼ਕਿਲ ਹੋ ਰਿਹਾ ਹੈ। ਗ੍ਰੇਪ-4 ਲਾਗੂ ਕਰਨ ਤੋਂ ਬਾਅਦ ਵੀ ਪ੍ਰਦੂਸ਼ਣ ‘ਤੇ ਕਾਬੂ ਨਹੀਂ ਪਾਇਆ ਜਾ ਸਕਿਆ ਹੈ। AQI ਲਗਾਤਾਰ ਵਧ ਰਿਹਾ ਹੈ। ਦਿੱਲੀ ਦੇ ਜ਼ਹਿਰੀਲੇ ਮਾਹੌਲ ਕਾਰਨ ਲੋਕਾਂ ਦੀ ਸਿਹਤ ਖ਼ਤਰੇ ਵਿੱਚ ਹੈ। ਇਸ ਦੌਰਾਨ ਦਿੱਲੀ ਸਰਕਾਰ ਦੇ ਵਾਤਾਵਰਣ ਮੰਤਰੀ ਗੋਪਾਲ ਰਾਏ ਨੇ ਨਕਲੀ ਬਾਰਸ਼ ਨੂੰ ਲੈ ਕੇ ਕੇਂਦਰੀ ਵਾਤਾਵਰਣ ਮੰਤਰੀ ਨੂੰ ਪੱਤਰ ਲਿਖਿਆ ਹੈ।

ਗੋਪਾਲ ਰਾਏ ਨੇ ਕਿਹਾ ਕਿ ਪਿਛਲੇ 3 ਦਿਨਾਂ ਤੋਂ ਪੂਰੇ ਉੱਤਰ ਭਾਰਤ ਵਿੱਚ ਹਵਾ ਪ੍ਰਦੂਸ਼ਣ ਹੈ। ਲੋਕਾਂ ਦਾ ਸਾਹ ਲੈਣਾ ਔਖਾ ਹੋ ਰਿਹਾ ਹੈ। ਗ੍ਰੈਪ-4 ਨਿਯਮ ਲਾਗੂ ਕੀਤੇ ਗਏ ਹਨ। ਵਾਹਨਾਂ ਦੇ ਪ੍ਰਦੂਸ਼ਣ ਨੂੰ ਰੋਕਣ ਲਈ ਅਸੀਂ ਨਿੱਜੀ ਅਤੇ ਵਪਾਰਕ ਵਾਹਨਾਂ ‘ਤੇ ਪਾਬੰਦੀ ਲਗਾਈ ਹੈ। ਹੁਣ ਸਮਾਂ ਆ ਗਿਆ ਹੈ ਕਿ ਦਿੱਲੀ ਵਿੱਚ ਧੂੰਏਂ ਦੀ ਚਾਦਰ ਨੂੰ ਤੋੜਨ ਅਤੇ ਲੋਕਾਂ ਨੂੰ ਪ੍ਰਦੂਸ਼ਣ ਮੁਕਤ ਕਰਨ ਲਈ ਨਕਲੀ ਬਾਰਿਸ਼ ਕਰਵਾਈ ਜਾਵੇ।

ਉਨ੍ਹਾਂ ਕਿਹਾ ਹੈ ਕਿ ਅੱਜ ਮੈਂ ਕੇਂਦਰੀ ਵਾਤਾਵਰਨ ਮੰਤਰੀ ਨੂੰ ਪੱਤਰ ਲਿਖ ਕੇ ਨਕਲੀ ਮੀਂਹ ਲਈ ਸਬੰਧਤ ਵਿਭਾਗਾਂ ਨਾਲ ਹੰਗਾਮੀ ਮੀਟਿੰਗ ਕਰ ਰਿਹਾ ਹਾਂ। ਪਿਛਲੇ ਸਾਲ ਸਮਾਂ ਘੱਟ ਸੀ, ਪਰ ਇਸ ਵਾਰ ਅਸੀਂ ਅਗਸਤ ਵਿੱਚ ਹੀ ਲੋੜ ਪੈਣ ‘ਤੇ ਨਕਲੀ ਬਾਰਿਸ਼ ਕਰਨ ਦੀ ਤਿਆਰੀ ਕਰ ਲਈ ਸੀ। ਪ੍ਰਵਾਨਗੀ ਅਤੇ ਮੀਟਿੰਗ ਲਈ ਮੈਂ 30 ਅਗਸਤ ਨੂੰ ਪਹਿਲਾ ਪੱਤਰ, 10 ਅਕਤੂਬਰ ਨੂੰ ਦੂਜਾ ਪੱਤਰ, ਫਿਰ 23 ਅਕਤੂਬਰ ਨੂੰ ਦੁਬਾਰਾ ਪੱਤਰ ਲਿਖਿਆ ਪਰ ਕੋਈ ਜਵਾਬ ਨਹੀਂ ਮਿਲਿਆ।

