2026 ਤੱਕ ਟੱਲ ਸਕਦੀ ਹੈ ਰਿਤਿਕ ਦੀ Krrish 4, ਬਜਟ ਬਣਿਆ ਪ੍ਰੇਸ਼ਾਨੀ
Hrithik roshan krrish 4 Movie Delay: ਰਿਤਿਕ ਦੇ ਪ੍ਰਸ਼ੰਸਕਾਂ ਨੂੰ ਰਿਤਿਕ ਰੋਸ਼ਨ ਨੂੰ ਇੱਕ ਵਾਰ ਫਿਰ ਸੁਪਰਹੀਰੋ ਦੇ ਰੂਪ 'ਚ ਦੇਖਣ ਲਈ ਇੰਤਜ਼ਾਰ ਕਰਨਾ ਹੋਵੇਗਾ। ਦੱਸਿਆ ਜਾ ਰਿਹਾ ਹੈ ਕਿ ਫਿਲਮ ਦਾ ਬਜਟ ਜ਼ਿਆਦਾ ਹੋਣ ਕਾਰਨ ਕੋਈ ਵੀ ਇਸ 'ਚ ਪੈਸਾ ਲਗਾਉਣ ਲਈ ਰਾਜ਼ੀ ਨਹੀਂ ਹੋ ਰਿਹਾ ਹੈ।
ਰਿਤਿਕ ਰੋਸ਼ਨ ਦੀ ਸੁਪਰਹੀਰੋ ਫਿਲਮ ‘ਕ੍ਰਿਸ਼’ ਨੂੰ ਲੋਕਾਂ ਦਾ ਕਾਫੀ ਪਿਆਰ ਮਿਲਿਆ ਹੈ। ਲੋਕ ਲੰਬੇ ਸਮੇਂ ਤੋਂ ਇਸ ਫਿਲਮ ਦੀ ਅਗਲੀ ਕਿਸ਼ਤ ਦਾ ਇੰਤਜ਼ਾਰ ਕਰ ਰਹੇ ਸਨ, ਹਾਲਾਂਕਿ ਕ੍ਰਿਸ਼ 4 ਨੂੰ ਬਣਾਉਣ ਦੀ ਚਰਚਾ ਸੀ। ਪਰ, ਹੁਣ ਇਸ ਨਵੇਂ ਪ੍ਰੋਜੈਕਟ ਵਿੱਚ ਹੋਰ ਦੇਰੀ ਹੋਣ ਦੀ ਚਰਚਾ ਹੈ। ਫਿਲਮ ਨੂੰ ਸ਼ੁਰੂ ਹੋਣ ਤੋਂ ਪਹਿਲਾਂ ਹੀ ਕਈ ਵਾਰ ਅੱਗੇ ਵਧਾਇਆ ਜਾ ਚੁੱਕਾ ਹੈ ਪਰ ਹੁਣ ਕਿਹਾ ਜਾ ਰਿਹਾ ਹੈ ਕਿ ਫਿਲਮ ਦਾ ਬਜਟ ਨਵਾਂ ਅੜਿੱਕਾ ਖੜਾ ਕਰ ਰਿਹਾ ਹੈ। ਪਹਿਲਾਂ ਇਹ ਫਿਲਮ 2025 ਵਿੱਚ ਹੀ ਰਿਲੀਜ਼ ਹੋਣੀ ਸੀ।
ਰਿਤਿਕ ਰੋਸ਼ਨ ਦੀ ਫਿਲਮ ‘ਕ੍ਰਿਸ਼ 4’ ਦਾ ਪ੍ਰਸ਼ੰਸਕ ਲੰਬੇ ਸਮੇਂ ਤੋਂ ਇੰਤਜ਼ਾਰ ਕਰ ਰਹੇ ਸਨ ਪਰ ਤਾਜ਼ਾ ਜਾਣਕਾਰੀ ਮੁਤਾਬਕ ਇਸ ਫਿਲਮ ‘ਚ ਹੋਰ ਦੇਰੀ ਹੋ ਸਕਦੀ ਹੈ। ਇਸ ਮਾਮਲੇ ਨਾਲ ਜੁੜੇ ਇੱਕ ਸੂਤਰ ਨੇ ਦੱਸਿਆ ਕਿ ਫਿਲਮ ਨੂੰ ਬਣਾਉਣ ਲਈ 700 ਕਰੋੜ ਰੁਪਏ ਦਾ ਬਜਟ ਤੈਅ ਕੀਤਾ ਗਿਆ ਹੈ। ਹਾਲਾਂਕਿ ਕੋਈ ਵੀ ਸਟੂਡੀਓ ਫਿਲਮ ‘ਚ ਇੰਨਾ ਪੈਸਾ ਲਗਾਉਣ ਦਾ ਰਿਸਕ ਲੈਣ ਨੂੰ ਤਿਆਰ ਨਹੀਂ ਹੈ। ਪਰ, ਅਭਿਨੇਤਾ ਦੇ ਦੋਸਤ ਸਿਧਾਰਥ ਆਨੰਦ ਇਸ ਫਿਲਮ ਨੂੰ ਬਣਾਉਣ ਲਈ ਅੱਗੇ ਆਏ ਸਨ, ਪਰ ਉਨ੍ਹਾਂ ਨੇ ਵੀ ਇਸ ਤੋਂ ਆਪਣਾ ਹੱਥ ਵਾਪਸ ਲੈ ਲਿਆ ਹੈ।
