ਪੰਜਾਬ: ਸੱਤਾ ਦਾ ਸੈਮੀਫਾਈਨਲ ਨਗਰ ਨਿਗਮ ਚੋਣਾਂ, ਸ਼ਹਿਰੀ ਵੋਟਰ ਵਧਾਏਗਾ ਪਾਰਟੀਆਂ ਦੀ ਮਨੋਬਲ

ਪੰਜਾਬ: ਸੱਤਾ ਦਾ ਸੈਮੀਫਾਈਨਲ ਨਗਰ ਨਿਗਮ ਚੋਣਾਂ, ਸ਼ਹਿਰੀ ਵੋਟਰ ਵਧਾਏਗਾ ਪਾਰਟੀਆਂ ਦੀ ਮਨੋਬਲ

ਪੰਜਾਬ ‘ਚ 26 ਮਈ ਨੂੰ ਹੋਣ ਵਾਲੀਆਂ ਨਗਰ ਨਿਗਮ ਚੋਣਾਂ ਨੂੰ ਅਗਲੇ ਸਾਲ ਹੋਣ ਵਾਲੀਆਂ ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ ਇੱਕ ਮਹੱਤਵਪੂਰਨ ਰਾਜਨੀਤਿਕ ਪ੍ਰੀਖਿਆ ਵਜੋਂ ਦੇਖਿਆ ਜਾ ਰਿਹਾ ਹੈ। ਇਹ ਚੋਣਾਂ ਸੂਬੇ ‘ਚ ਸਾਰੀਆਂ ਪ੍ਰਮੁੱਖ ਪਾਰਟੀਆਂ ਲਈ ਸੈਮੀਫਾਈਨਲ ਤੋਂ ਘੱਟ ਨਹੀਂ। ਇਸ ਨਾਲ ਸ਼ਹਿਰੀ ਵੋਟ ਬੈਂਕ ਦਾ ਝੁਕਾਅ ਕਿਸ ਪਾਸੇ ਹੈ? ਘੱਟੋ-ਘੱਟ ਇਸ ਬਾਰੇ ਜ਼ਰੂਰ ਪਤਾ ਚੱਲ ਜਾਵੇਗਾ। ਹਾਲਾਂਕਿ, ਪੰਜਾਬ ‘ਚ ਵਿਧਾਨ ਸਭਾ ਚੋਣਾਂ 2027 ‘ਚ ਹੋਣੀਆਂ ਹਨ, ਪਰ ਇਸ ਤੋਂ ਪਹਿਲਾਂ ਇਨ੍ਹਾਂ ਚੋਣਾਂ ਰਾਹੀਂ ਪ੍ਰਮੁੱਖ ਪਾਰਟੀਆਂ ਆਪਣਾ ਸ਼ਹਿਰੀ ਵੋਟ ਬੈਂਕ ਤਿਆਰ ਕਰਨ ‘ਚ ਲੱਗ ਗਈਆਂ ਹਨ।

ਬਟਾਲਾ, ਪਠਾਨਕੋਟ, ਕਪੂਰਥਲਾ, ਐਸਏਐਸ ਨਗਰ, ਬਠਿੰਡਾ, ਅਬੋਹਰ, ਮੋਗਾ ਤੇ ਬਰਨਾਲਾ ਨਗਰ ਨਿਗਮ ਦੀਆਂ ਇਹ ਚੋਣਾਂ ਵਿਧਾਨ ਸਭਾ ਦੀਆਂ ਸੀਟਾਂ ਨੂੰ ਵੀ ਪ੍ਰਭਾਵਿਤ ਕਰਨਗੀਆਂ। 8 ਨਗਰ ਨਿਗਮ, 76 ਨਗਰ ਕੌਂਸਲ ਤੇ 21 ਨਗਰ ਪੰਚਾਇਤ ਦੀਆਂ ਇਹ ਚੋਣਾਂ ਕੁੱਲ 36,72,932 ਵੋਟਾਂ ਨੂੰ ਕਵਰ ਕਰਨਗੀਆਂ, ਜਿਨ੍ਹਾਂ ‘ਚੋਂ 18,98,990 ਪੁਰਸ਼ ਵੋਟਰ ਕੇ 17,73,716 ਮਹਿਲਾ ਵੋਟਰਸ ਹਿੱਸਾ ਲੈਣਗੀਆਂ। ਕਰੀਬ, 37 ਲੱਖ ਕੁੱਲ ਵੋਟਰ ਜਦੋਂ ਇਸ ਚੋਣ ‘ਚ ਵੋਟ ਭੁਗਤਾਉਣਗੇ ਤਾਂ ਇਹ ਵੋਟ ਬੈਂਕ ਸਾਰੀਆਂ ਪ੍ਰਮੁੱਖ ਪਾਰਟੀਆਂ ਲਈ ਰਾਜਨੀਤਿਕ ਤੌਰ ‘ਤੇ ਮਹੱਤਵਪੂਰਨ ਬਣੇਗਾ।

