‘ਸਾਨੂੰ ਲੱਗਿਆ ਐਲਰਜੀ ਹੈ…’, ‘ਦੰਗਲ ਗਰਲ’ ਸੁਹਾਨੀ ਦੀ ਮੌਤ ਦੇ ਕਾਰਨਾਂ ਬਾਰੇ ਪਿਤਾ ਨੇ ਕੀਤਾ ਖੁਲਾਸਾ

ਆਮਿਰ ਖਾਨ ਦੀ ਫਿਲਮ ‘ਦੰਗਲ’ ਦੀ ਚਾਈਲਡ ਆਰਟਿਸਟ ਸੁਹਾਨੀ ਭਟਨਾਗਰ ਦੇ ਦੇਹਾਂਤ ਦੀ ਖਬਰ ਨੇ ਸਭ ਨੂੰ ਝੰਜੋੜ ਕੇ ਰੱਖ ਦਿੱਤਾ ਹੈ। ਸੁਹਾਨਾ ਦੀ ਮੌਤ ਸਿਰਫ 19 ਸਾਲ ਦੀ ਉਮਰ ‘ਚ ਹੋ ਗਈ ਹੈ। ਦੰਗਲ ਦੀ ਪੂਰੀ ਸਟਾਰ ਕਾਸਟ ਇਸ ਖਬਰ ਤੋਂ ਕਾਫੀ ਹੈਰਾਨ ਹੈ। ਕੱਲ੍ਹ ਖਬਰ ਆਈ ਸੀ ਕਿ ਸੁਹਾਨੀ ਦੇ ਸਰੀਰ ‘ਚ ਦਵਾਈਆਂ ਦਾ ਰਿਐਕਸ਼ਨ ਹੋਇਆ ਹੈ। ਜਿਸ ਕਾਰਨ ਉਸ ਦੀ ਮੌਤ ਹੋਈ ਹੈ। ਹੁਣ ਸੁਹਾਨੀ ਦੇ ਪਿਤਾ ਨੇ ਆਪਣੀ ਬੇਟੀ ਦੀ ਬੀਮਾਰੀ ਬਾਰੇ ਪੀਟੀਆਈ ਏਜੰਸੀ ਨੂੰ ਦੱਸਿਆ ਹੈ।

ਬਾਲ ਕਲਾਕਾਰ ਦੇ ਪਿਤਾ ਨੇ ਦੱਸਿਆ ਕਿ ਸੁਹਾਨੀ ਡਰਮਾਟੋਮਾਇਓਸਾਈਟਿਸ ਤੋਂ ਪੀੜਤ ਸੀ, ਜੋ ਕਿ ਇੱਕ ਦੁਰਲੱਭ ਸੋਜਸ਼ ਦੀ ਬਿਮਾਰੀ ਹੈ ਜੋ ਚਮੜੀ ‘ਤੇ ਲਾਲ ਧੱਬੇ ਅਤੇ ਮਾਸਪੇਸ਼ੀਆਂ ਦੀ ਕਮਜ਼ੋਰੀ ਦਾ ਕਾਰਨ ਬਣਦੀ ਹੈ। 7 ਫਰਵਰੀ ਨੂੰ ਸੁਹਾਨੀ ਨੂੰ ਦਿੱਲੀ ਦੇ ਏਮਜ਼ ‘ਚ ਭਰਤੀ ਕਰਵਾਇਆ ਗਿਆ ਸੀ। ਡਾਕਟਰੀ ਉਲਝਣਾਂ ਕਾਰਨ 16 ਫਰਵਰੀ ਨੂੰ ਉਸਦੀ ਮੌਤ ਹੋ ਗਈ ਸੀ। ਸੁਹਾਨੀ ਦੇ ਪਿਤਾ ਸੁਮਿਤ ਭਟਨਾਗਰ ਦੇ ਅਨੁਸਾਰ, ਸੁਹਾਨੀ ਦੇ ਹੱਥਾਂ ‘ਤੇ ਲਗਭਗ ਦੋ ਮਹੀਨਿਆਂ ਤੋਂ ਲਾਲ ਧੱਬੇ ਸਨ। ਉਨ੍ਹਾਂ ਨੇ ਸੋਚਿਆ ਕਿ ਇਹ ਐਲਰਜੀ ਹੈ ਅਤੇ ਫਰੀਦਾਬਾਦ ਦੇ ਕਈ ਹਸਪਤਾਲਾਂ ਵਿੱਚ ਡਾਕਟਰਾਂ ਦੀ ਸਲਾਹ ਲਈ।