ਪ੍ਰਧਾਨ ਮੰਤਰੀ ਮੋਦੀ ਦੇਣ ਦਖਲ – ਗੋਪਾਲ ਰਾਏ

ਮੰਤਰੀ ਗੋਪਾਲ ਰਾਏ ਨੇ ਕਿਹਾ ਕਿ ਅਕਤੂਬਰ ਵਿੱਚ ਲੰਮੀ ਬੇਨਤੀ ਤੋਂ ਬਾਅਦ ਕੇਂਦਰੀ ਖੇਤੀਬਾੜੀ ਅਤੇ ਵਾਤਾਵਰਣ ਮੰਤਰੀ ਨਾਲ ਆਨਲਾਈਨ ਮੀਟਿੰਗ ਕੀਤੀ ਗਈ ਸੀ। ਅੱਜ ਦਿੱਲੀ ਮੈਡੀਕਲ ਐਮਰਜੈਂਸੀ ਵਿੱਚੋਂ ਲੰਘ ਰਹੀ ਹੈ। ਇਸ ਧੂੰਏਂ ਨੂੰ ਤੇਜ਼ ਹਵਾ ਜਾਂ ਮੀਂਹ ਨਾਲ ਹੀ ਤੋੜਿਆ ਜਾ ਸਕਦਾ ਹੈ। ਅੱਜ ਭਾਰਤ ਵਿੱਚ ਭਾਜਪਾ ਦੀ ਸਰਕਾਰ ਅਜਿਹੀ ਕੇਂਦਰ ਵਿੱਚ ਬੈਠੀ ਹੈ ਕਿ ਲਗਾਤਾਰ ਚਿੱਠੀਆਂ ਲਿਖਣ ਅਤੇ ਅਪੀਲ ਕਰਨ ਦੇ ਬਾਵਜੂਦ ਮੰਤਰੀ ਕੋਲ ਮੀਟਿੰਗ ਬੁਲਾਉਣ ਦਾ ਸਮਾਂ ਨਹੀਂ ਹੈ। ਮਨਜ਼ੂਰੀ ਮਿਲਣੀ ਤਾਂ ਬਾਅਦ ਦੀ ਗੱਲ ਹੈ। ਜੇਕਰ ਏਨੀ ਅਪੀਲ ਕਿਸੇ ਵਿਦੇਸ਼ ਮੰਤਰੀ ਨੂੰ ਵੀ ਕੀਤੀ ਜਾਂਦੀ ਤਾਂ ਉਹ ਵੀ ਮੀਟਿੰਗ ਕਰ ਲੈਂਦਾ।

ਉਨ੍ਹਾਂ ਪੀਐਮ ਮੋਦੀ ਨੂੰ ਅਪੀਲ ਕਰਦਿਆਂ ਕਿਹਾ ਕਿ ਪ੍ਰਧਾਨ ਮੰਤਰੀ ਇਸ ਮਾਮਲੇ ਵਿੱਚ ਦਖ਼ਲ ਦੇਣ, ਜਾਂ ਤਾਂ ਮੀਟਿੰਗ ਕਰਨ ਜਾਂ ਇਸ ਸਮੱਸਿਆ ਦਾ ਹੱਲ ਕੱਢਣ। ਜੇਕਰ ਕੋਈ ਹੱਲ ਨਾ ਹੋਇਆ ਤਾਂ ਨਕਲੀ ਬਰਸਾਤ ਲਈ ਮੀਟਿੰਗ ਕੀਤੀ ਜਾਵੇ।

ਵਰਕ ਫਰਾਮ ਹੋਮ ‘ਤੇ ਕੀ ਬੋਲੇ ਗੋਪਾਲ ਰਾਏ?