ਚੋਣਾਂ ਦੀ ਨਾਮਜ਼ਦਗੀ ਪ੍ਰਕਿਰਿਆ ਪਹਿਲਾਂ ਹੀ ਸਮਾਪਤ ਹੋ ਚੁੱਕੀ ਹੈ ਤੇ ਰਾਜਨੀਤਿਕ ਪਾਰਟੀਆਂ ਨੇ ਹੁਣ ਆਪਣੀਆਂ ਪ੍ਰਚਾਰ ਰਣਨੀਤੀਆਂ ਨੂੰ ਤੇਜ਼ ਕਰ ਦਿੱਤਾ ਹੈ। ਆਪਣੇ ਉਮੀਦਵਾਰਾਂ ਦੀ ਜਿੱਤ ਤੇ ਲਈ ਪਾਰਟੀਆਂ ਵਾਰਡ-ਪੱਧਰੀ ਮੁੱਦਿਆਂ ਦੇ ਬਾਰੇ ਜਾਣ ਰਹੀਆਂ ਹਨ ਤੇ ਡੋਰ-ਟੂ-ਡੋਰ ਪ੍ਰਚਾਰ ਕਰ ਰਹੀਆਂ ਹਨ। ਨਾਲ ਦੇ ਨਾਲ ਪਾਰਟੀਆਂ ਸੂਬਾ ਤੇ ਕੇਂਦਰ ਪੱਧਰੀ ਮੁੱਦੇ ਵੀ ਲੋਕਾਂ ਅੱਗੇ ਰੱਖਣ ਦੀਆਂ ਤਿਆਰੀਆਂ ਕਰ ਰਹੀਆਂ ਹਨ।

ਪਾਰਟੀਆਂ ਦੀ ਰਣਨੀਤੀ

ਸੂਬੇ ‘ਚ ਸੱਤਾਧਾਰੀ ਆਮ ਆਦਮੀ ਪਾਰਟੀ ਆਪਣੇ ਪਿਛਲੇ ਚਾਰ ਸਾਲਾਂ ਦੇ ਕੰਮ ਨੂੰ ਆਧਾਰ ਬਣਾ ਕੇ ਲੋਕਾਂ ਵਿਚਕਾਰ ਉੱਤਰ ਰਹੀ ਹੈ, ਜਦਕਿ ਕੇਂਦਰ ‘ਚ ਰਾਜ ਕਰ ਰਹੀ ਭਾਰਤੀ ਜਨਤਾ ਪਾਰਟੀ ਆਪਣੀ ਕੇਂਦਰੀ ਮਾਡਲ ਨੂੰ ਲੋਕਾਂ ਅੱਗੇ ਰੱਖਣ ਦੀ ਕੋਸ਼ਿਸ਼ ਕਰੇਗੀ। ਸੂਬੇ ‘ਚ ਵਿਰੋਧ ਧਿਰ ਕਾਂਗਰਸ ਪਾਰਟੀ ਤੇ ਸ਼੍ਰਮਣੀ ਅਕਾਲੀ ਦਲ ਜਨਤਕ ਮੁੱਦਿਆਂ ਤੇ ਰਾਜ ਤੇ ਕੇਂਦਰ ਸਰਕਾਰ ਨੂੰ ਨਿਸ਼ਾਨਾ ਬਣਾ ਕੇ ਚੋਣ ਪ੍ਰਚਾਰ ਕਰ ਸਕਦੀ ਹੈ।

