ਸ਼ੂਗਰ ਨੂੰ ਕੰਟਰੋਲ ਕਰਨ ਲਈ ਭਾਰਤ ‘ਚ ਆਵੇਗੀ ਨਵੀਂ ਦਵਾਈ, ਕਿਵੇਂ ਕਰੇਗੀ ਕੰਮ, ਜਾਣੋ ਮਾਹਿਰਾਂ ਤੋਂ
Diabetes new medicine: ਭਾਰਤ ਵਿੱਚ ਅਗਲੇ ਸਾਲ ਤੱਕ ਡਾਇਬਟੀਜ਼ ਦੀ ਨਵੀਂ ਦਵਾਈ, ਟਿਰਜ਼ੇਪੇਟਾਈਡ (Tirzepatide) ਆ ਸਕਦੀ ਹੈ। ਇਹ ਦਵਾਈ ਸ਼ੂਗਰ ਦੀਆਂ ਹੋਰ ਦਵਾਈਆਂ ਨਾਲੋਂ ਬਿਹਤਰ ਮੰਨੀ ਜਾਂਦੀ ਹੈ। ਆਓ ਜਾਣਦੇ ਹਾਂ ਮਾਹਿਰਾਂ ਤੋਂ ਇਹ ਦਵਾਈ ਸਰੀਰ 'ਤੇ ਕੀ ਅਸਰ ਕਰੇਗੀ।
ਭਾਰਤ ਵਿੱਚ ਸ਼ੂਗਰ ਦੇ ਮਰੀਜ਼ਾਂ ਦੀ ਗਿਣਤੀ ਹਰ ਸਾਲ ਵੱਧ ਰਹੀ ਹੈ। ਦੇਸ਼ ਵਿੱਚ ਇਸ ਬਿਮਾਰੀ ਦੇ 10 ਕਰੋੜ ਤੋਂ ਵੱਧ ਮਰੀਜ਼ ਹਨ। ਸ਼ੂਗਰ ਨੂੰ ਕੰਟਰੋਲ ‘ਚ ਰੱਖਣ ਲਈ ਲੋਕ ਦਵਾਈਆਂ ਦਾ ਸੇਵਨ ਕਰਦੇ ਹਨ। ਇਸ ਦੇ ਲਈ ਬਾਜ਼ਾਰ ‘ਚ ਕਈ ਤਰ੍ਹਾਂ ਦੀਆਂ ਦਵਾਈਆਂ ਮੌਜੂਦ ਹਨ ਪਰ ਹੁਣ ਭਾਰਤ ‘ਚ ਇਸ ਬੀਮਾਰੀ ਨੂੰ ਕੰਟਰੋਲ ਕਰਨ ਲਈ ਇਕ ਨਵੀਂ ਦਵਾਈ ਨੂੰ ਮਨਜ਼ੂਰੀ ਮਿਲ ਗਈ ਹੈ। ਇਸ ਦਵਾਈ ਦਾ ਨਾਮ Tirzepatide ਹੈ। ਇਸ ਨੂੰ ਡਰੱਗਜ਼ ਸਟੈਂਡਰਡ ਕੰਟਰੋਲ ਆਰਗੇਨਾਈਜ਼ੇਸ਼ਨ ਦੁਆਰਾ ਮਨਜ਼ੂਰੀ ਦਿੱਤੀ ਗਈ ਹੈ। ਇਹ ਦਵਾਈ ਭਾਰਤ ਵਿੱਚ ਸਾਲ 2025 ਤੱਕ ਉਪਲਬਧ ਹੋ ਸਕਦੀ ਹੈ।