ਪ੍ਰਦੂਸ਼ਣ ਕਾਰਨ ਮੌਜੂਦਾ ਹਾਲਾਤਾਂ ਨੂੰ ਦੇਖ ਕੇ ਦਫ਼ਤਰਾਂ ਨੂੰ ਜਾਣ ਵਾਲੇ ਮੁਲਾਜ਼ਮਾਂ ਦੇ ਮਨਾਂ ਵਿੱਚ ਇੱਕ ਸਵਾਲ ਉੱਠ ਰਿਹਾ ਹੈ। ਯਾਨੀ ਕੀ ਹੁਣ ਕਰਮਚਾਰੀਆਂ ਨੂੰ ਵੀ ਵਰਕ ਫਰਾਮ ਹੋਮ ਮਿਲੇਗਾ? ਦਿੱਲੀ ਸਰਕਾਰ ਦੇ ਵਾਤਾਵਰਣ ਮੰਤਰੀ ਗੋਪਾਲ ਰਾਏ ਨੇ ਇਸ ਦਾ ਜਵਾਬ ਦਿੱਤਾ ਹੈ। ਦਿੱਲੀ ‘ਚ ਪ੍ਰੈੱਸ ਕਾਨਫਰੰਸ ‘ਚ ਵਰਕ ਫਰਾਮ ਹੋਮ ਕਰਨ ਬਾਰੇ ਸਵਾਲ ਪੁੱਛੇ ਜਾਣ ‘ਤੇ ਗੋਪਾਲ ਰਾਏ ਨੇ ਕਿਹਾ ਕਿ ਉਹ ਸੁਪਰੀਮ ਕੋਰਟ ਦੇ ਹੁਕਮਾਂ ਨੂੰ ਪੜ੍ਹ ਕੇ ਫੈਸਲਾ ਲੈਣਗੇ। ਓਡ-ਈਵਨ ਲਾਗੂ ਕਰਨ ਬਾਰੇ ਉਨ੍ਹਾਂ ਕਿਹਾ, ਅਸੀਂ ਹੁਣ ਨਿਗਰਾਨੀ ਕਰ ਰਹੇ ਹਾਂ ਅਤੇ ਜੋ ਵੀ ਜ਼ਰੂਰੀ ਕਦਮ ਹੋਣਗੇ…ਚੁੱਕੇ ਜਾਣਗੇ।

ਕੀ ਲਾਗੂ ਹੋਵੇਗਾ ਔਡ-ਈਵਨ ਨਿਯਮ ?

ਉਨ੍ਹਾਂ ਕਿਹਾ ਕਿ ਅਸੀਂ ਵਾਹਨਾਂ ‘ਤੇ ਪਾਬੰਦੀ ਦਾ ਅਸਰ ਦੇਖ ਰਹੇ ਹਾਂ। ਜੇਕਰ ਅੱਜ ਸਮੌਗ ਟੁੱਟ ਜਾਵੇ ਤਾਂ ਪ੍ਰਦੂਸ਼ਣ ਹੇਠਾਂ ਆ ਜਾਵੇਗਾ। ਜਿਸ ਕਾਰਨ ਇੱਥੇ ਪ੍ਰਦੂਸ਼ਣ ਵੱਧ ਰਿਹਾ ਹੈ। ਇਸ ਸਵਾਲ ਦੇ ਜਵਾਬ ਵਿੱਚ ਕਿ ਕੀ ਐਲਜੀ ਨੂੰ ਔਡ-ਈਵਨ ਅਤੇ ਘਰ ਤੋਂ ਕੰਮ ਕਰਨ ਦਾ ਪ੍ਰਸਤਾਵ ਭੇਜਿਆ ਜਾਵੇਗਾ, ਦਿੱਲੀ ਮੰਤਰੀ ਨੇ ਕਿਹਾ ਕਿ ਅਸੀਂ ਹਰ ਸੰਭਵ ਕੋਸ਼ਿਸ਼ ਕਰਾਂਗੇ, ਪਰ ਫਿਲਹਾਲ ਸਾਡੀ ਤਰਜੀਹ ਧੂੰਏ ਨੂੰ ਤੋੜਨਾ ਹੈ। ਇਹ ਤੇਜ਼ ਹਵਾ ਜਾਂ ਮੀਂਹ ਕਾਰਨ ਹੀ ਟੁੱਟੇਗਾ।

ਦਿੱਲੀ ‘ਚ DTC ਬੱਸਾਂ ਦੀ ਹੜਤਾਲ ‘ਤੇ ਕੀ ਬੋਲੇ ਗੋਪਾਲ ਰਾਏ?

ਗੋਪਾਲ ਰਾਏ ਨੇ ਕਿਹਾ ਕਿ ਮੈਂ ਸਾਰਿਆਂ ਨੂੰ ਮਿਲ ਕੇ ਕੰਮ ਕਰਨ ਦੀ ਬੇਨਤੀ ਕਰਦਾ ਹਾਂ। ਉਨ੍ਹਾਂ ਨਾਲ ਗੱਲਬਾਤ ਕੀਤੀ ਜਾ ਰਹੀ ਹੈ ਪਰ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਲੋੜ ਪੈਣ ‘ਤੇ ਹੀ ਘਰੋਂ ਨਿਕਲਣ । ਨਿੱਜੀ ਵਾਹਨਾਂ ਦੀ ਵਰਤੋਂ ਘਟਾਓ। ਮੈਟਰੋ ਵਿੱਚ ਅਜੇ ਵੀ ਕਾਫ਼ੀ ਥਾਂ ਹੈ।