ਸਟੂਡੀਓ ਵਿੱਚ ਹੈ ਝਿਜਕ
ਦੱਸਿਆ ਜਾ ਰਿਹਾ ਹੈ ਕਿ ਸਿਧਾਰਥ ਦਾ ਪ੍ਰੋਡਕਸ਼ਨ ਹਾਊਸ ਮਾਰਫਲਿਕਸ ਇਸ ਸਮੇਂ ਕੁਝ ਵਿੱਤੀ ਸਮੱਸਿਆਵਾਂ ਤੋਂ ਗੁਜ਼ਰ ਰਿਹਾ ਹੈ। ਇਸ ਕਾਰਨ ਉਸ ਨੇ ਕ੍ਰਿਸ 4 ਤੋਂ ਆਪਣਾ ਨਾਂ ਵਾਪਸ ਲੈ ਲਿਆ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਕਈ ਮਸ਼ਹੂਰ ਭਾਰਤੀ ਸਟੂਡੀਓ ਇਸ ਪ੍ਰੋਜੈਕਟ ‘ਚ ਇੰਨੀ ਵੱਡੀ ਰਕਮ ਨਿਵੇਸ਼ ਕਰਨ ਤੋਂ ਝਿਜਕ ਰਹੇ ਹਨ। ਕਿਉਂਕਿ ਕੁਝ ਸਮਾਂ ਪਹਿਲਾਂ ਤੱਕ ਮਾਰਵਲ ਸੁਪਰਹੀਰੋ ਫਿਲਮਾਂ ‘ਚ ਸਿਖਰ ‘ਤੇ ਸੀ, ਜਿਸ ਤੋਂ ਬਾਅਦ ਬਾਕੀ ਸਾਰੀਆਂ ਫਿਲਮਾਂ ‘ਚ ਕਾਫੀ ਗਿਰਾਵਟ ਦੇਖਣ ਨੂੰ ਮਿਲੀ ਹੈ। ਪਰ, ਹੁਣ ਫਿਲਮ ਦੇ ਬਜਟ ਨੂੰ ਸੁਧਾਰਨ ਦੀ ਗੱਲ ਹੋ ਰਹੀ ਹੈ। ਫਿਲਹਾਲ ਫਿਲਮ ਨੂੰ 2026 ਤੱਕ ਵਧਾਏ ਜਾਣ ਦੀ ਸੰਭਾਵਨਾ ਹੈ।
ਨਿਰਦੇਸ਼ਕ ਨੇ ਵੀ ਹੱਥ ਖਿੱਚੇ
ਸੂਤਰ ਮੁਤਾਬਕ ਸਾਲ 2013 ‘ਚ ਰਿਤਿਕ ਦੀ ਫਿਲਮ ‘ਕ੍ਰਿਸ਼ 3’ ਨੂੰ ਆਏ ਕਾਫੀ ਸਮਾਂ ਹੋ ਗਿਆ ਹੈ। ਜਿਸ ਤੋਂ ਬਾਅਦ ਇਸ ਫਿਲਮ ਦੇ ਅਗਲੇ ਹਿੱਸੇ ‘ਤੇ ਇੰਨਾ ਵੱਡਾ ਬਜਟ ਖਰਚ ਕਰਨ ਲਈ ਲੋਕਾਂ ਨੂੰ ਮਨਾਉਣਾ ਮੁਸ਼ਕਲ ਹੋ ਰਿਹਾ ਹੈ। ਹਾਲਾਂਕਿ, ਰਿਤਿਕ ਤੇ ਉਨ੍ਹਾਂ ਦੇ ਪਿਤਾ ਰਾਕੇਸ਼ ਰੋਸ਼ਨ ਇਸ ਫਿਲਮ ਨੂੰ ਲੈ ਕੇ ਕਈ ਸਟੂਡੀਓਜ਼ ਨਾਲ ਨਿੱਜੀ ਤੌਰ ‘ਤੇ ਗੱਲ ਕਰਨ ਦੀ ਯੋਜਨਾ ਬਣਾ ਰਹੇ ਹਨ। ਸਿਧਾਰਥ ਆਨੰਦ ਦੇ ਇਸ ਫਿਲਮ ਤੋਂ ਹਟਣ ਤੋਂ ਬਾਅਦ ਫਿਲਮ ਦੇ ਨਿਰਦੇਸ਼ਕ ਕਰਨ ਮਲਹੋਤਰਾ ਵੀ ਹੁਣ ਇਸ ਦਾ ਹਿੱਸਾ ਨਹੀਂ ਹਨ।
