ਚਾਹੇ ਮੂੰਹ ‘ਚ ਦੰਦ ਨਾ ਰਹਿੰਦੇ ਤਾਂ ਵੀ ਪਾਕਿਸਤਾਨ ਆਉਂਦੀ… ਸਰਬਜੀਤ ਕੌਰ ਨੇ ਕੀਤਾ ਸੱਚੇ ਪਿਆਰ ਦਾ ਇਜ਼ਹਾਰ, ਸ਼ੈਲਟਰ ਹੋਮ ਤੋਂ ਹੋਈ ਹੈ ਰਿਹਾਅ

ਸਰਬਜੀਤ ਕੌਰ (Pic: Social Media)

ਭਾਰਤੀ ਸਿੱਖ ਜੱਥੇ ਦੀ ਆੜ ‘ਚ ਪਾਕਿਸਤਾਨ ਜਾ ਕੇ ਫ਼ਰਾਰ ਹੋਣ ਵਾਲੀ ਸਰਬਜੀਤ ਕੌਰ ਨੂੰ ਸ਼ੈਲਟਰ ਹੋਮ ਤੋਂ ਰਿਹਾਅ ਕਰ ਦਿੱਤਾ ਗਿਆ ਹੈ। ਇਸ ਤੋਂ ਬਾਅਦ ਉਹ ਪਾਕਿਸਤਾਨ ‘ਚ ਆਪਣੇ ਸ਼ੌਹਰ (ਪਤੀ) ਦੇ ਘਰ ਚਲੀ ਗਈ ਹੈ। ਹੁਣ ਉਸ ਦਾ ਇੱਕ ਨਵਾਂ ਵੀਡੀਓ ਸਾਹਮਣੇ ਆਇਆ ਹੈ। ਇਸ ਮਾਮਲੇ ‘ਚ ਪਾਕਿਸਤਾਨੀ ਅਧਿਕਾਰੀਆਂ ਅਨੁਸਾਰ ਸਰਬਜੀਤ ਦੀ ਰਿਹਾਈ ਦਾ ਫੈਸਲਾ ਕਾਨੂਨੀ ਤੇ ਮਨੁੱਖਤਾ ਦੇ ਪਹਿਲੂ ‘ਦੇ ਆਧਾਰ ਨੂੰ ਮੁੱਖ ਰੱਖਦੇ ਹੋਏ ਲਿਆ ਗਿਆ ਹੈ।

‘ਮੂੰਹ ‘ਚ ਦੰਦ ਨਾ ਰਹਿੰਦੇ ਤਾਂ ਵੀ ਇੱਥੇ ਆਉਂਦੀ’

ਸ਼ੈਲਟਰ ਹੋਮ ਤੋਂ ਰਿਹਾਅ ਹੋਣ ਤੋਂ ਬਾਅਦ ਸਰਬਜੀਤ ਕੌਰ ਦੀ ਖੁਸ਼ੀ ਦਾ ਠਿਕਾਣਾ ਨਹੀਂ ਹੈ। ਉਸ ਦੀ ਇੱਕ ਵੀਡੀਓ ਸਾਹਮਣੇ ਆਈ ਹੈ। ਉਸ ਦਾ ਕਹਿਣਾ ਹੈ ਕਿ ਜੇਕਰ ਅਸੀਂ ਸੱਚਾ ਪਿਆਰ ਕਰਦੇ ਹਾਂ ਤਾਂ ਫਿਰ ਸਾਨੂੰ ਯਕੀਨ ਹੁੰਦਾ ਹੈ ਕਿ ਅਸੀਂ ਮਿਲਾਂਗੇ। ਕਦੇ ਨਾਲ ਕਦੇ ਮਿਲਾਂਗੇ… 8 ਸਾਲ ਹੋ ਗਏ ਸਾਨੂੰ ਪਿਆਰ ਕਰਦਿਆਂ ਨੂੰ ਤੇ ਜੇਕਰ ਮੇਰੇ ਮੂੰਹ ‘ਚ ਦੰਦ ਨਹੀਂ ਵੀ ਰਹਿੰਦੇ ਤਾਂ ਵੀ ਮੈਂ ਇੱਥੇ (ਪਾਕਿਸਤਾਨ) ਆਉਣਾ ਸੀ। ਉਸ ਨੇ ਕਿਹਾ ਕਿ ਮੈਂ ਆਉਣ ਵਾਲ ਟਾਈਮ ਪਾਕਿਸਤਾਨ ‘ਚ ਹੱਸਦੀ ਤੇ ਖੁਸ਼ੀ ਨਾਲ ਬਿਤਾਵਾਂਗੀ।

ਕੀ ਹੈ ਪੂਰਾ ਮਾਮਲਾ?