Tirzepatide ਸ਼ੂਗਰ ਅਤੇ ਭਾਰ ਘਟਾਉਣ ਲਈ ਇੱਕ ਦਵਾਈ ਹੈ। ਭਾਰਤ ਵਿੱਚ ਇਸ ਦੀ ਵਰਤੋਂ ਸ਼ੂਗਰ ਅਤੇ ਮੋਟਾਪੇ ਨੂੰ ਕੰਟਰੋਲ ਕਰਨ ਲਈ ਕੀਤੀ ਜਾਵੇਗੀ। ਇਸ ਦਵਾਈ ਨਾਲ ਬਲੱਡ ਸ਼ੂਗਰ ਲੈਵਲ ਨੂੰ ਕੰਟਰੋਲ ਕਰਨ ਦਾ ਦਾਅਵਾ ਕੀਤਾ ਜਾ ਰਿਹਾ ਹੈ। ਪਿਛਲੇ 10 ਸਾਲਾਂ ‘ਚ ਸ਼ੂਗਰ ਨੂੰ ਕੰਟਰੋਲ ਕਰਨ ਲਈ ਕਈ ਦਵਾਈਆਂ ਆ ਚੁੱਕੀਆਂ ਹਨ, ਹਾਲਾਂਕਿ ਜਿਸ ਕੰਪਨੀ ਦੀ ਇਹ ਦਵਾਈ ਹੈ, ਉਸ ਕੰਪਨੀ ਨੇ ਕੁਝ ਸਮਾਂ ਪਹਿਲਾਂ ਭਾਰ ਘਟਾਉਣ ਵਾਲੀ ਦਵਾਈ ਬਣਾਈ ਸੀ, ਜੋ ਕਾਫੀ ਕਾਰਗਰ ਸਾਬਤ ਹੋਈ ਹੈ। ਅਜਿਹੇ ‘ਚ ਉਮੀਦ ਕੀਤੀ ਜਾ ਰਹੀ ਹੈ ਕਿ ਸ਼ੂਗਰ ਦੀ ਇਹ ਦਵਾਈ ਮਰੀਜ਼ਾਂ ਲਈ ਵੀ ਕਾਫੀ ਫਾਇਦੇਮੰਦ ਸਾਬਤ ਹੋ ਸਕਦੀ ਹੈ। ਪਰ ਇਹ ਸਿਰਫ ਟਾਈਪ-2 ਸ਼ੂਗਰ ਲਈ ਹੋਵੇਗੀ। ਇਹ ਟਾਈਪ-1 ਲਈ ਨਹੀਂ ਬਣਾਈ ਗਈ ਹੈ।
Tirzepatide ਕਿਵੇਂ ਕਰੇਗੀ ਸਰੀਰ ‘ਤੇ ਅਸਰ?
ਮੈਡੀਸਨ ਦੇ ਡਾਕਟਰ ਸੁਭਾਸ਼ ਗਿਰੀ ਦਾ ਕਹਿਣਾ ਹੈ ਕਿ ਡਾਇਬਟੀਜ਼ ਦੀਆਂ ਦਵਾਈਆਂ ਹਾਰਮੋਨ ਲੈਵਲ ਨੂੰ ਠੀਕ ਕਰਦੀਆਂ ਹਨ ਅਤੇ ਇਸ ਨਾਲ ਸ਼ੂਗਰ ਲੈਵਲ ਕੰਟਰੋਲ ‘ਚ ਰਹਿੰਦਾ ਹੈ। ਇਹ ਦਵਾਈ ਸ਼ੂਗਰ ਦੇ ਨਾਲ-ਨਾਲ ਲੋਕਾਂ ਵਿੱਚ ਮੋਟਾਪੇ ਨੂੰ ਵੀ ਕੰਟਰੋਲ ਕਰੇਗੀ। ਇਸ ਨੂੰ ਖਾਣ ਨਾਲ ਮੈਟਾਬੋਲਿਜ਼ਮ ਠੀਕ ਹੋਵੇਗਾ ਅਤੇ ਇਹ ਸਰੀਰ ਦੀ ਚਰਬੀ ਨੂੰ ਘੱਟ ਕਰਨ ਦਾ ਕੰਮ ਕਰੇਗਾ। ਇਹ ਦਵਾਈ ਨੂੰ ਹਫ਼ਤੇ ਵਿੱਚ ਇੱਕ ਵਾਰ ਹੀ ਲਿਆ ਜਾ ਸਕੇਗਾ।