ਅਦਾਕਾਰਾ ਦੇ ਪਿਤਾ ਨੇ ਅੱਗੇ ਦੱਸਿਆ ਕਿ ਡਾਕਟਰਾਂ ਨੂੰ ਦੇਖਣ ਤੋਂ ਬਾਅਦ ਵੀ ਉਹ ਇਸ ਬੀਮਾਰੀ ਨੂੰ ਨਹੀਂ ਫੜ ਸਕੇ। ਜਦੋਂ ਸੁਹਾਨੀ ਦੀ ਹਾਲਤ ਵਿਗੜਨ ਲੱਗੀ ਤਾਂ ਉਨ੍ਹਾਂ ਨੇ ਉਸਨੂੰ ਏਮਜ਼ ‘ਚ ਭਰਤੀ ਕਰਵਾਇਆ। ਪਰ ਸੁਹਾਨੀ ਦੀ ਹਾਲਤ ਵਿੱਚ ਕੋਈ ਸੁਧਾਰ ਨਹੀਂ ਹੋਇਆ ਅਤੇ ਤਰਲ ਇਕੱਠਾ ਹੋਣ ਕਾਰਨ ਉਸ ਦੇ ਫੇਫੜੇ ਖਰਾਬ ਹੋ ਗਏ। ਸੁਹਾਨਾ ਦੇ ਦੇਹਾਂਤ ਦੀ ਖਬਰ ਸਾਹਮਣੇ ਆਉਣ ਤੋਂ ਬਾਅਦ ਦੰਗਲ ਦੀ ਸਟਾਰ ਕਾਸਟ ਨੇ ਸੋਸ਼ਲ ਮੀਡੀਆ ‘ਤੇ ਦੁੱਖ ਜਤਾਇਆ ਹੈ। ਆਮਿਰ ਖਾਨ ਨੂੰ ਉਨ੍ਹਾਂ ਦੇ ਪ੍ਰੋਡਕਸ਼ਨ ਹਾਊਸ ਵਲੋਂ ਵੀ ਸ਼ਰਧਾਂਜਲੀ ਦਿੱਤੀ ਗਈ।

ਫਿਲਮ ਦੰਗਲ ਦੀ ਗੱਲ ਕਰੀਏ ਤਾਂ ਸੁਹਾਨੀ ਭਟਨਾਗਰ ਨੇ ਇਸ ਫਿਲਮ ‘ਚ ਆਮਿਰ ਖਾਨ ਦੀ ਛੋਟੀ ਬੇਟੀ ਬਬੀਤਾ ਫੋਗਾਟ ਦਾ ਕਿਰਦਾਰ ਨਿਭਾਇਆ ਹੈ। ਇਸ ਫਿਲਮ ਤੋਂ ਸੁਹਾਨੀ ਨੂੰ ਕਾਫੀ ਪਹਿਚਾਣ ਮਿਲੀ। ਇੱਕ ਬਾਲ ਕਲਾਕਾਰ ਵਜੋਂ, ਸੁਹਾਨੀ ਹਿੰਦੀ ਸਿਨੇਮਾ ਦੀਆਂ ਵੱਡੀਆਂ ਬਲਾਕਬਸਟਰ ਫਿਲਮਾਂ ਦਾ ਹਿੱਸਾ ਬਣ ਗਈ। ਸੁਹਾਨੀ ਪਿਛਲੇ ਕਾਫੀ ਸਮੇਂ ਤੋਂ ਸੋਸ਼ਲ ਮੀਡੀਆ ‘ਤੇ ਘੱਟ ਐਕਟਿਵ ਸੀ।