AI Impact Summit 2026: ਦਿੱਲੀ ‘ਚ ਹੋਣ ਜਾ ਰਿਹਾ ਇਤਿਹਾਸਕ AI ਸਮਿਟ, ਦੁਨੀਆ ਦੇ ਵੱਡੇ ਟੇਕ ਲੀਡਰ ਹੋਣਗੇ ਇਕੱਠੇ

Image Credit source: Chatgpt AI Photo

ਦੇਸ਼ ਦੀ ਰਾਜਧਾਨੀ ਨਵੀਂ ਦਿੱਲੀ ਵਿੱਚ AI Impact Summit 2026 ਦਾ ਆਯੋਜਨ ਕੀਤਾ ਜਾ ਰਿਹਾ ਹੈ। ਸਰਕਾਰੀ ਜਾਣਕਾਰੀ ਮੁਤਾਬਕ ਇਹ ਗਲੋਬਲ ਸਾਊਥ ਖੇਤਰ ਵਿੱਚ ਹੋਣ ਵਾਲਾ ਪਹਿਲਾ ਵਿਸ਼ਵ ਪੱਧਰੀ AI ਸਮਿਟ ਹੋਵੇਗਾ। ਇਹ ਮਹੱਤਵਪੂਰਨ ਸਮਾਗਮ 16 ਫ਼ਰਵਰੀ ਤੋਂ 20 ਫ਼ਰਵਰੀ ਤੱਕ ਨਵੀਂ ਦਿੱਲੀ ਦੇ ਭਾਰਤ ਮੰਡਪਮ ਵਿੱਚ ਆਯੋਜਿਤ ਕੀਤਾ ਜਾਵੇਗਾ।

ਸਮਿਟ ਦੌਰਾਨ ਆਰਟੀਫ਼ੀਸ਼ਲ ਇੰਟੈਲੀਜੈਂਸ ਨਾਲ ਜੁੜੀਆਂ ਨੀਤੀਆਂ, ਰਿਸਰਚ, ਉਦਯੋਗ ਅਤੇ ਜਨ-ਭਾਗੀਦਾਰੀ ਵਰਗੇ ਮਹੱਤਵਪੂਰਨ ਵਿਸ਼ਿਆਂ ਤੇ ਵਿਸਥਾਰ ਨਾਲ ਚਰਚਾ ਕੀਤੀ ਜਾਵੇਗੀ। ਇਸ ਇਵੈਂਟ ਵਿੱਚ ਦੇਸ਼-ਵਿਦੇਸ਼ ਤੋਂ AI ਅਤੇ ਟੈਕਨਾਲੋਜੀ ਜਗਤ ਦੀਆਂ ਕਈ ਪ੍ਰਮੁੱਖ ਹਸਤੀਆਂ ਦੀ ਹਾਜ਼ਰੀ ਰਹੇਗੀ। ਆਓ ਜਾਣਦੇ ਹਾਂ ਕਿ ਇਸ ਸਮਿਟ ਵਿੱਚ ਕਿਹੜੇ-ਕਿਹੜੇ ਵੱਡੇ ਟੈਕ ਲੀਡਰ ਸ਼ਿਰਕਤ ਕਰਨਗੇ।

AI Impact Summit ਵਿੱਚ ਕੌਣ-ਕੌਣ ਹੋਵੇਗਾ ਸ਼ਾਮਲ?

ਭਾਰਤ ਵਿੱਚ ਹੋ ਰਹੇ ਇਸ AI Impact Summit ਵਿੱਚ ਦੁਨੀਆ ਦੀਆਂ ਲਗਭਗ ਸਾਰੀਆਂ ਪ੍ਰਮੁੱਖ AI ਕੰਪਨੀਆਂ ਦੇ ਸੀਈਓਜ਼ ਦੀ ਹਾਜ਼ਰੀ ਰਹੇਗੀ। ਅਲਫਾਬੇਟ ਦੇ ਸੀਈਓ ਸੁੰਦਰ ਪਿਚਾਈ, OpenAI ਦੇ ਸੀਈਓ ਸੈਮ ਆਲਟਮੈਨ, ਗੂਗਲ ਡੀਪਮਾਈਂਡ ਦੇ ਸੀਈਓ ਡੈਮਿਸ ਹਸਾਬਿਸ, ਐਂਥਰੋਪਿਕ ਦੇ ਸੀਈਓ ਡਾਰਿਓ ਅਮੋਡੇਈ ਅਤੇ ਮਿਸਟਰਲ AI ਦੇ ਸੀਈਓ ਆਰਥਰ ਮੈਨਸ਼ ਇਸ ਸਮਿਟ ਦਾ ਹਿੱਸਾ ਬਣਣਗੇ।

