ਭਾਰਤ ਆ ਰਹੇ ਕੱਚੇ ਤੇਲ ਨਾਲ ਭਰੇ ਜਹਾਜ਼ ‘ਤੇ ਹਮਲਾ, 20 ਸਨ ਸਵਾਰ

ਅਰਬ ਸਾਗਰ (Arabian sea) ‘ਚ ਵਿਦੇਸ਼ੀ ਵਪਾਰਕ ਜਹਾਜ਼ ‘ਤੇ ਡਰੋਨ ਨਾਲ ਹਮਲਾ ਕੀਤਾ ਗਿਆ। ਡਰੋਨ ਹਮਲੇ ਤੋਂ ਬਾਅਦ ਜਹਾਜ਼ ਵਿਚ ਧਮਾਕਾ ਹੋਇਆ। ਇਸ ਜਹਾਜ਼ ਵਿਚ 20 ਭਾਰਤੀ ਸਵਾਰ ਸਨ। ਇਸ ਹਮਲੇ ‘ਚ ਕਿਸੇ ਜਾਨੀ ਨੁਕਸਾਨ ਦੀ ਕੋਈ ਸੂਚਨਾ ਨਹੀਂ ਹੈ। ਹਰ ਕੋਈ ਸੁਰੱਖਿਅਤ ਹੈ। ਕੱਚੇ ਤੇਲ ਨਾਲ ਲੱਦਿਆ ਇਹ ਜਹਾਜ਼ ਸੰਯੁਕਤ ਅਰਬ ਅਮੀਰਾਤ ਤੋਂ ਮੰਗਲੌਰ ਬੰਦਰਗਾਹ ‘ਤੇ ਆ ਰਿਹਾ ਸੀ। ਇਹ 19 ਦਸੰਬਰ ਨੂੰ ਯੂਏਈ ਤੋਂ ਰਵਾਨਾ ਹੋਇਆ ਸੀ। ਇਸ ਨੇ 25 ਦਸੰਬਰ ਨੂੰ ਮੈਂਗਲੋਰ ਬੰਦਰਗਾਹ ‘ਤੇ ਪਹੁੰਚਣਾ ਸੀ।

ਜਾਣਕਾਰੀ ਮੁਤਾਬਕ ਧਮਾਕੇ ਤੋਂ ਬਾਅਦ ਜਹਾਜ਼ ‘ਚ ਅੱਗ ਲੱਗ ਗਈ, ਜਿਸ ਨੂੰ ਚਾਲਕ ਦਲ ਨੇ ਮਿਲ ਕੇ ਬੁਝਾਇਆ। ਅੱਗ ਦੀ ਸੂਚਨਾ ਮਿਲਣ ਤੋਂ ਬਾਅਦ, ਭਾਰਤੀ ਤੱਟ ਰੱਖਿਅਕ ਮੈਰੀਟਾਈਮ ਸੈਂਟਰ (ਐੱਮ.ਆਰ.ਸੀ.ਸੀ.) ਨੇ ਤੁਰੰਤ ਐਮਵੀ ਕੈਮ ਪਲੂਟੋ ਨਾਲ ਸੰਪਰਕ ਕਰਨ ਦੀ ਕੋਸ਼ਿਸ਼ ਕੀਤੀ ਕਿਉਂਕਿ ਧਮਾਕੇ ਤੋਂ ਬਾਅਦ ਜਹਾਜ਼ ਦੀ ਆਟੋਮੈਟਿਕ ਪਛਾਣ ਪ੍ਰਣਾਲੀ ਬੰਦ ਹੋ ਗਈ ਸੀ। ਸ਼ਨੀਵਾਰ ਨੂੰ ਇਹ ਜਹਾਜ਼ ਪੋਰਬੰਦਰ ਤੱਟ ਤੋਂ 217 ਨੌਟੀਕਲ ਮੀਲ ਦੂਰ ਮੌਜੂਦ ਸੀ।