ਇਹ ਦਵਾਈ ਇੱਕ ਖੁਰਾਕ ਅਨੁਸਾਰ ਲਈ ਜਾਵੇਗੀ। ਹਾਲਾਂਕਿ ਭਾਰਤ ‘ਚ ਦਵਾਈ ਆਉਣ ‘ਚ ਅਜੇ ਕੁਝ ਮਹੀਨੇ ਦਾ ਸਮਾਂ ਬਾਕੀ ਹੈ। ਦਵਾਈ ਬਣਾਉਣ ਵਾਲੀ ਕੰਪਨੀ ਨੇ Tirzepatide ਦੀ ਕੀਮਤ ਤੈਅ ਨਹੀਂ ਕੀਤੀ ਹੈ। ਪਰ ਅਮਰੀਕਾ ਵਿੱਚ ਇਸ ਦਵਾਈ ਦੀ ਕੀਮਤ ਇੱਕ ਹਜ਼ਾਰ ਡਾਲਰ ਪ੍ਰਤੀ ਦਵਾਈ ਹੈ। ਹਾਲਾਂਕਿ ਭਾਰਤ ‘ਚ ਕੀਮਤ ਇਸ ਤੋਂ ਘੱਟ ਹੋਣ ਦੀ ਉਮੀਦ ਹੈ।
ਭਾਰਤ ਵਿੱਚ ਹਰ ਸਾਲ ਵੱਧ ਰਹੇ ਸ਼ੂਗਰ ਦੇ ਮਰੀਜ਼
ICMR ਦੇ ਅਨੁਸਾਰ, ਭਾਰਤ ਵਿੱਚ ਸ਼ੂਗਰ ਦੇ ਮਰੀਜ਼ਾਂ ਦੀ ਗਿਣਤੀ 10 ਕਰੋੜ ਤੋਂ ਵੱਧ ਹੈ। ਦੇਸ਼ ਵਿੱਚ ਇਸ ਬਿਮਾਰੀ ਦੇ ਮਰੀਜ਼ਾਂ ਦੀ ਗਿਣਤੀ ਹਰ ਸਾਲ ਵੱਧ ਰਹੀ ਹੈ। ਇਹ ਬੀਮਾਰੀ ਖਾਣ-ਪੀਣ ਦੀਆਂ ਗਲਤ ਆਦਤਾਂ ਅਤੇ ਖਰਾਬ ਜੀਵਨ ਸ਼ੈਲੀ ਕਾਰਨ ਹੁੰਦੀ ਹੈ। ਪਹਿਲਾਂ ਟਾਈਪ-2 ਸ਼ੂਗਰ ਦੇ ਮਾਮਲੇ 50 ਸਾਲ ਦੀ ਉਮਰ ਤੋਂ ਬਾਅਦ ਦੇਖਣ ਨੂੰ ਮਿਲਦੇ ਸਨ ਪਰ ਹੁਣ 30 ਤੋਂ 35 ਸਾਲ ਦੀ ਉਮਰ ਦੇ ਲੋਕ ਵੀ ਇਸ ਬਿਮਾਰੀ ਤੋਂ ਪੀੜਤ ਹਨ। ਮਾਹਿਰਾਂ ਦਾ ਕਹਿਣਾ ਹੈ ਕਿ ਭਾਰਤ ‘ਚ ਸ਼ੂਗਰ ਦੇ ਵਧਦੇ ਮਾਮਲਿਆਂ ਨੂੰ ਦੇਖਦਿਆਂ ਦੁਨੀਆ ਭਰ ਦੀਆਂ ਫਾਰਮਾ ਕੰਪਨੀਆਂ ਆਪਣੀ ਸ਼ੂਗਰ ਦੀਆਂ ਦਵਾਈਆਂ ਇੱਥੇ ਵੇਚਣਾ ਚਾਹੁੰਦੀਆਂ ਹਨ। ਇਸ ਸਿਲਸਿਲੇ ਵਿਚ ਨਵੀਆਂ-ਨਵੀਆਂ ਦਵਾਈਆਂ ਆ ਰਹੀਆਂ ਹਨ।