ਪੰਜਾਬ ਦੀ ਰਾਜਨੀਤੀ ‘ਚ ਸ਼ਹਿਰੀ ਵੋਟਰਾਂ ਨੂੰ ਬਹੁਤ ਪ੍ਰਭਾਵਸ਼ਾਲੀ ਮੰਨਿਆ ਜਾਂਦਾ ਹੈ। ਖਾਸ ਕਰਕੇ ਧਾਰਮਿਕ ਜਾਂ ਖੇਤਰੀ ਮੁੱਦਿਆਂ ਤੋਂ ਪਰੇ ਇੱਥੇ ਵਿਕਾਸ-ਮੁਖੀ ਰਾਜਨੀਤੀ ‘ਤੇ ਧਿਆਨ ਦਿੱਤਾ ਜਾਂਦਾ ਹੈ। ਭਾਜਪਾ ਸ਼ਹਿਰੀ ਵੋਟਰਾਂ ਨੂੰ ਮੁੱਖ ਸਮਰਥਨ ਅਧਾਰ ਵਜੋਂ ਦੇਖਦੀ ਰਹੀ ਹੈ। ਪੰਜਾਬ ‘ਚ ਗੈਰ-ਸਿੱਖ ਆਬਾਦੀ ਦਾ ਇੱਕ ਵੱਡਾ ਹਿੱਸਾ ਸ਼ਹਿਰਾਂ ‘ਚ ਰਹਿੰਦਾ ਹੈ। ਹਾਲਾਂਕਿ, ਸਾਰੀਆਂ ਹੀ ਪ੍ਰਮੁੱਖ ਪਾਰਟੀਆਂ ਨੇ ਕਈ ਸਿੱਖ ਤੇ ਪੰਥਕ ਆਗੂਆਂ ਨੂੰ ਸ਼ਾਮਲ ਕਰਕੇ ਸਿੱਖ ਵੋਟਰਾਂ ਵਿੱਚ ਆਪਣੀ ਪਹੁੰਚ ਵਧਾਉਣ ਦੀ ਕੋਸ਼ਿਸ਼ ਕੀਤੀ ਹੈ।

ਪਾਰਟੀਆਂ ਦਾ ਮਨੋਬਲ

ਇਨ੍ਹਾਂ ਨਗਰ ਨਿਗਮ ਚੋਣਾਂ ਦੇ ਨਤੀਜੇ ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ ਪਾਰਟੀਆਂ ਦੇ ਮਨੋਬਲ ਨੂੰ ਕਾਫ਼ੀ ਪ੍ਰਭਾਵਿਤ ਕਰ ਸਕਦੇ ਹਨ। ਸੱਤਾਧਾਰੀ ਆਮ ਆਦਮੀ ਲਈ ਨਤੀਜਾ ਇਹ ਸੰਕੇਤ ਕਰ ਸਕਦਾ ਹੈ ਕਿ ਕੀ ਸੂਬੇ ‘ਚ ਕੋਈ ਸੱਤਾ ਵਿਰੋਧੀ ਭਾਵਨਾ ਨਹੀਂ ਹੈ। ਭਾਜਪਾ ਮੁਲਾਂਕਣ ਕਰੇਗੀ ਕਿ ਇਸ ਦੇ ਰਾਜਨੀਤਿਕ ਤੇ ਸੰਗਠਨਾਤਮਕ ਯਤਨਾਂ ਨੇ ਪੰਜਾਬ ‘ਚ ਪਾਰਟੀ ਸਥਿਤੀ ਨੂੰ ਕਿੰਨਾ ਮਜ਼ਬੂਤ ​​ਕੀਤਾ ਹੈ? ਕਾਂਗਰਸ ਪਾਰਟੀ ਧੜੇਬੰਦੀ ਨਾਲ ਜੂਝ ਰਹੀ ਹੈ, ਪਾਰਟੀ ਲਈ ਇਸ ਚੋਣਾਂ ਰਾਹੀਂ ਏਕਤਾ ਦਾ ਸੰਦੇਸ਼ ਦੇਣ ਦਾ ਚੰਗਾ ਮੌਕਾ ਹੈ। ਇਸੇ ਤਰ੍ਹਾਂ, ਸ਼੍ਰੋਮਣੀ ਅਕਾਲੀ ਦਲ ਤੋਂ ਚੋਣ ਨਤੀਜਿਆਂ ਰਾਹੀਂ ਸ਼ਹਿਰੀ ਤੇ ਗੈਰ-ਸਿੱਖ ਵੋਟਰਾਂ ‘ਚ ਸਥਿਤੀ ਦਾ ਮੁਲਾਂਕਣ ਕਰੇਗੀ।