ਇਸ ਤੋਂ ਇਲਾਵਾ, Nvidia ਦੇ ਸੀਈਓ ਜੈਨਸਨ ਹੁਆਂਗ ਦੀ ਭਾਗੀਦਾਰੀ ਦੀ ਵੀ ਪੁਸ਼ਟੀ ਹੋ ਚੁੱਕੀ ਹੈ। ਟੈਕਨਾਲੋਜੀ ਖੇਤਰ ਦੀਆਂ ਹੋਰ ਮਸ਼ਹੂਰ ਹਸਤੀਆਂ ਵਿੱਚ ਮਾਈਕਰੋਸਾਫਟ ਦੇ ਸੰਸਥਾਪਕ ਬਿਲ ਗੇਟਸ, ਮਾਈਕਰੋਸਾਫਟ ਦੇ ਪ੍ਰੈਜ਼ੀਡੈਂਟ ਬ੍ਰੈਡ ਸਮਿਥ, ਐਡੋਬ ਦੇ ਸੀਈਓ ਸ਼ਾਂਤਨੂ ਨਾਰਾਇਣ, ਐਕਸੇਂਚਰ ਦੀ ਸੀਈਓ ਜੂਲੀ ਸਵੀਟ, ਕਵਾਲਕਾਮ ਦੇ ਸੀਈਓ ਕ੍ਰਿਸਟਿਆਨੋ ਐਮੋਨ ਅਤੇ ਪਾਲੋ ਆਲਟੋ ਨੈਟਵਰਕਸ ਦੇ ਸੀਈਓ ਨਿਕੇਸ਼ ਅਰੋੜਾ ਵੀ ਸ਼ਾਮਲ ਹੋਣਗੇ।

ਮੈਟਾ ਦੇ ਪੂਰਵ ਚੀਫ਼ ਸਾਇੰਟਿਸਟ ਅਤੇ AMI ਲੈਬਜ਼ ਦੇ ਸੰਸਥਾਪਕ ਯਾਨ ਲੇਕੂਨ ਵੀ ਇਸ ਸਮਿਟ ਵਿੱਚ ਹਿੱਸਾ ਲੈਣਗੇ। ਇਸ ਤੋਂ ਇਲਾਵਾ, AI ਦੇ ਗਾਡਫਾਦਰ ਦੇ ਤੌਰ ਤੇ ਮੰਨੇ ਜਾਣ ਵਾਲੇ ਯੋਸ਼ੂਆ ਬੈਂਜਿਓ ਦੀ ਭਾਗੀਦਾਰੀ ਦੀ ਵੀ ਪੁਸ਼ਟੀ ਹੋ ਚੁੱਕੀ ਹੈ। ਜੇਕਰ ਭਾਰਤ ਦੇ ਪ੍ਰਮੁੱਖ ਉਦਯੋਗਪਤੀਆਂ ਦੀ ਗੱਲ ਕਰੀਏ ਤਾਂ ਰਿਲਾਇੰਸ ਇੰਡਸਟ੍ਰੀਜ਼ ਦੇ ਚੇਅਰਮੈਨ ਮੁਕੇਸ਼ ਅੰਬਾਨੀ ਅਤੇ ਟਾਟਾ ਸੰਸ ਦੇ ਚੇਅਰਮੈਨ ਨਟਰਾਜਨ ਚੰਦਰਸ਼ੇਕਰਨ ਵੀ ਇਸ ਇਵੈਂਟ ਵਿੱਚ ਹਾਜ਼ਰ ਰਹਿਣਗੇ।

ਇਸ ਦੇ ਨਾਲ ਹੀ ਇੰਫੋਸਿਸ ਦੇ ਕੋ-ਫਾਊਂਡਰ ਅਤੇ ਚੇਅਰਮੈਨ ਨੰਦਨ ਨੀਲੇਕਣੀ, ਭਾਰਤੀ ਐਂਟਰਪ੍ਰਾਈਜ਼ਜ਼ ਦੇ ਚੇਅਰਮੈਨ ਸੁਨੀਲ ਭਾਰਤੀ ਮਿੱਤਲ, ਟੀਸੀਐਸ ਦੇ ਸੀਈਓ ਕੇ. ਕ੍ਰਿਤਿਵਾਸਨ, ਇੰਫੋਸਿਸ ਦੇ ਸੀਈਓ ਸਲਿਲ ਪਾਰੇਖ ਅਤੇ HCLTech ਦੀ ਚੇਅਰਪਰਸਨ ਰੋਸ਼ਨੀ ਨਾਦਰ ਮਲਹੋਤਰਾ ਵੀ ਇਸ ਮਹੱਤਵਪੂਰਨ AI Impact Summit 2026 ਵਿੱਚ ਸ਼ਿਰਕਤ ਕਰਨਗੇ।