ਪਿੰਡ ਅਮਾਨੀਪੁਰ, ਕਪੂਰਥਲਾ ਦੀ ਰਹਿਣ ਵਾਲੀ ਸਰਬਜੀਤ ਕੌਰ 4 ਨਵੰਬਰ, 2025 ਨੂੰ ਸਿੱਖ ਸ਼ਰਧਾਲੂਆਂ ਦੇ ਜੱਥੇ ਨਾਲ ਸ੍ਰੀ ਗੁਰੂ ਨਾਨਕ ਦੇਵ ਜੀ ਦੇ ਪ੍ਰਕਾਸ਼ ਪੁਰਬ ਮੌਕੇ ਪਾਕਿਸਤਾਨ ਗਈ ਸੀ। ਇਹ ਸਿੱਖ ਜੱਥਾ ਦੱਸ ਦਿਨਾਂ ਲਈ ਪਾਕਿਸਤਾਨ ਰੁਕਿਆ ਸੀ। ਸਿੱਖ ਜੱਥਾ ਪਾਕਿਸਤਾਨ ‘ਚ ਵੱਖ-ਵੱਖ ਗੁਰਦੁਆਰਾ ਸਾਹਿਬ ਦੇ ਦਰਸ਼ਨ ਕਰਨ ਤੋਂ ਬਾਅਦ 13 ਨਵੰਬਰ ਨੂੰ ਪਰਤ ਆਇਆ ਸੀ। ਪਰ ਇਸ ਦੌਰਾਨ ਜੱਥੇ ਦਾ ਇੱਕ ਮੈਂਬਰ ਪਰਤਿਆ ਨਹੀਂ ਸੀ। ਇਹ ਹੋਰ ਕੋਈ ਨਹੀਂ ਸਗੋਂ ਸਰਬਜੀਤ ਕੌਰ ਸੀ।

ਸਰਬਜੀਤ ਤੋਂ ਬਣੀ ਨੂਰ ਫਾਤਿਮਾ

ਇਸ ਤੋਂ ਬਾਅਦ ਇਹ ਖ਼ਬਰ ਸਾਹਮਣੇ ਆਈ ਕਿ ਸਰਬਜੀਤ ਕੌਰ ਨੇ ਇਸਲਾਮ ਧਰਮ ਅਪਣਾ ਲਿਆ ਹੈ ਤੇ ਆਪਣਾ ਨਾਮ ਨੂਰ ਫਾਤਿਮਾ ਰੱਖ ਲਿਆ ਹੈ। ਇਸ ਦੇ ਨਾਲ ਹੀ ਉਸ ਨੇ ਸ਼ੇਖਪੁਰਾ ਦੇ ਨੂਰ ਹੁਸੈਨ ਨਾਲ ਨਿਕਾਹ (ਵਿਆਹ) ਕਰਵਾ ਲਿਆ ਹੈ। ਇਸ ਮਾਮਲੇ ‘ਚ ਸੋਸ਼ਲ ਮੀਡੀਆ ‘ਤੇ ਉਸ ਦੇ ਨਿਕਾਹ ਦੇ ਦਸਤਾਵੇਜ਼ ਤੇ ਇਸਲਾਮ ਧਰਮ ਕਬੂਲ ਕਰਨ ਦੀ ਵੀਡੀਓ ਵਾਇਰਲ ਹੋਈ ਸੀ।

ਪਾਕਿਸਤਾਨ ਤੋਂ ਕੱਢਣ ਦੀ ਮੰਗ

ਇਸ ਤੋਂ ਬਾਅਦ ਪਾਕਿਸਤਾਨ ਦੇ ਵੱਖ-ਵੱਖ ਕਾਨੂਨੀ ਅਦਾਰਿਆਂ ‘ਚ ਵੀ ਇਸ ਮਾਮਲੇ ਨੂੰ ਲੈ ਕੇ ਸੁਣਵਾਈ ਹੋਈ। ਕਈ ਲੋਕਾਂ ਵੱਲੋਂ ਮੰਗ ਕੀਤੀ ਗਈ ਕਿ ਸਰਬਜੀਤ ਕੌਰ ਨੂੰ ਪਾਕਿਸਤਾਨ ਤੋਂ ਬਾਹਰ ਕੱਢਿਆ ਜਾਵੇ, ਕਿਉਂਕਿ ਉਹ ਗੈਰ-ਕਾਨੂੰਨੀ ਤੌਰ ‘ਤੇ ਪਾਕਿਸਤਾਨ ਰਹਿ ਰਹੀ ਸੀ।

ਹਾਲਾਂਕਿ, ਇਸ ਤੋਂ ਬਾਅਦ ਉਸ ਨੂੰ ਸ਼ੈਲਟਰ ਹੋਮ ‘ਚ ਭੇਜ ਦਿੱਤਾ ਗਿਆ ਸੀ। ਇਸ ਵਿਚਕਾਰ ਇਹ ਵੀ ਖ਼ਬਰ ਆਈ ਕਿ ਸਰਬਜੀਤ ਕੌਰ ਭਾਰਤ ਆਉਣਾ ਚਾਹੁੰਦੀ ਹੈ। ਪਰ, ਹੁਣ ਸਰਬਜੀਤ ਕੌਰ ਸ਼ੈਲਟਰ ਹੋਮ ਤੋਂ ਬਾਹਰ ਆਈ ਹੈ ਤਾਂ ਉਸ ਦਾ ਇਹ ਵੀਡੀਓ ਦੱਸ ਰਿਹਾ ਹੈ ਕਿ ਉਹ ਪਾਕਿਸਤਾਨ ‘ਚ ਹੀ ਖੁਸ਼ ਹੈ ਤੇ ਉੱਥੇ ਹੀ ਰਹਿਣਾ ਚਾਹੁੰਦੀ ਹੈ।