ਟ੍ਰੈਕਿੰਗ ਸਿਸਟਮ ਤੋਂ ਅਚਾਨਕ ਗ਼ਾਇਬ, ਫਿਰ ਸਮੁੰਦਰ ‘ਚ ਸਮਾਇਆ; ਓਡੀਸ਼ਾ ਤੱਟ ਨੇੜੇ ਕਿਵੇਂ ਡੁੱਬਿਆ ਪਨਾਮਾ ਦਾ ਕਾਰਗੋ ਸ਼ਿਪ?

ਓਡੀਸ਼ਾ ਦੇ ਤੱਟ ਨੇੜੇ ਬੰਗਾਲ ਦੀ ਖਾੜੀ ਵਿੱਚ ਇੱਕ ਵੱਡਾ ਸਮੁੰਦਰੀ ਹਾਦਸਾ ਵਾਪਰਿਆ ਹੈ, ਜਿੱਥੇ ਪਨਾਮਾ ਦੇ ਝੰਡੇ ਵਾਲਾ ਵਿਸ਼ਾਲ ਬਲਕ ਕੈਰੀਅਰ ਜਹਾਜ਼ ‘ਐੱਮ.ਵੀ. ਓਸ਼ਨ ਵਿਨਰ’ (MV Ocean Winner) ਸਮੁੰਦਰ ਵਿੱਚ ਡੁੱਬ ਗਿਆ। ਇਸ ਮਾਲਵਾਹਕ ਜਹਾਜ਼ ‘ਤੇ ਕੁੱਲ 24 ਕਰੂ ਮੈਂਬਰ ਸਵਾਰ ਸਨ, ਜਿਨ੍ਹਾਂ ਵਿੱਚ 20 ਚੀਨੀ, 3 ਮਿਆਂਮਾਰ ਅਤੇ 1 ਬੰਗਲਾਦੇਸ਼ੀ ਨਾਗਰਿਕ ਸ਼ਾਮਲ ਹੈ। ਜਹਾਜ਼ ਦੇ ਅਚਾਨਕ ਮੈਰੀਟਾਈਮ ਟ੍ਰੈਕਿੰਗ ਸਿਸਟਮ ਤੋਂ ਗ਼ਾਇਬ ਹੋਣ ਉਪਰੰਤ ਸੁਰੱਖਿਆ ਏਜੰਸੀਆਂ ਵੱਲੋਂ ਵੱਡੇ ਪੱਧਰ ‘ਤੇ ਖੋਜ ਅਤੇ ਬਚਾਅ ਕਾਰਜ (ਸਰਚ ਐਂਡ ਰੈਸਕਿਊ ਆਪ੍ਰੇਸ਼ਨ) ਸ਼ੁਰੂ ਕਰ ਦਿੱਤਾ ਗਿਆ ਹੈ।

ਰਿਪੋਰਟਾਂ ਮੁਤਾਬਕ ‘MV ਓਸ਼ਨ ਵਿਨਰ’ ਨਾਮਕ ਇਹ ਵਿਸ਼ਾਲ ਜਹਾਜ਼ ਭਾਰੀ ਮਾਤਰਾ ਵਿੱਚ ਲੋਹਾ (ਆਇਰਨ ਓਰ) ਲੈ ਕੇ ਓਡੀਸ਼ਾ ਦੀ ਪਾਰਾਦੀਪ ਬੰਦਰਗਾਹ ਤੋਂ ਸਿੰਗਾਪੁਰ ਲਈ ਰਵਾਨਾ ਹੋਇਆ ਸੀ। ਯੋਜਨਾ ਅਨੁਸਾਰ ਇਸ ਜਹਾਜ਼ ਨੇ 27 ਅਗਸਤ ਨੂੰ ਸਿੰਗਾਪੁਰ ਪਹੁੰਚਣਾ ਸੀ। ਖ਼ਬਰ ਏਜੰਸੀ ਏ.ਐੱਨ.ਆਈ. (ANI) ਮੁਤਾਬਕ 225 ਮੀਟਰ ਲੰਮੇ ਇਸ ਜਹਾਜ਼ ਨਾਲ ਸੰਪਰਕ ਟੁੱਟਣ ਤੋਂ ਪਹਿਲਾਂ ਆਖ਼ਰੀ ਵਾਰ ਇਸ ਦੀ ਲੋਕੇਸ਼ਨ ਓਡੀਸ਼ਾ ਤੱਟ ਤੋਂ 200 ਸਮੁੰਦਰੀ ਮੀਲ (ਨੌਟੀਕਲ ਮੀਲ) ਤੋਂ ਜ਼ਿਆਦਾ ਦੂਰ ਦਰਜ ਕੀਤੀ ਗਈ ਸੀ।

