Imran Khan: ਇਮਰਾਨ ਖਾਨ ਦੀ ਮਦਦ ਲਈ ਅੱਗੇ ਆਏ ਕਪਿਲ ਦੇਵ ਅਤੇ ਸੁਨੀਲ ਗਾਵਸਕਰ, ਪਾਕਿਸਤਾਨੀ ਸਰਕਾਰ ਤੋਂ ਅੱਗੇ ਰੱਖੀਆਂ ਇਹ 3 ਮੰਗਾਂ
Imran Khan Health Update: ਪਾਕਿਸਤਾਨ ਦੇ ਸਾਬਕਾ ਪ੍ਰਧਾਨ ਮੰਤਰੀ ਇਮਰਾਨ ਖਾਨ ਦੀ ਮਦਦ ਲਈ 14 ਸਾਬਕਾ ਕਪਤਾਨ ਅੱਗੇ ਆਏ ਹਨ। ਇਸ ਵਿੱਚ ਕਪਿਲ ਦੇਵ ਅਤੇ ਸੁਨੀਲ ਗਾਵਸਕਰ ਵਰਗੇ ਮਹਾਨ ਖਿਡਾਰੀ ਵੀ ਸ਼ਾਮਲ ਹਨ। ਇਮਰਾਨ ਖਾਨ ਇਸ ਸਮੇਂ ਜੇਲ੍ਹ ਵਿੱਚ ਹਨ ਅਤੇ ਉਨ੍ਹਾਂ ਦੀ ਸਿਹਤ ਕਾਫੀ ਜਿਆਦਾ ਖਰਾਬ ਹੈ।
ਇਮਰਾਨ ਖਾਨ
1992 ਦੇ ਵਿਸ਼ਵ ਕੱਪ ਵਿੱਚ ਪਾਕਿਸਤਾਨ ਨੂੰ ਜਿੱਤ ਦਿਵਾਉਣ ਵਾਲੇ ਸਾਬਕਾ ਕਪਤਾਨ ਇਮਰਾਨ ਖਾਨ ਇਸ ਸਮੇਂ ਜੇਲ੍ਹ ਵਿੱਚ ਬੰਦ ਹਨ। ਇਸ ਮਹਾਨ ਕਪਤਾਨ ਨੇ ਨਾ ਸਿਰਫ਼ ਪਾਕਿਸਤਾਨ ਦੀ ਕਪਤਾਨੀ ਕੀਤੀ ਬਲਕਿ ਪ੍ਰਧਾਨ ਮੰਤਰੀ ਵਜੋਂ ਵੀ ਸੇਵਾ ਨਿਭਾਈ, ਪਰ ਮੌਜੂਦਾ ਪਾਕਿਸਤਾਨੀ ਸਰਕਾਰ ਨੇ ਉਨ੍ਹਾਂ ਨੂੰ ਕੈਦ ਕਰ ਕੀਤਾ ਹੋਇਆ ਹੈ। ਇਮਰਾਨ ਖਾਨ 2023 ਤੋਂ ਜੇਲ੍ਹ ਵਿੱਚ ਹਨ। ਉਨ੍ਹਾਂ ਨੂੰ ਲਾਹੌਰ ਵਿੱਚ ਗ੍ਰਿਫ਼ਤਾਰ ਕੀਤਾ ਗਿਆ ਸੀ ਅਤੇ ਹੁਣ ਰਾਵਲਪਿੰਡੀ ਦੀ ਅਦਿਆਲਾ ਜੇਲ੍ਹ ਵਿੱਚ ਕੈਦ ਹਨ। ਰਿਪੋਰਟਾਂ ਅਨੁਸਾਰ, ਇਮਰਾਨ ਦੀ ਹਾਲਤ ਬਹੁਤ ਮਾੜੀ ਹੈ, ਅਤੇ ਹੁਣ 14 ਸਾਬਕਾ ਕਪਤਾਨਾਂ ਨੇ ਉਨ੍ਹਾਂ ਦੀ ਮਦਦ ਲਈ ਆਵਾਜ਼ ਉਠਾਈ ਹੈ। ਇਨ੍ਹਾਂ ਮਹਾਨ ਖਿਡਾਰੀਆਂ ਵਿੱਚ ਕਪਿਲ ਦੇਵ ਅਤੇ ਸੁਨੀਲ ਗਾਵਸਕਰ ਵੀ ਸ਼ਾਮਲ ਹਨ। ਸਾਬਕਾ ਕਪਤਾਨਾਂ ਨੇ ਪਾਕਿਸਤਾਨੀ ਸਰਕਾਰ ਨੂੰ ਈਮੇਲ ਲਿਖ ਕੇ ਜੇਲ੍ਹ ਵਿੱਚ ਇਮਰਾਨ ਦੀ ਹਾਲਤ ਬਾਰੇ ਆਪਣੀ ਡੂੰਘੀ ਚਿੰਤਾ ਪ੍ਰਗਟ ਕੀਤੀ ਹੈ। ਸਾਬਕਾ ਕ੍ਰਿਕਟਰਾਂ ਨੇ ਪਾਕਿਸਤਾਨੀ ਸਰਕਾਰ ਨੂੰ ਅਪੀਲ ਕਰਦਿਆਂ ਮੰਗ ਕੀਤੀ ਕਿ ਇਮਰਾਨ ਖਾਨ ਨਾਲ ਜੇਲ੍ਹ ਵਿੱਚ ਮਨੁੱਖੀ ਵਿਵਹਾਰ ਕੀਤਾ ਜਾਵੇ।
ਸਾਬਕਾ ਕਪਤਾਨਾਂ ਨੇ ਈਮੇਲ ਵਿੱਚ ਕੀ ਲਿਖਿਆ?
ਪਾਕਿਸਤਾਨੀ ਸਰਕਾਰ ਨੂੰ ਭੇਜੇ ਗਏ ਇੱਕ ਈਮੇਲ ਵਿੱਚ, ਸਾਬਕਾ ਕਪਤਾਨਾਂ ਨੇ ਉਨ੍ਹਾਂ ਨੂੰ ਯਾਦ ਦਿਵਾਇਆ ਕਿ ਇਮਰਾਨ ਖਾਨ ਨਾ ਸਿਰਫ਼ ਪਾਕਿਸਤਾਨ ਵਿੱਚ ਸਗੋਂ ਵਿਸ਼ਵ ਕ੍ਰਿਕਟ ਦੇ ਵੀ ਮਹਾਨ ਖਿਡਾਰੀਆਂ ਵਿੱਚੋਂ ਇੱਕ ਹਨ। ਸਾਬਕਾ ਕਪਤਾਨਾਂ ਨੇ ਲਿਖਿਆ ਕਿ ਇਮਰਾਨ ਖਾਨ ਦੀ ਕਪਤਾਨੀ ਵਿੱਚ, ਪਾਕਿਸਤਾਨ 1992 ਵਿੱਚ ਵਿਸ਼ਵ ਚੈਂਪੀਅਨ ਬਣਿਆ ਸੀ, ਅਤੇ ਉਨ੍ਹਾਂ ਨੇ ਪਾਕਿਸਤਾਨੀ ਕ੍ਰਿਕਟ ਦੀ ਤਰੱਕੀ ਵਿੱਚ ਮਹੱਤਵਪੂਰਨ ਯੋਗਦਾਨ ਪਾਇਆ ਸੀ। ਪਰ, ਹੁਣ ਉਹ ਕੈਦ ਵਿੱਚ ਹਨ ਅਤੇ ਉਨ੍ਹਾਂ ਦੀ ਸਿਹਤ ਕਾਫ਼ੀ ਵਿਗੜ ਰਹੀ ਹੈ। ਇਮਰਾਨ ਖਾਨ ‘ਤੇ ਕਈ ਘੁਟਾਲਿਆਂ ਦਾ ਆਰੋਪ ਹੈ ਅਤੇ ਉਹ ਲਗਭਗ 1,000 ਦਿਨਾਂ ਤੋਂ ਜੇਲ੍ਹ ਵਿੱਚ ਹੈ।
