ਰੀਟੇਲ ਨਿਵੇਸ਼ਕ ਹੀ ਬਾਜ਼ਾਰ ਦੇ ਅਸਲੀ ਹੀਰੋ, SIP ਨੇ ਨਿਵੇਸ਼ ਦੇ ਖੇਤਰ ਵਿੱਚ ਲਿਆਂਦੀ ਕ੍ਰਾਂਤੀ: ਮਨੀ9 ਸਮਿਟ ਵਿੱਚ ਬੋਲੇ ਬਰੁਣ ਦਾਸ

ਰੀਟੇਲ ਨਿਵੇਸ਼ਕ ਬਾਜ਼ਾਰ ਦੇ ਅਸਲੀ ਹੀਰੋ, SIP ਨੇ ਲਿਆਂਦੀ ਨਿਵੇਸ਼ ਕ੍ਰਾਂਤੀ

‘ਮਨੀ9 ਫਾਈਨੈਂਸ਼ੀਅਲ ਫਰੀਡਮ ਸਮਿਟ 2026’ ਦੇ ਸ਼ਾਨਦਾਰ ਆਗਾਜ਼ ਮੌਕੇ ਟੀਵੀ9 ਨੈੱਟਵਰਕ ਦੇ ਐਮ.ਡੀ. ਅਤੇ ਸੀ.ਈ.ਓ. ਬਰੁਣ ਦਾਸ ਨੇ ਸਵਾਗਤੀ ਭਾਸ਼ਣ ਦਿੰਦਿਆਂ ਭਾਰਤੀ ਨਿਵੇਸ਼ਕਾਂ ਅਤੇ ਸੋਨੇ ਦੀ ਵਧਦੀ ਅਹਿਮੀਅਤ ‘ਤੇ ਖ਼ਾਸ ਚਰਚਾ ਕੀਤੀ। ਉਨ੍ਹਾਂ ਨੇ ਪਿਛਲੇ ਕੁਝ ਸਾਲਾਂ ਵਿੱਚ ਸੋਨੇ ਦੀਆਂ ਕੀਮਤਾਂ ਵਿੱਚ ਆਈ ਭਾਰੀ ਤੇਜ਼ੀ ਦਾ ਜ਼ਿਕਰ ਕਰਦਿਆਂ ਕਿਹਾ ਕਿ ਪਿਛਲੇ ਡੇਢ ਸਾਲ ਵਿੱਚ ਸੋਨੇ ਦੇ ਭਾਅ ਲਗਭਗ ਦੁੱਗਣੇ ਹੋ ਗਏ ਹਨ।

ਬਰੁਣ ਦਾਸ ਅਨੁਸਾਰ, ਭਾਰਤੀ ਪਰਿਵਾਰਾਂ ਨੇ ਆਪਣੀ ਪੁਰਖਿਆਂ ਦੀ ਦੌਲਤ (ਸੋਨੇ) ਤੋਂ ਉਨਾ ਹੀ ਮੁਨਾਫ਼ਾ ਕਮਾਇਆ ਹੈ, ਜਿੰਨਾ ਪੂਰੇ ਸਟਾਕ ਮਾਰਕੀਟ ਨੇ ਆਪਣੀ ਬੜ੍ਹਤ ਰਾਹੀਂ ਕਮਾਇਆ ਹੈ। ਉਨ੍ਹਾਂ ਨੇ ਹਾਸੇ-ਮਜ਼ਾਕ ਅਤੇ ਸਤਿਕਾਰ ਨਾਲ ਕਿਹਾ ਕਿ ਅੱਜ ਮਹਿਸੂਸ ਹੁੰਦਾ ਹੈ ਕਿ ਸਾਡੀ ਦਾਦੀ-ਨਾਨੀ ਦੀ ਸਮਝ ਬਿਲਕੁਲ ਸਹੀ ਸੀ, ਕਿਉਂਕਿ ਪੁਰਾਣੀ ਪੀੜ੍ਹੀ ਦਾ ਸੋਨੇ ਵਿੱਚ ਨਿਵੇਸ਼ ਕਰਨ ਦਾ ਫ਼ੈਸਲਾ ਅੱਜ ਸਭ ਤੋਂ ਸਹੀ ਸਾਬਤ ਹੋ ਰਿਹਾ ਹੈ।

ਭਾਰਤੀ ਘਰਾਂ ਵਿੱਚ 27,000 ਟਨ ਸੋਨਾ

ਬਰੁਣ ਦਾਸ ਨੇ ਦੱਸਿਆ ਕਿ ਅੱਜ ਦੇ ਮੁਸ਼ਕਿਲ ਸਮੇਂ ਵਿੱਚ ਸੋਨਾ ਸਭ ਤੋਂ ਵੱਡਾ ਸਹਾਰਾ ਬਣ ਕੇ ਉਭਰਿਆ ਹੈ। ਇੱਕ ਅੰਦਾਜ਼ੇ ਮੁਤਾਬਕ ਭਾਰਤੀ ਘਰਾਂ ਵਿੱਚ ਕਰੀਬ 27,000 ਟਨ ਸੋਨਾ ਮੌਜੂਦ ਹੈ। ਕੀਮਤਾਂ ਵਿੱਚ ਆਏ ਉਛਾਲ ਕਾਰਨ ਭਾਰਤੀ ਪਰਿਵਾਰਾਂ ਦੀ ਕੁੱਲ ਸੰਪਤੀ ਵਿੱਚ ਲਗਭਗ 100 ਲੱਖ ਕਰੋੜ ਰੁਪਏ ਦਾ ਵਾਧਾ ਹੋਇਆ ਹੈ। ਸੋਨੇ ਦੀ ਮਾਲਕੀ ਦੇ ਮਾਮਲੇ ਵਿੱਚ ਭਾਰਤੀ ਪੂਰੀ ਦੁਨੀਆ ਵਿੱਚ ਸਭ ਤੋਂ ਅੱਗੇ ਹਨ ਅਤੇ ਇਹੀ ਸਾਡੀ ਅਸਲ ਆਰਥਿਕ ਮਜ਼ਬੂਤੀ ਦੀ ਨੀਂਹ ਹੈ।

ਰੀਟੇਲ ਨਿਵੇਸ਼ਕ ਹੀ ਬਾਜ਼ਾਰ ਦੇ ਅਸਲੀ ਹੀਰੋ

ਪਿਛਲੇ ਦੋ ਸਾਲਾਂ ਦੇ ਅੰਕੜਿਆਂ ਦਾ ਹਵਾਲਾ ਦਿੰਦਿਆਂ ਉਨ੍ਹਾਂ ਕਿਹਾ ਕਿ ਭਾਰਤੀ ਸ਼ੇਅਰ ਬਾਜ਼ਾਰ ਨੂੰ ਵਿਦੇਸ਼ੀ ਸੰਸਥਾਵਾਂ ਨੇ ਨਹੀਂ, ਸਗੋਂ ਭਾਰਤ ਦੇ ਆਮ ਨਿਵੇਸ਼ਕਾਂ ਨੇ ਸੰਭਾਲਿਆ ਹੈ। ਸਾਲ 2024 ਅਤੇ 2025 ਵਿੱਚ ਜਦੋਂ ਵਿਦੇਸ਼ੀ ਨਿਵੇਸ਼ਕ ਆਪਣਾ ਪੈਸਾ ਕੱਢ ਰਹੇ ਸਨ, ਉਦੋਂ ਆਮ ਭਾਰਤੀਆਂ ਦੇ ਨਿਵੇਸ਼ ਨੇ ਹੀ ਬਾਜ਼ਾਰ ਨੂੰ ਸਥਿਰ ਰੱਖਿਆ। ਬਰੁਣ ਦਾਸ ਨੇ ਕਿਹਾ ਕਿ TV9 ਨੈੱਟਵਰਕ ਨੇ Money9 ਦੀ ਸ਼ੁਰੂਆਤ ਇਸੇ ਮਕਸਦ ਲਈ ਕੀਤੀ ਸੀ ਕਿ ਦੇਸ਼ ਦੇ ਹਰ ਵਿਅਕਤੀ ਨੂੰ ਉਸਦੀ ਆਪਣੀ ਭਾਸ਼ਾ ਵਿੱਚ ਵਿੱਤੀ ਸਾਖਰਤਾ ਮਿਲ ਸਕੇ। ਉਨ੍ਹਾਂ ਕਿਹਾ ਕਿ ਵਿੱਤੀ ਆਜ਼ਾਦੀ ਉਦੋਂ ਮਿਲਦੀ ਹੈ ਜਦੋਂ ਸਾਡਾ ਪੈਸਾ ਸਾਡੇ ਲਈ ਕੰਮ ਕਰਨ ਲੱਗ ਜਾਵੇ।

