ਇੱਕ ਦੂਜੇ ਦੇ ਹੋਏ ਸਿਧਾਰਥ-ਕਿਆਰਾ, ਵਿਕੀਪੀਡੀਆ ‘ਚ ਵੀ ਰਿਸ਼ਤਾ ਅਪਡੇਟ

ਸਿਧਾਰਥ ਮਲਹੋਤਰਾ ਅਤੇ ਕਿਆਰਾ ਆਡਵਾਨੀ ਲੰਬੇ ਸਮੇਂ ਤੋਂ ਇੱਕ-ਦੂਜੇ ਨੂੰ ਡੇਟ ਕਰ ਰਹੇ ਸਨ। ਦੋਹਾਂ ਦੇ ਵਿਆਹ ਨੂੰ ਲੈ ਕੇ ਅਕਸਰ ਹੀ ਪ੍ਰਸ਼ੰਸਕਾਂ ਵੱਲੋਂ ਕਿਆਸ ਲਗਾਏ ਜਾ ਰਹੇ ਸਨ। ਆਖਿਰਕਾਰ, ਦੋਵਾਂ ਨੂੰ ਇਕੱਠੇ ਦੇਖਣ ਦੀ ਪ੍ਰਸ਼ੰਸਕਾਂ ਦੀ ਇਹ ਇੱਛਾ ਹੁਣ ਪੂਰੀ ਹੋ ਗਈ ਹੈ। ਸਿਧਾਰਥ ਅਤੇ ਕਿਆਰਾ ਇੱਕ ਦੂਜੇ ਦੇ ਹੋ ਚੁੱਕੇ ਹਨ, ਦੋਵੇਂ ਵਿਆਹ ਦੇ ਬੰਧਨ ਵਿੱਚ ਬੱਝ ਚੁੱਕੇ ਹਨ।

ਦੋਵਾਂ ਨੇ ਆਪਣੇ ਵਿਆਹ ਲਈ ਜੈਸਲਮੇਰ ਦੇ ਸੂਰਿਆਗੜ੍ਹ ਪੈਲੇਸ ਨੂੰ ਚੁਣਿਆ, ਜਿੱਥੇ ਇਹ ਜੋੜਾ ਆਪਣੇ-ਆਪਣੇ ਪਰਿਵਾਰਾਂ ਨਾਲ 4 ਫਰਵਰੀ ਨੂੰ ਹੀ ਪਹੁੰਚ ਗਿਆ ਸੀ।ਉੱਥੇ ਹੀ 5 ਫਰਵਰੀ ਤੋਂ ਮਹਿਮਾਨ ਆਉਣੇ ਸ਼ੁਰੂ ਹੋ ਗਏ ਸਨ। ਦੋਵਾਂ ਦੇ ਵਿਆਹ ਦੀਆਂ ਰਸਮਾਂ 5 ਫਰਵਰੀ ਤੋਂ ਸ਼ੁਰੂ ਹੋਈਆਂ ਸਨ ਅਤੇ ਅੱਜ 7 ਫਰਵਰੀ ਨੂੰ ਦੋਵੇਂ ਸੱਤ ਫੇਰੇ ਲੈ ਕੇ ਸਦਾ ਲਈ ਇੱਕ ਦੂਜੇ ਦੇ ਹੋ ਗਏ।

ਪੰਜਾਬੀ ਅੰਦਾਜ਼ ‘ਚ ਬਾਰਾਤ ਲੈ ਕੇ ਪਹੁੰਚੇ ਸਿਧਾਰਥ

ਸਿਡ-ਕਿਆਰਾ ਦੇ ਇਸ ਵਿਆਹ ਲਈ ਦਿੱਲੀ ਤੋਂ ਬੈਂਡ ਮੈਂਬਰ ਆਏ ਸਨ। ਲਾੜ੍ਹਾ ਕਿਆਰਾ ਨੂੰ ਆਪਣੀ ਦੁਲਹਨ ਬਣਾਉਣ ਲਈ ਪੰਜਾਬੀ ਸਟਾਈਲ ਵਿੱਚ ਪਹੁੰਚਿਆ। ਸਿਧਾਰਥ ਸ਼ਾਨਦਾਰ ਢੰਗ ਨਾਲ ਬੈਂਡ ਮੈਂਬਰਾਂ ਦੇ ਨਾਲ ਘੋੜੀ ‘ਤੇ ਸਵਾਰ ਹੋ ਕੇ ਬਾਰਾਤ ਲੈ ਕੇ ਪਹੁੰਚੇ ਅਤੇ ਫਿਰ ਦੋਵਾਂ ਨੇ ਸੱਤ ਫੇਰੇ ਲਏ ਅਤੇ ਇਕ ਦੂਜੇ ਦੇ ਹੋ ਗਏ।