Remarkable — legends like Kapil Dev and Sunil Gavaskar, among 14 former international captains, have urged the Pakistan government to ensure fair medical treatment, dignified detention, and a fair trial for Imran Khan. pic.twitter.com/OKdO9VQflW
— Adeel Raja (@adeelraja) February 17, 2026
ਇਮਰਾਨ ਖਾਨ ਲਈ ਸਾਬਕਾ ਕਪਤਾਨਾਂ ਦੀਆਂ 3 ਮੰਗਾਂ
ਸੁਨੀਲ ਗਾਵਸਕਰ ਅਤੇ ਕਪਿਲ ਦੇਵ ਸਮੇਤ ਕੁੱਲ 14 ਸਾਬਕਾ ਕਪਤਾਨਾਂ ਨੇ ਇਮਰਾਨ ਖਾਨ ਲਈ ਤਿੰਨ ਵੱਡੀਆਂ ਮੰਗਾਂ ਕੀਤੀਆਂ ਹਨ।
ਪਹਿਲੀ ਮੰਗ: ਇਮਰਾਨ ਖਾਨ ਨੂੰ ਤੁਰੰਤ ਚੰਗਾ ਡਾਕਟਰੀ ਇਲਾਜ ਮੁਹੱਈਆ ਕਰਵਾਇਆ ਜਾਵੇ। ਉਨ੍ਹਾਂਨੂੰ ਉਨ੍ਹਾਂ ਦੀ ਪਸੰਦ ਦੇ ਮਾਹਰ ਡਾਕਟਰ ਮੁਹੱਈਆ ਕਰਵਾਏ ਜਾਣ।
ਇਹ ਵੀ ਪੜ੍ਹੋ
ਦੂਜੀ ਮੰਗ: ਇਮਰਾਨ ਖਾਨ ਨੂੰ ਅੰਤਰਰਾਸ਼ਟਰੀ ਮਾਪਦੰਡਾਂ ਦੇ ਅਨੁਸਾਰ ਮਨੁੱਖੀ ਅਤੇ ਸਨਮਾਨਜਨਕ ਕੈਦ ਦਿੱਤੀ ਜਾਵੇ। ਉਨ੍ਹਾਂਨੂੰ ਪਰਿਵਾਰਕ ਮੈਂਬਰਾਂ ਅਤੇ ਦੋਸਤਾਂ ਨਾਲ ਮਿਲਣ ਦੀ ਆਗਿਆ ਦਿੱਤੀ ਜਾਵੇ।
ਤੀਜੀ ਮੰਗ: ਇਮਰਾਨ ਖਾਨ ਨੂੰ ਆਪਣੀ ਕਾਨੂੰਨੀ ਲੜਾਈ ਨਿਰਪੱਖ ਅਤੇ ਪਾਰਦਰਸ਼ੀ ਢੰਗ ਨਾਲ ਲੜਨ ਦਾ ਮੌਕਾ ਦਿੱਤਾ ਜਾਵੇ।
ਕਪਿਲ ਅਤੇ ਸੁਨੀਲ ਗਾਵਸਕਰ ਤੋਂ ਇਲਾਵਾ, ਮਾਈਕਲ ਐਥਰਟਨ, ਐਲਨ ਬਾਰਡਰ, ਮਾਈਕਲ ਬੇਅਰਲੀ, ਗ੍ਰੇਗ ਚੈਪਲ, ਇਆਨ ਚੈਪਲ, ਬੇਲਿੰਡਾ ਕਲਾਰਕ, ਕਿਮ ਹਿਊਜ, ਨਾਸਿਰ ਹੁਸੈਨ, ਕਲਾਈਵ ਲੋਇਡ ਅਤੇ ਸਟੀਵ ਵਾ ਵੀ ਇਮਰਾਨ ਖਾਨ ਦੀ ਮਦਦ ਲਈ ਅੱਗੇ ਆਏ ਹਨ।