SIP ਦਾ ਰਿਕਾਰਡ ਤੋੜ ਸਫ਼ਰ ਅਤੇ ਨਿਵੇਸ਼ਕਾਂ ਦੀ ਸਮਝਦਾਰੀ

ਭਾਰਤ ਵਿੱਚ ਨਿਵੇਸ਼ ਦੇ ਬਦਲਦੇ ਰੂਪ ਬਾਰੇ ਗੱਲ ਕਰਦਿਆਂ ਉਨ੍ਹਾਂ ਦੱਸਿਆ ਕਿ ਦਸੰਬਰ 2025 ਅਤੇ ਜਨਵਰੀ 2026 ਦੇ ਵਿਚਕਾਰ, SIP ਰਾਹੀਂ ਹਰ ਮਹੀਨੇ ਆਉਣ ਵਾਲਾ ਨਿਵੇਸ਼ 31,000 ਕਰੋੜ ਰੁਪਏ ਦੇ ਇਤਿਹਾਸਕ ਅੰਕੜੇ ਤੱਕ ਪਹੁੰਚ ਗਿਆ ਹੈ। ਦੇਸ਼ ਵਿੱਚ ਹੁਣ 26 ਕਰੋੜ ਤੋਂ ਵੱਧ SIP ਖਾਤੇ ਹਨ, ਜੋ ਇਹ ਦਰਸਾਉਂਦੇ ਹਨ ਕਿ ਆਮ ਆਦਮੀ ਹੁਣ ਸਿਰਫ਼ ਬੱਚਤ ਨਹੀਂ, ਸਗੋਂ ਨਿਵੇਸ਼ ‘ਤੇ ਭਰੋਸਾ ਕਰ ਰਿਹਾ ਹੈ। ਬਾਜ਼ਾਰ ਦੇ ਉਤਾਰ-ਚੜ੍ਹਾਅ ਦੇ ਬਾਵਜੂਦ, ਇਕੁਇਟੀ SIP ਵਿੱਚ ਲੋਕਾਂ ਦਾ ਵਿਸ਼ਵਾਸ ਅਟੱਲ ਰਿਹਾ ਹੈ।

ਹੁਣ ‘ਮੈਚਿਓਰ’ ਹੋ ਗਿਆ ਹੈ ਭਾਰਤੀ ਨਿਵੇਸ਼ਕ

ਬਰੁਣ ਦਾਸ ਨੇ ਅੰਤ ਵਿੱਚ ਕਿਹਾ ਕਿ ਭਾਰਤੀ ਨਿਵੇਸ਼ਕ ਹੁਣ ਪੂਰੀ ਤਰ੍ਹਾਂ ‘ਮੈਚਿਓਰ’ ਹੋ ਗਏ ਹਨ। ਉਹ ਪ੍ਰਧਾਨ ਮੰਤਰੀ ਮੋਦੀ ਦੇ ਵਿੱਤੀ ਸਮਾਵੇਸ਼ ਮਿਸ਼ਨ ਦਾ ਹਿੱਸਾ ਬਣ ਕੇ ਖੁਦ ਨੂੰ ਆਰਥਿਕ ਤੌਰ ‘ਤੇ ਮਜ਼ਬੂਤ ਕਰ ਰਹੇ ਹਨ। ਅੱਜ ਦਾ ਨਿਵੇਸ਼ਕ ਸਮਝ ਗਿਆ ਹੈ ਕਿ “ਮਿਊਚੁਅਲ ਫੰਡ ਸਹੀ ਹੈ” ਅਤੇ ਭਾਰਤ ਵਰਗੀ ਤੇਜ਼ੀ ਨਾਲ ਵਧ ਰਹੀ ਆਰਥਿਕਤਾ ਵਿੱਚ ਪੈਸਾ ਬਣਾਉਣ ਦਾ ਸਭ ਤੋਂ ਵਧੀਆ ਤਰੀਕਾ SIP ਹੀ ਹੈ। ਉਨ੍ਹਾਂ ਮੁਤਾਬਕ ਹੁਣ ਨਿਵੇਸ਼ਕਾਂ ਨੂੰ ਇਹ ਸਮਝ ਆ ਗਈ ਹੈ ਕਿ ਮਾਰਕੀਟ ਵਿੱਚ ਪੈਸਾ ਲਗਾਉਣ ਦਾ ਸਮਾਂ ਨਹੀਂ, ਸਗੋਂ ਬਾਜ਼ਾਰ ਵਿੱਚ ਬਣੇ ਰਹਿਣਾ ਜ਼ਿਆਦਾ ਮਾਇਨੇ ਰੱਖਦਾ ਹੈ।