ਸੰਪਰਕ ਟੁੱਟਣ ਮਗਰੋਂ ਅੰਤਰਰਾਸ਼ਟਰੀ ਅਲਰਟ ਜਾਰੀ

ਮੈਰੀਟਾਈਮ ਰੈਸਕਿਊ ਕੋਆਰਡੀਨੇਸ਼ਨ ਸੈਂਟਰ (MRCC) ਨੂੰ ਸ਼ਨੀਵਾਰ ਦੇਰ ਰਾਤ ਜਹਾਜ਼ ਨਾਲ ਰਾਬਤਾ ਟੁੱਟਣ ਦੀ ਅਧਿਕਾਰਤ ਸੂਚਨਾ ਮਿਲੀ। ਇਸ ਦੇ ਨਾਲ ਹੀ ਜਹਾਜ਼ ਕੰਪਨੀ ‘ਵਿਕਟਰੀ ਸਟਾਰ ਗਰੁੱਪ ਕੰਪਨੀ ਲਿਮਟਿਡ’ ਵੱਲੋਂ ਕਰੂ ਮੈਂਬਰਾਂ ਦੀ ਸੁਰੱਖਿਆ ਅਤੇ ਬਚਾਅ ਕਾਰਜ ਲਈ ਤੁਰੰਤ ਮਦਦ ਦੀ ਅਪੀਲ ਕੀਤੀ ਗਈ। ਸੰਕਟ ਦਾ ਐਮਰਜੈਂਸੀ ਅਲਰਟ ਮਿਲਦੇ ਹੀ MRCC (SVP) ਨੇ ਤੁਰੰਤ ‘ਇੰਟਰਨੈਸ਼ਨਲ ਸੇਫ਼ਟੀ ਨੈੱਟ’ ਨੂੰ ਸਰਗਰਮ ਕਰ ਦਿੱਤਾ। ਘਟਨਾ ਸਥਾਨ ਦੇ ਆਸ-ਪਾਸ ਮੌਜੂਦ ਮਰਚੈਂਟ ਜਹਾਜ਼ ‘MT AISOPOS’ ਨੂੰ ਤੁਰੰਤ ਪ੍ਰਭਾਵ ਨਾਲ ਉਸ ਖੇਤਰ ਵੱਲ ਰਵਾਨਾ ਕੀਤਾ ਗਿਆ ਤਾਂ ਜੋ ਡੁੱਬੇ ਜਹਾਜ਼ ਦੇ ਮਲਬੇ ਅਤੇ ਲਾਈਫ਼-ਰਾਫ਼ਟਸ (ਬਚਾਅ ਕਿਸ਼ਤੀਆਂ) ਦੀ ਭਾਲ ਕੀਤੀ ਜਾ ਸਕੇ।

2 ਲੋਕਾਂ ਨੂੰ ਸੁਰੱਖਿਅਤ ਕੱਢਿਆ

ਭਾਰਤੀ ਤੱਟਰੱਖਿਅਕ ਬਲ (ICG) ਅਤੇ ਭਾਰਤੀ ਜਲ ਸੈਨਾ ਵੱਲੋਂ ਸਾਂਝੇ ਤੌਰ ‘ਤੇ ਜੰਗੀ ਪੱਧਰ ‘ਤੇ ਖੋਜ ਮੁਹਿੰਮ ਚਲਾਈ ਜਾ ਰਹੀ ਹੈ। ਲਾਪਤਾ ਕਰੂ ਮੈਂਬਰਾਂ ਦੀ ਭਾਲ ਲਈ ਕੋਸਟ ਗਾਰਡ ਦੇ ਦੋ ਅਹਿਮ ਜਹਾਜ਼ ‘ਵਰਦ’ ਅਤੇ ‘ਅਨਮੋਲ’ ਮੌਕੇ ‘ਤੇ ਤਾਇਨਾਤ ਕੀਤੇ ਗਏ ਹਨ, ਜਦਕਿ ਬਚਾਅ ਮੁਹਿੰਮ ਨੂੰ ਹੋਰ ਤੇਜ਼ ਕਰਨ ਲਈ ਸ਼੍ਰੀ ਵਿਜੇ ਪੁਰਮ ਤੋਂ ਜਹਾਜ਼ ‘ਵਿਜਿਤ’ ਨੂੰ ਵੀ ਰਵਾਨਾ ਕਰ ਦਿੱਤਾ ਗਿਆ ਹੈ। ਬਚਾਅ ਦਲ ਸਮੁੰਦਰ ਵਿੱਚ ਤੈਰ ਰਹੇ ਲਾਈਫ਼-ਰਾਫ਼ਟਸ ਅਤੇ ਬਚੇ ਹੋਏ ਮੁਲਾਜ਼ਮਾਂ ਦੀ ਨਿਸ਼ਾਨਦੇਹੀ ਕਰਨ ਲਈ ਖੇਤਰ ਵਿੱਚੋਂ ਲੰਘ ਰਹੇ ਹੋਰਨਾਂ ਵਪਾਰਕ ਜਹਾਜ਼ਾਂ ਨਾਲ ਲਗਾਤਾਰ ਤਾਲਮੇਲ ਬਣਾ ਰਹੇ ਹਨ।

ਹੁਣ ਤੱਕ ਮਿਲੀ ਜਾਣਕਾਰੀ ਅਨੁਸਾਰ 2 ਕਰੂ ਮੈਂਬਰਾਂ ਨੂੰ ਸੁਰੱਖਿਅਤ ਬਚਾ ਲਿਆ ਗਿਆ ਹੈ, ਜਦਕਿ ਬਾਕੀ 22 ਮੈਂਬਰਾਂ ਦੀ ਭਾਲ ਲਈ ਸਮੁੰਦਰ ਵਿੱਚ ਲਗਾਤਾਰ ਤਲਾਸ਼ੀ ਮੁਹਿੰਮ ਜਾਰੀ ਹੈ। ਜਹਾਜ਼ ਦੇ ਅਚਾਨਕ ਡੁੱਬਣ ਦੇ ਅਸਲ ਕਾਰਨਾਂ ਦਾ ਹਾਲੇ ਤੱਕ ਪਤਾ ਨਹੀਂ ਲੱਗ ਸਕਿਆ ਹੈ। ਹਾਦਸੇ ਤੋਂ ਠੀਕ ਪਹਿਲਾਂ ਜਹਾਜ਼ ਦੀ ਤਕਨੀਕੀ ਸਥਿਤੀ ਅਤੇ ਲਾਪਤਾ ਮੈਂਬਰਾਂ ਦੀ ਸਥਿਤੀ ਬਾਰੇ ਹੋਰ ਵੇਰਵੇ ਇਕੱਠੇ ਕੀਤੇ ਜਾ ਰਹੇ ਹਨ।