ਵਿਕਰਮ ਦੀ ਦੇਖ-ਰੇਖ ‘ਚ ਵਾਪਸ ਪਰਤੇਗਾ ਮੁੰਬਈ

ਸੰਪਰਕ ਸਥਾਪਤ ਕਰਨ ਤੋਂ ਬਾਅਦ, MRCC ਮੁੰਬਈ ਨੇ MV Chem Pluto ਦੀ ਸੁਰੱਖਿਆ ਨੂੰ ਵਧਾਉਣ ਲਈ ISN ਨੂੰ ਸਰਗਰਮ ਕੀਤਾ ਅਤੇ ਤੁਰੰਤ ਸਹਾਇਤਾ ਪ੍ਰਦਾਨ ਕਰਨ ਲਈ Chem Pluto ਦੇ ਆਸ-ਪਾਸ ਹੋਰ ਵਪਾਰੀ ਜਹਾਜ਼ਾਂ ਨੂੰ ਰਵਾਨਾ ਕੀਤਾ। ਭਾਰਤੀ ਤੱਟ ਰੱਖਿਅਕਾਂ ਨੇ ਕੈਮ ਪਲੂਟੋ ਨੂੰ ਸਹਾਇਤਾ ਪ੍ਰਦਾਨ ਕਰਨ ਲਈ ICGS ਵਿਕਰਮ ਅਤੇ ਸਮੁੰਦਰੀ ਨਿਗਰਾਨੀ ਜਹਾਜ਼ ਤਾਇਨਾਤ ਕੀਤੇ ਹਨ।

ਡੋਰਨੀਅਰ ਜਹਾਜ਼ ਨੇ ਕੈਮ ਪਲੂਟੋ ਨਾਲ ਸੰਚਾਰ ਸਥਾਪਿਤ ਕੀਤਾ ਹੈ। ਜਹਾਜ਼ ਦੇ ਮੁੰਬਈ ਪਹੁੰਚਣ ਦੀ ਸੰਭਾਵਨਾ ਹੈ। ਸਟੀਅਰਿੰਗ ਦੀ ਸਮੱਸਿਆ ਕਾਰਨ ਐਸਕਾਰਟ ਦੀ ਸਹਾਇਤਾ ਮੰਗੀ ਗਈ ਹੈ। ਯਾਤਰਾ ਦੌਰਾਨ ਵਿਕਰਮ ਇਸ ਜਹਾਜ਼ ਦੀ ਸੁਰੱਖਿਆ ਕਰਨਗੇ। ਇਸ ਜਹਾਜ਼ ਦੇ 25 ਦਸੰਬਰ ਤੱਕ ਮੁੰਬਈ ਪਹੁੰਚਣ ਦੀ ਸੰਭਾਵਨਾ ਹੈ। ਭਾਰਤੀ ਤੱਟ ਰੱਖਿਅਕ ਸੰਚਾਲਨ ਕੇਂਦਰ ਸਥਿਤੀ ‘ਤੇ ਨੇੜਿਓਂ ਨਜ਼ਰ ਰੱਖ ਰਿਹਾ ਹੈ।

ਹੂਤੀ ਬਾਗੀਆਂ ‘ਤੇ ਹਮਲੇ ਦਾ ਸ਼ੱਕ

ਤੁਹਾਨੂੰ ਦੱਸ ਦੇਈਏ ਕਿ ਇਸ ਭਾਰਤੀ ਜਹਾਜ਼ ‘ਤੇ ਡਰੋਨ ਹਮਲਾ ਕਿਸ ਨੇ ਕੀਤਾ, ਇਸ ਦੀ ਅਜੇ ਤੱਕ ਕਿਸੇ ਨੇ ਜ਼ਿੰਮੇਵਾਰੀ ਨਹੀਂ ਲਈ ਹੈ। ਹਾਲਾਂਕਿ ਹੂਤੀ ਬਾਗੀਆਂ ‘ਤੇ ਹਮਲੇ ਦਾ ਸ਼ੱਕ ਜਤਾਇਆ ਜਾ ਰਿਹਾ ਹੈ। ਤੁਹਾਨੂੰ ਦੱਸ ਦੇਈਏ ਕਿ ਇਜ਼ਰਾਈਲ-ਹਮਾਸ ਯੁੱਧ ਤੋਂ ਬਾਅਦ ਲਾਲ ਸਾਗਰ ਵਿੱਚ ਡਰੋਨ ਹਮਲੇ ਵਧ ਗਏ ਹਨ। ਪਿਛਲੇ ਮਹੀਨੇ, ਹੂਤੀ ਬਾਗੀਆਂ ਨੇ ਹਿੰਦ ਮਹਾਸਾਗਰ ਵਿੱਚ ਇੱਕ ਇਜ਼ਰਾਈਲੀ ਜਹਾਜ਼ ਨੂੰ ਨਿਸ਼ਾਨਾ ਬਣਾਇਆ ਸੀ।