ਵਿਆਹ ਤੋਂ ਪਹਿਲਾਂ ਪ੍ਰੀ-ਵੈਡਿੰਗ ਫੰਕਸ਼ਨ ਦੀਆਂ ਕਈ ਤਸਵੀਰਾਂ ਅਤੇ ਵੀਡੀਓਜ ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੋਈਆਂ ਸਨ, ਜਿਸ ਤੋਂ ਲੱਗ ਰਿਹਾ ਸੀ ਕਿ ਦੋਵੇਂ ਸ਼ਾਨਦਾਰ ਤਰੀਕੇ ਨਾਲ ਵਿਆਹ ਕਰ ਰਹੇ ਹਨ। ਇਸ ਦੇ ਨਾਲ ਹੀ, ਕੁਝ ਸਮਾਂ ਪਹਿਲਾਂ ਮੰਡਪ ਦੀਆਂ ਤਸਵੀਰਾਂ ਵੀ ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੋਈਆਂ ਸਨ, ਜਿਸ ਨੂੰ ਗੁਲਾਬੀ ਰੰਗ ਨਾਲ ਖੂਬਸੂਰਤੀ ਨਾਲ ਸਜਾਇਆ ਗਿਆ ਸੀ। ਤੁਹਾਨੂੰ ਦੱਸ ਦੇਈਏ ਕਿ ਸਿਡ-ਕਿਆਰਾ ਦੇ ਵਿਆਹ ਦੀ ਥੀਮ ਪਿੰਕ ਸੀ।

ਇਨ੍ਹਾਂ ਬਾਲੀਵੁੱਡ ਸਿਤਾਰਿਆਂ ਨੇ ਕੀਤੀ ਸ਼ਿਰਕਤ

ਖਬਰਾਂ ਮੁਤਾਬਕ ਸਿਧਾਰਥ ਅਤੇ ਕਿਆਰਾ ਦੇ ਵਿਆਹ ‘ਚ ਕਰੀਬ 100 ਤੋਂ 125 ਮਹਿਮਾਨ ਸ਼ਾਮਲ ਹੋਏ, ਜਿਸ ‘ਚ ਬਾਲੀਵੁੱਡ ਦੇ ਕਈ ਸਿਤਾਰੇ ਮੌਜੂਦ ਸਨ। ਸ਼ੁਰੂਆਤੀ ਜਾਣਕਾਰੀ ਮੁਤਾਬਕ ਬਾਲੀਵੁੱਡ ਤੋਂ ਕਰਨ ਜੌਹਰ, ਮਲਾਇਕਾ ਅਰੋੜਾ, ਸ਼ਾਹਿਦ ਕਪੂਰ ਅਤੇ ਉਨ੍ਹਾਂ ਦੀ ਪਤਨੀ ਮੀਰਾ ਰਾਜਪੂਤ, ਅਰਮਾਨ ਜੈਨ ਅਤੇ ਉਨ੍ਹਾਂ ਦੀ ਪਤਨੀ ਅਨੀਸਾ ਮਲਹੋਤਰਾ, ਜੂਹੀ ਚਾਵਲਾ ਅਤੇ ਉਨ੍ਹਾਂ ਦੇ ਪਤੀ ਜੈ ਮਹਿਤਾ ਸ਼ਾਮਲ ਸਨ। ਇਸ ਦੇ ਨਾਲ ਹੀ ਮੁਕੇਸ਼ ਅੰਬਾਨੀ ਦੀ ਬੇਟੀ ਅਤੇ ਕਿਆਰਾ ਦੀ ਚੰਗੀ ਦੋਸਤ ਈਸ਼ਾ ਅੰਬਾਨੀ ਨੇ ਵੀ ਇਸ ਵਿਆਹ ‘ਚ ਸ਼ਿਰਕਤ ਕੀਤੀ ਅਤੇ ਉਨ੍ਹਾਂ ਦੀ ਮੌਜੂਦਗੀ ‘ਚ ਸਿਡ-ਕਿਆਰਾ ਇਕ ਦੂਜੇ ਦੇ ਹੋ ਗਏ। ਹਾਲਾਂਕਿ ਵਿਆਹ ਤੋਂ ਬਾਅਦ ਦੋਵੇਂ ਸੋਸ਼ਲ ਮੀਡੀਆ ‘ਤੇ ਲਾਈਮਲਾਈਟ ‘ਚ ਹਨ। ਫੈਨਸ ਦੋਵਾਂ ਨੂੰ ਸੋਸ਼ਲ ਮੀਡੀਆ ਰਾਹੀਂ ਵਧਾਈ ਦੇ ਰਹੇ ਹਨ।

ਵਿਕੀਪੀਡੀਆ ‘ਤੇ ਵੀ ਅੱਪਡੇਟ ਹੋਇਆ ਰਿਸ਼ਤਾ

ਵਿਆਹ ਦੇ ਬੰਧਨ ‘ਚ ਬੱਝਦੇ ਹੀ ਸਿਧਾਰਥ ਅਤੇ ਕਿਆਰਾ ਦਾ ਰਿਸ਼ਤਾ ਵਿਕੀਪੀਡੀਆ ‘ਤੇ ਵੀ ਅਪਡੇਟ ਹੋ ਚੁੱਕਾ ਹੈ। ਜਿਵੇਂ ਹੀ ਇਹ ਦੋਵਾਂ ਨੇ ਸੱਤ ਫੇਰੇ ਲਏ, ਵਿਕੀਪੀਡੀਆ ‘ਤੇ ਦੋਵਾਂ ਦਾ ਰਿਸ਼ਤਾ ਵੀ ਅਪਡੇਟ ਹੋ ਗਿਆ।